Lucas 14:11 - Dios Iwene

¹¹ Jau chömöledö, okobe deinö idöda luwedö batjibobö isakwadöma, mikwawöködö batjibanö ja̧akwo̧ Diosma, ja̧danö okobe deinö mikwawö̧kö̧sa jö̧ba̧lö omukwatadönö, jobadönö mikwawadö batjibanö kabebö ujunakwo̧ Diosma— jö̧ba̧lö yöawinobe Jesúsma.

Lucas 14:11 Iomraidhean Croise

2 Samuel 22:28

Usula jojodö mikwawöködösa jö̧ba̧lö omukwatadönö, tjö̧jibinö pjabato̧ja, jo̧kwaijayonö otiwadösa jö̧ba̧lö omukwatadönö eda̧loja, taba lö̧jawö tjö̧jakobetjö̧.

Diosnö ösödo̧ Job mikwo̧ usula emawina jawa 22:29

—Jau Job, –Otiwadösa, –jö̧ba̧ladönö, nijakwönönö tjötabakwobö juno̧ Diosma, jo̧kwaijayonö, –Mikwawö̧kö̧sa, –jö̧ba̧lö omukwatadönö, tjö̧ji̧binö pjabato̧ Diosma.

Proverbios 15:33

Ja̧danö, ju'wibi yötawa: Bakwo̧, Isabenö Jo̧nö yebabinö omukwatö ö̧jobetjö̧ jweinö omukwatakwawa jawa öwaisachibakwo̧. Jao, Isabenö Jo̧nö yebabinö omukwati̧ma jo̧banö öbibö pjaati̧danö öibobe jo̧banöma, jweinö omukwatö i̧'yobö. Ja̧danö, ju'wibi yötawa, jweinö omukwatö jo̧nöma. Jweinö omukwatö jo̧ma baikwö omukwatobö jo̧be, ötjöma baikwönönö jo̧sa, jö̧ba̧lö. Jobekwö omukwatö ö̧jobetjö̧ jojodöma jo̧banö edö isabenö bitema jweinö omukwato̧, jö̧ba̧lö, tjöwaisachibakwedö.

Proverbios 18:12

Ja̧danö, ju'wibi yötawa: Bakwo̧ itedada omukwatena, ötjödasa ju'wedötjö o̧penönö waiso̧ma, jö̧ba̧lö. Isabenö yötawa: Ötjödasa waiso̧ma, jö̧ba̧lö, omukwato̧nöma Dios lȩebakwo̧, labi̧ jawa baledinö jo̧banöma. Ja̧danö, jelo̧nö yötawa: Bakwo̧ itedada baikwökönö jo̧sa jö̧ba̧lö omukwato̧nöma, jojodö otiwanö tjedakwo̧, otiwanö omukwatö jo̧ jö̧ba̧lö.

Proverbios 25:27

Ju'wibi jwebebö yötawa: Wa̧yo̧ nöinö nȩköboböma sulobe. Ja̧danö, ju'wi jawabi sulobe, jö̧ba̧lö, wanedö yötawa: Bakwo̧ma ömöledönö itenöda otiwanö yöba̧lö tjösödoböda isakwobe. Jao, ömöledöma jo̧banö, otiwanö jo̧ja, jö̧ba̧lö, otiwanö omukwato̧ja, jö̧ba̧lö, waiso̧ja, jö̧ba̧lö yötja̧lobö isakwo̧. Isabenö yötawa: Jobekwö isakwi̧ma sulobe.

Proverbios 29:23

Ja̧danö, ju'wibi yötawa: Bakwo̧ ju'wedönötjö bajalekwönönö otiwanö jo̧sa, jö̧ba̧lö omukwato̧ma ju'wi mölȩ tabakwöda ö̧jakwo̧. Ja̧danö, jelo̧ma ju'wedönötjö baikwönönö jo̧sa, jö̧ba̧lö, ju'wi mölȩ tabakwökönö ö̧jakwo̧. Ja̧danö, jo̧ba baikwönönö jo̧sa jö̧ba̧lö omukwato̧nö edö jojodöma otiwanö tjöwaisachibakwo̧kwo̧, otiwanö omukwato̧, jö̧ba̧lö.

Isaías 2:11

Ja̧ möle Isabenö Jo̧ Diosnöda otiwanö tjomukwatakwedö, —Isabenö Jo̧ Diosda inesö la'aka luwo̧ juluwo̧ma, —jö̧ba̧lö. Babe möle bö̧je jojodöma ju'wedönö edö omukwatadö, —Idöma mikwawöködö, —jö̧ba̧lö, ja̧danö, —Ju'wedötjö bajalekwönö mikwawo̧sa, —jö̧ba̧lö omukwatadö babema. Jo̧kwaijayonö, löji möle okobe deinö jobekwö omukwatadöma tabakwö tjö̧jakwedö, sule Isabenö Jo̧ Diosnöda otiwanö tjomukwatakwedö, —Diosda mikwawo̧ma, —jö̧ba̧lö.

Isaías 2:17

Jobekwö omukwatadö bö̧je jojodöma, jo̧kwaijayonö Dios omudawö ujunina möle badekwachenama, okobe jwiinö ja̧jaye tjomukwati̧ma söbebö loakwo̧ Isabenö Jo̧ma. —Ju'wedötjö bajalekwönönö otiwo̧sa, bajalekwönönö juluwo̧sa, —jö̧ba̧lö tjomukwati̧ma söbebö loakwo̧ Diosma. Ja̧danö ja̧ möle sule Isabenö Jo̧ Diosnöda omukwatö tjösödakwedö, —Isabenö Jo̧ Diosda okobe deinö ju'wedötjö bajalekwönönö bo̧ma, —jö̧balö.

Isaías 57:15

Jau, baikwö yöa̧lobe inesö mööjȩ mölejȩnö jo̧, ba̧kwelöjatebö jo̧, Suli̧tjö Ödö Jo̧ jö̧ba̧lö mikwo̧ Diosma: Ötjöma inesö möemi, suli̧tjö ödö jȩmi jo̧sa. Jo̧kwaijayonö ju'wibi, bakwo̧ sulabenö ja̧bina, o̧'wo tjo̧bekwö, —Sulabo̧ mikwawö̧kö̧sa, —jö̧ba̧lo̧kwöbi jo̧sa. Jo̧bajayo̧kwö jo̧sa, o̧'wo ujuluwachibanö pjatatakobetjö̧, sulabenö omukwataja̧ kabatibö balewachajo̧nö omajade ujuluwachibanö pjatatakobetjö.

Mateo 23:12

Jau chömöledö, okobe deinö idöda luwedö batjibobö isakwadöma, mikwawöködö batjibanö ja̧akwo̧ Diosma, ja̧danö okobe deinö mikwawö̧kö̧sa jö̧ba̧lö omukwatadönö, jobadönö mikwawadö batjibanö kabebö ujunakwo̧ Diosma— jö̧ba̧lö yöawinobe Jesúsma.

Lucas 1:51

Iteda ujulu i̧sebö Diosma jojodö edajitjökö jawa öwawinö i̧sebajabe. Diosma tjomajadenö, Otiwadösa, jö̧ba̧lö omukwatadönö jelobetenia a'dewö loajabe,

Lucas 1:52

ja̧danö la'aka luwedönö luwedö ba̧kwawakatjö meatö loajabe, jo̧kwaijayonö, Mikwawöködösa jö̧ba̧lö omukwatadönö kabebö ujunajabe Diosma, Bidöma otiwadö, jö̧ba̧lö.

Lucas 14:12

Ja̧danö, Jesúsma jo̧banö ukwobö a̧debajo̧nö jö̧a̧linobe: —Jojodö ichö tjukwobö kwa̧debena, ja̧danö pjiesta kwujunenama, kwömöledönö, ja̧danö kwöja̧wo̧dönö, ja̧danö kwipjeanö ju̧kwadö nöinö juna̧ladönö kwa̧deboko. Baikwö yötawa: Ökwö kwujuna̧li̧danö nöinö juna̧ladönöda kwa̧debitjö̧ma, balekwa mikwa ökwönöbi tja̧debakobe, tjejube ichö kwukwobö, ¿jö̧tö? Ja̧danö, jejenö tja̧debobetjö̧ Diosma kwa̧debaja̧ omukwatö ökwönö mölejȩbetjö iyobö omukwatökena, ida̧ökö balekwa mikwa jo̧banöbi tja̧debajabe jö̧ba̧lö.

Lucas 18:14

Isabenö yötawaduwakwö, jejenö aebiökwe Diosma jo̧ba impuesto ötjabi̧ balada emawa otido̧ usula söbebö loinobe, ja̧danö jobetjö ȩwa̧jenama, sulabe jwibö ȩwa̧jinobe. Jo̧kwaijayonö sulabe jwiböma ȩwa̧jinokobe jelo̧ abebo̧ fariseo jojoma chömöledö. Otiwo̧sa jö̧ba̧lö omukwatijayonö isabenö otiwo̧inokobe, Diosma usula söbebö loinokobetjö̧. Jau chömöledö, okobe deinö otiwadösa jö̧ba̧lö omukwatadönöma, otiwöködö tjö̧ji̧ i̧sebakobe Diosma, ja̧danö sulabedösa jö̧ba̧lö omukwatadönöma Diosma i̧sebakobe, chedemi bidöma otiwadö, jö̧ba̧lö— Jejenö wanedö yöawinobe Jesúsma, Diosma tjusula waisadönö pjabato̧ jö̧ba̧lö.

Santiago 1:9

Ja̧danö, ökwödö chö̧ja̧wo̧dötjö böjȩ jawa jwibadönö, usulasedö, jö̧ba̧lö, ötjabiwö̧nö yötawaduwakwö. Ökwödöma jwiköbaduwobetjö̧ kwö̧jaduwi̧ma waiya, yelösöda. Jo̧kwaijayonö, ¡Ökwödöwe, usulasedösa! jö̧ba̧lö, kwomukwataduwoko chö̧ja̧wo̧dö. Ju'wi kwomukwataduwobö jo̧be, biya̧: Diosma ökwödönö möakwö kabebö edö yöa̧lobe, Bidöma jwiinö mikwawadö, jö̧ba̧lö. Chö̧ja̧wo̧dö böjȩ jawa jwiköbaduwijayonö kwo̧'wo̧duwi ösöwanö, Dios i̧tji̧mudobetjö̧ jwiinö mikwawadösa, jö̧ba̧lö, omukwatö kwö̧jaduwo.

Santiago 4:10

Ja̧danö, isabenö omukwataduwi, Ökwödöma luwedöböködösa, sulabedösa, mikwawöködösa, juluwöködösa, jö̧ba̧lö. Ja̧danö, Dios pjaati̧kwöda dujulu juna̧ladösa, jö̧ba̧lö, omukwataduwi. Jejenö jweinö kwomukwataduwiökwe Duluwo̧ Diosma ökwödönö kwo̧'wo̧ luwo̧duwi okwanö möakwö kaebi̧danö kabebö öwanakwo̧, Bidöma isabenö jwiinö mikwawadö, jö̧ba̧lö.

Santiago 4:6

Jo̧kwaijayonö Diosma ökwödönö pjaatobö juluwo̧ ökwödö dösödi̧da omukwatö junibö dö̧jobö. Chö̧ja̧wo̧dö, Diosma ökwödönö pjabatö ujuluwobe ökwödö sulabe dösödi̧ma. Isabenö chö̧ja̧wo̧dö, Dios pjaati̧ma ökwödö sulabenö dösödi̧tjö o̧penönö juluwobe. Jejenöobetjö̧ Dios iwenetjö baikwö laebobe: Diosma, Luwedösa, jö̧ba̧lö, omukwatadönö ölakwabikwawö jo̧. Jo̧kwaijayonö, Jo̧kwadabedösa, jö̧ba̧lö omukwatadönö lȩlö̧jinö pjabato̧. Jejenö laebobe Dios iwenema. Chö̧ja̧wo̧dö, Luwedösa, jö̧ba̧lö, domukwataduwoko. Jejenö omukwatökönö dö̧jiökwe Diosma lȩlö̧jino edö pjaatakwo̧.

1 Pedro 5:5

Ja̧danö ökwödö te'ada̧lakwawa luwedötjö ina möayedödanö ju̧kwadöma damöbedönö kwa̧ja̧kwaduwo. Ja̧danö, okobe deinö ökwödönö baikwö yötawa, möayedödanö te'ada̧lakwawa luwedönöbi, damö te'ada̧lakwawa luwedönöbi: Te'ada̧lakwawa luwedö kwö̧jaduwijayonö, labinö webökönö bakwo̧nökwena pjabatakwawö kwö̧jaduwo, chömöledö tjömöayo̧danöbo̧sa jö̧ba̧lö. Jau chömöledö, jejenö omukwatö kwö̧jaduwobö jo̧be, Dios iwene baikwö laebobetjö̧: Diosma otiwadösa jö̧ba̧lö omukwatadönö ölakwabikwawö ö̧jobe, jo̧kwaijayonö otiwadösa jö̧ba̧lö omukwatöködönö lȩlö̧jinö pjabato̧, jö̧ba̧lö.

1 Pedro 5:6

Ja̧danö, jejenö jo̧betjö̧, Diosda juluwo̧ma, ökwödöma sule jo̧ba ömöayedösa jö̧ba̧lö kwö̧jaduwo chömöledö, ja̧danö iteda omukwatö ujunina möle badekwachenama, jo̧bada ökwödönö kabebö ujunakobe, Bidöma otiwadö, jö̧ba̧lö.

1 Samuel 15:17

Ikenama Samuelma Saulnö yöawinobe Isabenö Jo̧ Saulnö yöa̧li̧ma: —Ajayinö kwomukwatinobe, ökwödada, ju'wedö israel jojodötjö baikwönönöbo̧sa jö̧ba̧lö. Jo̧kwaijayonö israel jojodö bakwasokwena jojodö la'aka tjuluwo̧ babibinaja, ¿jö̧tö? Jau, Isabenö Jo̧ma ökwönö omudawö ujuninobe, Israel jojodötjö inesö la'aka luwo̧ bakibanö.