Mateo 1:21 - Dios Iwene

²¹ Maríama jitji̧ iso̧nö jemakobe, ja̧danö jemakwo̧nö Jesús jö̧ba̧lö kwimidonö, iteda ömöledönö tjusulatjö tjö̧jibanö ja̧akwo̧obetjö̧— jö̧ba̧lö yöawinobe Dios weökwe ángelma.

Mateo 1:21 Iomraidhean Croise

Génesis 17:19

Jejenö aebijayonö Diosma atadijetö Abrahamnöma: —Jo̧batjömaökö. Kwilekwo Sarama ökwö kwitji̧nö 'yajebakobe. Jo̧banöma Isaac, jö̧ba̧lö kwimido. Jo̧banöda yöbawö chujuni̧ chiwenema badekwachinö pjatatakwo̧sa. Ja̧danö jo̧batjö tupadanö jojodönöbi yöbawö chujunobetjö̧, ja̧ yöbawö chujuni̧ chiwenema ba̧kwȩlö̧jatebö ja̧kobe— jö̧ba̧lijetö Diosma.

Génesis 17:21

Jo̧kwaijayonö kwitji̧ Isaacnö, ja̧danö Isaactjö tupadanö jojodönöbi chiwene yöbawö chujunina badekwachinö dösölö̧jinö edö pjatatakwo̧sa. Abraham, yötawakwö, ju'wi o̧ba babedajayena Sarama jo̧banöma jemakobe— yöbawijetö Diosma Abrahamnöma.

Génesis 18:10

Ja̧danö jobadötjö bakwo̧ yöbawijetö: —Abraham. Isabenö, babedajayena ju'wi o̧banö yemidanö chichocha. Chichenama kwilekwo Sarama ida̧ökö jitji̧nö jujuna̧lakobe— yöbawijetö. Ja̧danö, Sarama apjude okwakwöchobe, yö̧ne ja̧nö jo̧ba yöawi̧ma a̧ja̧kwa̧lijotö.

Daniel 9:24

Baikwö yöawinobe Gabrielma Danielnö: —Diosma omukwatö ujunajabe, kwömöledö Israel jojodönö tjö̧jibinö pjaatakwa̧ abönö, ina cuatrociento noventa o̧biya tjöbaledobö jo̧be jö̧ba̧lö. Ja̧danö, Dios badedö ujunina möle badekwachenama, tjusulatjö tjö̧jibinö pjaatakobe. Sulabenö ja̧tji̧ katjatibobö ja̧akobe, ja̧danö tjusula söbebö loakobe, okobe jwiinö suli̧ söbebö loakobe. Ja̧danö ja̧ mölema Diosda yöbawö weakobe, bakwainö otiwanö ba̧kwȩlö̧jatebö yöbawö weakobe. Ja̧ mölema Dios yöawi̧ yöbawo̧ Jeremías iwȩyudinadanö badekwachakobe, ja̧danö ökwö kwi̧'wi̧dinö kwedinadanö badekwachakobe, ja̧danö Jerusalénnö jȩju Dios ejuma, yemidanö isabenö Dios eju baibanö dichö loakobe.

Mateo 1:25

Jo̧kwaijayonö, jobujunö emijayonö, jobujunö ja̧inokobe, jitji̧nö jemenanö kabatö. Ja̧danö, jitji̧nö jemenama, Joséma jo̧banö Jesús jö̧ba̧lö imidinobe.

Lucas 1:13

Jejenö yeabiökwe, ángelma jo̧banö yöawinobe: —Yebabökönuwi Zacarías, akebiökwe Diosma isabenö akebi̧ a̧ja̧kwinobetjö̧. Ja̧danö, akebi̧danö kwilekwo Elisabetma kwitji̧nö jemakobe, ja̧danö kwitji̧nö Juan jö̧ba̧lö kwimidakobe.

Lucas 1:31

Ökwöma isabenö metu'wo kwö̧jakwujuja, ja̧danö kwitji̧nö kwemakwujuja, ja̧danö emaju jo̧banö Jesús jö̧ba̧lö kwimidakobe.

Lucas 2:11

babe yö̧te Davidmine itebo comunidadtjö jojodö tjö̧jibinö pjabato̧nö jemajabetjö̧, Dios weakwo̧ jö̧a̧linökwe Duluwo̧nö.

Lucas 2:21

Jemi ikenama, jelemutjö wa̧pötakwa möle baledibajenama, tjemu ötade bajalesado̧ wibebö lotjobö baibinobe, Israel jojodö wibebö lobiatji̧danö. Ja̧danö, ötade bajalesado̧ wibebö lotjenama, Jesús jö̧ba̧lö imi tjimidinobe, ángel ajayinö weinadanö. Ina metu'wo jwijayi ángelma Maríanö weinobe, Jesús jö̧ba̧lö kwimidonö, jö̧ba̧lö, ja̧danö weinadanö Jesús jö̧ba̧lö imi tjimidinobe.

Juan 1:29

Ju'wi dewachö Juanma edinobe iteda ö̧jobekwö Jesús ichobe. Jesúsnö edö jö̧a̧linobe itekwöda ju̧kwadönö: —Edaduwi. Ite baikwö icho̧ma, Dios weinökwe obeja itji̧danö jo̧. Diosma jo̧banö ö'wöchinö midawö, jojodö tjusuli̧ söbebö loobö weinobetjö̧, obeja itji̧danö jo̧, ötjabökwe.

Juan 4:42

Ja̧danö, yötjawinobe tjömöledösujunö: —Ajayinöma sule ökwö yökawi̧da a̧ja̧kwö dösödijatö bitenöma. Babema bite yöawi̧ a̧ja̧kwö, ökwödöda omukwatö dösödanö, Isabenö böjȩnö ju̧kwadö tjö̧jibinö pjabato̧— jö̧tja̧linobe Samaria jojodöma tjömöledösujunöma.

Hechos 13:23

Ina yöbawijetö Pabloma: —Damötjö Diosma ajayinö yöbawö junijetö biya̧ wenema, Israel jojodö tjö̧jibinö pjaatakwo̧ma Davidtjö tupadanö jojodötjö bakwo̧, jö̧ba̧lö. Chömöledö, ja̧ Dios ajayinö yöbawö ujunina wene ida̧ökö badekwachijetö Jesúsnö jemenama. Jesúsnö, Davidminetjö tupadanö jojonö, israel jojodö tjö̧jibinö pjabato̧nö jeminena Dios ajayinö yöbawö ujunina wene badekwachijetö.

Hechos 3:26

Jo̧kwaobetjö̧ Diosma webijetö Jesúsnö iteda weina ja̧akwo̧nö. Webijetö Jesúsnö ökwödönöma, judío jojodönöma abönöma, ökwödönö pjaatobö, okobe deinö sulabenö kwujuna̧laduwi̧ kakatibaduwinö— yöbawijetö Pedroma.

Hechos 4:12

Ja̧danö, jojodö tjö̧jibinö pjabato̧ma jo̧bada. Jelo̧ma deobe. Dios böjȩnö ju̧kwadönö tjö̧jibinö pjaatobö weinökwema bakwo̧da, Jesúsda— jejenö yöbawö atadijetö Pedroma.

Hechos 5:31

Jemi tupakwöma, Diosma junijetö Jesúsnöma, la'aka luwo̧ baibanö. Ja̧danö, Diosma Jesús kaekwajinö ja̧bijetö. Ikenama Diosma kabekwajo̧nö iteda öwaisobekwöchobe öbamatobö webijetö, ökwödö Duluwo̧ baibanö, ökwödö dö̧jibinö pjabato̧nö. Jo̧bama ökwödö israel jojodö domukwati̧ma balewachö domukwatobö pjabato̧, ja̧danö ökwödö dusuli̧ma söbebö lobo̧, jo̧bama.

Tito 2:14

Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

Hebreos 7:25

Jo̧kwaobetjö̧ Jesúsda jojodö Dioskwö ichibö tjö̧jibinö pjabato̧, Jesúsma dö̧jibinö pjabato̧, jö̧ba̧ladönöma. Ja̧danö, jobadö tjö̧ji̧bi okobe jwiinö pjaatinobe Jesúsma, ja'yubebi ji̧bökönö. Ja̧danö, Jesúsma jo̧banö ösödadönöma ba̧kwȩlö̧jatebö tjö̧jibinö pjabato̧, Jesúsma ba̧kwȩlö̧jatebö Diosnö abebö jobadönö pjaatobö ö̧jobetjö̧.

1 Juan 1:7

Jo̧kwaijayonö ökwödötjö bakwo̧ otiwanö ja̧bö, dewinö jo̧ Dios omukwati̧danö omukwatö jo̧ma, dewa'wo okwa kwebachö jo̧, Dios ö̧jobema. Jejenö kwebacho̧ma isabenö omajadenö Dioskwö bakobe dötekwö jo̧, Dios iwene, isabenö ji̧ wene ösödö. Ja̧danö, jejenö ja̧nö jo̧ba dewa'wo okwa kwebacho̧ma Cristotjö ö̧ja̧wo̧dönö ile nibebö ö̧jobe. Ja̧danö, jo̧bama Dios öba a'otjö okobe jwiinö suli̧tjö dichö loinökwe, Dios Itji̧ Jesús ökwösobu ebawinö imidawinobetjö̧. Chö̧ja̧wo̧dö, ökwödöma jejenö kwi̧'yaduwobö jo̧be, kwomajadeduwinö Dioskwöbi, kwö̧ja̧wo̧dökwöbi bakobe dötekwö ja̧nö.

1 Juan 3:5

Ja̧danö kwöwaisaduwa, Cristoma böjȩkwö ichinobe jojodö tjusula tjumusidi̧, Dios jojodönö lȩebobö tjumusidi̧ma imidawobö, jö̧ba̧lö. Jejenö Cristoma imidawinobe jojodö tjusuli̧ma, Dios söbebö loobö. Jau chö̧ja̧wo̧dö, Cristoma suli̧ jwibo̧obetjö̧ jo̧bada jojodö tjumusidi̧ midawinama.

Apocalipsis 7:14

Jejenö abebö a̧ja̧kwitjö̧ chatadijatö: —Chuluwo̧ma, ökwöda kwöwaisa— jö̧ta̧lökwe: —Jau, yötawakwö. Bidöma, inia tjöawa baledi̧ möletjö o̧penönö baledi̧ möle inia tjöbö ji̧nadö. Ja̧danö, tjökamisima, Obeja Itji̧danö Jo̧ ökwösobutjö dichö loi̧danö dichö loawa odi̧ju, dewi̧ odo̧ baibanö. Ja̧danö, bidöma dewi̧ odo̧ 'dubawadö babibinadö.

Jueces 13:3

Ja̧danö, ju'wi möle Isabenö Jo̧ma, angeldanö ichejekwö öwawachinobe Manoa ilekwonö, ja̧danö jobujunö yöawinobe, —Metu'wo babibökuju kwitji̧mu deköbelö, isabenö metu'wo kwö̧jakwujuja, ja̧danö kwitji̧nö kwemakwujuja.

1 Samuel 1:20

ja̧danö jemakwa̧ mölȩ badekwachenama, jitji̧ iso̧nö jeminobe. Emaju, Samuel jö̧ba̧lö jimidinobe jitji̧nö, —Chitji̧nö atebiökwe, Isabenö Jo̧ma a̧ja̧kwö bitenö iyajabe, —jö̧ba̧lö.