Mateo 12:35 - Dios Iwene

³⁵ Jau, otiwo̧ma, omajadenö otiwa jawa omukwati̧tjö otiwa jawa yöba̧lo̧, ja̧danö sulabo̧ma omajadenö suli̧ jawa omukwati̧tjö suli̧ jawa yöba̧lo̧.

Mateo 12:35 Iomraidhean Croise

Diosnö ösödo̧ Job mikwo̧ usula emawina jawa 8:10

Jo̧kwajabetjö̧ isabenö da'dödömine tjöwaisachibina jawatjö kwöwaisachibobö jo̧be Job, da'dödömine yötjawina jawa otiwanö kwa̧ja̧kwo, jobadö tjöwaisachibina jawatjö ökwöbi otiwanö kwöwaisakobetjö̧.

Proverbios 12:6

Ja̧danö, ju'wibi yötawa: Sulabenö omukwatadö yötjawi̧ma jojodönö kwabö lotji̧danö sulobe. Wanedö yötawa: Sulabenö omukwatadöma mana ö'öbö jukwawö te'ada̧ladö jojodö tjöbaledena mebibö kwabö lotjobö. Jobekwö wanekwachobe sulabenö omukwatadö yötjawi̧ma, jojodönö sulabenö baledobö yötjawobetjö̧. Jobekwö yötjawokobe Dios wei̧ a̧ja̧kwadöma. Jobadö, Dios wei̧ a̧ja̧kwadö yötjawi̧ma jojodönö pjatjati̧danö ji̧, sulabenö omukwatö yöbawadötjö tjö̧jibobö.

Proverbios 15:23

Ja̧danö, ju'wibi yötawa, wanedö: Bakwo̧ma jelo̧nö abebö a̧ja̧kwobe, ju'wi jawabi ju'wi jawa öwaisobö. Ja̧danö, abebö a̧ja̧kwajökwema otiwanö atadobetjö̧ jwiinö pjaatobe abebö a̧ja̧kwo̧nöma, ja̧danö nöinö ösödobe abebö a̧ja̧kwo̧ma, otiwanö kwatadajabe, jö̧ba̧lö. Isabenö yötawa: Okobe deinö tjösödobe jweinö atadakwawama. Isabenö, abebö a̧ja̧kwökwema pjabatö yöbawö otiwanö ataditjö̧ma abebö a̧ja̧kwo̧ma nöinö ösödakwo̧, babema chöwaisobö chisakwaja̧ma otiwanö yökawajabe, jö̧ba̧lö.

Proverbios 15:28

Ja̧danö, ju'wibi yötawa: Dios wei̧ a̧ja̧kwö jo̧ma jelo̧nö atadakwa̧ abönö ö'wiyawakwawönö omukwato̧. Juluwanö, omukwatökönö atadokobe. Jobekwö omukwatokobe sulabenö omukwatö jo̧ma. Jo̧bama juluwanö, omukwatökönö yöba̧lo̧. Isabenö, jo̧ba yöa̧li̧tjö suli̧da laebobe.

Proverbios 15:4

Ja̧danö, ju'wibi yötawa: Bakwo̧ tjo̧'o̧manö ösödö yöba̧lo̧ yöa̧li̧ma jwiinö mikwawobe. Wanedö yötawa: Towinö wa̧ji̧ma jojodönö pjaati̧ jawa, kwanö tjo̧'wo̧ 'yaba̧lö tjö̧jobö. Ja̧ pjaati̧danö bakwo̧ tjo̧'o̧manö ösödö yöa̧li̧ma yöa̧laja̧wö̧nö pjaatobe tjo̧'wo̧ ösöwanö tjö̧jobö. Jobekwö pjaatokobe sulabenö omukwato̧ ömöna yöa̧li̧ma. Sulabenö omukwato̧ omöna yöa̧li̧ma ja̧kwawö̧kö̧ ji̧. Yöa̧laja̧wö̧nö sule o̧'wo̧ tjo̧achinöda tjö̧jobö ja̧obe.

Mateo 12:34

Ökwödö a̧ko̧'dö̧danöbedöbi ja̧danö, ökwödöma sulabedököbaduwobetjö̧, otiwa jawa yöka̧laduwobö jwibadöja, kwomajadeduwinö kwomukwataduwi̧ma, kwaaduwitjö laebobetjö̧.

Mateo 13:52

Tupakwö yöawinobe Jesúsma: —Chömöledö, Moisés iwȩyudina jawa ba̧ja̧dadötjö mölejȩbe jo̧ yöbawö weena jawabi waisachibajadöma, isabenö otiwanö tjöba̧ja̧dakwedö, damötjö tjiwȩyudina jawa nöinö mikwawi̧ jawakwö, 'yayi̧ jawa tja̧ja̧kwaja̧ jawakwö otiwanö tjöba̧ja̧dobetjö̧— jö̧ba̧lö.

Mateo 7:17

Jau chömöledö, otiwowinö wa̧ji̧ma otiwa jawa wa̧jowi, jo̧kwaijayonö sulabowinö wa̧ji̧ma, suli̧ jawa wa̧jowi, ¿jö̧tö?

Lucas 6:45

Jojodöbi ja̧danö chömöledö, otiwo̧ma, omajadenö otiwa jawa omukwati̧tjö otiwa jawa yöba̧lo̧, ja̧danö sulabo̧ma, omajadenö suli̧ jawa omukwati̧tjö suli̧ jawa yöba̧lo̧, jojodöma tjomajadenö tjomukwati̧tjö yöba̧ladötjobetjö̧— jö̧ba̧lö yöawinobe Jesúsma.

Efesios 4:29

Ja̧danö, sulabema yöka̧laduwa chömöledö. Pjabatö yöa̧lakwawada yöka̧laduwo, bakwo̧ o̧'wo̧ tjo̧bekwö jo̧nö pjabatö. Jejenö yöka̧laduwi̧ a̧ja̧kwadönö pjakataduwakobe, tjo̧'wo̧ luwo̧ ösöwachibawö̧ jö̧tja̧lobö, Bidöma otiwanö pjabatö yöba̧ladö, jö̧ba̧lö.

Colosenses 3:16

Chömöledö, Cristo jawa wene kwomajadeduwinö omukwatö kwö̧jaduwo, jo̧kwajabetjö̧ waisanö yökawakwawaduwo, ja̧danö waisanö kwöba̧ja̧dakwawaduwo kwömöledöduwikwö. Ja̧danö otiwanö pjabato̧ja jö̧ba̧lö, Diosnö ösödö lo̧köbaduwo, Salmos jawa lo̧awabi, Jesús jawa lo̧awabi, Dios O̧'wo̧ Luwo̧tjö öba̧ja̧di̧ lo̧awabi.

Colosenses 4:6

Ja̧danö, jobadönö yöka̧laduwi̧ma, dösölö̧jinö yöka̧laduwodönö. Ja̧danö wanedö yötawa: Meyuwanöma yöka̧laduwoko, söinö yöka̧laduwodönö chömöledö. Ja̧danö, jojodö ökwödönö abebö tja̧ja̧kwenama, otiwanö kwatadaduwo jö̧ka̧laduwi̧danö atadakwawa kwöwaisaduwo chömöledö, otiwanö jobadönö kwatadaduwakobetjö̧.