Lucas 1:30 - Dios Iwene

³⁰ Jemi ikenama tupakwö yöawinobe ángelma jobujunö baledakwa̧: —Yebabökönuwi, María. ¡Diosma isabenö lȩlö̧jinö edakwö ökwönöma!

Lucas 1:30 Iomraidhean Croise

Génesis 6:8

Jejenö jö̧a̧lijayonö bakwo̧, Noé mikwo̧nö ösödö lȩlö̧jinö edijetö Isabenö Jo̧ Diosma.

Isaías 41:10

Yekabiduwoko ökwödö israel jojodö, ötjöda ökwödökwö jo̧chobetjö̧, ja̧danö kwo̧'wo tjo̧bekwö kwö̧jaduwoko, ötjöda kwösödaduwökwe Dioschobetjö̧. Jau, ötjöda kwujuluwaduwachibanö pjatatakwo̧sa, meköbaduwapji jö̧ba̧lö, ötjöda chömamu juluwamu chöwaisobekwöchobesamunö do̧balö pjatatakwo̧sa.

Isaías 41:14

Ökwödö Israel jojodöma, yekabiduwoko. Ökwödö Jacob itji̧mu tupadanö jojodöma, sa̧dö juluwöködö kwichejekwaduwijayonö, yekabiduwoko. Jau chömöledö, —Ötjödasa ökwödönö pjabato̧ma, —jö̧ba̧lö ötjö Isabenö Jo̧ma yötawaduwakwö, ökwödönö kwö̧jibaduwinö pjabato̧ma, ötjö Israel jojodö tjösödökwe Suli̧ Jwibo̧ Diosda, jo̧kwajabetjö̧ yekabiduwoko.

Isaías 44:2

Ötjö Isabenö Jo̧ma, ökwödönö otidinasa, ina kwojo'do jukwa'wo okwa kwö̧jaduwayi, ökwödönö dadö otidinasa. Ju'wibi ökwödönö otidajo̧, ökwödönö pjabatö jo̧sa chömöledö, ja̧danö babema baikwö yöta̧laduwakwö: Chömöayedö Jesurun ötabiwö̧ Jacob itji̧mu tupadanö jojodö, ötjöda omudawö chujuninawö̧, yekabiduwoko, isabenö ökwödönö pjatatakobetjö̧.

Mateo 14:27

Jo̧kwaijayonö Jesúsma juluwanö yöawinobe: —Juluwachibaduwi. Ötjöma Jesússa. Yebabökönaduwi— jö̧ba̧lö yöawinobe.

Mateo 28:5

Jo̧ba ángelma ya̧dö ichajadönö yöawinobe: —Yebabökönaduwi. Chöwaisa, towisa'onö bȩtjinökwe Jesúsnö edö kwichaduwajabe,

Lucas 1:13

Jejenö yeabiökwe, ángelma jo̧banö yöawinobe: —Yebabökönuwi Zacarías, akebiökwe Diosma isabenö akebi̧ a̧ja̧kwinobetjö̧. Ja̧danö, akebi̧danö kwilekwo Elisabetma kwitji̧nö jemakobe, ja̧danö kwitji̧nö Juan jö̧ba̧lö kwimidakobe.

Lucas 12:32

Jejenö jo̧be, jo̧kwajabetjö̧ ökwödö cha̧jwi̧mu chite'ada̧lawö̧ o̧bȩja̧dödanöbedönö baikwö yöta̧la: Yekabiduwa, Kwabe'doduwi Diosma otiwanö ökwödönö iyobö ösödobetjö̧. Jau chömöledö, Kwabe'doduwima isabenö otiwanö ökwödönö iyobö ösödo̧, ja̧danö jejenö iyobö ösödobetjö̧ iteda la'aka luwo̧ ö̧jenabi ökwödönö iyakobe. Jo̧kwajabetjö̧, jwidena jö̧ba̧lö yekabiduwobö jwiobe yelösöda chömöledö, Diosma isabenö otiwanö ökwödönö te'ada̧lö iyakwo̧, jö̧ba̧lö.

Hechos 27:24

baikwö yöawatö: Pablo, yekabi. Ina debö kwebachö̧kö̧ja. Isabenö ökwöma Roma la'aka luwo̧ César öba a'otjö kwö̧jakobe. Ja̧danö, Diosma ökwönö lȩlö̧jino edö, ökwönöbi ökwökwö kwebachadönöbi pjaatakobe, kwö̧jibaduwinö ja̧bö. Jejenö yöawatö Dios weajökwe ángelma.

Romanos 8:31

Chömöledö, biya̧ babeda yötawaja̧ omukwatö, ökwödönö suli̧ waedo̧ma bakwo̧bi deobe ichejekwa. Diosda ökwödönö pjabato̧obetjö̧, bakwo̧bi deobe ökwödönö suli̧ waedo̧ma chömöledö.

Hebreos 13:6

Ja̧danö, Diosma ökwödökwö ba̧kwȩlö̧jatebö ö̧jobetjö̧ yebabökönö dö̧jobö jo̧be. Baikwö laebobe Dios iwenetjö: Ötjönö pjabato̧ma Duluwo̧da. Jo̧bama ötjönö pjaatobetjö̧ yebabökönö jo̧sa. Ja̧danö pjaatobetjö̧ jojodö ötjö inia tjötobö ja̧tjijayonö yebabökönö jo̧sa. Jejenö laebobe Dios iwenetjö. Ja̧danö chömöledö, ökwödöma domajadenö isabenö döwaisobö jo̧be, Chuluwo̧ma ötjökwö ba̧kwȩlö̧jatebö ötjönö pjabatö ö̧jobetjö̧ ötjönö baledi̧ yebabökönö jo̧sa, jö̧ba̧lö.