Jueces 10:6 - Dios Iwene

⁶ Ja̧danö, israel jojodöma yemidanö Isabenö Jo̧ öpöjödi̧ jawa sulabenö ja̧tji̧nobe. Yemidanö Baal ötjabökwe o̧'wo jawanöbi, Asterot ötjaboko jo̧'wo jawanöbi sulabenö tjösödinobe. Ju'wibi, jelobetenia jojodö tjösödawö̧ o̧'wo jawanöbi sulabenö tjösödinobe israel jojodöma, Arar niji jojodö tjösödawö̧nöbi, Sidon niji jojodö tjösödawö̧nöbi, Moab niji jojodö tjösödawö̧nöbi, amonitas jojodö tjösödawö̧nöbi, filisteo jojodö tjösödawö̧nöbi. Idöda tjösödo jö̧tja̧lökwe Isabenö Jo̧nö ösödökönö, jo̧banö kabatibö ju'wedötenia tjösödawö̧ o̧'wo jawanöda sulabenö tjösödinobe israel jojodöma.

Jueces 10:6 Iomraidhean Croise

1 Reyes 11:33

Ja̧ Salomontjö 'dötebakwama, baikwö labebö lobö yötawakwö Jeroboan, Salomonbi, ömöledöbi ötjönö kabatibö, sidonio jojodö tjösödoko Astartenö bȩbachibö tjösödajabe, ja̧danö moabita jojodö tjösödökwe Quemosnö bȩbachibö tjösödajabe, jadanö amonitas jojodö tjösödökwe Molocnö bȩbachibö tjösödajabe, sulabenö. Jau Jeroboan, abe'do Davidma jwaikwöda ötjö chösödi̧danö ja̧nö, ja̧bö ö̧jobö weti̧bi, ju'wi weti̧bi otiwanö a̧ja̧kwö ö̧jinobe, ja̧danö Salomonbi a̧ja̧kwo jö̧a̧linobe, jokwaijayonö a̧ja̧kwö̧kö̧. Jo̧kwajabetjö̧, a̧jakwökönö sulabenö ja̧obetjö̧, la'aka luwo̧ ö̧ji̧ 'dötebocha.

1 Reyes 11:5

Diosnöda ösödökönö, Salomonma sidonio jojodö tjösödoko Astarte mikwujunö ösödinobe, jadanö amonitas jojodö tjösödökwe inesö sulabo̧ Molocnöbi ösödinobe.

1 Reyes 11:7

Jwiinö sulabenö ja̧inobe Salomonma, Jerusalen comunidadtjö jawo̧ laebobekwö ja̧'o mösa'otjö, Salomonma moabitas jojodö tjösödökwe inesö sulabo̧ Quemosnö ösödakwawemi möemi otidinobe, ja̧danö ju'wibi amonitas jojodö tjösödökwe inesö sulabo̧ Molocnö ösödakwawemi möemi otidinobe.

1 Reyes 16:31

Jeroboan sulabenö ja̧i̧nadanö sulabenö jainobe Acabma, jo̧kwaijayonö ja̧damaökö, jemi bajalekwönönö jwiinö sulabenö jainobe Acabma, Jeroboan sulabenö jainama, sule ja'yubeda sulabenö jainobedanö ichejekwenanö baibanö. Baikwö laebobe Acab inesö sulabenö jaina wenema: Acabma sidonio jojodötjö la'aka luwo̧ Et Baal mikwo̧ itjiju Jezabel mikwujunö eminobe, ja̧danö jobujunö emajo̧, Acabma o̧'wo jawa tjösödökwe Baal wei̧ ja̧bö ö̧jobö isakwinobe, ja̧danö Baalnö bȩbachibö ösödinobe.

2 Reyes 17:16

Isabenö okobe jwiinö tjösödökwe Isabenö Jo̧ Dios wei̧ katjatibinobe Israel jojodöma. Jo̧banö kabatibö, idöda tjösödawö̧ batjibanö du̧ju̧taja pakayadö tji̧tji̧mu tjo̧'wo jawa tjotidinobe, ja̧danö Asera ötjabokonö ösödakwawa'o tjujuninobe, ja̧danö okobe deinö mölejȩnö lö̧jadönö bȩbachibö tjösödinobe, ja̧danö Baal ötjabökwenö tjösödinobe.

2 Reyes 23:13

Ja̧danö Jerusalen comunidadtjö jawo̧ laebobekwö, Olivos ötjaba'o mösa'otjö a̧li̧kwöchobe la'aka luwo̧ Salomon otidina iyawemibiya, Sidon jojodö tjösödoko inesö sulabuju Astarte ötjabokonö iyawemibi, Moab jojodö tjösödökwe inesö sulabo̧ Quemos ötjabökwenö iyawemibi, Amonitas jojodö tjösödökwe inesö sulabo̧ Molec ötjabökwenö iyawemibi suli̧ öwaedinobe Josiasma, jobetjö yemidanö tjösödökakobetjö̧.

Isaías 23:4

Jo̧kwaijayonö babe tabakwö kwö̧jaduwobö jö̧baladöja ökwödö Sidon niji jojodöma, inesö kwösödaduwemi, ö'wejesa'o comunidad Tiroma söbebö loawemida baibajobetjö̧. Jau, jwaibalawa ö'wejetjö, ajayinö ba̧jȩkwadö tjuju̧kwemi ji̧najayonö, jojodö deobeda baibajabe Tiro comunidadma, jojosuju la'akatjöda jitji̧munö eminökujudanö baibajabe, jitji̧mu möayedönö la'akatjöda da̧pedinökujudanö baibajabe, jwaibalawa ö'wejesa'o Tiro comunidadma.

Deuteronomio 13:6

—Jau chömöledö, isabenö Diostjö 'da̧bachibö, ju'wedö tjösödawö̧nö kwösödaduwobö öbibadönö kwabö loköbaduwobö jo̧be, baikwö yötawa: Ökwöda yöne kwöjawo̧bi, ökwöda kwitji̧bi, ökwöda kwitjijubi, kwilekwobi, jelo̧ yö̧ne kwömöledöso̧bi Diosnö kakatibaduwobö öbibö, –Ju'wedö tjösödawö̧nö dösödo, –jö̧ba̧lö sulabenö ötjibitjö̧ma, ile nikebaduwawö̧ tjö̧jijayonö, yayonö jobadönö kwabö loköbaduwobö ja̧kobe, ökwödöbi kwa'dödöbi wajwiköbaduwawö̧nö kwösödaduwobö sulabenö ötjibobetjö̧. Jau chömöledö, bö̧jȩ ba̧kwemeachibanö ju̧kwadötjö ju'wedö tjösödawö̧nö̧ kwösödaduwobö sulabenö öbibö, bemi nijinö ju̧kwadö tjösödawö̧nö kwösödaduwobö ötjibitjö̧bi, jelobe ödö ju̧kwadö tjösödawö̧nö kwösödaduwobö ötjibitjö̧bi,

Deuteronomio 13:8

ötjibi̧da̧nö kwösödaduwoböma jwiakobe chömöledö, öbibö yötja̧li̧bi kwa̧ja̧kwaduwoböma jwiakobe, ja̧danö ju'wibi jobadönö kwabö loköbaduwobö ja̧kobe chömöledö. Jau chömöledö, jobadönö lȩlöjinö kwedaduwoböma jwiakobe, ja̧danö ju'wedö kwabö lotjapji jö̧ba̧lö tjökeba̧laduwobö jwiakobe, isabenö lȩlöjinö edökönö,

Deuteronomio 31:16

Ja̧danö, Isabenö Jo̧ma yöawinobe: —Moises, ökwöma juluwanö kwa'dödökwö bakibanö ö'wö bakibakwo̧ja. Ikenama, ö'wö bakibaja̧ ikenama, bidö kwömöledö israel jojodöma juluwanö sulabenö ja̧tja̧kwedö, baikwö wanedö yötawa, bakwuju jilekwamuböködökwö sulabenö 'da̧'da̧bakwawö jalewi̧danö, bidö israel jojodöma juluwanö ju'wedö tjösödawö̧ o̧'wo jawanö tjösödakwedö. Jau Moises, bakobe jobadökwö isabenö ötjönöda tjösödobö yöbawö dujuninajayonö, juluwanö ötjönö kabatibö, tjitebonö tjö̧'da̧de ju̧kwadö tjösödawö̧nöda tjösödakwedö, sulabenö.

Deuteronomio 31:17

Jejenö baledi̧tjö̧, ja̧ möle chödameakwakwo̧sa jobadönö, ja̧danö jobadönö le'dedibö, jobadönö pjabatö katatibakwo̧sa. Jejenö jobadönö pjatatokobetjö̧, tjöpöjojodöma juluwanö jobadönö tjujuluwakobe, ja̧danö nöinö wene baledakobe jobadönö, jwiinö usula tjemawinö. Jejenö balediawö̧, ja̧ möle yötja̧lakwawakobe, –Babe wene dujuna̧li̧ma, duluwo̧ Dios dö̧'da̧de deobetjö̧ baledobe, –jö̧ba̧lö yötja̧lakwawakobe.

Deuteronomio 32:15

Jejenö iyiawö̧, tjomeawinö tjukwinobe israel jojodöma, o̧tewadö batjibanö. O̧tewadö babibö, nötja̧chibinobe, inesö o̧tewadö batjibanö, ja̧danö jobadönö otidina Diosnö katjatibinobe, tjö̧jibinö pjabato̧ inawadanöbo̧ Diosnö obö katjatibinobe.

Josué 13:31

Ja̧danö, Galaad niji ja'öbi, Basan la'aka luwo̧ Og itebo comunidadbiya Astarotbi, Edreibi, jobadö Manases jojodönö iyinobe. Okobe jwiinö ja̧ niji ajayinö ji̧na Manases itji̧ Maquir itji̧mu tupadanö jojodönö iyinobe Moisesma, Maquir itji̧mu tupadanö jojodö bakwasokwena jojodönö.

Jueces 10:5

Ja̧danö, Yair ö'wö baibenama, Camon comunidadnö jo̧banö tjo̧tji̧nobe.

Jueces 11:24

Ja̧maökö, baikwö yötawa: Ökwödöma kwösödaduwökwe Quemosnö ösödadöja, ja̧danö kwösödaduwökwe Quemosma ökwödönö niji iyitjö̧ma, iyaja̧ nijinö kwö̧jaduwobö jwienaji̧? Jȩna, ja̧danö baikwö yötawakwö: Okobe jwiinö dösödökwe Isabenö Jo̧ Dios iyaja̧ nijinö ökwödö israel jojodö dö̧jobö jo̧be. Jau, ökwödönö pjabatö, ajayi bemi nijinö ji̧nadönö ujuluwinobe dösödökwe Diosma, jo̧kwajabetjö̧ isabenö iyina nijinö dö̧jobö jo̧be.

Jueces 13:1

Israel jojodöma yemidanö Isabenö Jo̧ öpöjödi̧ jawa sulabenö ja̧bö tjö̧jinobe, ja̧danö sulabenö ja̧bö tjö̧jiökwe, Isabenö Jo̧ma jobadönö iyö loinobe, tjöpöjojodö filisteo jojodöma cuarenta o̧biya baledibanö israel jojodönö tjujuluwobö.

Jueces 16:23

Jemi ikenama, ja'yubenö lekwajabetjö, filisteo jojodötjö luwedöma tjo̧ko̧ko̧kwinobe, bakobe ba'ali junö, tjösödökwe Dagon ötjabökwe o̧'wo jawanö iyawa tjiyobö. Dagonnö ösödö, —Dösödökwe Dagonda döpöjojo Sansonnö dujuluwobö pjabatinama, —jö̧ba̧lö tjo̧'wo ösöwanö yötja̧linobe.

Jueces 3:7

Isabenö Jo̧ öba a'otjö isabenö jwiinö sulabenö ja̧tji̧nobe israel jojodöma, Tjuluwo̧ Isabenö Jo̧ Diosnö tjo̧'wo jwibibö, juwedö tjösödawö̧nöda tjösödinobe, Baal ötjabökwe o̧'wo jawanöbi, Asterot ötjaboko jo̧'wo jawanöbi.

Jueces 4:1

Ja̧danö, Aod ö'wö baibaja̧ ikenama, israel jojodöma yemidanö Isabenö Jo̧ öpöjödi̧ jawa sulabenö ja̧tjinobe.

Jueces 6:1

Ja̧danö, israel jojodöma yemidanö Isabenö Jo̧ öpöjödi̧ jawa sulabenö ja̧tjinobe, ja̧danö sulabenö ja̧tjiökwe, Isabenö Jo̧ma jobadönö iyö loinobe, tjöpöjojodö madianitas jojodö jobadönö tjujuluwobö. Ja̧danö, jelemutjö dötölataja o̧bia baledibanö, madianitas jojodöma israel jojodönö tjujuluwinobe, tjuluwedö ja̧nö.

Jueces 8:33

Ja̧danö, Gedeon ö'wö baibenama, israel jojodöma juluwanö Diosnö katjatibinobe, ja̧danö yemidanö Baal ötjabökwenö tjösödinobe. Diosnö kabatibö, Baal Berit ötjabökwenö tjösödinobe, duluwo̧ dios jö̧ba̧lö.

1 Samuel 5:2

Ichibajadö, filisteo jojodö tjösödökwe o̧'wo jawa Dagon jö̧ba̧lö ötjabökwenö ösödakwawejunö tetjatinobe, ja̧danö Dios iteapjo Dagon ipjeanö tjujuninobe, dösödökwe Dagonma isabenö Diosnö ujuluwajabe jö̧ba̧lö.