Lucas 9:2 - Dios Iwene

² Ja̧danö, jejenö junajo̧, jobadönö weinobe otiwa jawa wene Dios la'aka luwo̧ ö̧jakwa̧ jawa wene yötjawobö, ja̧danö ö'wöchadönö otidö lotjobö.

Lucas 9:2 Iomraidhean Croise

Mateo 10:5

Jobadö a̧li̧nösamutjö du̧ju̧tajabedönö Jesúsma weinobe, Israel niji bakwameachibanö wainökwena kwetjachobö, ja̧danö jobadönö baikwö weinobe: —Israel jojodöböködönö pjabatöma 'yö̧könaduwi, ja̧danö Samaritano jojodö comunidadbema 'yö̧könaduwi.

Mateo 13:19

—Ödebiya mananö meaja̧ ödebiya badekwachi̧ma, Dios la'aka luwo̧ ö̧jakwa̧ wene tja̧ja̧kwijayonö otiwanö a̧ja̧kwöködönö badekwachobe. Ja̧ wene tja̧ja̧kwenama, inesö sulabo̧ma ichö ja̧ wene jobadötjö 'döebobedanö ichejekwa, tjomajadenö pokwapji jö̧ba̧lö.

Mateo 24:14

Ja̧danö, Dios yöbawö ö̧jena jawa otiwa jawa wenema böjȩ bakwameachibanö yötjawakobe tja̧ja̧kwobö, okobe deinö tjitebotenia jojodö tja̧ja̧kwobö, ja̧danö jemi ikenada 'dö̧ibaji̧ möle baibakobe.

Mateo 3:2

—Sulabenö kwomukwataduwi̧ kabatibö balewachaduwi, Dios yöbawö weakwa̧ möle yöneawachibobe— jö̧ba̧lö.

Marcos 16:15

Ikenama Jesúsma jö̧ba̧lijetö jobadönö: —Wetaduwakwö. Böjȩ okobe jwiinö 'ya̧duwi Dios otiwa jawa wene okobe deinö Dios otidinawö̧nö yökawaduwo.

Marcos 6:12

Jejenö weawö̧ Jesús öba̧ja̧di̧ waisachadöma labebö jelobebi jelobebi du̧ju̧tajakwena yöbawö 'yi̧jadötö. Jelobe, jelobebi du̧ju̧tajakwena 'ya̧jadöma jojodönö yöbawiabijadötö: —Sulabenö tjomukwati̧ kabatibö balewachaduwi— jö̧ba̧lö.

Lucas 10:1

Jemi ikenama, Jesúsma jo̧banö ösödadötjö setenta ömadönö 'da̧batö ujuninobe, Israel niji bakwameachibanö yötjawobö. Jesúsma Israel niji bakwameachibanö yöawobö jö̧a̧linobe, ja̧danö i̧'yakwa̧ abönö jobadönö du̧ju̧tajakwena weinobe, comunidadtenia, iteda yöbawö kweachakwatenia comunidadteniabe 'ya̧nö kwebachö yötjawobö.

Lucas 10:11

Pjadatobö kwöpöjödaduwobetjö̧, ökwödötjö 'da̧bachibö di̧'yobe, Bidöma öpöjödadö, jö̧ba̧lö. Jau, kwöpöjödaduwobetjö̧, kwiteboduwi nijiso̧pja̧bi dömasapiyatjö 'do̧bekwö lodobe, Bemi jojodöma isabenö ökwödödanöböködö, jö̧ba̧lö. Ja̧danö, kwöpöjödaduwobetjö̧ Dios lȩebakwawö̧ja. Dios la'aka luwo̧ ö̧jakwa̧ma isabenö yöneawachibajabe, ja̧danö ökwödönobi pjaatobö jö̧a̧lajabe, jo̧kwaijayonö kwöpöjödaduwobetjö̧ Dios lȩebakwawö̧ja, jö̧ba̧lö, yökawaduwo.

Lucas 10:9

Ja̧danö jobe ja̧nö, ö'wöchadönö otidö loköbaduwo, ja̧danö jojodönö yökawaduwo, Dios la'aka luwo̧ ö̧jakwa̧ma, ida̧ökö yöneawachibobe jö̧ba̧lö.

Lucas 16:16

Tupakwö yöawinobe Jesúsma: —Chömöledö, Juan Ojwenö Bu̧dato̧ ötjabökwe yöawakwa̧ abönö, sule Moisés iwȩyudinabi, ju'wedö Dios yöawi̧ yöbawadö tjiwȩyudinabi yötjawinobe, ¿jö̧tö? Jemi ikena, Juan jamatö yöawena baikwöma, Dios la'aka luwo̧ ö̧jakwa̧ wene otiwa jawa wene yöawakwawobe, ¿jö̧tö? Jau chömöledö, Dios la'aka luwo̧ ö̧jakwa̧ wene yöawakwawobe, ja̧danö jojodönö lȩenö a̧debakwawa jo̧be, tekachaduwobö jo̧be, juluwanö tebachaduwi jö̧ba̧lö.

Lucas 9:11

Jo̧kwaijayonö, jo̧dawa'ye tjö̧jotö jö̧ba̧lö tji̧'yijayonö, jojodöma jobe tji̧'yaja̧ tjöwaisachibinobe, ja̧danö waisachibö Jesús ökömanö tji̧'yinobe. Ichibajadönö edö, Jesúsma jobadönö ösödinobe, ja̧danö Dios la'aka luwo̧ ö̧jakwa̧ jawa jobadönö yöawinobe, ja̧danö jobadötjö ö'wöchadönö otidö loinobe.