Lucas 18:11 - Dios Iwene

¹¹ Ja̧danö, wainö ja̧nö, fariseo jojoma Diosnö aebinobe baikwö: Dios, ötjöma ju'wedödanöbö̧kö̧chobetjö̧ chösödakwö, otiwa, jö̧ba̧lö. Jau Dios, ju'wedö idöda tjemotö jö̧ba̧lö tjomukwati̧danöma chemotö jöba̧löma omukwatö̧kö̧sa, ja̧danö ju'wedö omöna yötja̧li̧danöma omönama yöba̧lö̧kö̧sa, ja̧danö ju'wedö tji̧lȩkwa̧muböködökwö sulabenö ja̧tji̧danöma chilekwobökujukwö sulabenöma ja̧bö̧kö̧sa. Jau Dios, bite sulabo̧ impuesto ötjabi̧ balada emawa otido̧danöbö̧kö̧chobetjö̧ chösödakwö, otiwa, jö̧ba̧lö.

Lucas 18:11 Iomraidhean Croise

Proverbios 20:6

Ja̧danö, ju'wibi yötawa: Isabenö, ba̧jȩkwadö yötja̧lena ömöledöso̧nö, ökwönö ba̧kwȩlö̧jatebö pjatatakwo̧sa, la'akatjöda chile'dedibökakwo̧sa, jö̧ba̧lö. Jobekwö yötja̧lijayonö omöna yötja̧lena. Isabenö bakwo̧, ba̧kwȩlöjatebö pjatatakwo̧sa, jö̧ba̧lö yöa̧li̧danö badekwachinö i̧sebo̧ma deobe.

Proverbios 30:12

Jojodötjö ju'wedöma idödada, dewadösa, jö̧ba̧lö tjo̧mukwatijayonö sulabenö ja̧tji̧ma söbebö loököwö̧tjobetjö̧ yȩbadöda ja̧dö.

Isaías 1:15

Jo̧kwajabetjö̧, ötjönö abebö kwa̧ja̧kwaduwakobetjö̧, kwömamijuduwi kabebö dekataduwenama, jalachibö jelobekwö edo̧sa, ja̧danö nöinö abeba̧lö ötjönö akebaduwenama, a̧ja̧kwö̧kö̧sa, jojodönö sulabenö kwabö lobajadö, kwömamuduwi̧ tjökwösobu 'yoliwinö kwö̧jaduwobetjö̧.

Isaías 58:2

Wamenö otiwanö ötjönö ösödadö, mölekwena chejube ichibö, weti̧ jawa tjöwaisobö ösödinö isakwadö. Jau, wamenö tji̧sȩbi̧ edö, —Bidöma otiwanö tjösödökwe Dios wei̧ a̧ja̧kwö ju̧kwadötö, tjösödökwe Dios lȩekwa yöawi̧ma ja'yubebi kabatiböködötö, —jö̧ba̧lö jojodö edö tjomukwatena. Ba̧kwelöjatebö chöba a'o ichibö abebadö, ötjöda yötawakwa̧ lȩekwa tja̧ja̧kwobö, ja̧danö ba̧kwelöjatebö chöba a'o tjichibobö ösödadö.

Isaías 65:5

Jobekwö sulabenö ja̧bö tjö̧jijayonö, yayonö otiwadösa jö̧ba̧lö omukwatadö. Otiwadösa jö̧ba̧lö, tjömöledönö yöba̧ladö, —Chö̧jobekwö yöne ichibökönaduwi, ötjöma ökwödötjö bajalekwönönö otiwo̧sa, yȩtekwapji jö̧ba̧lö ichibökönaduwi, —jö̧ba̧lö. Jobekwö sulabenö ja̧bö tjö̧ji̧ma, jwiinö chöpöjöda, ja̧bö tjö̧ji̧ma chi̧su̧nö imiyupjo sulabenö 'dö̧ekwapjodanö 'dö̧ekwi̧, möle baledibanö sulabenö 'dö̧ekwinö ubola ökwöla imiyupjodanö.

Mateo 10:3

Ja̧danö Felipebi, Bartolomébi, Tomásbi, Mateo, la'aka luwo̧ itea balada emö otido̧bi. Ja̧danö Alfeo itji̧ Jacobobi, Tadeobi.

Mateo 5:20

Jau chömöledö, baikwö yötawaduwakwö: Ökwödöma fariseo ötjabiwö̧ ja̧bö tjö̧ji̧tjö, ja̧danö Moisés iwȩyudina ba̧ja̧dadö ja̧bö tjö̧ji̧tjö ökwödöma bajalekwönönö sulabenö ja̧bökönö jwaikwöda otiwanö ja̧bö kwö̧jaduwökötjö̧ma, la'akatjöda Dios la'aka luwo̧ ö̧jakwa̧ tekachaduwökena— jö̧ba̧lö yöawinobe.

Mateo 6:5

Tupakwö yöawinobe Jesúsma: —Ja̧danö, Diosnö akebaduwenama, jobadö dötölatajanö omukwatadö atjebi̧danöma akebaduwa. Jobadöma tjösödobe, judío jojodö ba̧nö tja̧ja̧kwa̧lakwawejubiyatjö jamatö labinö Diosnö atjebobö, ja̧danö ba̧jekwadö jojodö kwetjachemi ö'öbönö ja̧nö, labinö Diosnö atjebobö, böjȩ jojodö Diosnö atjebi̧ tjedobö. Isabenö yötawaduwakwö chömöledö: Atjebaja̧ mikwa baibanöma iyökakwo̧ Diosma otiwanö abebadöja jö̧ba̧löma, ida̧ökö okobe jwiinö atjebaja̧ mikwa tjeminobetjö̧.

Marcos 11:25

Ja̧danö, Diosnö akebaduwonö, jelo̧nö kwo̧'wo̧duwi sulinö kwomukwataduwi̧ma kakatibaduwo. Ja̧danö, ökwödö Kwabe'doduwi mölejȩbe jo̧ma ökwödö sulabenö ja̧köbaduwi̧bi söbebö loakwo̧— jö̧ba̧lijetö Jesúsma.

Lucas 20:47

Jo̧kwaijayonö jejenö otiwadösa jö̧ba̧lö wamenö tji̧sebijayonö, ya̧dö tji̧lȩkwa̧mu wobekwinadö tjitea 'dötjebobe. Ja̧danö Diosnö abebö lekwe atjeba̧lenama, sule jojodöda a̧ja̧kwö tjösödobö atjeba̧lobe. Ja̧danö, jejenö sulabenö ja̧tjiökwe, ju'wedötjö bajalekwönönö isabenö jobadö Moisés iwȩyudina ba̧ja̧dadönö labinö lȩebakobe Diosma— jö̧ba̧lö yöawinobe Jesúsma.

Lucas 22:41

Ja̧danö, jejenö yöbawajo̧, ja'yubenö tupakwönö i̧'yinobe, ödöokobe sule bakwo̧ inawa ikwemi meenanö i̧'yinobe, jo̧dawa'ye Diosnö aebobö. Ja̧danö, u̧yu̧ko̧nö bamatö, Diosnö aebinobe baikwö:

Gálatas 3:10

Jo̧kwaijayonö Moisés iwȩyudina ja̧bö otiwadö batjibobö isakwadöma, Dios lȩebakwawö̧ tjuju̧kwobe chömöledö, Dios iwenema baikwö laebobetjö̧: Okobe jwiinö Dios weina Moisés iwȩyudina'yetjö laebi̧danö ja'yubebi junibökönö ja̧böködöma, Dios lȩebakwawö̧, jö̧ba̧lö laebobe.

Filipenses 3:6

Ja̧danö, ja̧ Moisés iwȩyudina jawa jwaikwöda chösödobetjö̧, Jesúsnö ösödadönö chöpöjödijatö, ja̧danö usula tjemawinö ja̧tijatö chömöledö, jwaikwöda Moisés iwȩyudina jawa isakwö. Jau chömöledö, Moisés iwȩyudina jawama otiwanö ja̧binasa, ja̧danö okobe deinö ötjönö tjomukwato jö̧tja̧linobe, Pabloma wene jwibo̧, okobe jwiinö Moisés iwȩyudina ja̧bo̧ jö̧ba̧lö.

Apocalipsis 3:17

Ökwödöma jelobekwö omukwatö, Ökwödöma luwedösa, okobe jwiinö dösödi̧ tea juna̧ladösa, jö̧ba̧lö, yöka̧laduwijayonö wajwiköbaduwobe, kwo̧'wo̧ luwo̧duwinö jwiinö usula jojodödanöbedöja. Wajwiköbaduwobe, lȩlö̧jino tjedawö̧danöbedöja, kwo̧'wo̧ luwo̧duwinöma. Ja̧danö, jwibadödanöbedöja, tjöbajale tjewawadödanö, kwo̧'wo̧ luwo̧duwinöma. Ja̧danö, kamisi jwibadö kwetjachi̧danöbedöja, kwo̧'wo̧ luwo̧duwinöma. Ja̧danö, kwo̧'wo̧ luwo̧duwinö jwiinö usulasedödanö kwö̧jaduwi̧ma yelösöda wajwibadöja, Otiwanö dö̧ja, jö̧ba̧lö.