Mateo 12:32 - Dios Iwene

³² Jau chömöledö, ötjö jojo baibanö jeminökwenö sulabenö yöba̧ladöbi Dios lȩebi̧tjö tjö̧jibobö ina jo̧be. Ötjönö sulabenö yötja̧lijayonö, tupakwö sulabenö tjomukwati̧ kabatibö tjöbalewachitjö̧ma Dios lȩebakwa̧tjö tjö̧jibobö ina jȩna. Jo̧kwaijayonö ji̧kwa jwiakobe Dios O̧'wo̧ Luwo̧ ja̧i̧ edö, Awetja ja̧i̧da jö̧ba̧lö yöba̧ladönöma. La'akatjöda tjö̧jibökakwedö. Jau chömöledö, böjȩnö ja̧nöbi, tupakwöbi la'akatjöda ji̧kwa jwiakobe jobadönö— jö̧ba̧lö yöawinobe Jesúsma.

Mateo 12:32 Iomraidhean Croise

Diosnö ösödo̧ Job mikwo̧ usula emawina jawa 36:13

—Tjomajadenö Diosnö öpöjödadöma, jwaikwöda dameakwö ju̧kwadö, jadanö jobadönö lȩbebö, ka̧lena tjö̧bobö weenabi, yayonö Diosnö budekwöködö.

Mateo 11:19

Ja̧danö ötjö jojo baibanö jeminökwe chichenama, pjiesta kwanö, ja̧danö ubasobu o̧'dobu owö chichijatö, ja̧danö ötjöma Juan ja̧bö ö̧jinatjö wainö ja̧bö chö̧jijayonö, ötjönöbi öpöjödö wanedö yötja̧lobe, yelösöda nöinö kwo̧, 'dukwachökwe, sulabedö luwedö tjitea balada emadöbi, ju'wedö sulabenö ja̧badöbi tjömöledöso̧, jö̧ba̧lö ötjönö öpöjödö yötja̧lobe. Jo̧kwaijayonö jobadö tjöpöjödijayonö, Juan ja̧bö ö̧jinabi, ja̧danö ötjö ja̧bö chö̧ji̧bi öwaetjöda i̧sebobe, isabenö waisanö omukwatö ja̧badösa jö̧ba̧lö— jö̧ba̧lö yöawinobe Jesúsma.

Mateo 12:31

Ja̧danö baikwö yötawaduwakwö: Okobe deinö sulabenö ja̧badöbi, ja̧danö Diosnö sulabenö yöba̧ladöbi, sulabenö ja̧tjinajayonö ina Dios lȩebi̧tjö tjö̧jibobö jȩna. Sulabenö tjomukwatina kabatibö tjöbalewachiökwe jobadönö lȩbebökönö Diosma tjusula söbebö loena. Jo̧kwaijayonö, Dios O̧'wo̧ Luwo̧ ja̧i̧ edö, Awetja ja̧i̧da, jö̧ba̧lö sulabenö yöba̧ladöma, la'akatjöda Dios lȩebi̧tjö tjö̧jiboböma jwitjakwedö. La'akatjöda tjusula söbebö loökakwo̧ Diosma, isabenö lȩebakwo̧.

Mateo 12:8

Jau, ötjö jojo baibanö jeminökwema, otikwökö möle jawa luwo̧sa, jo̧kwajabetjö̧ juluwo̧sa otikwökö möle jojodö ja̧tji̧ otiwojobö, sulojobö jö̧ba̧lö yötawobö— jö̧ba̧lö yöawinobe Jesúsma.

Mateo 13:22

Ja̧danö, sȩa'wonö meaja̧ ödebiya badekwachi̧ma, Dios la'aka luwo̧ ö̧jakwa̧ wene a̧ja̧kwö tjösödijayonö, böjȩ jawa nöinö omukwatadönö, ja̧danö balada tjemobö isakwadönö badekwachobe. Jobadöma ja̧ jawa nöinö tjomukwatobetjö̧, otiwanöma tjöda̧peachokobe, ja̧danö tjo̧'wo̧ luwo̧ wa̧ji̧ jawama otiwanöma wa̧jokobe.

Mateo 13:39

ja̧danö sula'wosa'ye ikwö juno̧nö badekwachi̧ma, Awetjanö badekwachobe. Ja̧danö, batjonö wa̧ji̧ emö tjotidi̧ badekwachi̧ma, 'dö̧ibaji̧ möle jawa badekwachobe, ja̧danö batjonö wa̧ji̧ emö otidadönö badekwachi̧ma, ángelesdönö badekwachobe.

Mateo 13:40

Jau chömöledö, sula'wo ko̧ko̧dibö ökwölanö tjujuwi̧danö, 'dö̧ibaji̧ möle

Mateo 13:55

Jo̧bama towi ötebiyatjö otido̧ José itji̧, ¿jö̧tö? Ja̧danö, ojo'doma bemi jojosuju María, ja̧danö ö̧ja̧wo̧döma bemi jojodö Jacobobi, Josébi, Simónbi, Judasbi mikwadö, ¿jö̧tö?

Mateo 8:20

Jejenö yöa̧lökwe, Jesúsma atadinobe: —Chömöledöso̧, ötjöma cheju jwibo̧sa. Yo̧lo̧ko̧döma laju sobö tjabakwemi juna̧ladö, ja̧danö pji̧yu̧ma, tja'di̧ju juna̧ladö. Jobadö tjabakwemi tjujuna̧li̧danöma chujuna̧lökö chömöledöso̧. Ötjö jojo baibanö jeminökwema chabakwemi jwibo̧sa. ¿Isabenö chökömanö kwichobö jö̧ka̧liji̧, kwabakwemi jwibo̧ bakibanö?— jö̧ba̧lö atadinobe.

Marcos 10:30

Diosma pjaatakwo̧. Jo̧ba junibö i̧'yajejutjö bajalekwönönö böjȩnö ja̧nö nöinö ujuna̧lobö pjaatakwo̧ Diosma. Ja̧danö, jo̧ba ömöledönö junibö i̧'yajawö̧tjö bajalekwönönö böjȩnö ja̧nö ba̧jekwadönö ujuna̧lobö pjaatakwo̧ Diosma. Ja̧danö, jo̧ba itebotjö i̧'yajemitjö bajalekwönönö nöinö böjȩnö ja̧nö ujuna̧lobö pjaatakwo̧ Diosma—jö̧ba̧lijetö—. Jo̧kwaijayonö, jo̧ba 'yo̧ma usula emawöbi emawakobe, ötjönö o̧'wo̧ öwana̧lobetjö̧. Ja̧danö, usula emawijayonö jo̧ba 'yo̧ma ba̧kwȩlö̧jatebö ja̧kwawa ujuna̧lakwo̧. Jo̧bama ju'winö Dioskwö ba̧kwȩlö̧jatebö ö̧jakwo̧— jö̧ba̧lijetö—.

Marcos 3:28

Ina yöbawijetö: —Isabenö jö̧ta̧la ökwödönö. Jojodö sulabe tjujuna̧li̧ma Diosma söbebö lobo̧. Ja̧danö, tjo̧'wo̧ sulawö Diosnö sulabenö yötja̧li̧bi Diosma söbebö lobo̧.

Marcos 3:29

Jo̧kwaijayonö jejenömaökö Dios O̧'wo̧ Luwo̧ jawa sulabenö yötja̧li̧ma. Söbebö loi̧ma yelösöda jwiobe Dios O̧'wo̧ Luwo̧ jawa sulabenö yöba̧ladönöma. La'akatjöda Diosma, iteda O̧'wo̧ Luwo̧ jawa sulabenö yötja̧li̧ma söbebö lobö̧kö̧— jö̧ba̧lö yöbawijetö.

Lucas 12:10

Jejenö yöba̧lö, babe ötjönö öpöjödadöma la'akatjöda chömöledö batjibökakwedö jö̧ba̧löma yöta̧lökö chömöledö. Baikwö yötawa: Ötjö jojo baibanö jeminökwenö sulabenö yöba̧ladöma Dios lȩebi̧tjö tjö̧jibobö ina jo̧be. Ötjönö sulabenö yötja̧lijayonö, tupakwö sulabenö tjomukwati̧ kabatibö tjöbalewachitjö̧ma Dios lȩebakwa̧tjö tjö̧jibobö ina jȩna. Jo̧kwaijayonö ji̧kwa jwiakobe Dios O̧'wo̧ Luwo̧ otidi̧ edö, Awetja otidi̧da jö̧ba̧lö yöba̧ladönöma, la'akatjöda tjö̧jibökakwedö— jö̧ba̧lö yöawinobe Jesúsma.

Lucas 16:8

Jejenö ja̧inobe uluwo̧ itea sulabenö te'ada̧lo̧ma, otidawatjö laebaja̧ ikena, tjumusidi̧ söbebö loiawö̧, uluwo̧nö musidadöma jo̧banö pjatjatakobetjö̧. Ja̧danö, jejenö ja̧iökwe, uluwo̧ma yöa̧linobe: Bite chömöayo̧ma sulabenö ötidijayonö isabenö waisanö omukwatö ja̧ajabe, otidawatjö laebaja̧ ikena ina otiwanö ujuna̧lakobetjö̧, jö̧ba̧lö. Jau chömöledö, jo̧ba sulabenö otido̧ma isabenö waisanö omukwatinobe tupakwö ö̧jakwa̧ma, böjȩ jojodö isabenö otiwanö tjö̧jakwa̧ tjomukwatobetjö̧. Jau chömöledö, böjȩ jojodö Diosnö ösödöködöma Diosnö ösödadö dewinö tjuju̧kwakwedötjö bajalekwönönö otiwanö tjö̧jakwa̧ omukwatö tjö̧jobe. Jo̧kwaijayonö ökwödöbi isabenö otiwanö kwö̧jaduwakwa̧ kwomukwataduwo, isabenö mölejȩbetjö otiwanö kwö̧jaduwakobetjö̧.

Lucas 18:30

Jau chömöledö, Dios la'aka luwo̧ ö̧jakwa̧ jawa ösödö tjujunibobetjö̧, Diosma isabenö otiwanö iyakobe jobadönöma, böjȩtjöbi, böjȩ 'yayöjȩtjöbi. Jau chömöledö, ina böjȩnö tjö̧jayi tjujunibinatjö yelösöda bajalekwönönö balekwa iyakwo̧ Diosma, ja̧danö ju'wibi böjȩ 'yayöjȩ Dios otidenama, jobe ja̧nö ba̧kwȩlö̧jatebö ja̧kwawa tjujuna̧lakobe— jö̧ba̧lö atadinobe Jesúsma.

Lucas 23:34

Jejenö bȩtjiökwe, Jesúsma Diosnö aebinobe: —Chabe'do, bidö ötjönö bȩtji̧ omukwatökönö kwösödodönö, ja̧tji̧ma wajwibö sulabenö ja̧tjobetjö̧— jö̧ba̧lö. Ja̧danö, Jesúsnö towisa'onö bȩbajadö, guardia jojodöma inawiya pjei̧ öwiya ikwawö alewö ja̧tjinobe, Jesús ökamijido̧ ti emojobö jö̧ba̧lö tjalewinobe.

Lucas 7:34

Ja̧danö, ötjö jojo baibanö jeminökwe chichenama, pjiesta kwanö, ja̧danö ubasobu o̧'do̧bu owö chichijatö. Ja̧danö, ötjöma Juan ja̧bö ö̧jinatjö wainö ja̧bö chö̧jijayonö, ötjönöbi öpöjödö o̧'wo̧ sulinö yöka̧laduwobe, yelösöda nöinö kwo̧, 'dukwachökwe, sulabedö luwedö tjitea balada emadöbi, ju'wedö sulabenö ja̧badöbi tjömöledöso̧, jö̧ba̧lö ötjönö öpöjödö yöka̧laduwobe. Jejenö öpöjödö, tjemu wanedö yöta̧laja̧wö̧danö bakwainö öpöjödadöja. Juan pjiesta kwökönö ichenama tjemu tjo̧'wo̧ sulinö tjedi̧danö, pjiesta kwukwo jö̧ka̧lajabe jö̧ba̧lö kwo̧'wo̧ sulinö kwedinaduwobe. Ja̧danö, ötjö pjiesta kwanö chichenama, tjemu tjo̧'wo̧ sulinö tjedi̧danö pjiesta kwukwoko jö̧ka̧lajabe jö̧ba̧lö kwo̧'wo̧ sulinö kwöpöjödaduwobe.

Juan 7:12

Ja̧danö, jojodöma Jesús yöawina, ja̧danö, jo̧ba otidina nöinö yötja̧lakwawinobe. Bakwainö omukwatökönö yötja̧lakwainobe, ju'wedöma, Jo̧bama otiwanö jo̧, jö̧ba̧lö, ja̧danö, Otiwanö jö̧kö̧, jojodönö jelobekwö öbibo̧, jö̧ba̧lö.

Juan 7:39

Jejenö yöbawö Jesúsma Dios O̧'wo̧ Luwo̧nö yöawinobe, itenö ösödadö tjo̧'wo̧ luwo̧nö tebachibö öjamatakwo̧nöda. Ja̧danö, ina Dios O̧'wo̧ Luwo̧ma deinobe. Diosma, jobadö tjo̧'wo̧ luwo̧nö tebachibö öjamatobö ina weinokobe. Ina, jejenö weinokobe Diosma, Jesús kabekwachajö mölejȩbekwö ȩwa̧ji̧ ina badekwachokobetjö̧.

Juan 7:52

Jejenö yöawiawö̧, Nicodemonö obö, öpöjödö jö̧tja̧linobe: —Nicodemo ¿ökwöbi Galilea jojoja?— obö jö̧tja̧linobe—. Jweinö edi Dios iwenema kwöwaisobö Galileabetjö ichokobe Dios yöawi̧ yöbawo̧ma— jö̧tja̧linobe.

Hechos 3:19

Jo̧kwaobetjö̧ kwomukwataduwi̧ma kabatibö balewachaduwi, Diosnö omukwatö, Diosma ökwödö kwusuladuwi̧ söbebö loobö. Jejenö kwöbalewachaduwitjö̧ma kwo̧'wo̧ luwo̧duwi ösöwö kwö̧jaduwena, Duluwo̧ Diosma ökwödökwö ö̧jobetjö̧— yöbawijetö.

Efesios 1:21

Ikenama Diosma Jesúsnö kabebö wanijetö, inesö La'aka Luwo̧ baibanö. Chömöledö, jo̧badajayo̧ la'aka luwo̧ma deobe. Okobe deinö la'aka luwedötjö o̧penönö Jesúsma inesö La'aka Luwo̧ baibanö jo̧. Mölejȩnö ju̧kwadö tjuluwedötjöbi, böjȩnö ju̧kwadö tjuluwedötjöbi Jesúsma o̧penönö inesö La'aka Luwo̧. Jejenö jo̧be babema. Ju'winöbi jejenö ja̧kobe, Jesúsma ju'wedö la'aka luwedötjö o̧penönö inesö La'aka Luwo̧.

1 Timoteo 1:13

Damötjö Cristonö chösödakwa̧ abönö, sulabenö yöba̧liachijatö Cristonöma, sulabo̧ jö̧ba̧lö. Ja̧danö, jo̧banö öpöjödö sulabenö ja̧biachijatö jo̧banöma. Jo̧kwaijayonö, jejenö ja̧tinajayonö, ötjönö ösödö 'da̧batö ujuninobe, Cristo wei̧ chotidobö. Jau, wajwibö chöpöjödijatö Cristonöma, Cristoma Dios weökökwe, jö̧ba̧lö. Ja̧danö, wajwibö chöpöjödiökwe, Diosma lȩlö̧jinö edinobe ötjönöma.

1 Timoteo 1:15

Jau Timoteo, Cristo Jesúsma böjȩkwö ichinobe sulabenö ja̧badönö tjö̧jibinö ja̧obö. Ja̧ wenema isabenö wene Timoteo, okobe deinö ja̧ wene tjösödobö jo̧be. Ja̧danö, ökwönö yötawa, jobadö sulabenö ja̧badötjö, o̧penönö sulabenö ja̧bö ji̧achijatö ötjöma.

1 Timoteo 4:8

Wanedö yötawa: Ju'wedö juluwadö batjibobö isakwadöma, kabatökönö ö'öba̧libadö, ja̧danö ju'wibi ja̧badö, tupakwö juluwadö batjibobö. Ja̧ ja̧tji̧ma ja'yubeda pjaatijayonö, nöinö pjaatokobe, sule böjȩnö ja̧nö tjiteba'o jawada tjujuluwachibobö pjaatobetjö̧. Jo̧kwaijayonö, Dios ösödi̧danö ja̧dobö isawama, ja̧danö Dios ösödi̧danö ja̧bö ja̧kwawama inesö pjaati̧ do̧'wo̧ luwo̧nö dujuluwachibanö. Ja̧danö, böjȩnö ja̧nöbi, mölejȩnö Dioskwö ja̧nöbi pjaatobetjö̧, do̧'wo̧ luwo̧ ösöwachibanö dö̧jakobe.

1 Timoteo 6:17

Cristonö ösödadötjö balada luwedönö baikwö yöbawidönö Timoteo, Aaa, ju'wedönötjö o̧penönöbedösa, jö̧ba̧lö tjomukwatokobö. Ja̧danö, böjȩ jawa tjujuna̧li̧, tupakwö jwiakwa̧ jawa tjujuna̧li̧ma tjo̧'wo̧ tjöwana̧lokobö yöbawidönö, Diosnöda tjo̧'wo̧ tjöwana̧lobö jo̧be. Jau, jo̧ba Diosda okobe jwiinö ökwödönö iyo̧ma, do̧'wo̧ ösöwanö dö̧jobö.

2 Timoteo 4:10

Jau Timoteo, ajayinö ötjökwö otidina Demas mikwo̧ma, böjȩ jawa ösödobetjö̧ ötjönö le'dedibö i̧'yajabe, ja̧danö böjȩ jawa ösödobetjö̧ Tesalónicabe i̧'yajabe. Ja̧danö, ju'wibi Crescentema Galacia nijibe i̧'yajabe, ja̧danö Titoma Dalmacia nijibe i̧'yajabe,

Tito 2:12

Ja̧danö, ja̧ Dios mikwa jwiinö otiwa jawa iyi̧ma ökwödönö ba̧ja̧dobe Diosnö öpöjödö ja̧kwawama kadatibobö, ja̧danö böjȩ jojodö sulabe dösödi̧ jawa ja̧bökönö kabatibö ja̧dobö. Ja̧danö, tupakwö ba̧ja̧dobe ökwödönö, Dios mikwa jwiinö otiwa jawa iyi̧ma, obökönö dö̧jobö, ja̧danö sulabenö ja̧bökönö dö̧jobö, ja̧danö Diosnö ösödö dö̧jobö ina böjȩnö dö̧jayi.

Santiago 1:27

Ja̧danö, Dios, ökwödö Dabe'do Diosma ¿dakwö yöawobeda, Biya̧ ötjönö inesö kwösödaduwi̧ kwi̧sekwaduwi̧ma, jö̧ba̧lö? Biya̧ chö̧ja̧wo̧dö, Diosnö jwiinö inesö dösödi̧ma: Usulasedönö, tjabe'do tjojo'do debadönöbi, tjilekwe wotjinawö̧nöbi pjadatobö jo̧be, usula tjemawena. Ju'wi jawabi chö̧ja̧wo̧dö, biya̧: Böjȩnö ju̧kwadö sulabenö ja̧tji̧tjö 'da̧bachibö dö̧jobö jo̧be, ja̧ suli̧kwö pjabacha̧lökönö. Jejenö kwö̧jaduwo chö̧ja̧wo̧dö, Dios kwö̧jaduwobö ösödi̧danö, jo̧ba iwene ösödinö a̧ja̧kwö.