Jueces 7:2 - Dios Iwene

² Ja̧danö, Isabenö Jo̧ma Gedeonnö yöawinobe, —Ökwökwö ju̧kwadö israel jojodötjö ölakwabikwawadöma, yelösöda ba̧jȩkwadö tjö̧jobe. Chedemi ba̧jȩkwadökwö kwölakwabikwawaduwitjö̧ma, israel jojodöma ötjö chujulu tjo̧mukwatökena, idöda tjujulu tjomukwatena, –Juluwadödobetjö̧ dujuluwajabe, –jö̧ba̧lö. Jejenö tjomukwatapji jö̧ba̧lö, ba̧jȩkwadönö öbibö kwölakwabikwawobö chöpöjöda.

Jueces 7:2 Iomraidhean Croise

Génesis 46:2

Ikenama yö̧te ja'ö Israelma a̧ja̧kwijetö jo̧banö Dios jwöi̧ma: —Jacob, Jacob— jwöbijetö. Jwöökwe atadijetö: —Bena chö̧ja— atadijetö.

Isaías 10:13

Jau, isabenö sulabenö omukwatö yöba̧lo̧ Asiria la'aka luwo̧ma, ötjöda jo̧ba ujuluwobö chiyinajayonö, ötjönö omukwatökönö iteda jawa yöba̧lo̧, baikwö: –Ötjöda juluwo̧chobetjö̧, chujuluwajabe, ja̧danö ötjöda waisanö omukwatö, okwa jawa waisanö chomukwatobetjö, chujuluwajabe. Ötjöda chujulunö sasokwena jojodö tjitebotenia bakwachobema söbebö lotajabe, ja̧danö nöinö mikwawi̧ jawa 'da̧batö tjujunina jawa 'döbebo̧sa, ja̧danö pakayaso̧ juluwo̧ ichejekwinö, inesö la'aka luwedö tjiteakanö ba̧jadönö töbö meatö lobo̧sa.

Isaías 2:11

Ja̧ möle Isabenö Jo̧ Diosnöda otiwanö tjomukwatakwedö, —Isabenö Jo̧ Diosda inesö la'aka luwo̧ juluwo̧ma, —jö̧ba̧lö. Babe möle bö̧je jojodöma ju'wedönö edö omukwatadö, —Idöma mikwawöködö, —jö̧ba̧lö, ja̧danö, —Ju'wedötjö bajalekwönö mikwawo̧sa, —jö̧ba̧lö omukwatadö babema. Jo̧kwaijayonö, löji möle okobe deinö jobekwö omukwatadöma tabakwö tjö̧jakwedö, sule Isabenö Jo̧ Diosnöda otiwanö tjomukwatakwedö, —Diosda mikwawo̧ma, —jö̧ba̧lö.

Isaías 2:17

Jobekwö omukwatadö bö̧je jojodöma, jo̧kwaijayonö Dios omudawö ujunina möle badekwachenama, okobe jwiinö ja̧jaye tjomukwati̧ma söbebö loakwo̧ Isabenö Jo̧ma. —Ju'wedötjö bajalekwönönö otiwo̧sa, bajalekwönönö juluwo̧sa, —jö̧ba̧lö tjomukwati̧ma söbebö loakwo̧ Diosma. Ja̧danö ja̧ möle sule Isabenö Jo̧ Diosnöda omukwatö tjösödakwedö, —Isabenö Jo̧ Diosda okobe deinö ju'wedötjö bajalekwönönö bo̧ma, —jö̧balö.

Daniel 4:30

Ja̧danö, edö, yöa̧linobe itedada, isabenö biya̧ inesö otiwobe comunidad Babiloniama, ötjöda otiwanö chotidajabe, yöbawö weti̧ comunidad baibanö. Ötjöda chujulunö otiwanö chotidajabe, chujulu otiwanö öwawobö, okobe deinö edö ötjönö tjöwaisobö, Nabucodonosorma isabenö jwiinö juluwo̧ jö̧ba̧lö, yöa̧linobe Nabucodonosorma itedada.

Romanos 11:18

Jo̧kwaijayonö, omukwatökönaduwi, Aaa, Dios tjebö loinawö̧nötjö o̧penönö otiwadösa, jö̧ba̧lö. Aaa, otiwadösa, jö̧ba̧lö kwomukwataduwoböma jwia chömöledö. Baikwö wanedö yötawa: Towi bö'diama, towi öjabiyatjö i̧dȩlu̧ emokobe, ¿jö̧tö? Sule towi öjabiyada towi bö'diatjö i̧dȩlu̧ emobe, ¿jö̧tö? Ja̧danö, ökwödöma towi öjabiyadanö ichejekwadöja, towi bö'diadanömaökö. Jo̧kwajabetjö̧, Aaa, otiwadösa, jö̧ka̧laduwoböma jwia chömöledö.

Romanos 3:27

Ja̧danö, bakwo̧, Aaa, otiwo̧sa, ¿jö̧a̧loböma jo̧beji̧? Jwiobe yelösöda chömöledö. Bakwo̧bi deobe iteda ja̧bö suli̧ jwibo̧ baiboböma, bakwo̧bi Dios weina ja̧bo̧ma deobetjö̧. Okobe deinö Jesúsnö ösödöda ichibadö chömöledö. Jo̧kwajabetjö̧ bakwo̧bi ötjöma otiwo̧sa jö̧a̧loböma jwiobe yelösöda, iteda ja̧bö suli̧ jwibo̧ baibokobetjö̧.

2 Corintios 4:7

Chömöledö, ökwödöma ja̧ inesö mikwawi̧ wene yöbawadösa, jo̧kwaijayonö juluwöködösa chömöledö, sule letiatjö Dios dadö otidinawö̧sa, ¿jö̧tö? Ja̧danö, ökwödöma juluwöködö dö̧jijayonö, inesö mikwawi̧ Jesús jawa wene yöbawadösa chömöledö. Jau chömöledö, jojodö tjomukwatena, sule juluwadöda mikwawi̧ wene yötjawobö jo̧be jö̧ba̧lö, jo̧kwaijayonö jojodö tjomukwati̧danöma omukwatö̧kö̧ Diosma chömöledö, juluwadönöma webö̧kö̧. Jau chömöledö Diosma ökwödö juluwöködönöda yödawobö ujuninobe, juluwöködöda yötjawitjö̧ma, ötjöda inesö chujulu öwawakobe jö̧ba̧lö.

Efesios 2:9

Jau chömöledö, ökwödöma ja'yubebi kwö̧jibaduwoböma ja̧köbakwawinaduwokobe. Bakwo̧bi deobe, iteda ujulunö, ö̧jibobö ja̧bawakwawo̧ma. Deobe yelösöda, Ötjöma otiwanö ja̧bö chö̧jobetjö̧ chö̧jibanö ja̧bawakwawo̧sa, jö̧ba̧lo̧ma. Jejenö jö̧a̧loböma jwiobe.

Deuteronomio 32:27

Jo̧kwaijayonö, bakobe israel jojodönö söbebö lotitjö̧ma, tjöpöjojodöma idöda tjujulu tjomukwatena, –Isabenö Jo̧ma israel jojodönö lȩebinokobe, ökwödöda dujulunö jobadönö söbebö lodajabe, –jö̧ba̧lö. Jo̧kwajabetjö̧, tjöpöjojodö jejenö juluwadösa jö̧ba̧lö tjomukwatapji jö̧ba̧lö, bakobenö söbebö lotokobe israel jojodönö, –jö̧ba̧lö laebobe, Dios israel jojodönö dameakwö yöa̧li̧ma.

Deuteronomio 8:17

—Chömöledö, kwomukwataduwoko, –Aaa, nöinö chujuna̧li̧ma, ötjöda chujuluwobetjö̧, ötjöda chujulunö otiwanö nöinö juna̧lo̧ batibajabe, –jö̧ba̧lö.

Deuteronomio 8:18

Baikwö jweinö kwomukwataduwo jö̧ka̧laduwi̧ yötawaduwakwö chömöledö, –Otiwanö chujuna̧li̧ma chuluwo̧ Isabenö Jo̧ Diostjö ichi̧, –jö̧ba̧lö. Jau chömöledö, kwuluwo̧duwi Diosma damötjö da'dödönö yöbawö ujuninobe, ökwödönö pjaatakwa̧ma, ja̧danö jejenö yöbawö ujunina badekwachakobetjö̧, babe inesö otiwanö pjaati̧ ökwödönö pjaatobe.

Santiago 4:6

Jo̧kwaijayonö Diosma ökwödönö pjaatobö juluwo̧ ökwödö dösödi̧da omukwatö junibö dö̧jobö. Chö̧ja̧wo̧dö, Diosma ökwödönö pjabatö ujuluwobe ökwödö sulabe dösödi̧ma. Isabenö chö̧ja̧wo̧dö, Dios pjaati̧ma ökwödö sulabenö dösödi̧tjö o̧penönö juluwobe. Jejenöobetjö̧ Dios iwenetjö baikwö laebobe: Diosma, Luwedösa, jö̧ba̧lö, omukwatadönö ölakwabikwawö jo̧. Jo̧kwaijayonö, Jo̧kwadabedösa, jö̧ba̧lö omukwatadönö lȩlö̧jinö pjabato̧. Jejenö laebobe Dios iwenema. Chö̧ja̧wo̧dö, Luwedösa, jö̧ba̧lö, domukwataduwoko. Jejenö omukwatökönö dö̧jiökwe Diosma lȩlö̧jino edö pjaatakwo̧.

1 Samuel 14:6

Ja̧danö, Jonatanma iteda ömöayo̧ ölakwabikwawa jawa kwebato̧nö yöa̧linobe, —Yai tupakwö idö Diosnö ösödöködö tjötade bajalesado̧ 'wibekwöködö tjöjobe di̧'yaduwo. Jobe di̧'yitjöma, Isabenö Jo̧ma ökwödönö pjaatena, isabenö juluwo̧obetjö̧. Du̧ju̧tajada tjö̧jitjö̧böbi, ba̧jekwadö tjö̧jitjö̧böbi bakwaiobe Diosnöma, jo̧bama isabenö juluwo̧, dö̧jibanö pjaatobö, —jö̧ba̧lö yöa̧linobe Jonatanma.