Mateo 10:28 - Dios Iwene

²⁸ Jojodönö yekabiduwa chömöledö, jobadöma sule tjiteba'oda kwabö lobadö, tjo̧'wo̧ luwo̧nö kwabö lotjoböma juluwöködö. Jau chömöledö, Diosnöda yekabiduwobö jo̧be, jo̧bama isabenö jojodönö lȩebobö juluwo̧obetjö̧, jo̧bada ökwöla nöolatjö jojodö tjiteba'obi, tjo̧'wo̧ luwo̧bi söbebö loakwo̧.

Mateo 10:28 Iomraidhean Croise

2 Reyes 17:39

sule ötjö kwösödaduwökwe Isabenö Jo̧ Diosnöda yebabinö kwösödaduwo, ja̧danö jobekwö ötjönö ösödö kwö̧jaduwitjö̧ma, ötjö Isabenö Jo̧ma okobe deinö kwöpöjojodöduwi tjujulutjö kwö̧jibaduwinö pjatatocha, —jö̧ba̧lö weinobe Isabenö Jo̧ma, israel jojodönö.

Diosnö ösödo̧ Job mikwo̧ usula emawina jawa 37:24

Jo̧kwaiawö̧, Diosnö yebabinö omukwatö ösödadösa, isabenö otiwo̧obetjö̧. Jau Job, isabenö otiwo̧ Diosma, ja̧danö, –Waisadöma ökwödödasa, –jö̧ba̧lö sulabenö omukwatadönö a̧ja̧kwö̧kö̧ Diosma, —jö̧ba̧lö yöa̧linobe Eliuma.

Isaías 51:12

Adebökwe, baikwö atadö yöba̧lo̧ Isabenö Jo̧ma: Chömöledö, kwo̧'wo tjo̧bekwö kwö̧jaduwelö, ötjödasa kwo̧'woduwi ösöwachibanö pjabato̧ma. Ja̧danö ötjöda ökwödönö pjatatobetjö̧, tajawedö bö̧jȩ jojodönö yekabiduwobö? Jobadöma meje'ye, juluwanö kököbachibö, debi baiba'yedanö ichejekwadö, juluwanö debö 'ya̧dö bö̧jȩ jojodöma, tajawedö jobadönö yekabiduwobeda?

Isaías 51:7

Ökwödö weti̧ a̧ja̧kwö ju̧kwadöma, kwomajadeduwinö, —Dios wei̧ma inesö mikwawi̧ a̧ja̧kwö dö̧jobö, —jö̧ba̧lö ösödadöma, ökwödönö yöta̧li̧ kwa̧ja̧kwaduwo: Jojodö ökwödönö obö, sulabenö yötja̧li̧jayonö, jobadönö yekabiduwoko, ja̧danö sulabenö yötja̧li̧ a̧ja̧kwö, kwo̧'woduwi tjo̧kekwaduwoko.

Isaías 66:2

Okobe jwiinö mölejȩnö ji̧bi, bö̧jȩnö ji̧bi, ötjöda chotidijatö chömöledö, ja̧danö okobe jwiinö kwedaduwi̧ma, ötjö chiteada edadöja. Jo̧kwajabetjö̧ cheju baibanö kwiyaduwobö jwibadöja chömöledö. Jobekwö ötjö Isabenö Jo̧ma yötawaduwakwö. Ju'wibi baikwö yötawaduwakwö: Ötjö otiwanö edö pjatatakwawö̧ma, bidö: Tjomajadenö, —Mikwawöködösa, —jö̧ba̧lö omukwatadö, yötawi̧ a̧ja̧kwö, yebabinö tjö̧bawö, sulabenö tjomukwati̧ kabatibö balewachadöma.

Mateo 10:26

Tupakwö yöawinobe Jesúsma iteda öba̧ja̧di̧ waisachadönö: —Chömöledö, jojodö isabenö yebeabinö yötja̧lakwedö ökwödönö, jo̧kwaijayonö jobadönö yekabiduwa. Jau chömöledö, okobe jwiinö babe öwawökö ji̧ jawama, tupakwö öwawakobe, ja̧danö okobe jwiinö babe jojodö tjöwaisapji jö̧ba̧lö tojö tjujuni̧ jawama, okobe deinö tupakwö tjöwaisakobe.

Mateo 25:46

Ikenama, jobadö sulabedöma ökwöla nöolabe tji̧'yakwedö, jobetjö Dios lȩebi̧tjö ba̧kwȩlö̧jatebö usula tjemawobö, jo̧kwaijayonö otiwadöma ba̧kwȩlö̧jatebö ja̧kwawobe ja̧nö tji̧'yakwedö— jö̧ba̧lö yöawinobe Jesúsma.

Mateo 5:22

Jo̧kwaijayonö jemi bajalekwönönö baikwö yötawaduwakwö ötjöma chömöledö: Sule kwömöledöso̧nö kwabö loköbitjö̧damaökö, kwömöledöso̧nö kwölabitjö̧bi, lȩekwa jo̧be jö̧ba̧lö. Ja̧danö, kwömöledöso̧nö sulabenö yöka̧litjö̧ma, lȩekwa luwedö tjöba a'o kwö̧jena, ja̧danö kwömöledöso̧nö wajwibo̧ja, mikwawö̧kö̧ja jö̧ba̧lö yöka̧litjö̧ma, ökwöla nöolatjö Dios lȩebakwa̧tjö kwemena, jö̧ba̧lö yötawaduwakwö.

Juan 5:29

Jejenö a̧ja̧kwö latjebakwedö. Ja̧danö, jobadö labebajadötjö otiwanö ja̧bö ja̧döma ba̧kwȩlö̧jatebö Dioskwö tjö̧jobö tjetjachajakwedö. Jo̧kwaijayonö, sulabenö ja̧bö ju̧kwadönöma lȩtebakwawö̧, ba̧kwȩlö̧jatebö inia tjötjinö tjö̧jobö.

Hechos 21:13

Jejenö lȩdeabijayonö Pabloma jö̧a̧lijatö: —Kwubudekwabiduwatjö chömöledö. Jejenö kwubudekwabiduwobema jwiinö cho̧'wo̧ tjo̧tekwobe. Ötjöma Duluwo̧ Jesús ja̧ina yötawobetjö̧ jobetjö Jerusalénbetjö ötjönö do̧tjatitjö̧ma wainö do̧tjatakwo̧sa. Jesús ja̧ina yötawobetjö̧ kwabö lotjitjö̧bi wainö kwabö lotjakwo̧sa. Jejenö ötjönö baleditjö̧ma ötjöma, Jau kwatjö̧ma, do̧tjatena, kwabö lotjena, jö̧ba̧lo̧sa— jö̧a̧lijatö Pabloma.

Hebreos 10:31

¡Ayö! 'Yaba̧lo̧ Dios lȩebakwa̧ma jwiinö labi̧ ja̧kobe. Dios lȩebawö̧nö omukwatö yebabidösa, ¡Ayö jobadöwe! jö̧ba̧lö.

Hebreos 11:35

Ja̧danö, ju'wedöbi Diosnö tjo̧'wo̧ wana̧ladö tjuju̧kwinobe, ya̧dö. Jobadö ya̧döma, Dios wobajaletjö tjeatajinawö̧ tjömöledö. Ja̧danö ju'wedöbi, ömadöma Diosnö tjo̧'wo̧ wana̧lö tjuju̧kwinobe. Jobadöma inia tjötjinö ja̧tjobö tje'ewinawö̧. Yelösöda inia tjötjinö baledinobe jobadönöma. Ja̧danö, jobadönö wetjinobe Diosnö katjatibobö, Chöpöjödökwe, jö̧ba̧lö. Ja̧danö, jejenö katjatibitjö̧ma inia tjötjoko jö̧tja̧linena. Jo̧kwaijayonö jejenöma katjatibinokobe, ju'wi möle tjö̧jakwa̧ tjomukwatobetjö̧, yemidanö tjebachajö Dioskwö ba̧kwȩlö̧jatebö tjö̧jakwa̧ möle. Ja̧danö, Diosnöma chöpöjödökwe, jö̧ba̧lö, jö̧tja̧lokobetjö̧ inia tjötjinö baledinobe, wotjenanö baibanö.

Santiago 4:12

Chö̧ja̧wo̧dö, dö̧jibinö pjabato̧ma bakwo̧da ¿jö̧tö? Ja̧danö, jo̧bada jojodönö lȩbebo̧ ¿jö̧tö? Jo̧bada juluwo̧ jojodönö lȩbebö yöawobö, Bidöma tjö̧jibinö tjö̧jakwedö, ja̧danö, Bidöma tjö̧jibinö tjö̧jökakwedö, jö̧ba̧lö. Ökwödöma lȩbeböködösa chö̧ja̧wo̧dö.

1 Pedro 3:14

Jau chömöledö, isabenö otiwanö ja̧bö kwö̧jaduwobetjö̧, usula kwemawaduwena, jo̧kwaijayonö suli̧ waekwokobe, Diosma ökwödönö pjaatakobetjö̧. Jo̧kwajabetjö̧ kwomajadeduwinö Cristonö otiwanö omukwatö, Cristoma Duluwo̧ jö̧ba̧lö ösödö ja̧nö, ökwödönö suli̧ tjöwaedobö jö̧ba̧ladönö yekabiduwa, ja̧danö kwo̧'wo̧ tjo̧achaduwa chömöledö. Ja̧danö chömöledö, yebabökönö kwö̧jaduwiawö̧, ju'wedöma ökwödönö abebö tja̧ja̧kwena, ¿tajawedö yebaböködöjada?, ¿taji wene ösödadöjada? jö̧ba̧lö. Jo̧kwajabetjö̧ ökwödö Jesúsnö ösödadöma kwösödaduwi̧ jawa otiwanö kwöwaisaduwobö jo̧be, ju'wedö ökwödönö Cristonö kwösödaduwi̧ jawa labebö loköbaduwobö atjebenama, jweinö kwatadaduwakobetjö̧. Ja̧danö, jejenö abebö tja̧ja̧kwenama, dameakwöma kwatadaduwa chömöledö, jobadönö otiwanö omukwatö, dösölö̧jinö kwatadaduwodönö.

Apocalipsis 2:10

Yötawaduwakwö lekwokobetjö inia tjököbaduwinö baledakobe ökwödönöma. Jejenö baledi̧ma yekabiduwoko, chömöledö. Kwo̧'wo̧ 'dibachibö kwö̧jaduwo. A̧ja̧kwaduwitjö. Awetjama ökwödötjö ju'wedönö ka̧lena ba̧kwawejunö tjödobö weakobe, ötjönö kwo̧'wo̧ kwöwana̧laduwi̧ma kakatibaduwojobö edobö. Ja̧danö, jo̧bama inia tjököbaduwinö ja̧tjobö weakobe, ja'yubeda lekwe, domulataja möle baibanö. Ja̧danö, chömöledö, kabatibökönö kwo̧'wo̧ kwöwana̧laduwotjö, kwabö lotjobö jö̧tja̧lenabi. Yekabiduwoko chömöledö. Ö'wö bakibaduwaja̧ ikena, chöba a'o kwichibaduwena, ba̧kwȩlö̧jatebö ja̧kwawa chiyakwo̧sa, Otiwanö kwujuluwaduwajabe, jö̧ba̧lö.