Lucas 21:34 - Dios Iwene

³⁴ Tupakwö yöawinobe Jesúsma: —Wanedö yötawa: Te'ada̧lönö eda̧lö kwö̧jaduwo chömöledö, böjȩ jojodö tjösödi̧ jawama ökwödönö ömökapji jö̧ba̧lö. Jau chömöledö, nöinö pjiesta junö, ja̧danö nio ojwiyo owa̧lö, ja̧danö böjȩnö kwö̧ja̧duwi̧ omukwatö kwö̧jaduwitjö̧ma, yemidanö chichakwa̧ kwomukwataduwökena, ja̧danö chichakwa̧ te'ada̧lökönö kwö̧jaduwonö, juluwanö ja̧ möle baibena.

Lucas 21:34 Iomraidhean Croise

Génesis 19:32

Jo̧kwaobetjö̧ ubasobu o̧'do̧bu diyo dabe'donöma 'dukwachobö. Ikenama 'dukwachena jo̧bakwö dö̧jo, di̧tji̧mu, jo̧batjö tupadanö jojodöma tjuju̧kwakobetjö̧— jö̧ba̧lijotö.

Génesis 19:35

Jo̧kwaobetjö̧, ja̧ yö̧tebi tjabe'donö iyijadötö ubasobu o̧'do̧bu owobö 'dukwachobö. 'Dukwachena itjiju bajaliya luwujuma jabe'dokwö ji̧jotö. Lotma yemidanö itjiju sulabenö ja̧ji̧ma wajwibijetö, 'dukwachobetjö̧.

Génesis 27:14

Jejenö wejökwe 'ya̧jo̧ chi̧wo̧dönö emö ichejebijetö ojo'do jö̧jobekwö. Ja̧danö, jobujuma söinö tobijotö jilekwe ösödi̧danö.

Proverbios 21:4

Ja̧danö, ju'wibi yötawa, wanedö: Bakwo̧ma ju'wedönö edö, mikwawöködö jö̧ba̧lö omukwatobe. Ja̧danö, itedada ötjödasa otiwanö jo̧ma, jö̧ba̧lö omukwato̧. Isabenö yötawa: Jobekwö omukwato̧ma sulabenö omukwato̧. Ja̧danö, ja̧ omukwatö ö̧ji̧ma öwawinö i̧sekwobe, sulabenö omukwatö jo̧, jö̧ba̧lö.

Proverbios 23:20

Ju'wi jawabi jwebebö yötawakwö chitji̧: Owa̧ladökwö pjakacha̧loko. Ja̧danö, yemidanö yemidanöbi nöinö kwakwawa kwadökwöbi pjakacha̧loko.

Isaías 28:7

Babe möle, ökwödönö ötjibo jö̧ba̧ladöma, 'dukwachawö̧ kwebachadö. Ubasobu o̧'dobubi, ju'wi nio ojwiyobi o̧wa̧lajadö, jobekwö 'dukwachawö̧ kwetjachobe. Dios yöawi̧ yöbawadöbi, Diostjö jojodötjö ö'weje pjabatadöbi, nöinö o̧wa̧lajadö jobekwö 'dukwachawö̧ kwebachadö. Jobadöma tji̧'wididanö tjedijayonö, okwa jawa tjöwaisachibanö tjedobö jwibadö, ja̧danö lȩekwa yötjawobö jö̧tja̧lenama, jweinö lȩekwa yötjawobö jwibadö, 'dukwachawö̧ tjö̧jobetjö̧.

Mateo 13:22

Ja̧danö, sȩa'wonö meaja̧ ödebiya badekwachi̧ma, Dios la'aka luwo̧ ö̧jakwa̧ wene a̧ja̧kwö tjösödijayonö, böjȩ jawa nöinö omukwatadönö, ja̧danö balada tjemobö isakwadönö badekwachobe. Jobadöma ja̧ jawa nöinö tjomukwatobetjö̧, otiwanöma tjöda̧peachokobe, ja̧danö tjo̧'wo̧ luwo̧ wa̧ji̧ jawama otiwanöma wa̧jokobe.

Marcos 13:9

Jo̧kwaobetjö̧ yötawaduwakwö. Tjöbeba̧lakwawö ju̧kwaduwi ökwödönö sulabenö ja̧tjakobetjö̧. Ja̧danö, ju'wedöma ökwödönö do̧batibö tje'ewakobe lȩekwa jojodö tjö̧bajobekwö, ökwödönöma jwötjeba̧lobö. Ja̧danö, judío jojodö ba̧nö tja̧ja̧kwa̧leju okwa tebachö kwakwatjakobe ökwödönöma. Ötjökwö kwekachaduwobetjö̧ ju'wedöma ökwödönö jwötjeba̧lotö jö̧ba̧lö ökwödönö do̧batibö tjujunakobe la'aka luwedö tjöba a'otjöbi, luwedö tjipjea jojodö tjöba a'otjöbi. Jejenö ja̧nö ökwödöma otiwa jawa wene, Dios iwenema, yökawaduwobö ja̧kobe.

Marcos 4:19

böjȩ jawama ba̧wa̧lö̧jinö edadö, yelösöda. Ju'wi jaye okobe jwiinö edö tjujuna̧lo jö̧ba̧lö ba̧wa̧lö̧jawö̧. Ja̧ jaye okobe jwiinö ba̧wa̧lö̧jinö edö ödebiya sȩa'wonö meinadanö, lewachajinadanö ichejekwadö. Jejenö lewachajawö̧ma Dios iwenema do̧tjatokobetjö̧ kabatibadö— labebö lobö yöbawijetö.

Lucas 10:41

Yöja̧lökwe Jesúsma atadinobe: —Chömöledösuju chösödoko Marta, ju'wi jayebi, ju'wi jayebi nöinö kwo̧'wo̧ tjo̧kekwa, jo̧kwaijayonö ja̧ jayema isabenö mikwawökö ji̧ Marta.

Lucas 12:40

Jau chömöledö, naukwabo̧ma jojodö wajwitjonö tebacho̧, ja̧danö ötjö chichakwa̧bi jojodö wajwitjonö chichakwo̧sa. Jo̧kwajabetjö̧ ba̧kwȩlö̧jatebö te'ada̧lö kwö̧jaduwo, ötjö jojo baibanö jeminökwe chichibakwa̧ma, ina ichökena jö̧ba̧lö kwomukwataduwonö badekwachakobetjö̧— jö̧ba̧lö yöawinobe Jesúsma.

Lucas 17:3

Jau chömöledö, isabenö sulabenö ötjibakobe, jo̧kwajabetjö̧ te'ada̧lönö eda̧lö kwö̧jaduwo, tjöbeba̧lönö kwö̧jaduwakobetjö̧. Ja̧danö, ökwödötjö bakwo̧ sulabenö ja̧itjöma, jo̧banö jwekebo. Ja̧danö, jwekebi̧ a̧ja̧kwö sulabenö omukwataja̧ kabatibö öbalewachitjöma, sulabenö ja̧aja̧ omukwatökönö kwösödonö.

Lucas 21:35

Jau chömöledö, böjȩ jojodö tjo̧'wo̧ söba̧lö tjö̧jonö, ja̧ möle baibakobe. Wanedö yötawa: Tjo̧'wo̧ söba̧lö tji̧'yemi ja'ötjö juluwanö 'daliwanö tjö̧li̧danö, chichakwa̧ omukwatökönö tjö̧jonö juluwanö jobadönö lȩtebakwa̧ möle baibakobe. Ja̧danö, ökwödöbi chichakwa̧ omukwatökönö kwö̧jaduwapji jö̧ba̧lö, böjȩ jojodö tjösödi̧ jawa ja̧böma kwö̧jaduwoko chömöledö.

Lucas 21:8

Abebö tja̧ja̧kwökwe, Jesúsma atadö yöawinobe baikwö: —Chömöledö, ö'wiakwawönö kwö̧jaduwo, jelo̧ ökwödönö omöna yöa̧li̧ kwösödaduwapji jö̧ba̧lö. Ba̧jekwadö chiminö ichö yötjawakwedö, ötjödasa Dios weakwo̧ jö̧a̧linökwema jö̧ba̧lö, ja̧danö ju'wedöbi yötjawakwedö, 'dö̧ibaji̧ möle tjo̧wi̧ juluwanö baiba jö̧ba̧lö, jo̧kwaijayonö yötja̧li̧ ösödökönaduwi, ja̧danö tjö̧kömanöma 'yö̧könaduwi.

Lucas 8:14

Ja̧danö sȩa'wonö meaja̧ ödebiya badekwachi̧ma, Dios iwene a̧ja̧kwö tjösödijayonö, jemi tupakwö böjȩnö tjö̧ji̧ jawa nöinö tjomukwatobe, ja̧danö balada tjemobö tjisakwobe, ja̧danö böjȩ jawatjö tjo̧'wo̧ ösöwobö tjisakwobe. Jobadöma ja̧ jawa nöinö tjomukwatobetjö̧, otiwanöma tjöda̧peachokobe, ja̧danö tjo̧'wo̧ luwo̧ wa̧ji̧ jawama otiwanöma wa̧jököwö̧.

1 Corintios 5:11

Jo̧kwaijayonö, ja̧ chiwȩyudinama, baikwö jö̧ba̧lö chiwȩyudijatö: Jesúsnö ösödadösa jö̧ba̧ladötjö jejenö sulabenö ja̧badötjö 'da̧bachibö kwö̧jaduwo. Jau chömöledö, Jesúsnö ösödadösa jö̧ba̧ladötjö ilekwobökujukwö ja̧bö jo̧tjöbi, ja̧danö Jesúsnö ösödadösa jö̧ba̧ladötjö iteda nöinö emotö jö̧ba̧lö isakwo̧tjöbi, ja̧danö Jesúsnö ösödadösa jö̧ba̧ladötjö o̧'wo̧ jawa ösödö jo̧tjöbi, ja̧danö Jesúsnö ösödadösa jö̧ba̧ladötjö ju'wedönö sulabenö yöba̧lö jo̧tjöbi, ja̧danö Jesúsnö ösödadösa jö̧ba̧ladötjö 'dukwachinö owa̧lö jo̧tjöbi, ja̧danö Jesúsnö ösödadösa jö̧ba̧ladötjö naukwabinö jo̧tjöbi 'da̧bachibö kwö̧jaduwo jö̧ba̧lö chiwȩyudijatö. Jau chömöledö, Jesúsnö ösödadösa jö̧ba̧ladötjö ju'wedö jejenö sulabenö ja̧bö tjö̧jitjö̧ma, jobadötjö 'da̧bachibö kwö̧jaduwo, kwanöbi jobadökwö ba̧nö kwökönö.

1 Corintios 6:10

ja̧danö naukwabidöbi, ja̧danö idöda tjemotö jö̧ba̧lö isakwadöbi, ja̧danö 'dukwachinö owa̧ladöbi, ja̧danö ju'wedönö sulabenö yöba̧ladöbi, ja̧danö tjönaukwotö jö̧ba̧lö omöna yöba̧ladöma Dioskwö ja̧nö luwedö batjibökakwedö chömöledö.

Gálatas 5:20

ja̧danö o̧'wo̧ jawa ösödakwawabi, ja̧danö mea boawabi, ja̧danö jojodö tjöpöjojodö ja̧nö ölakwabikwawabi, ö'wiabinö edawabi, dameakwa̧lakwawabi, a̧'dȩlakwawabi, ja̧danö wainökwena 'da̧bachibö ju'wedö ju'wedökwö jwöjwöakwawabi,

Deuteronomio 29:19

—Jau chömöledö, ökwödötjö ju'wedöma Dios pjaatakwa̧ jawabi, lȩebakwa̧ jawabi yöbawö ujunaja̧ a̧ja̧kwö, tjomajadenö tjomukwatena, –Chuu 'dibo̧ ja̧nö, Dios wei̧ a̧ja̧kwökönö, ötjöda chösödi̧danö ja̧bö chö̧jijayonö, wene jwiinö chö̧jakwo̧sa̧, –jö̧ba̧lö. Jejenö omukwatö, Dios wei̧ a̧ja̧kwökönö idöda tjösödi̧danö ja̧bö tjö̧jitjö̧ma, wene jwötjebena chömöledö, jobadönöbi, ju'wedö sulabenö omukwatöködönöbi suli̧ tjöwaedi̧nö, jo̧kwajabetjö̧ teada̧lönö kwö̧jaduwo chömöledö.

Filipenses 4:6

Ja̧danö, okobe jwiinö baledi̧ma, kwo̧'wo̧ tjo̧kekwaduwa chömöledö, dakwö ja̧dakwajö jö̧ba̧löma. Kwo̧'wo̧ tjo̧bekwökönö, Diosnöda akebaduwo chömöledö, jo̧ba pjaatobö akebaduwonö, otiwanö pjabato̧ja jö̧ba̧lö.

Hebreos 12:15

Jejenö ja̧nö, ökwödödada kwite'ada̧laduwo ökwödötjö bakwo̧bi Diosnö sulabenö omukwatö kaatibapji jö̧ba̧lö, jo̧ba jwiinö otiwi̧ pjaati̧ma öpöjödö. Jejenö omukwatö jo̧ma labo̧, Diosnö o̧'wo̧ sulinö edö. Ja̧danö, ja̧ sulabenö edi̧ma jo̧ba okwatjöda laebobe, ö̧ja̧wo̧dönö yöawi̧danö yöbawö. Jejenö jo̧bama ö̧ja̧wo̧dönö jelobekwö öbibo̧, jobadöbi labidö batjibanö, jo̧ba sulabenö omukwati̧danö sulabenö tjomukwatobö. Chömöledö, ökwödödada tjöbeba̧lö̧jönö kwite'ada̧laduwo ökwödötjö bakwo̧ jejenö sulabenö omukwatapji jö̧ba̧lö, ju'wedönö jelobekwö tjomukwatobö öbibö.

2 Pedro 3:10

Jo̧kwaijayonö Duluwo̧ma lekwe ite'ada̧lijayonö, isabenö yemidanö ichakwo̧ chömöledö. Ja̧danö wanedö yötawa, naukwabo̧ ju'wedö tjomukwatokonö tebachö önaukwi̧danö, jojodö jo̧ba ichakwa̧ tjomukwatokonö ja̧ inesö lȩebakwa̧ möle baibakobe chömöledö. Ja̧danö, ja̧ baibenama, labinö ökwöobetjö mölejȩma jwiinö baibakobe, ja̧danö mölejȩnö la̧jadöma ökwölanö ubö jwiinö baibakobe, ja̧danö böjȩbi, okobe jwiinö böjȩnö ji̧bi ubö jwiinö baibakobe. Jau chömöledö, obadö ichökena jö̧ba̧lö otjijayonö, isabenö ichakwo̧ Duluwo̧ma.

2 Pedro 3:14

Jau chömöledö, Dios 'yayöjȩ otidobö te'ada̧ladösa ökwödöma. Jo̧kwajabetjö̧ ja̧ baledakwa̧ möle baibobö dite'ada̧lonö, jwaikwöda wene jwiinö kwö̧jaduwobö kwisakwaduwo, ökwödönö edö, bakwainö sulabenö ja̧böködönöda Duluwo̧ edakobetjö̧.

Apocalipsis 3:3

Yötawaduwakwö. Omukwataduwi. Ajayima Dios iwene yötjawi̧ a̧ja̧kwö jwiinö kwösödinaduwobe. Ja̧danö, ja̧ ajayi a̧ja̧kwö kwösödinaduwadanö yemidanö kwösödaduwobö, babe jelobekwö kwomukwataduwi̧ma kabatibö balewachaduwi. Chömöledö, kwo̧'wo̧ luwo̧duwi okwanö woawatjö yemidanö 'yabibajadö bakibaduwanö wilubakwawaduwi. Jejenö, wiluköbakwawaduwökötjö̧ma ötjöma, ökwödö wajwiköbaduwonö naukwabo̧ ichi̧danö chichakwo̧sa, ökwödönö lȩbebö.

1 Samuel 25:36

Ja̧danö, jejube Nabal ö̧jobekwö jȩwa̧bijenama Abigailma jilekwenö jöbadekwajinobe, ba'ali juno̧nö. Inesö la'aka luwedö tjujuni̧jaye ba'ali ujuninobe, ja̧danö o̧'wo ösöwanö jwiinö 'dukwachökwe ö̧jinobe. Jo̧kwajabetjö̧, 'dukwachökwe ö̧jioko, Abigailma jo̧banö yöjawinokokobe baledaja̧ma, ikena möle dewachenanö kabatö.