Jueces 19:18 - Dios Iwene

¹⁸ Aebökwe, —Juda niji comunidad Belentjö dichajabe, ja̧danö Efrain niji mösa'iju jȩmi nijibe, comunidadtjö ödöobe di̧'yobe, ötjö chitebobe. Belen comunidadtjö chȩwa̧jabe, ja̧banö bemi jojodötjö bakwo̧bi ökwödönö a̧debokobe, eju tedachobö.

Jueces 19:18 Iomraidhean Croise

Proverbios 25:17

Ja̧danö, ju'wibi jwebebö yötawa: Ba̧kwȩlö̧jateböma kwipjeanö jo̧ ejube kwi̧'yoko jo̧bakwö yöba̧lö. Yemidanöbi yemidanö kwi̧'yiökwe, yelösöda ba̧kwȩlö̧jatebö ichiba̧lo̧, jö̧ba̧lö ökwönö jwiinö öpöjödachibena.

Juan 15:6

Ja̧danö, ötjökwö dötewinö jö̧ködöma ubasa'ba opjiya 'döbebö loawa opjiya kököachibi̧, emibö ökwölanö ubinö juwawakwa̧ opjiyadanö ja̧dö— yöawinobe Jesúsma öba̧ja̧di̧ waisachadönöma.

Josué 18:1

Jemi ikenama, Canaan niji juluwajadö, okobe deinö israel jojodöma Silo comunidadtjö tjo̧ko̧ko̧kwinobe, ja̧danö jobetjö Dios eju tjujuninobe.

Jueces 17:7

Ja̧danö, Judasaso niji Belen comunidadtjö bakwo̧ ö̧jinobe, möayo̧ Levisaso jojo.

Jueces 18:31

Dios eju, jo̧banö tjösödobö weinejuma Silo comundidadnö ji̧nobe, otiwanö jobetjö jojodö tjösödobö. Jo̧kwaijayonö Dios eju Silo comunidadnö jȩmi baledibanö, Dansaso jojodöma Micaias otidinökwe o̧'wo jawa ösödö tjö̧jinobe, bitema dösödökwe dios jö̧ba̧lö.

Jueces 19:17

Jo̧bama ichibö, jelobetjö ichajadö jojodö tjö̧bajemi ju̧kwadönö edenama, abebö a̧ja̧kwinobe, —Ökwödöma detjö kwichaduwaja̧da, ja̧danö dai kwi̧yaduwa? —jö̧ba̧lö.

Jueces 19:19

Ökwödöma okobe jwiinö dujuna̧lobe dö̧ji̧ jawama, cha̧jwi̧mu tju̧kwa isa'yebi dujuna̧la, ja̧danö du̧kwabi, ubasobubi dujuna̧la, ötjöbi, chilekwobi, chömöayo̧bi dukwobö, sule dabakwemida jwidobe, ju'wi okobe jwiinö dujuna̧lobe, —jö̧ba̧lö atadinobe Levisaso jojoma.

Jueces 19:5

Ikenama, ö'wejemu jawa möle dewachenama, yȩayi a̧la̧jibajadö̧, tjȩwa̧jakwa̧ jawa tjotidinobe. Jo̧kwaijayonö ilekwo jabe'doma o̧jo̧linö yöa̧linobe, —Kwȩwa̧jakwa̧ abönö, kwujuluwachibanö kwakwawa kwukwo, ja̧danö kwajo̧, otiwanö kwȩwa̧jena, —jö̧ba̧lö.

Jueces 20:18

Ja̧danö, tjölakwabikwawakwa̧ abönö, ju'wedö israel jojodöma Betel comunidadbe tji̧'yinobe, Dios oba a'o ichibö, abebö tja̧ja̧kwobö. Ja̧danö, Diosnö abebö tja̧ja̧kwinobe, —Ökwödö israel jojodötjö, diso jojodö abönö Benjamin jojodökwö tjölakabikwawobö jo̧beda? Diso jojodö abönö tjölakwabikwawobö weköbobeda? —jö̧ba̧lö. Atjebökwe, Isabenö Jo̧ma atadinobe, —Judasaso jojodöda abönö ölakwabikwawö tji̧'yobö jo̧be, —jö̧ba̧lö.

1 Samuel 1:3

Ja̧ mölȩ Silo comunidadtjö Inesö Diostjö jojodötjö tjö̧'da̧de pjabato̧ Eli mikwo̧bi, itji̧mu Ofni mikwo̧bi, Finees mikwo̧bi Isabenö Jo̧, okobe jwiinö juluwo̧ Dios öba a'otjö pjabatö tjö̧jinobe. Ja̧danö, jejenö Silo comunidadtjö tjotidiökwe, o̧ba bakwabakwena, Elcanama, ilekwamunöbi itji̧munöbi öbibö Silo comunidadbe 'yi̧ainobe, jobetjö Diosnö ösödö juwö iyobö.

1 Samuel 1:7

Jejenö bakwabakwena Diosnö ösödö Silobe tji̧'yenama, Peninama sulabenö obiajinobe Ananö. Ja̧danö jejenö baledioko, Anama jo̧'wo tjo̧achiainobe, ja̧danö o̧'wo tjo̧achö ja̧nö, kwökönö budekwiajinobe.