Jueces 2:18 - Dios Iwene

¹⁸ Sulabenö a̧ja̧kwökönö tjö̧jijayonö, Isabenö Jo̧ma ina lȩlöinö edinobe jobadönö. Tjöpöjojodö usula tjemawinö ja̧tjawö̧, nöinö usula emawö tjubudekwenama, Isabenö Jo̧ma lȩlöinö ediainobe israel jojodönö, ja̧danö pjaatakwo̧ la'aka luwo̧nö kabebö juniainobe, israel jojodönö pjabatö. Ja̧danö Isabenö Jo̧ pjaatakwo̧nö kabebö ujunenama, ba̧kwelöjatebö jo̧banö pjabatiainobe, tjöpöjojodötjö tjö̧jibanö otiwanö pjaatobö. Ja̧danö jo̧ba ujuninökwe ina 'yaba̧lo̧ ö̧jayi, Isabenö Jo̧ma ba̧kwelöjatebö jo̧banötjö̧ israel jojodönö pjabatiainobe, jobadönö lȩlöinö edobetjö̧.

Jueces 2:18 Iomraidhean Croise

Génesis 6:6

Edinö omukwatijetö, tajawedö chotidinawö̧jö, la'akatjöda chotidinökötjö̧bö, jö̧ba̧lö. Jwiinö o̧'wo tjo̧bekwibö omukwatijetö, chotidinawö̧ma sulabedö babibinadöwe, jö̧ba̧lö.

2 Reyes 13:4

Jobekwö nöinö balediökwe, bajaliyanö Isabenö Jo̧nö aebinobe Joacazma, lȩlöjinö edobö, ja̧danö aebiökwe, a̧ja̧kwö pjaatinobe Isabenö Jo̧ma. Jau, Isabenö Jo̧ma edö öwaisinobe israel jojodö usula tjemawi̧ma, —Siria luwedöma labinö israel jojodönö usula tjemawinö webadötö, —jö̧ba̧lö.

Éxodo 2:24

Usula emawö jwötjeba̧li̧ma a̧ja̧kwijetö Diosma. Ja̧danö, omukwatijetö Diosma damötjö Abrahamnö Isaacnö Jacobnö iteda iwene yöbawö ujuninama, jobadötjö tupadanö jojodönö pjatatakwo̧sa, jö̧ba̧lö.

Éxodo 3:12

Jejenö atadiökwe: — Moisés, ötjöma ökwökwö chö̧jakwo̧sa. Ötjö Diossa ökwönö webo̧, Israel jojodönö Egiptotjö lakebobö. Ja̧danö, ökwönö kwöwaisachibobö chi̧sebocha, Isabenö ötjönö webinama Diosda, jö̧ba̧lö. Baikwö kwöwaischibobö baledakobe: Moisés, ötjö chömöledönö Egiptotjö labebö öbibö kwi̧'yaja̧ ikena bi'onöda ichibö kwösödaduwakwedöja ötjönöma— yöba̧lijetö Diosma Moisésnöma.

Éxodo 32:14

Ja̧danö, Isabenö Jo̧ma, iteda omukwati̧ kabatibö balewö lobijetö, ömöledönö söbebö lobökönö.

Deuteronomio 32:36

Jau chömöledö, Isabenö Jo̧ma iteda ömöledö israel jojodönö isabenö lȩebakobe, tjujulu jwitjenanö baibanö. Jemi ikenama, israel jojodötjö ju'wedö tjömöayedöbi, tjömöayedöböködöbi sule o̧bukwedöda tjö̧jibenama, jobadö iteda ömöayedö israel jojodönö lȩlöinö edakobe Isabenö Jo̧ma.

Josué 1:5

Isabenö kwujuluwachibanö pjatatakwo̧sa, baikwö yötawa: Ina 'yaba̧lo̧ kwö̧jayi, kwöpöjojodötjö bakwo̧bi ökwönö ujuluwobö jwiakobe, okobe deinö kwöba a'otjö dötjibajakwedö. Jau Josue, Moiseskwö ja̧nö pjatatinadanö, ökwökwöbi ja̧nö pjatatakwo̧sa, isabenö ba̧kwelöjatebö ökwökwö chö̧ja̧kwo̧sa, la'akatjöda ökwönö katatibökakwo̧sa.

Jueces 10:16

Ja̧danö, israel jojodöma ju'wedö tjösödawö̧ o̧'wo jawa tjujuna̧lawö̧nö tjö̧'da̧detjö ikwö lotjinobe, ja̧danö jobadönö kabatibö, tjebachajö Isabenö Jo̧nö tjösödinobe. Ja̧danö, Isabenö Jo̧ma israel jojodö usula tjemawi̧ edö, jobadönö o̧'wo tjo̧achinobe, Tjo̧wita, jobadönö pjatatocha, jö̧ba̧lö.

Jueces 11:32

Ikenama, yöbawö junajo̧, Jeftema israel jojodönö öbibö i̧'yinobe amonitas jojodö tjö̧jobekwö, jobadökwö ölakwabikwawobö. Ja̧danö, Isabenö Jo̧ma isabenö pjaatinobe, amonitas jojodönö ujuluwobö.

Jueces 2:19

Jo̧kwaijayonö jejenö otiwanö pjaatijayonö, Dios kabebö ujuninökwe ö'wö baibenama, israel jojodöma kabatökönö juluwanö tjebachajö sulabenö ja̧bö ji̧atjinobe. Tjabe'dodö sulabenö ja̧tjitjö̧ bajalekwönönö, jwiinö sulabenö ja̧biatjinobe israel jojodöma, ju'wedö tjösödawö̧nö tjösödobö isakwöbi, bȩba̧chibö ösödöbi. Jwaikwöda tjuu 'dibadö ja̧nö, sulabenö ja̧bö tjö̧ji̧ katjatiboböma tjöpöjodinobe, jwaikwöda sulabenö ja̧bö tjö̧jinobe israel jojodöma, Dios wei̧ a̧ja̧kwökönö.

Jueces 3:9

Ikenama, usula emawö, Isabenö Jo̧nö tjubudekwenama, Isabenö Jo̧ma jobadönö pjaatinobe. Jobadönö pjaatakwo̧nö kabebö ujuninobe, la'aka tjuluwo̧ ja̧nö, jobadönö jwebebö pjaatobö. Caleb öjawo̧ Quenaz itji̧ Otoniel mikwo̧nö kabebö ujuninobe, israel jojodönö pjaatakwo̧ baibanö, ja̧danö Otonielma jobadönö pjaatinobe, Cusan Risatayin ujulutjö tjö̧jibobö.

Jueces 6:12

Jo̧ba Gedeonnö angeldanö öwawachinobe Isabenö Jo̧ma, ja̧danö Gedeonnö yöawinobe, —Baikwö yötawakwö ökwö ölakwabikwawa juluwo̧nö, Isabenö Jo̧ma isabenö ökwökwö ja̧nö pjaatobe, —jö̧ba̧lö.

Jueces 6:16

Atadökwe, Isabenö Jo̧ma Gedeonnö yöawinobe, —Ötjödasa ökwönö pjatatakwo̧ma, jo̧kwajabetjö̧ ökwönö pjatatobetjö̧, wayökakobe jobadönö kwujuluwobö. Jau, jojo bakwo̧nöda tjujuluwi̧danö, madianitas jojodö tjö̧ba̧jȩkwijayonö, wayökakobe jobadönö kwujuluwoböma, —jö̧ba̧lö.