Jueces 3:7 - Dios Iwene

⁷ Isabenö Jo̧ öba a'otjö isabenö jwiinö sulabenö ja̧tji̧nobe israel jojodöma, Tjuluwo̧ Isabenö Jo̧ Diosnö tjo̧'wo jwibibö, juwedö tjösödawö̧nöda tjösödinobe, Baal ötjabökwe o̧'wo jawanöbi, Asterot ötjaboko jo̧'wo jawanöbi.

Jueces 3:7 Iomraidhean Croise

1 Reyes 16:33

Ju'wibi tjösödoko Asera ötjaboko jo̧'wo jawa otidö ösödinobe Acabma. Jobekwö jwiinö sulabenö ja̧bö ö̧jinobe Acabma, Isabenö Jo̧ jwiinö ödameakwawenanö baibanö. Acabtjö ajayinö ji̧nadö Israel la'aka luwedöbinadöma, Israel jojodö tjösödökwe Isabenö Jo̧ Dios ödameakwobö ja̧tjinobe, jo̧kwaijayonö okobe deinö jobadö ja̧tjinemi bajalekwönönö, Isabenö Jo̧ jwiinö ödameakwobö sulabenö ja̧inobe Acabda.

1 Reyes 18:19

—Babema baikwö wetakwö: Ötjöma Carmelo mösa'o chö̧jocha, ja̧danö kwömöayedönö weköbo, okobe deinö israel jojodönö ko̧ko̧dö, öbibö tjichejebobö chö̧jobekwö, Carmelo mösa'obe. Jadanö ju'wibi kwilekwo Jezabel jitea mesasötetjö kwadönöbi kwichejebo, tjösödökwe Baal yöawi̧ yöbawadö cuatrociento cincuentabedönöbi, tjösödoko Asera yöjawi̧ yöbawadö cuatrocientosbedönöbi, —jö̧ba̧lö weinobe Eliasma, Acabnö.

2 Reyes 23:14

Jobadönö ösödakwawa inawiyatjö otikwa o'iju 'dobö loinobe, ja̧danö Asera ötjabokonö ösödakwawa o'iju jubö loinobe, ja̧danö ja̧ ösödakwawa jawa ji̧nemi niji, jojodö tjiwe'iju ikwö loinobe, ja̧ ösödakwawemi suli̧ öwaedakobetjö̧.

2 Reyes 23:6

Ja̧danö ju'wibi tjösödoko Asera ötjaboko jo̧'wo jawama, Isabenö Jo̧ ejutjö laebinobe, ja̧danö Jerusalen comunidad ö'öbökwöchobe e'ewinobe, ja̧danö Cedron ojwe ö'öbö e'ewajo̧, juwö loinobe. Ikenama, juwö lobajo̧, o̧'wo jawatjö ji̧baja̧ma, 'dobö loinobe, i̧so̧pja baibanö, ja̧danö wobiako jȩna ja̧ ökwölaso̧pjama ikwö loinobe.

Éxodo 34:13

Jo̧kwaobetjö̧ jobadö tjo̧'wo jawa tjösödi̧ jawa, juwö iyawapjobi, inawiya ödöi̧ öwiya junawa öwiyabi 'dobö loköbaduwo. Ja̧danö, towitjö otikwa Asera mikwuju o̧'wo jawa löbö loköbaduwo.

Deuteronomio 16:21

Tupakwö yöawinobe Moisesma: —Ja̧danö chömöledö, kwuluwo̧duwi Isabenö Jo̧ Diosnö iyawöte kwotidaduwenama, jöte ö'öbönö ju'wedö tjösödoko Aseranö ösödakwawowi towima kwujunaduwoko,

Deuteronomio 4:9

Tupakwö yöawinobe Moisesma, israel jojodönö: —Teada̧lönö kwö̧jaduwo chömöledö, ökwödö kwedinaduwa jawama kwo̧'wo jwikibaduwapji jö̧ba̧lö. Jau chömöledö, ba̧kwelöjatebö kwo̧'woduwi jwibibökönö, ina kwö̧jaduwayi ja̧ jawa omukwatö kwö̧jaduwobö jo̧be, ja̧danö kwitji̧muduwinöbi, kwö̧'dödöduwinöbi yökawaduwobö jo̧be, jobadöbi ba̧kwȩlöjatebö omukwatö tjö̧jakobetjö̧.

Deuteronomio 8:11

—Jo̧kwaijayonö, baikwö lȩtebaduwakwö chömöledö, jejenö otiwanö kwiteboduwinö kwö̧jaduwenama, teada̧lönö kwö̧jaduwo, kwuluwo̧duwi Isabenö Jo̧ Diosnö kwo̧'wo jwikibaduwapji jö̧ba̧lö. Ja̧u chömöledö, kwuluwo̧duwi Diosnö omukwatö, jo̧ba wei̧, ja̧bö kwö̧jaduwobö wei̧bi, ju'wi wei̧bi jwaikwöda a̧ja̧kwö kwö̧jaduwobö ja̧kobe, babe ökwödönö yötawi̧ jawama.

Deuteronomio 8:14

Ja̧danö, jejenö baibenama, teada̧lönö kwö̧jaduwo, –Aaa, otiwadösa, –jö̧ba̧lö, kwuluwo̧duwi Isabenö Jo̧ Diosnö kwo̧'wo jwikibaduwapji jö̧ba̧lö. Jau chömöledö, kwuluwo̧duwi Diosnö kwo̧'wo jwikibaduwobö jwiobe, baikwö yötawa: Kwuluwo̧duwi Isabenö Jo̧ Diosda usula emawö ju'wedö tjömöayedö kwö̧jinaduwelö Egipto nijitjö labebö öbibinama.

Deuteronomio 8:18

Baikwö jweinö kwomukwataduwo jö̧ka̧laduwi̧ yötawaduwakwö chömöledö, –Otiwanö chujuna̧li̧ma chuluwo̧ Isabenö Jo̧ Diostjö ichi̧, –jö̧ba̧lö. Jau chömöledö, kwuluwo̧duwi Diosma damötjö da'dödönö yöbawö ujuninobe, ökwödönö pjaatakwa̧ma, ja̧danö jejenö yöbawö ujunina badekwachakobetjö̧, babe inesö otiwanö pjaati̧ ökwödönö pjaatobe.

Jueces 3:12

Jemi ikenama, israel jojodöma yemidanö Isabenö Jo̧ öpöjödinö sulabenö ja̧tjinobe. Jo̧kwajabetjö̧, sulabenö ja̧tjiökwe, Isabenö Jo̧ma tjöpöjojo Moab niji la'aka luwo̧ Eglon mikwo̧nö ujuluwachibanö weinobe, israel jojodönö suli̧ waedö ujuluwobö.

Jueces 3:8

Ja̧danö jejenö sulabenö ja̧tji̧ökwe, Isabenö Jo̧ma jwiinö ödameakwinobe israel jojodönö, ja̧danö jobadönö iyö loinobe, tjöpöjojo Aram Najarayin niji la'aka luwo̧ Cusan Risatayin mikwo̧ jobadönö suli̧ waedö ujuluwobö. Ja̧danö, jejenö iyö loiawö̧, israel jojodöma jelemutjö wapötakwa o̧bia baledibanö jo̧ba ömöayedö tjö̧jinobe, wei̧danö otidö.

Jueces 6:25

Ja̧danö, ja̧ yö̧te Isabenö Jo̧ma Gedeonnö weinobe, —Kwabe'do ajwi pakayaso̧ i̧so̧nö kwemo, ja̧danö jelo̧ ajwi pakayaso̧ i̧so̧nöbi, jelemutjö dötölataja o̧biya juna̧lo̧nö kwemo, ja̧danö emajo̧, kwabe'do itea Baalnö iyawemi pjolö loköbo, ja̧danö ju'wibi, jemi ö'öbö towisa'o, tjösödoko Aseranö ösödakwawa'obi jubö loköbo.

Jueces 8:33

Ja̧danö, Gedeon ö'wö baibenama, israel jojodöma juluwanö Diosnö katjatibinobe, ja̧danö yemidanö Baal ötjabökwenö tjösödinobe. Diosnö kabatibö, Baal Berit ötjabökwenö tjösödinobe, duluwo̧ dios jö̧ba̧lö.

Jueces 8:34

Tjuluwo̧ Isabenö Jo̧ Diosma okobe deinö tjöpöjojodö ö'öbötenia ju̧kwadötjö tjö̧jibanö pjaatijayonö, jo̧banö tjomukwatinokobe.

1 Samuel 12:10

Ikenama, da'dödöma Isabenö Jo̧nö budekwö atjebinobe, –Isabenö sulabenö ja̧dajabe, Isabenö Jo̧nö kabatibö, o̧'wo jawa Baal ötjabawö̧nöbi, o̧'wo jawa Astarot ötjabokonöbi sulabenö ösödö dö̧jajabe. Jo̧kwaijayonö, döpöjojodö tjujulutjö dö̧jibanö pjakatobö adeba, isabenö ökwö Isabenö Jo̧nöda ösödö, weköbi̧da ja̧bö dö̧jakobetjö̧, –jö̧ba̧lö atjebinobe.

1 Samuel 12:9

Jo̧kwaijayonö, jejenö otiwanö pjaatinajayonö, tjuluwo̧ Isabenö Jo̧ Diosnö juluwanö tjo̧'wo jwibibö katjatibinobe da'dödöma, sulabenö. Jejenö katjatibiökwe, Diosma jobadönö iyö loinobe, Hazor jojodö ölakwabikwawa luwo̧ Sisara mikwo̧ jobadönö ujuluwobö, ja̧danö filisteo jojodö jobadönö tjujuluwobö, ja̧danö Moab niji la'aka luwo̧ jobadönö ujuluwobö, ja̧danö jobadöma da'dödönö tjölakwabikwawinobe.