Jueces 6:34 - Dios Iwene

³⁴ Jejenö tjichibiökwe, Isabenö Jo̧ o̧'wo luwo̧ma Gedeonkwö ichibinobe, ja̧danö Gedeonma trompeta pjuinobe, Dios pjaatonö döpöjojodönö dölakwabikwawo, jö̧ba̧lö.

Jueces 6:34 Iomraidhean Croise

1 Crónicas 12:18

Jobekwö yöa̧liökwe, Dios O̧'wo Luwo̧ma treintabedötjö luwo̧ Amasai mikwo̧kwö ichibinobe, ja̧danö Dios O̧'wo Luwo̧ weonö yöa̧linobe: —Duluwo̧ Isai itji̧ David, ökwödöma ökwöda kwömöledösa, isabenö ökwönö pjadatobö jö̧ba̧ladösa. Jau David kwuluwo̧ Diosma isabenö ökwökwö pjabatö jo̧, jo̧kwajabetjö ökwönöbi, okobe deinö ökwönö pjabatadönöbi Dios pjaatobö dösöda, —jö̧ba̧lö atadinobe Amasaima. Ja̧danö, jobekwö yöa̧liökwe, ösödinobe Davidma, ja̧danö jo̧bakwö batjibobö weinobe, ja̧danö jobadönö ujuninobe, iteda ömöayedö ölakwabikwawa jojodötjö luwedö batjibanö.

1 Crónicas 12:19

Ja̧danö Manasessaso jojodötjö ju'wedöbi Davidkwö babibö, ömöayedö ölakwabikwawa jojodö batjibinobe. Filisteo jojodöma Saulkwö tjölakwabikwawobö kwetjachinobe, ja̧danö Davidma tjömöledöso̧ janö, jobadönö pjaatobö kweachinobe, ja̧danö jobadökwö kweachonö, Manasessaso jojodötjö ju'wedöma Saul ömöayedötjö 'da̧bachibö, Davidkwö batjibinobe. Ja̧ David filisteo jojodökwö kweachina jawa baikwö laebobe: Davidma ajayinö filisteo jojodökwö kweachinajayonö, Saulkwö ölakwabikwawinokobe Davidma, filisteo jojodötjö luwedöma David ȩwa̧jobö wetjinobetjö̧. Filisteo luwedöma yötja̧lakwawinobe idödada: —Davidma dömöledöso̧ ja̧nö ökwödökwö kweachijayonö, labi. Dedemi ajayi uluwo̧kwö baibotö jö̧ba̧lö, dölakwabikwawemi ja'ötjö ökwödönö iyö loena, jo̧kwajabetjö̧ ölakwabikwawökönö ȩwa̧jobö wedo, —jö̧ba̧lö ȩwa̧jobö wetjinobe.

Romanos 13:14

Wainö ja̧bö kwö̧jaduwo chömöledö. Baikwö wanedö yötawa: Duluwo̧ Jesucristo jawa 'dukawaduwo chömöledö, ja̧danö Dios ösödi̧ jawada ja̧köbaduwobö kwisakwaduwo. Ja̧danö, sulabenö dösödi̧ jawama, böjȩ jojodö sulabenö dösödi̧ jawa ja̧köbaduwoböma kwisakwaduwoko chömöledö.

Gálatas 3:27

Baikwö yötawa chömöledö: Diosma ökwödönö bakobe Jesúskwö bakibaduwanö ja̧inobe, ¿jö̧tö? Ja̧danö, okobe deinö jejenö ja̧inawö̧ma, Jesús sulabe jwii̧ 'dukawinaduwobe ichejekwa chömöledö.

Josué 17:2

Ja̧danö ju'wedö Manases itji̧mu tupadanösasokwena jojodönöbi tjitebo baibanö wetjinobe. Manases itji̧mu tupadanösasokwena luwedö ömadöma, bidö: Abiezer mikwo̧bi, Jelek mikwo̧bi, Asriel mikwo̧bi, Siquen mikwo̧be, Hefer mikwo̧bi, Semida mikwo̧bi.

Jueces 13:25

Jobadöma, Majane Dan comunidadnö tjö̧jinobe, Zora comunidadbi, Estaol comunidadbi ö'weje. Ja̧danö jobe Sanson ö̧jonö, Isabenö Jo̧ o̧'wo luwo̧ma, jamatö Sansonnö ujuluwachibanö pjaatinobe, ömöledö israel jojodönö tjö̧jibinö pjaatakobetjö̧.

Jueces 14:19

Ikenama Isabenö Jo̧ o̧'wo luwo̧ma juluwanö Sansonnö ujuluwachibanö ichibinobe, ja̧danö Sansonma Ascalon comunidadbe i̧'yinobe. Jobe ichibajo̧, Ascalon comunidad ömadö filisteo jojodötjö treintabedönö kwabawö loinobe Sansonma, ja̧danö kwabö lobajo̧, tjiteajama 'döbebö eminobe. Ikenama, emajo̧, tjiteaja̧ kamijido̧ e'ewö ȩwa̧bijinobe Timnat comunidadbe, ja̧danö yöa̧lakwawa labebö lobinadönö iyinobe, —Chiyocha, —jö̧ba̧lö yöa̧lina badekwachinö. Ikenama, jwiinö dameakwö, ilekwonö le'dedibö ȩwa̧jinobe Sansonma, iteda abe'do ejube.

Jueces 15:14

Sansonnö öbibö tjichejebinobe Lehi comunidadbe, filisteo jojodö tju̧ju̧kwobekwö. Ja̧danö, tjichejebiawö̧, filisteo jojodöma jwöbeba̧lö tjichinobe Sanson ö̧jobekwö. Jejenö tjichiökwe, Isabenö Jo̧ o̧'wo luwo̧ma juluwanö Sansonkwö ichibinobe, ujuluwachibanö, ja̧danö Sansonma juluwanö kaa'bodanö 'döbekwö loinobe a̧la̧chi'bo tjunu'yaja̧'boma. 'Yaya'bojayonö, ökwölanö ubaja'bo ichejekwinö 'döbekwö loinobe, ömamijutjö meinö.

Jueces 3:10

Isabenö Jo̧ o̧'wo luwo̧ma Otonielkwö ichibinobe, ja̧danö pjaatinobe, otiwanö israel jojodönö jweebobö. Israel jojodönö öbibö, Cusan Risatayinkwö ölakwabikwawobö i̧'yinobe, ja̧danö Isabenö Jo̧ma pjaatinobe, jo̧banö tjujuluwobö, ja̧danö israel jojodö jo̧batjö tjö̧jibanö jo̧banö ujuluwinobe Otonielma.

Jueces 3:27

Ja̧danö, jobe Efrain niji mösa'ijube ichibajo̧, Aodma trompeta pjuinobe, —Dios pjaatonö döpöjojodönö dölakwabikwawajo, —jö̧ba̧lö. Ja̧danö jejenö pjuiawö̧, israel jojodöma jo̧bakwö ölakwabikwawö tji̧'yinobe. Tjabönö öbibö i̧'yonö, israel jojodöma mösa'ijutjö yutubajö tjölakwabikwawobö tji̧'yinobe.

Jueces 6:11

Ja̧danö, ju'wi möle, Isabenö Jo̧ma, angeldanö ichejekwö öwawachinobe, ja̧danö Ofra comunidadtjö encina towi teebe öbamatinobe. Jowima, Manasessaso jojodötjö Abiezersaso jojo Joas itea towi. Jowi pjeanö, laju ubasobu ja̧takwö otikwaju ji̧nobe, ja̧danö jaju okwa, Joas itji̧ Gedeonma ju̧kwawö trigo sula'wo chabö loinobe, madianitas jojodöma edö tjönaukwapji jö̧ba̧lö.

Jueces 8:2

Yötja̧lökwe, Gedeonma atadinobe, —¡Kwödameakwaduwobö jwia chömöledö! Ökwödö kwujuluwaduwaja̧ma, ökwödö dujuluwaja̧tjö bajalekwönönö kwujuluwaduwajabe. Jau, ökwödö Abiezersaso jojodöma, sule jamatö dölakwabikwawatö, ja̧danö ökwödöma dölakwabikwawatjö bajalekwönönö kwölakwabikwawaduwajabe, döpöjojodönö kwujuluwaduwinö. Yötawaduwakwö, dölakwabikwawaja̧ ikena jamatö kwölakwabikwawaduwajayonö, yayonö dujuluwaja̧tjö bajalekwönönö kwujuluwaduwajabe.

1 Samuel 10:6

Ja̧danö jobadönö kwöbadekwajenama, Isabenö Jo̧ O̧'wo Luwo̧ma ökwökwö ichibö ö̧jakobe, ja̧danö jelo̧danö balewachibö, ökwöbi jobadökwö kwekachakwo̧ja, Dios yöawi̧ yöbawö.

1 Samuel 11:6

Yötjawökwe, Dios O̧'wo Luwo̧ma juluwanö Saulkwö ichibinobe, ja̧danö Nahas sulabenö yöa̧lina a̧ja̧kwö, jwiinö ödameakwinobe Saulma.

1 Samuel 13:3

Jobe Guibeatjö, filisteo jojodö ölakabikwawa jojodö tjö̧jemi ji̧nobe, ja̧danö Jonatanma ömöayedö ölakwabikwawa jojodökwö jobadö filisteo jojodönö ölakwabikwawö ujuluwinobe, ja̧danö filisteo jojodöma ja̧ baledaja̧ wene tja̧ja̧kwinobe. Jejenö balediökwe, Saulma weinobe, israel niji ba̧kwemeachibanö yöbawadönö asabikwawi̧ jawa trompeta asabikwawö, jojodönö yötjawobö, —Ökwödö Hebreo jojodöma, filisteo jojodönö ölakwabikwawö kwichaduwo, —jö̧ba̧lö.

1 Samuel 16:14

Ja̧danö, Isabenö Jo̧ O̧'wo Luwo̧ma Saultjö laebinobe, ja̧danö o̧'wo luwo̧ sulabo̧ Saulnö usula emawinö ja̧obö weinobe Diosma.