Lucas 18:7 - Dios Iwene

^7-8 ¿Diosja? Sulabenö otido̧ bajalianö ajebi̧ a̧ja̧kwinatjö̧ma, Diosma ¿iteda ömöledö jo̧banö tjubudekwi̧ a̧ja̧kwökenaji̧? Dios omudawö ujuninawö̧ma yö̧tebi mölebi Diosnö budekwadö, ökwödönö pjabatö döpöjojodönö lȩkebo jö̧ba̧lö, ja̧danö lekwe möle atjebijayonö, Diosma juluwanöma pjaatokobedanö ichejekwa, ¿jö̧tö? ¿Dakwö kwomukwataduwa? ¿Isabenö pjaatökenaji̧? Isabenö pjaatakwo̧ chömöledö. Lekwe pjaatokobedanö ichejekwijayonö isabenö a̧ja̧kwo̧ chömöledö, ja̧danö isabenö pjaatakwo̧. Jau chömöledö, isabenö yötawaduwakwö, ajayinö a̧ja̧kwokobedanö ichejekwijayonö, isabenö juluwanö pjabatö tjöpöjojodönö lȩebakwo̧ chömöledö. Jo̧kwajabetjö̧ kabatibökönö Diosnö budekwö akebaduwo chömöledö, isabenö ökwödönö a̧ja̧kwo̧obetjö̧. Jau chömöledö, isabenö Dios lȩebakwa̧ lȩbebö ötjö jojo baibanö jȩminökwema ichö lȩtebocha. Ja̧ wene ösödö kwite'ada̧laduwobö jo̧be. Chöwaisa chömöledö, böjȩ jojodöma, juluwanö tjime'dawachibobe, jo̧kwajabetjö̧ chichibakwa̧ abönö ba̧jekwadö tjime'dawachibena, döpöjojodönö la'akatjöda lȩebökena jö̧ba̧lö. Jo̧kwaijayonö isabenö kwöpöjojodönö lȩbebö chichocha chömöledö, jo̧kwajabetjö̧ isabenö me'dawachibökönö kwite'ada̧laduwo chömöledö, Diosma isabenö a̧ja̧kwobetjö̧— jö̧ba̧lö yöawinobe Jesúsma.

Lucas 18:7 Iomraidhean Croise

Éxodo 22:23

Yötawaduwakwö: Jobadönö usula tjemawinö weköbaduwitjö̧ma, jobadö ötjönö jwötjeba̧li̧ a̧ja̧kwö pjatatakwo̧sa.

Isaías 40:27

Chömöledö, ökwödö Jacob itji̧mu tupadanö jojodö Israel jojodöma, tajawedö yöka̧laduwobeda, —Usula emawö dö̧ji̧ edö̧kö̧ Isabenö Jo̧ma, ökwödönö pjaato jö̧a̧lijayonö, dösödökwe Diosma ökwödönö pjabatö̧kö̧, —jö̧ba̧lö.

Mateo 24:22

Jau chömöledö, ja̧ möle baledakwa̧ lekwe baleditjö̧ma, okobe deinö böjȩnö ju̧kwadö debö tji̧'yo jö̧tja̧lena, jo̧kwaijayonö iteda omudawö ujuninawö̧nö omukwatö lekwökönö ja̧akwo̧ Diosma.

Mateo 24:24

Jau chömöledö, isabenö Dios weakwo̧ jö̧a̧linökwesa jö̧ba̧lö omöna yöba̧ladöma yötjawakobe, ja̧danö Dios yöawi̧ yöbawadösa jö̧ba̧lö omöna yöba̧ladöbi yötjawakobe. Jobadöma jojodö edajitjökö jawa tji̧sebakobe, Dios omudawö ujuninawö̧bi jobadö yötjawi̧ tjösödobö, jo̧kwaijayonö Dios omudawö ujuninawö̧tjobetjö̧ tjösödökakobe.

Mateo 7:11

Jau chömöledö, ökwödöma sulabedököbaduwijayonö, kwi̧tji̧muduwinö otiwanö te'ada̧lö iyadöja. Ja̧danö, ökwödö sulabedöma kwi̧tji̧muduwinö otiwanö kwiyaduwitjö̧ma, ¿mölejȩbe jo̧ Kwabe'doduwima ja̧tjö o̧penönö jo̧banö abebadönö otiwa jawa iyökenaji̧? Iyo̧ chömöledö— jö̧ba̧lö yöawinobe Jesúsma.

Lucas 11:13

Jau chömöledö, ökwödöma sulabedököbaduwijayonö, kwi̧tji̧muduwinö otiwanö te'ada̧lö iyadöja, ja̧danö ökwödö sulabedöma kwi̧tji̧muduwinö otiwanö kwiyaduwitjö̧ma, mölejȩbe jo̧ Kwabe'doduwima ja̧tjö o̧penönö jo̧banö abebadönö ¿otiwanö iyökenaji̧? Iyo̧ chömöledö. Jau chömöledö, jo̧banö abebadönö Kwabe'do Diosma iteda O̧'wo̧ Luwo̧nö iyobe chömöledö— jö̧ba̧lö yöawinobe Jesúsma öba̧ja̧di̧ waisachadönö.

Lucas 21:28

Jejenö baledakobe chömöledö, ja̧danö jejenö baledakwa̧ jamatö baledenama, ju'wedö yetjabijayonö yekabiduwa chömöledö. Jejenö baledenama, ökwödöma kwo̧'wo̧ ösöwachibanö a̧laibö möakwö kwedaduwo, ida̧ökö ökwödönö kwö̧jibaduwinö chemakwa̧ yöneawachibobetjö̧— jö̧ba̧lö yöawinobe Jesúsma.

Romanos 8:33

Ja̧danö, ¿bakwo̧bi ö̧jobeji̧, ökwödö Dios omudawö ujuninawö̧nö wanedö yöawakwo̧ma? ¿Diosma ökwödönö wanedö yöawenaji̧, Bidöma sulabedö, jö̧ba̧lö? Yöbawö̧kö̧ chömöledö, Diosda ida̧ökö yöbawina, Bidöma sulabe jwibadö, jö̧ba̧lö.

Colosenses 3:12

Ökwödöma Dios ömöledöbedöja chömöledö, jo̧bama ökwödönö ösödö omudawö ujuninobe, iteda ömöledö bakibaduwanö. Jo̧kwajabetjö̧ wanedö yötawa: Lȩlö̧jinö edawabi, otiwanö pjabatö ja̧awabi, ju'wedönötjö o̧penönö jö̧kö̧sa jö̧ba̧lö omukwatakwawabi, dösölö̧jinö ja̧awabi, tjo̧'wo̧ 'dibachibö me'dawachibökönö ja̧awabi kamijido̧ 'dutjawi̧danö 'dukawaduwo chömöledö.

1 Tesalonicenses 3:10

Ja̧danö, mölebi, yö̧tebi nöinö Diosnö adebobe, döbabiyakwena yemidanö ökwödönö dedobö weo jö̧ba̧lö. Ja̧danö Jesúsnö ösödö kwö̧jaduwo jö̧ka̧laduwi̧danö isabenö kwö̧jaduwinö pjadatobö weo jö̧ba̧lö adebanö Diosnöma.

2 Tesalonicenses 1:6

Jau chömöledö, lȩebo jö̧a̧li̧danö, usula kwemawaduwinö ja̧badönö otiwanö lȩebakwo̧ Diosma, balekwa mikwa jobadö usula tjemawinö.

1 Timoteo 5:5

Jesúsnö ösöduju jilekwenö wobekwinuju jömöledö debujuma, jömöledönö jo̧'wo̧ jöwana̧loböma jwibuju. Ja̧danö, Diosnöda jo̧'wo̧ wana̧luju, jo̧bada ite'ada̧lobö, ja̧danö kabatökönö Diosnö abebuju, kabatökönö Dios pjaatobö abebuju jobujuma, yö̧tebi, mölebi. Jobujujayedönö Dios ömöledö tjite'ada̧lobö jo̧be.

2 Timoteo 1:3

Timoteo, kabatökönö ökwönö omukwatö Diosnö ösödö yöta̧lobe, otiwa jö̧ba̧lö. Jau Timoteo, cha'dödömine otiwanö Dios wei̧ ja̧bö tjö̧jinadanö, ötjöbi chomajadenö otiwanö chöwaisi̧danö, jwaikwöda Dios wei̧ ja̧bö jo̧sa. Ja̧danö jo̧ba wei̧ ja̧bö chö̧jonö, mölebi, yö̧tebi kabatökönö ökwönö omukwatö atebobe chuluwo̧ Diosnö.

2 Timoteo 2:10

Ja̧danö, Dios iwene pje'datakwawokobetjö̧, usula chemawijayonö, Dios ösödawö̧ ömöledö batjibakwedönö omukwatö, öpöjödachibökönö usula chemawobe. Jau Timoteo, öpöjödachibökönö usula chemawobe, cho̧'wo̧ 'dibachibö usula chemawi̧tjö jobadöbi Cristo Jesúsnö ösödö tjö̧jibakobetjö̧, ja̧danö jo̧bakwö mölejȩbetjö ba̧kwȩlö̧jatebö tjö̧jakobetjö̧.

Tito 1:1

Tito, böja kwialusöjanö ötjö Pablo mikwo̧ma wȩyudö wetakwö. Ötjöma Dios ömöayo̧sa, ja̧danö Jesucristo webawo̧sa. Ötjöma Dios 'da̧batö ujuninökwesa, Dios omudawö ujuninawö̧nö pjabatö chöba̧ja̧do jö̧ba̧lö. Ja̧danö, jobadönö chöba̧ja̧dobe, jwaikwöda Dios yöawi̧ tjösödakobetjö̧. Ja̧danö, isabenö wene tjöwaisakobetjö̧ chöba̧ja̧dadönö. Ja̧danö, Dios ösödi̧danö ja̧bö tjö̧jakobetjö̧ chöba̧ja̧dadönö.

1 Pedro 1:1

Dokwa chömöledö, ötjöma Jesucristo webawo̧ Pedro mikwo̧sa. Ötjöma böja kwialusöja wȩyudö wetaduwakwö, ökwödö Dios omudawö ujuninawö̧ mölejȩ jojodönö. Jau chömöledö, ina böjȩnö kwö̧jaduwijayonö, mölejȩ jojodöja. Ja̧danö ökwödö jelobetenia ju̧kwadönö chiwȩyudobe, Ponto nijinö ju̧kwadönöbi, Galacia nijinö ju̧kwadönöbi, Capadocia nijinö ju̧kwadönöbi, Asia nijinö ju̧kwadönöbi, Bitinia nijinö ju̧kwadönöbi.

2 Pedro 3:9

Ja̧danö ju'wedö jo̧banö tjomukwatobe, Aaa, Duluwo̧ma iteda yöbawö ujuninadanöma juluwanö yemidanö ichö̧kö̧, juluwanö ichatjö̧bö, jö̧ba̧lö tjomukwatobe. Jo̧kwaijayonö, ja̧maökö chömöledö, ökwödö böjȩ jojodönö lȩlö̧jinö edobetjö̧, juluwanöma ichokobe chömöledö. Jau chömöledö, bakwo̧bi Dios lȩebi̧tjö emoböma öpöjöda Duluwo̧ma, okobe deinö sulabenö tjomukwati̧ kabatibö tjöbalewachobö ösödo̧. Ja̧danö jejenö ösödobetjö̧ juluwanöma ichokobe, ju'wedöbi sulabenö tjomukwati̧ kabatibö tjöbalewachakobetjö̧.

Apocalipsis 18:20

Ja̧danö chömöledö, ötjöma mölejȩbe ju̧kwadönö yöta̧lijatö, Kwo̧'wo̧duwi ösöwanö ja̧duwi, jö̧ba̧lö. Ja̧danö, ökwödö Dios ömöledö babibinadönöbi, Jesús webawedönöbi, Dios yöawi̧ yöbawinadönöbi, Kwo̧'wo̧duwi ösöwanö ja̧duwi, jö̧ba̧lö, yöta̧lijatö. Diosma ökwödönö inia tjököbaduwinö ja̧bujunö, balekwa mikwa iyö lȩebajobetjö̧, kwo̧'wo̧duwi ösöwanö ja̧duwi, jö̧ba̧lö yöta̧lijatö jobadönöma.

Apocalipsis 6:10

Ja̧danö, jobadö öwawöködöma labinö Diosnö atjeba̧li̧ cha̧ja̧kwijatö, baikwö: —Duluwo̧ Dios, ökwöma okobe jwiinö webo̧ja, suli̧ jwibo̧ja, jweinö yöba̧lo̧ja. ¿Dokwa lekwe kwite'ada̧lakwa̧da ökwödönö kwabö lobinadönö lȩkeboböma? ¿Dokwa lekwe kwite'ada̧lakwa̧da balekwa mikwa lȩbebö weköbakwa̧ma?—budekwabinö atjeba̧li̧ cha̧ja̧kwijatö.

Apocalipsis 7:15

Jejenö baibinobetjö̧ bidöma, ba̧kwȩlö̧jatebö, mölebi, yö̧tebi Dios ö̧bemi badeibö ja̧nö, jo̧banö ösödö ju̧kwadö. Ja̧danö, Diosma jobadökwö ja̧nö te'ada̧lo̧.