Jueces 16:7 - Dios Iwene

⁷ Ajebökwe, Sanson atadinobe, —Jojodö ötjönö 'böpösopja 'yayopja ina kököachokopjanö jelemutjö dopjolatajanö tjunu'yitjö̧ma, chujulu jwiena. Jejenö tjunu'yitjö̧ma, chime'dawena, ju'wedö jojodö tjujuluwi̧danö chujuluwena, —jö̧ba̧lö atadinobe.

Jueces 16:7 Iomraidhean Croise

Proverbios 12:19

Ja̧danö, ju'wibi yötawa: Jweinö yöawakwawama la'akatjöda balewachokobe, ba̧kwelöjatebö jweinö ji̧. Jo̧kwaijayonö omöna yöawakwawama ba̧kwȩlö̧jatebö jö̧kö̧. Jojodöma omöna yötjawi̧ a̧ja̧kwö juluwanö tjöwaisachibakwedö, omönada yötjawa jö̧ba̧lö. Ja̧danö, juluwanö tjöwaisachibobetjö̧ omöna yöawakwawama lekwökö ji̧, ja̧danö ba̧kwȩlö̧jatebö jö̧kö̧.

Proverbios 17:7

Ja̧danö, ju'wibi yötawa, Bakwo̧ sulabenö omukwato̧ma jweinö omukwatö yöa̧lokobe, sulabenö omukwatobetjö̧. Ja̧danö, jelo̧nöbi yötawa: Jweinö omukwatö la'aka luwo̧ma la'akatjö̧da omöna yöa̧lokobe, jweinöda omukwatobetjö̧.

Romanos 3:8

Ja̧danö, jejenö omukwatö yötja̧lena, Sulabenö ja̧bö dö̧ji̧ma, sulökö, Dios suli̧ jwii̧ weneda i̧sebö yödawobetjö̧, jö̧ba̧lö. Jejenö omukwatadö tjuju̧kwobe chömöledö. Ja̧danö, ju'wedöbi sulabenö ötjönö wanedö omöna yöba̧ladö, Pablobi jejenö yöbawo̧, jö̧ba̧lö. Jejenö yöbawö̧kö̧sa ötjöma chömöledö. Ju'wibi ökwödönö isabenö yötawa, Diosma jejenö yöba̧ladönö lȩebenama, jweinöda lȩbebo̧ chömöledö.

Gálatas 6:7

Chömöledö, omukwatökönaduwi, Aaa Diosnö odijayonö wene jwiena jö̧ba̧lö. Bakwo̧bi Diosnö ooböma jwia chömöledö. Baikwö wanedö yötawa batjo jawa chömöledö: Bakwo̧ ödebiya öditjö̧ma, iyakwa̧da pokwakobe, ja̧danö iyakwa̧da wa̧ji̧ emakwo̧, ¿jö̧tö?

Colosenses 3:9

Ja̧danö kwömöledöduwinöma omöna yöka̧lakwawaduwoko. Jau chömöledö, wanedö yötawa: Kamijido̧ yo̧tjekwi̧danö ökwödöma ida̧ökö sulabenö kwösödinaduwabi, sulabenö ösödö ja̧köbinaduwabi kabatibö yo̧kekwinaduwobe ichejekwa,

Jueces 16:10

Jemi ikenama Dalilama Sansonnö yöja̧linobe, —Sulabenö obö, omöna yöka̧lijatö ötjönö Sanson, jweinö yöka̧lobö atebakwö, dakwö ja̧tjenada, dökibobö jwiinö ökwönö tjunu'yoböma? —jö̧ba̧lö.

Jueces 16:6

Jejenö atjeboko jösödinobe Dalilama, jo̧kwajabetjö̧ Sansonnö abebö ja̧ja̧kwinobe, —Sanson, inesö kwujulu labebö loköbobö atebakwö, detjö ichojobö jö̧ba̧lö. Bakwo̧ ökwönö unu'yobö jö̧a̧litjö̧ma, dakwö ja̧enada, isabenö ökwönö ujuluwoböma? yökawobö atebakwö, —jö̧ba̧lö ajebinobe.

Jueces 16:8

Atadoko, luwedönö yöjawinobe, ja̧danö yöjawawö̧ jelemutjö dopjolataja 'böpö jawa opjiya tjichejebinobe, 'yayopja ina kököachokopjiyama. Ja̧danö, Dalilama filisteo jojodötjö ju'wedönö tejatinobe jeju okwasȩko̧nö tju̧ju̧kwawobö, Sanson ujulu jwiena jo̧banö metji̧bobö. Ikenama, Sanson a̧ba̧lonö, 'böpösopjanö junu'yinobe Sansonnö. Ikenama, nu'yu kabataju, Sansonnö wiludö jwöjeba̧linobe, —¡Sanson, filisteo jojodö ökwönö metjibobe! —jö̧ba̧lö. Ja̧danö, chujulu jwiena jö̧ba̧lö yöa̧linajayonö, Sansonma wilubö 'döbekwö loinobe isopjiyama. Isopja ubö 'dai̧danö, juluwanö 'döbekwö loinobe Sansonma, ja̧danö ina tjöwaisachibinokobe Sanson ujulu jawa, detjö ichojobö jö̧ba̧lö.

1 Samuel 19:17

Jejenö balediökwe, Saulma itjiju Micalnö abebö a̧ja̧kwinobe, —Tajawedö omöna jawa chomukwatobö choma'apekwönö ja̧bö, chöpöjojo döibajobö pjakataja̧da? Chöpöjojonö do̧tatobö pjakato jö̧ka̧lijayonö döibajobö pjakatajabe, —jö̧ba̧lö. Aebioko, Micalma jatadinobe, —Davidma ötjönö yebeabinö yöa̧latö, dötibajobö pjakatökötjö̧ma, kwabö lotakwujuja jö̧ba̧lö, jo̧kwajabetjö̧ ötjönö kwabö loapji jö̧ba̧lö, döibajobö pjatatajabe, —jö̧ba̧lö omöna jatadinobe Micalma, jabe'do Saulnö.

1 Samuel 27:10

Ja̧danö, ȩwa̧jiökwe, —Detjö kwabawö emö kwȩwa̧jada, — jö̧ba̧lö Aquis abebö a̧ja̧kwenama, omöna yöba̧lö atadiainobe. Ju'wikwenama, —Juda niji̧ a̧likwöobetjö israel jojodönö kwabawö chȩwa̧jabe, —jö̧ba̧lö, ju'wikwenama, —Jerameel nijitjö kwabawö chȩwa̧jabe, —jö̧ba̧lö, ja̧danö ju'wikwenama, —Ceneo jojodönö kwabawö chȩwa̧jabe, —jö̧ba̧lö omöna yöba̧liainobe Davidma.