Jueces 18:29 - Dios Iwene

²⁹ Ja̧danö comunidad imi balewö lotjinobe Dan jojodöma. Ajayinö Lais jö̧ba̧lö mikwinobe ja̧ comunidadma, jo̧kwaijayonö tja'dömine iminö tjimidinobe, Dan comunidad jö̧ba̧lö. Jo̧ba tja'dömine Danma, Jacob ju'wi imi Israel itji̧.

Jueces 18:29 Iomraidhean Croise

Génesis 14:14

Jejenö yöawiökwe Abramma iteda ömöayedö, itekwö ja̧nö bötjachinadö, ölakwabikwawö waisadönönö tjo̧ko̧ko̧chibobö jwöbijetö, trescientos dieciocho jojodönö. Ikenama jobadökwö 'yi̧jetö, luwedönö ö'wejemu jojodönö, tjömöayedö guardia jojodönö lubö, Dan comunidad ichibö.

Génesis 30:6

Ja̧danö, Raquelma jö̧ba̧lijotö: —Diosma ötjönö sulabenö baledobe edö omukwatö ujunajabe, Raquelma jweinö jomukwata, jö̧ba̧lö. Ja̧danö ötjö budekwabinö ateba̧li̧ma a̧ja̧kwö chitji̧danö cheminö iyajabe— jö̧ba̧lijotö. Jejenö jö̧ba̧lö midijotö jitji̧nö, Dan, jö̧ba̧lö.

Génesis 32:28

Ikenama öwawachajo̧ma jö̧ba̧lijetö: —Babema kwimi balewö lota. Jacob kwimikwökakobe, babema Israel, jö̧ba̧lö, mikwo̧ja, Diosnöbi, jojodönöbi ölakwabikwawö kwujuluwajabetjö̧. Ja̧danö, ökwöma Diosnöbi, jojodönöbi ölabikwawö kwujuluwajabetjö̧ Israel, jö̧ba̧lö mikwo̧ja babema— jö̧ba̧lijetö.

2 Samuel 17:11

Tupakwö yöa̧linobe Husayma, —Ja̧danö, jejenöobetjö̧, baikwö otiwanö ja̧dakwa̧ chomukwati̧ma yötawakwö: Okobe jwiinö ditebo israel niji ba̧kwemeachibanö ölakwabikwawa jojodönö kwo̧ko̧kodo, ojwe ö'öbö so̧biapuso̧pja ba̧jȩkwidanö ba̧jekwadönö, ja̧danö ökwöda jobadönö öbibö kwi̧'yo, kwabe'donö kwujuluwobö.

1 Reyes 15:20

La'aka luwo̧ Asa jejenö iyö yöa̧liökwe, a̧jakwinobe Ben Adadma, jo̧kwajabetjö̧ iteda ömöayedö ölakwabikwawa jojodötjö luwedönö weinobe, Israel niji mebibö tjölakwabikwawobö. Ja̧danö, jejenö tjölakwabikwawenama, Iyon comunidadbi, Dan comunidadbi, Abel Betmaca comunidadbi, okobe jwiinö Quineret nijibe, okobe jwiinö Neftalisaso nijibi tjujuluwinobe.

Deuteronomio 34:1

Jemi ikenama, Moab niji ba̧ba̧lawobe israel jojodö tjö̧jelö labebö, Moisesma mösa'o Nebo mikwa'o önöchinobe, wa̧pekwa'o Pisga ötjabobe ichibenanö. Ja̧ Pisga ötjabemima, Jerico comunidad badeibö. Ja̧danö, jobe nöchajo̧nö i̧sȩbinobe Isabenö Jo̧ma, israel jojodönö iyakwa̧ nijima. Moisesnö i̧sȩbinama baikwö laebobe: Okobe jwiinö Galaad niji i̧sȩbinobe, Dan comunidadbe ichibanö,

Josué 19:47

Jobekwö laebobe Dan itji̧mu tupadanö jojodö tjitebo baibanö niji 'da̧batö wetjinama. Damötjö Dios chiyocha jö̧ba̧lö tja'dödönö yöbawö ujunina jawa badekwachinö, jejenö Dios wei̧danö 'da̧batö wetjinobe. Ja̧ comunidadbiyabi, ö'öbö pjei̧ comunidadteniabi, Dansaso jojodönö wetjinobe, tjitebo baibanö. Jejenö Dansaso tjitebo baibanö wetjinobe, jo̧kwaijayonö jemi ikena, lekwe möle baledibajenama, Dansaso jojodö jobe tjö̧jobö jö̧tja̧lima waekwinobe, jo̧kwajabetjö̧ u'dakwö bajalenö tji̧'yinobe, ju'wedö tjitebo comunidad Lesenbe, jobadö tjitebo do̧tja̧tobö. Ja̧danö, Lesen jojodönö juluwajadö, okobe deinö Lesennö ju̧kwadönö kwabawö lotjinobe, ja̧danö idöda tjitebo baibanö tjeminobe. Jejenö emajadö, ajayi imi balewö lobö, tja'dömine iminö midö ötjabinobe, Dan comunidad jö̧ba̧lö, ja̧danö jemi tupakwö Dansaso jojodöma jobe tjö̧jinobe.

Jueces 18:7

Ikenama jobadö bakwamubedöma tupakwö tji̧'yinobe, Lais comunidadbe tjichibenanö kabatö. Jobe ichibajadö, Lais comunidad jojodönö tjedinobe, wene jwiinö, yebabökönö tjö̧jima. Sidon comunidad jojodö wene jwiinö tjö̧ji̧danö, tjöpöjojodö metjibakwa̧ omukwatökönö tjö̧ji̧ tjedinobe. Ja̧danö ju'wibi, Lais comunidad jojodö tjujuna̧li̧ tjedinobe, Tjöbatjiju otiwanö wa̧jobetjö̧ okobe jwiinö bö̧jenö tjö̧ji̧ jawa juna̧ladö, ja̧danö tjitea nöinö juna̧ladö, jö̧ba̧lö tjedinobe. Ju'wibi Lais jojodöma Sidon comunidadtjö ödö tjö̧jinobe, ja̧danö jelobetjö ichadöma Lais comunidadbe ichibiatjinokobe, ja̧danö Lais comunidad jojodöma jelobekwena 'yi̧atjinokobe.

Jueces 20:1

Ja̧danö, okobe deinö israel jojodöma tjo̧ko̧kokwinobe, u'dakwö Dan comunidadtjö, a̧li̧kwö Berseba comunidad baibanö jojodöbi, Galaad niji jojodöbi, okobe deinö Mizpa comunidadnö Dios öba a'otjö bakobe tjo̧ko̧kokwinokobe.