Mateo 13:8 - Dios Iwene

⁸ Jo̧kwaijayonö, niji otiwenabi meinobe ikwaja̧ ödebiyama, ja̧danö jobe meajabema, otiwanö pokwinobe, ja̧danö otiwanö wa̧jinobe. Jelö'yebiyama cien jenanö ödebiya wa̧jinobe, ja̧danö jelö'yebiyama sesenta jenanö ödebiya wa̧jinobe, ja̧danö jelö'yebiyama treinta jenanö ödebiya wa̧jinobe.

Mateo 13:8 Iomraidhean Croise

Génesis 26:12

Ja̧danö, ja̧ o̧bama jobe ja̧nö Isaacma öbatjo ödebiya lödijetö. Ja̧ ödebiyatjö nöinö pokwijetö, Diosma Isaacnö dösölö̧jinö edö pjaatobetjö̧. Bakwade ödinatjö̧ cien jenanö ödebiyama baibijetö.

Mateo 13:23

Ja̧danö, niji otiwena meaja̧ ödebiya badekwachi̧ma, otiwanö a̧ja̧kwö, okwa jawa do̧batadönö badekwachobe. Jobadöma Dios la'aka luwo̧ ö̧jakwa̧ wene otiwanö a̧ja̧kwö okwa jawa do̧tjatobe, ja̧danö tjo̧'wo̧ luwo̧ wa̧ji̧ jawama isabenö nöinö wa̧jobe. Wanedö yötawa: Ju'wedöma treintanö ödebiya wa̧jawö̧, ju'wedöma sesentanö wa̧jawö̧, ja̧danö ju'wedöma ciennö wa̧jawö̧— jö̧ba̧lö labebö lobö yöawinobe Jesúsma.

Mateo 13:7

Ja̧danö, ikwaja̧tjö sȩa'wonö meinobe, ja̧danö sȩi̧bi pokwobetjö̧, ikwaja̧ ödebiyama otiwanö pokwinokobe, ja̧danö wa̧ji̧ma wa̧jinokobe.

Marcos 4:20

Jo̧kwaijayonö ju'wedöma ödebiya niji otiwanö tjotidinena meinadanö ichejekwadö, tjomajadema. Jobadöma Dios iwene a̧ja̧kwö tjomajade okwanö otiwanö do̧batibö ösödadö. Otiwanö tjo̧'wo̧ luwo̧ öda̧peachinö ju̧kwadö, Dios O̧'wo̧ Luwo̧ öba̧ja̧da̧lonö. Ja̧danö, otiwanö öda̧peachinö ju̧kwadöma otiwanö pokwina wa̧ji̧ ödebiyadanö ichejekwadö— labebö lobö yöbawijetö—. Ja̧danö wanedö yötawaduwakwö: Jobadöma tjo̧'wo̧ luwo̧ jawama i̧sebö, otiwanö omukwatö pjabatö ju̧kwadö. Ju'wedöma nöinö i̧sebö ju̧kwadö, tjo̧'wo̧ luwo̧ jawama, otiwanö omukwatö pjabatö ju̧kwadöma, treinta ödebiya yeawi̧danö ju̧kwadöma. Ja̧danö, ju'wedöma jobadötjö bajalekwönönö i̧sebö ju̧kwadö, tjo̧'wo̧ luwo̧ jawama otiwanö omukwatö pjabatö ju̧kwadöma, cincuenta ödebiya yeawi̧danö ju̧kwadöma. Ja̧danö, ju'wedöma yelösöda jobadötjö bajalekwönönö tjo̧'wo̧ luwo̧ jawama i̧sebö, otiwanö omukwatö pjabatö ju̧kwadöma, cien ödebiya yeawi̧danö ju̧kwadöma—jejenö yöbawijetö Jesúsma, wanedö yöawakwawa labebö loböma.

Marcos 4:8

Ja̧danö, ju'wi ödebiyama niji otiwena meijetö, otiwanö tjotidinena. Ja̧ ödebiyatjö pokwi̧ma otiwanö pokwijetö. Otiwanö wa̧jijetö. Ja̧danö, ja̧ pokwinatjö wa̧ji̧ma ödebiya libö pokwö yeawijetö. Ja̧danö, ju'wima ödebiya treintanö wa̧jijetö, bakwadetjö pokwina wa̧ji̧ma. Ja̧danö, ju'wima ödebiya sesentanö wa̧jijetö, bakwadetjö pokwina wa̧jima. Ja̧danö, ju'wima ödebiyama ciennö wa̧jijetö, bakwadetjö pokwina wa̧jima.

Lucas 8:15

Ja̧danö niji otiwena meaja̧ ödebiya badekwachi̧ma, otiwanö a̧ja̧kwö, tjomajadenö 'diinö do̧ba̧ladönö badekwachobe. Jobadöma sule omöna yöba̧lödama chösöda jö̧ba̧lö yöba̧löködö, tjomajadenö otiwanö omukwatö isabenö ösödadö, ja̧danö wene baledijayonö, tjo̧'wo̧ 'dibachibö ja̧nö tjo̧'wo̧ luwo̧ wa̧ji̧ jawa otiwanö tjöwa̧jobe— jö̧ba̧lö. Jejenö yöbawö Jesúsma iteda öba̧ja̧di̧ waisachadönö labebö lobö yöawinobe jojodönö wanedö yöawaja̧ma.

Lucas 8:8

Jo̧kwaijayonö, niji otiwenabi meinobe loaja̧ ödebiyama, ja̧danö jobe meajabema, otiwanö pokwinobe, ja̧danö otiwanö wa̧jinobe, bakwachokwena cien jenanö ödebiya wa̧jinobe— jö̧ba̧lö. Jejenö wanedö yöawinobe Jesúsma jojodönö, ja̧danö yöawenama, jojodönö jwöinobe: Yötawi̧ma okobe deinö otiwanö tja̧ja̧kwobö jo̧be, jö̧ba̧lö.

Juan 15:8

Ja̧danö, jojodöma ökwödö otiwanö da̧peachö, otiwanö omukwatö ja̧bö kwö̧jaduwobe edö, Bidöma Jesús öba̧ja̧di̧ waisachadö, jö̧ba̧lö, tjomukwatakobe. Ja̧danö, jobadöma ökwödö otiwanö kwö̧jaduwiawö̧ Diosnö tjösödakobe, Jwiinö otiwo̧, jö̧ba̧lö— yöawinobe Jesúsma öba̧ja̧di̧ waisachadönöma.

Romanos 7:18

Jau chömöledö, biya̧ wene chöwaisa: Ötjö böjȩ jojoma, ja'yubebi otiwa jawa jwibo̧sa, jö̧ba̧lö. Ja̧danö, ötjö chujulunö otiwa jawa ja̧tobö chösödijayonö, waekwobe, sulabe jawada ja̧bo̧sa.