Mateo 19:29 - Dios Iwene

²⁹ Ja̧danö, ötjönö tjösödobetjö̧ tjeju junibadö, ja̧danö tjöjawujudö ya̧dönöbi, tjö̧ja̧wo̧dö ömadönöbi, tjabe'donöbi, tjojo'donöbi, tji̧tji̧munöbi yöne tjömöledönöbi junibadö, ja̧danö tjöbatjiju junibadöma, ötjönö ösödö tjujunibobetjö̧ isabenö tjujunibinatjö yelösöda bajalekwönönö balekwa iyakwo̧ Diosma, ja̧danö ju'wibi ba̧kwȩlö̧jatebö ja̧kwawa jobadönö iyakwo̧.

Mateo 19:29 Iomraidhean Croise

Mateo 10:22

Jau chömöledö, okobe deinö jojodöma ökwödönö tjöpöjödakobe, chöba̧ja̧di̧ waisachadö kwö̧jaduwobetjö̧, jo̧kwaijayonö ja̧ jawa tjo̧'wo̧ 'dibachibö baledadöma isabenö tjö̧jibakobe.

Mateo 13:23

Ja̧danö, niji otiwena meaja̧ ödebiya badekwachi̧ma, otiwanö a̧ja̧kwö, okwa jawa do̧batadönö badekwachobe. Jobadöma Dios la'aka luwo̧ ö̧jakwa̧ wene otiwanö a̧ja̧kwö okwa jawa do̧tjatobe, ja̧danö tjo̧'wo̧ luwo̧ wa̧ji̧ jawama isabenö nöinö wa̧jobe. Wanedö yötawa: Ju'wedöma treintanö ödebiya wa̧jawö̧, ju'wedöma sesentanö wa̧jawö̧, ja̧danö ju'wedöma ciennö wa̧jawö̧— jö̧ba̧lö labebö lobö yöawinobe Jesúsma.

Mateo 13:8

Jo̧kwaijayonö, niji otiwenabi meinobe ikwaja̧ ödebiyama, ja̧danö jobe meajabema, otiwanö pokwinobe, ja̧danö otiwanö wa̧jinobe. Jelö'yebiyama cien jenanö ödebiya wa̧jinobe, ja̧danö jelö'yebiyama sesenta jenanö ödebiya wa̧jinobe, ja̧danö jelö'yebiyama treinta jenanö ödebiya wa̧jinobe.

Mateo 16:25

Jau chömöledö, baikwö yötawa: Bakwo̧ iteda otiwanö ö̧jobö isakwitjö̧ma, waekwena, isabenö ja̧kwawama öbadekwajökena. Jo̧kwaijayonö ötjönö ösödobetjö̧ ö'wö babibo̧ma, jo̧bama isabenö ja̧kwawa öbadekwajakwo̧.

Mateo 19:16

Ikenama, jelo̧ Jesúsnö ichö abebö a̧ja̧kwinobe: —Ba̧ja̧dakwawa luwo̧, ¿diya̧ otiwanö ja̧awa ja̧takwa̧da, ba̧kwȩlö̧jatebö ja̧kwawa chujuna̧lakobetjö̧?— jö̧ba̧lö.

Mateo 25:34

Ikenama ötjö la'aka luwo̧ma, chöwaisobekwöchobe ju̧kwadönö yötawocha: Ökwödöma kwo̧'wo̧ ösöwanö Chabe'do pjaatawö̧ja. Ina böjȩ otidapji, Dios la'aka luwo̧ ö̧jakwa̧ otidö ujuninobe, ökwödö jobe kwö̧jaduwobö, jo̧kwajabetjö̧ babema ichö tebachaduwi.

Mateo 25:46

Ikenama, jobadö sulabedöma ökwöla nöolabe tji̧'yakwedö, jobetjö Dios lȩebi̧tjö ba̧kwȩlö̧jatebö usula tjemawobö, jo̧kwaijayonö otiwadöma ba̧kwȩlö̧jatebö ja̧kwawobe ja̧nö tji̧'yakwedö— jö̧ba̧lö yöawinobe Jesúsma.

Mateo 5:11

Tupakwö yöawinobe Jesúsma: —Ötjönö kwösödaduwiawö̧ ju'wedö ökwödönö sulabenö otjenama, ja̧danö usula kwemawaduwinö ja̧tjenama, ja̧danö sulabenö ja̧köbaduwököjayonö sulabenö ja̧köbaduwaja̧ omöna yötjawenama, kwo̧'wo̧ ösöwaduwachibanö jwiinö kwo̧'wo̧ ösöwanö kwö̧jaduwo chömöledö, mölejȩbetjö Diosma isabenö otiwa jawa iyakobetjö̧. Jau chömöledö, kwöwaisaduwa, ökwödönö sulabenö tjöpöjödi̧danö damötjö ji̧nadö Dios yöawi̧ yöbawadönöbi tjöpöjödinobe, ¿jö̧tö? Ja̧danö, ju'wibi kwöwaisaduwobö jo̧be, jobadö damötjö otiwanö ja̧bö ji̧nadö Diostjö otiwa jawa tjemi̧danö ökwödöbi bakwainö kwemaduwakwedöja— jö̧ba̧lö yöawinobe Jesúsma.

Mateo 6:33

Jo̧kwajabetjö̧ ja̧ jawa omukwatökönö kwö̧jaduwo chömöledö. Ja̧ jawa omukwatökönö jwaikwöda Dios la'aka luwo̧ ö̧jakwa̧ jawada isakwö kwö̧jaduwo. Ja̧danö chömöledö, jwaikwöda Dios la'aka luwo̧ ö̧jakwa̧ jawa isakwö kwö̧jaduwiökwe, Kwabe'doma isabenö ökwödönö ite'ada̧lakobe. Jau chömöledö, kwakwawabi, owawabi, 'dukawaduwakwa̧bi jo̧bada ökwödönö te'ada̧lö iyakobe.

Lucas 14:26

—Bakwo̧ ötjö chöba̧ja̧di̧ waisacho̧ baibanö chökömanö ichobö ösöditjö̧ma, okobe deinö ju'wedötjö bajalekwönönö jwaikwöda ötjönöda ösödobö jo̧be. Baikwö yötawa: Iteda yöne ömöledönö, abe'donöbi, ojo'donöbi, ilekwonöbi, i̧tji̧munöbi, öjawo̧dö ömadönöbi, ya̧dönöbi ösödijayonö, jobadönö ösödi̧tjö bajalekwönönö ötjönöda ösödobö jo̧be. Jau chömöledö, jobadönö ösödi̧tjö jwiinö bajalekwönönö ötjönöda ösödobetjö̧, ömöledönö öpöjödobedanö ichejekwena, jobadötjö bajalekwönönö ötjönöda ösödobetjö̧. Jau chömöledö, ötjö isabenö chöba̧ja̧di̧ waisachadöma, ju'wedötjö bajalekwönönö ötjönöda tjösödobö jo̧be, ja̧danö ju'wibi itedada ösödakwawi̧tjö bajalekwönönö ötjönöda ösödobö jo̧be isabenö chöba̧ja̧di̧ waisacho̧ma, ja̧danö jejenö ötjönö ösödökötjö̧ma, isabenö chöba̧ja̧di̧ waisacho̧ ö̧joböma jwibo̧.

Lucas 5:11

Jemi ikenama, o̧pesobu ö'öbönö tjölamatenama, jobadöma okobe jwiinö tjujuna̧li̧ lödibö Jesúskwö tji̧'yinobe, Jesús öba̧ja̧di̧ waisachadö batjibanö.

Lucas 6:22

Ja̧danö, ötjönö jojo baibanö jeminökwenö kwösödaduwiawö̧ jojodö ökwödönö tjöpöjödena, ja̧danö ökwödönö 'da̧batö lotjena, ja̧danö ökwödönö otjena, ja̧danö sulabenö yötja̧lena. Jejenö baleditjö̧ma, isabenö kwo̧'wo̧ ösöwanö kwö̧jaduwakwedöja chömöledö, Diosma isabenö otiwanö ökwödönö iyakobetjö̧.

Juan 15:19

Ökwödöma jojodö tjomukwati̧danö, böjȩ jawada omukwatö kwö̧jaduwitjö̧ma jojodöma ökwödönö tjösödena, Bidöma ökwödödanö omukwatadö, jö̧ba̧lö. Jo̧kwaijayonö ökwödöma böjȩ ja̧wada omukwatöködöja. Jejenö, böjȩ jawada kwomukwatiaduwiököwö̧ tjöpöjödakobe. Ja̧danö, ötjöma böjȩnö ju̧kwadötjö omudawö chujuninobe ökwödönöma, böjȩ jawa omukwatökönö kwo̧'wo̧ luwo̧duwi jawada omukwatadö bakibaduwinö ja̧bö. Jejenö ja̧nö kwomukwatiaduwiawö̧ yelösöda tjöpöjödakobe ökwödönöma—yöawinobe—.

Juan 4:36

Ina yöawinobe: —Ja̧danö, bakwo̧, jojodönö Dioskwö tjichibobö öbibo̧ma, batjo junawa 'döbö emo̧danö jo̧, ida̧ökö yȩi̧ wa̧ji̧ 'döbö emo̧danö. Ja̧danö, jo̧ba batjo junawa emo̧ma, emaja̧ iyawö̧ma tjimidobe ¿jö̧tö? Ja̧ tjimidi̧danö, Diosma iteda otiwi̧ jawa iyakobe jojodönö öbibo̧nö, jo̧bakwö tjichibobö öbibo̧nöma. Jobadö öibawö̧ma, ba̧kwȩlö̧jatebö ja̧kwawa tjemakwedö, Dioskwö ichibö. Ja̧danö, ba̧kwȩlö̧jatebö ja̧kwawa tjemiökwe, jobadönö öbibo̧ma o̧'wo̧ ösöwanö ö̧jakwo̧. Ja̧danö, ajayinö Dios iwene yöbawinabi o̧'wo̧ ösöwanö ö̧jakwo̧. Jo̧bama ajayinö önebiya ujuninadanö ajayinö yöawinobe— jejenö yöawinobe—.

Hechos 9:16

Jo̧bama ötjö jawa wene yöawobetjö̧ yelösöda usula emawakwo̧. Ja̧ usula emawakwa̧ öwaisachibobö chi̧sebocha jo̧banöma— jö̧ba̧lijetö Duluwo̧ma Ananíasnöma.

1 Corintios 2:9

Jo̧kwaijayonö, wajwitjinajayonö, Diosma isabenö otiwa jawa ökwödönö iyobö omukwatobe Dios iwene laebi̧danö. Baikwö laebobe Dios iwene: Diosma inesö otiwa jawa otidinobe jo̧banö ösödadönö iyobö. Jojodöma jejenöjaye otiwa jawama la'akatjöda edöködö, ja̧danö la'akatjöda a̧ja̧kwöködö, ja̧danö la'akatjöda tjomajadenö omukwatöködö, tjomukwati̧tjö bajalekwönönö otiwobetjö̧. jö̧ba̧lö laebobe.

2 Corintios 5:16

Jo̧kwajabetjö̧ chömöledö, jojodönö domukwatenama, böjȩ jojodö wame jawa tjomukwati̧danöma domukwatokobe babema. Jau chömöledö, isabenö ajayinöma jojodö tjomukwati̧danö, wame jawada domukwatijatö, ja̧danö ajayinö Jesúsnö dedenama, wame jawada omukwatö dedijatö, böjȩ jojo jö̧ba̧lö. Jo̧kwaijayonö babema sule wame jawadama omukwatöködösa.

Filipenses 3:8

Jau chömöledö, ja̧ jawabi, okobe jwiinö ju'wi jawabi mikwawökö ji̧ jö̧ba̧lö, inesö mikwawi̧da chisakwobe chömöledö, jwaikwöda Chuluwo̧ Cristo Jesúsnö chöwaisobö chisakwobe babema chömöledö, ja̧da inesö mikwawi̧ jö̧ba̧lö. Wanedö yötawa: Sula'wo tjikwi̧danö ikwö lotinobedanö ichejekwa, mikwawökö ji̧ jö̧ba̧lö, Cristonöda chemo jö̧ba̧lö,

1 Pedro 4:14

Jesúsnö ösödadö kwö̧jaduwobetjö̧ ökwödönö sulabenö yötja̧lena chömöledö. Jo̧kwaijayonö jejenö yötja̧liawö̧ kwo̧'wo̧ tjo̧achaduwoböma jwia, kwo̧'wo̧ ösöwanö kwö̧jaduwobö jo̧be chömöledö, Dios O̧'wo̧ Luwo̧ dejatinö juluwo̧ma ökwödönö pjabatö jo̧ jö̧ba̧lö.

3 Juan 1:7

Isabenö yötawa. Jobadöma Jesús yöawina wene yöbawö tji̧'yobetjö̧ jobadönö pjakatobö jo̧be. Ja̧danö, jobadöma ju'wedötjö, Dios iwene öpöjödadötjöma ja'yubebi tjeminokobe, tjö̧ji̧ jawa mikwa pjatjati̧ma.