Lucas 11:49 - Dios Iwene

^49-50 Jo̧kwajabetjö̧ Diosma itedada waisanö omukwatö yöa̧linobe: Yötawi̧ yöbawadönöbi, chömöayedö ötjö webawedönöbi wetocha, ja̧danö jobadötjö ju'wedönö kwabö lotjakobe, ja̧danö ju'wedönö usula tjemawinö ja̧tjakobe, jö̧ba̧lö. Jejenö omukwatö ujuninobe Diosma, iteda ömöayedö ökwödö babe möle ju̧kwadönö yötjawobö, ja̧danö jobadönö kwabö loköbaduwakobe. Jejenö kwabö loköbaduwiökwe, isabenö Dios lȩebakwawö̧ja. Jau isabenö Dios lȩebakwawö̧ja, kwa'dödö ja̧tjinadanö ja̧köbaduwiökwe okobe deinö Dios yöawi̧ yöbawadönö kwabö lotjiökwe Dios lȩebakwa̧ma ökwödö babe möle ju̧kwadönö badekwachakobe,

Lucas 11:49 Iomraidhean Croise

Mateo 22:6

Ja̧danö, ju'wedöma jobadö la'aka luwo̧ ömöayedönö do̧batö kwakwatjinobe, ja̧danö jobadönö kwabö lotjinobe.

Lucas 11:48

Jejenö ja̧bö kwi̧sebaduwobe ökwödöma kwa'dödö sulabenö ja̧tjina bakwainö sulabenö ja̧badöja jö̧ba̧lö. Jau, lödawado̧ otidö bakobe kwa'dödökwö kwotidaduwobe, jobadö kwabö lotjinawö̧nö lödawemi kwotidaduwobetjö̧.

Lucas 24:47

Ja̧danö ju'wibi tjiwȩyudinobe: Okobe deinö sulabenö tjomukwati̧ kabatibö balewachö Dios weakwo̧ jö̧a̧linökwenö ösödadönöma, tjusula söbebö loakwo̧ Diosma jö̧ba̧lö yötjawobö ja̧kobe. Ja̧ yötjawakwa̧ma, Jerusaléntjö jamatö böjȩ bakwameachibanö baibanö yötjawobö ja̧kobe, jö̧ba̧lö laebobe damötjö tjiwȩyudinama.

Juan 16:2

Jau, inia tjököbaduwinö baledakobe ökwödönöma. Kwömöledöduwi judío jojodöma jobadökwö ba̧nö kwa̧ja̧kwa̧laduweju tekachaduwoböma wetjökakobe, ötjönö ösödö kwö̧jaduwobetjö̧. Yelösöda ja̧ mölema jojodöma ökwödönö kwabö lotjakobe, Diosma jejenö kwabö lodobö ösöda, jö̧ba̧lö, tjomukwatobetjö̧.

Hechos 1:8

Jo̧kwaijayonö biya̧da, kwöwaisaduwobö yötawa. Ökwödöma Dios ujulu kwujuna̧laduwakobe, Dios O̧'wo̧ Luwo̧ ökwödö kwo̧'wo̧ luwo̧duwinö tebachibö öjamataja̧ ikena. Ja̧danö, ötjö yötawina wenema otiwanö yökawaduwakwedöja. Bemi Jerusalénnöbi, ju'wi okobe jwiinö Judea nijinöbi, Samaria nijinöbi yökawaduwakwedöja. Jelobe jelobebi böjȩ bakwameachibanö yökawaduwakwedöja— jö̧ba̧lijetö Jesúsma öba̧ja̧di̧ waisachadönöma.

Hechos 11:27

Ja̧danö, Bernabé, Saulo Antioquíanö tjuju̧kwena Dios yöawi̧ yöbawadöma ju'wi möle ju'wedö, ju'wi möle ju'wedö Jerusaléntjö Antioquíabe 'yi̧jadötö.

Hechos 22:20

Ja̧danö, Estebannö, inawiyanö tjikwawökwe ö'wöchobe edö jwiinö chösödijatö, jo̧banö ikwawadö tjökamisi te'ada̧lö ja̧nö, jö̧ba̧lö, yötawijatö Chuluwo̧nö.

Hechos 7:57

Jejenö jö̧a̧liawö̧ jobadö la'aka luwedöma, labinö jwöbeba̧lö, Da̧ja̧kwökö, jö̧ba̧lö, tjölakiyubiya tumatakwawijadötö. Ikenama Esteban ö̧jobekwö bakobe ö'öbakwawijadötö.

Hechos 8:3

Ikenama Sauloma jwiinö öpöjödijetö Jesúsnö ösödadönöma. Tjejubiya techawö do̧batibö tötöbö öbibö ka̧lena ba̧kwawejube tje'ewobö webiabijetö Sauloma.

1 Corintios 1:24

Jo̧kwaijayonö, Dios jwöinawö̧ma, judío jojodötjöbi, judío jojodöböködötjöbi Dios jwöinawö̧ma, döpöjödokobe ja̧ wenema. Ökwödönö ja̧ Cristo jawa wenema Dios ujulu i̧sebobe, ja̧danö Dios waisanö omukwati̧ i̧sebobe.

1 Corintios 1:30

Ja̧danö, Diosma ökwödönö Cristo Jesúskwö bakobe bakibaduwanö ja̧inobe. Ja̧danö Diosma Cristonötjö iteda öwaisi̧ waisakwawa ji̧ma ökwödönö iyobe. Jau chömöledö, Cristoda sulabe jwibadö badibanö ja̧binama, ja̧danö Cristoda Dios ömöledö badibanö ja̧binama, ja̧danö Cristoda dö̧jibobö midawö wobinama.

Efesios 4:11

Chömöledö, jo̧bama, mölejȩbe kabekwajinama, damötjö Dios iwenenö iwȩyudinökwe. Jo̧ba iwȩyudinökwe iyabinadanö, otiwa jawa iyabijetö. ¿Dakwö yöawobeda, otiwa jawa iyabijetö, jö̧ba̧löma? Biya̧ chömöledö: Cristoma jo̧banö ösödadönöma bakwo̧nökwena wainökwena jelo̧nö ju'wi, jelo̧nö ju'wi, tjo̧'wo̧ luwo̧ jawa tjotidawakwena iyabinobe, jojodönö pjabatö, Dios wei̧ tjotidobö. Jo̧banö ösödadötjö ju'wedönöma 'da̧batö ujuninobe iteda weawö̧ batjibinö ja̧bö. Ja̧danö, ju'wedönö 'da̧batö ujuninobe Dios iwene yötjawobö Jesúsnö ösödadönö. Ja̧danö, ju'wedönö ji̧bakwawa wene yötjawobö 'da̧batö ujuninobe. Ja̧danö, ju'wedönö Jesúsnö ösödadönö tjite'ada̧loböbi, tjöba̧ja̧doböbi 'da̧batö ujuninobe Cristoma.

Colosenses 2:3

Jo̧ba Cristoda okobe jwiinö jojodö ajayinö wajwitjina jawa waiso̧ma, jo̧batjö waisanö omukwatakwawabi, ja̧danö waisakwawabi döwaisachibo jö̧ba̧lö.

Apocalipsis 16:6

Bidö lȩkebawö̧ma, ökwö kwömöledö babibinadönö kwabö lobinadö. Ja̧danö, ökwö yökawi̧ yöbawinadönö kwabö lobinadö. Yelösöda, bidö lȩkebawö̧ma, ökwö kwömöledönö tjökwösobu ebawinö kwabö lobinadö. Jo̧kwaobetjö̧, ökwöma otiwanö balekwa mikwa ja̧köbajabe jobadönöma, tjökwösobuda tjowobö— ángel Diosnö yöa̧lobe cha̧ja̧kwijatö.

Apocalipsis 18:20

Ja̧danö chömöledö, ötjöma mölejȩbe ju̧kwadönö yöta̧lijatö, Kwo̧'wo̧duwi ösöwanö ja̧duwi, jö̧ba̧lö. Ja̧danö, ökwödö Dios ömöledö babibinadönöbi, Jesús webawedönöbi, Dios yöawi̧ yöbawinadönöbi, Kwo̧'wo̧duwi ösöwanö ja̧duwi, jö̧ba̧lö, yöta̧lijatö. Diosma ökwödönö inia tjököbaduwinö ja̧bujunö, balekwa mikwa iyö lȩebajobetjö̧, kwo̧'wo̧duwi ösöwanö ja̧duwi, jö̧ba̧lö yöta̧lijatö jobadönöma.