Lucas 11:27 - Dios Iwene

²⁷ Jesús ina jejenö wanedö yöawonö, jojodötjö bakwuju labinö yöja̧linobe baikwö: —Isabenö otiwanö Dios pjaatoko kwojo'donöma, isujuda jukwa'wotjö ökwönö jeminobetjö̧, ja̧danö isujuda jo̧do'bi̧tjö ökwönö jojwinobetjö̧. Ökwöda kwojo'do jö̧jobö Dios iyinobetjö̧, isabenö Dios otiwanö pjaatoko kwojo'donöma— jö̧ba̧lö.

Lucas 11:27 Iomraidhean Croise

Proverbios 23:25

Jo̧kwaobetjö̧ chitji̧, otiwanö omukwatö kwö̧jo, ötjö kwabe'do, ja̧danö kwojo'do do̧'wo̧ ösöwanö dö̧jakobetjö̧. Jao, ökwönö eminujuma jwiinö jo̧'wo̧ ösöwanö jö̧jakwuju otiwanö omukwatö kwö̧jobetjö̧.

Lucas 1:28

Gabrielma jobujunö öwawachinobe, ja̧danö öwawachö yöawinobe: —Dios otiwanö pjaatokoja María, dokwa. Diosma isabenö ökwökwö jo̧— jö̧ba̧lö.

Lucas 1:42

ja̧danö Dios O̧'wo̧ Luwo̧ jo̧'wo̧ luwo̧nö yöawioko, Elisabetma labinö yöja̧linobe Maríanö: —Isabenö ju'wedö ya̧dötjö bajalekwönönö Dios otiwanö pjaatokoja, María, ja̧danö isabenö Dios pjaatökwenö kwemakwo̧ kwitji̧nöma.

Lucas 1:48

Diosma ötjö jo̧ba ömöayuju mikwawökujunö lȩlö̧jinö edobetjö̧. Ja̧danö jejenö lȩlö̧jinö ötjönö edobetjö̧, tupakwö bajalenö okobe deinö tji̧tji̧mu tupadanö jojodöma ötjönö ötjabikobe, Dios otiwanö pjaatinoko jö̧ba̧lö.

Lucas 11:26

Jejenö badekwajo̧, ömöledö ju'wedö tjo̧'wo̧ luwo̧nö sulabedönö jelemutjö du̧ju̧tajabedönö isakwena, itedatjö bajalekwönönö sulabedönö, ja̧danö jobadönö öbibö, yemidanö ajayinö ö̧jinökwe o̧'wo̧ luwo̧nö teachibena. Jejenö baibitjö̧ma, jejenö tjö̧jökwema ajayinö usula emawö ö̧jinatjö bajalekwönönö yelösöda nöinö usula emawakwo̧, ¿jö̧tö?— Jejenö wanedö yöawinobe Jesúsma jo̧banö öpöjödadönö, Isabenö ajayitjö bajalekwönönö usula tjemawakwedö, jö̧ba̧lö.

Lucas 23:29

Jau chömöledö, isabenö usula kwemawaduwakwedöja ökwödöbi kwi̧tji̧muduwibi. Baikwö yötawa: Ja'yubenö lekwajabetjö Jerusalénnö ju̧kwadöma jwiinö usula tjemawobetjö̧, yötja̧lakobe: Isabenö tjo̧'wo̧ ösöwanö ju̧kwadöma tji̧tji̧munö la'akatjöda emöködöda, ja̧danö la'akatjöda tji̧tji̧munö o̧do'bi̧ ojwöködöda, jobadöda tji̧tji̧mu usula tjemawobe tjedokobetjö̧, jö̧ba̧lö usula emawö yötja̧lakobe.