Jueces 11:27 - Dios Iwene

²⁷ Jau, ökwödönö sulabenö ja̧dijökötö, babe ökwödönö kwödameakwaduwoböma. Ökwödöda ökwödönö ölakwabikwawö sulabenö ja̧badöja, sulabenö ja̧dököjayonö sulabenö ökwödönö ölakwabikwawadöja. Isabenö Jo̧ Diosda inesö lȩekwa luwo̧ma, ja̧danö jo̧bada yöawakwo̧, ökwödötjö didö jweinö tjomukwatojobö jö̧ba̧lö, ökwödö israel jojodöö̧kö̧, ökwödö amonitas jojodöö̧kö̧, —jö̧ba̧lö yöawi̧ weinobe Jeftema, amonitas jojodötjö la'aka luwo̧nö.

Jueces 11:27 Iomraidhean Croise

Génesis 16:5

Ja̧danö, Agar jejenö jedioko Saraima jö̧ba̧lijotö Abramnöma: —Chilekwe, Agar ötjönö sulabenö jeda̧li̧ma ökwöda jawa. Ötjöma ökwökwö jö̧jobö wetijayonö babema metu'wo jö̧jobetjö̧ sulabenö jedokosa ötjönöma. Chilekwe, jobujuma kwilekwojobetjö̧ ja̧ sulabenö jedi̧ma ökwöda jawa. Isabenö Jo̧ Diosnö atebobe edö yöawobö ökwö sulabenö ja̧köbinojobö, ötjö sulabenö ja̧tinojobö— jö̧ba̧lijotö Saraima.

Génesis 18:25

Chuluwo̧, ökwöma jejenö lȩkebö̧kena. Otiwanö omukwatö ju̧kwadökwö sulabenö ja̧bö ju̧kwadökwö debö tji̧'yobö söbebö loköbökena. Jejenö söbebö loköbitjö̧ma otiwadönöbi sulabedönöbi bakwainöda kwedena. Ökwöma jejenö kwomukwatökena. Ökwöma böjȩnö ju̧kwadötjö didö sulabenö ja̧tjojobö, didö otiwanö ja̧tjojobö waiso̧ja. Jo̧kwaobetjö̧ jweinö omukwatö weköbakwo̧ja— yöba̧lijetö Abrahamma Isabenö Jo̧ Diosnö.

Génesis 31:53

—Ökwödö yöbawö dujuni̧ma da'dödö tjösödinökwe Dios, ötjö cha'dömine Nahor, kwa'dömine Abrahambi tjösödinökwe Diosma ökwödönö edö öwaisakwo̧ diwene yöbawö dujuninadanö dö̧jojobö— yöba̧lijetö Labánma. Jejenö yö̧a̧lökwe ösödijetö Jacobma, Jao jejenö yöbawö chujuna. Ja̧danö, yöbawö chujuni̧ yöta̧la̧ja̧tjö wainö ja̧titjö̧ma Dios, chabe'do Isaac yebabinö omukwatökwe Diosma lȩebakwo̧sa yöba̧lijetö Jacob.

Diosnö ösödo̧ Job mikwo̧ usula emawina jawa 23:7

ja̧danö a̧ja̧kwajo̧, inesö lȩekwa luwo̧ Diosma yöawena, –Isabenö wene jwibo̧ Jobma, –jö̧ba̧lö, ja̧danö yöawi̧tjö̧, la'akatjöda lȩebi̧tjö chemawobö jwiena. Jau chömöledö, isabenö Dios wei̧ a̧ja̧kwö jo̧sa, jo̧kwajabetjö̧ Dios öba a'o ichibö yötawitjö̧ma, isabenö otiwanö a̧ja̧kwena.

Diosnö ösödo̧ Job mikwo̧ usula emawina jawa 9:15

Sulabenö ja̧tinököjayonö, yayonö atadakwawa jwiinö chö̧jibena. Jau, öba a'o ja̧nö chatadobö jwibo̧sa, atadökönö, abeböda, –Chuluwo̧, lȩlöji̧nö kwedobö atebakwö, –jö̧ba̧lö budekwö atebobö jȩna.

2 Corintios 11:11

¿Dakwö kwomukwataduwa chömöledö? Ökwödönö chöpöjödobetjö̧, ¿ökwödötjö ateba̧lokobeji̧? Ja̧maökö chömöledö, isabenö ökwödönö ösödo̧sa, ja̧danö isabenö Diosma ökwödönö chösödi̧ waiso̧ chömöledö.

2 Corintios 5:10

Jau chömöledö, Duluwo̧ ösödi̧danö ja̧dobö disakwobe, döwaisobetjö̧, okobe deinö Cristo ba̧nö yöawelö dö̧jakwedösa, jo̧bada böjȩnö ja̧nö ja̧dina yöawobö, otiwojobö, sulojobö jö̧ba̧lö. Ja̧danö jo̧bada ja̧dina mikwa baibanö iyakwo̧ chömöledö.

2 Timoteo 4:8

Ja̧danö, jejenö ja̧bö chö̧jiökwe, chuunö chubutjawakwaka, sulabe jwibadö tjubutjawakama, ida̧ökö mölejȩbe te'ada̧lö jo̧be, 'dö̧ibaji̧ möle Duluwo̧ chuunö öwanenanö kabatö. Jau Timoteo, Duluwo̧da sulabe jwibo̧ inesö lȩekwa luwo̧ma, ja̧danö ja̧ mölema, Duluwo̧ma ja̧ka inesö otiwaka ötjönö iyö öwanakobe. Jo̧kwaijayonö sule ötjönödamaökö, okobe deinö Duluwo̧ ichakwa̧ ösödö te'ada̧ladönöbi iyakobe ja̧ mölema.

Hebreos 12:23

Ja̧danö, kwo̧'wo̧ luwo̧duwinö jobe ichibö ökwödöma ju'wedökwö bakobe ko̧ko̧kwa̧lö kwuju̧kwaduwi̧danö ju̧kwadöja, okobe deinö Jesúsnö ösödadö, ba̧kwȩlö̧jatebö ja̧kwawa wȩyukwa'yenö tjimibiya ba̧jadökwö. Ja̧danö jobekwö ichibö, Dioskwöbi ju̧kwadöja, okobe deinö jojodönö lȩekwa yöawakwo̧kwö. Ja̧danö jobe Dios ö̧jobekwö ichibö, ju'wedökwöbi ko̧ko̧kwa̧lö ja̧nö ju̧kwadöja, Diosnö tjo̧'wo̧ wana̧ladö wobinadökwö, tjo̧'wo̧ luwo̧nöda. Jobadönöma Dios jö̧a̧lawö̧, Suli̧ jwiinö babibinadö, jö̧ba̧lö.

Jueces 11:28

Jo̧kwaijayonö jweinö yöawijayonö, amonitas jojodötjö la'aka luwo̧ma Jefte yöawaja̧ a̧ja̧kwinokobe, jwaikwöda tjölakwabikwawobö omukwatinobe.

1 Samuel 2:10

Jo̧banö öpöjödadönö isabenö tji'delachajinö söbebö loakwo̧ Isabenö Jo̧ma, isabenö böba ökwödi̧danö mölȩjebetjö labinö ökwöakobe jobadönö lȩebakwa̧ma. Isabenö bö̧jȩ ba̧kwemeachibanö ju̧kwadönö badedö edakwo̧ Isabenö Jo̧ma, ja̧tjina otiwojobö sulojobö jö̧ba̧lö, ja̧danö iteda ujunajökwe la'aka luwo̧nö isabenö ujulu iyakwo̧, iteda omudawö ujunajökwenö, —jö̧ba̧lö yöja̧linobe Anama, Diosnö ösödö.

1 Samuel 24:12

Jau chuluwo̧, Isabenö Jo̧da ökwödönö badedö edo̧ma, ökwödötjö dite otiwanö ja̧ojobö jö̧ba̧lö. Ja̧danö, jo̧bada ötjönö sulabenö ja̧köbi̧ edö lȩebobö jȩna. Jo̧kwaijayonö ötjönö sulabenö ja̧köbijayonö, ötjöma la'akatjöda balekwa mikwa ökwönö chujuluwoböma chisakwökakwo̧sa chuluwo̧.

1 Samuel 24:13

Jau chuluwo̧, da'dödö yötja̧li̧ma baikwö laebobe, –Sulabedöma, jwaikwöda sulabenö ja̧badö, –jö̧ba̧lö, ja̧danö ötjöma isabenö sulabo̧chitjö̧ma, ökwönö sulabenö ja̧to jö̧ta̧lajena. Jo̧kwaijayonö sulabö̧kö̧sa, ja̧danö la'akatjöda ökwönö sulabenö ja̧bö chujuluwoböma chisakwökakwo̧sa.

1 Samuel 24:15

Jau chuluwo̧, Isabenö Jo̧da ja̧di̧ edö badedö edakwo̧ma, ökwödötjö dite otiwanö ja̧ojobö jö̧ba̧lö. Ja̧danö jo̧banö cho̧'wo chöwana̧lobe, isabenö jo̧bada ja̧bö chö̧ji̧ edö, tjöbeba̧lö pjaatakobe jö̧ba̧lö, ja̧danö ötjönö kwabö loköbapji jö̧ba̧lö chö̧jibinö pjaatakobe jö̧ba̧lö, —yöa̧linobe Davidma Saulnö.

1 Samuel 24:16

Jejenö yöa̧lökwe, David jejenö yöba̧lö kaatena, Saulma jwöbö abebö a̧ja̧kwinobe, —Chitji̧ David, isabenö ökwödaji̧? Isabenö ökwöda kwiwene cha̧ja̧kwaji̧? —jö̧ba̧lö. Ja̧danö David yöa̧laja̧ omukwatö, Saulma labinö ubudekwinobe.