Juan 9:3 - Dios Iwene

³ abebö tja̧ja̧kwökwe: —Jejenömaökö. Ite, abe'do, ojo'do, jobadö jawamaökö. Jobadö sulabenö ja̧tjinamaökö ite öbajale tjewawökwe baiboböma. Dios iteda ujulu i̧sebö otidö loakobetjö̧ itenöma, öbajale tjewawökwe öbötjachinobe— yöawinobe Jesúsma—.

Juan 9:3 Iomraidhean Croise

Diosnö ösödo̧ Job mikwo̧ usula emawina jawa 21:27

Tupakwö yöa̧linobe Jobma: —Ökwödö kwomukwataduwi̧ chöwaisa chömöledö, ötjönö suli̧ kwöwaedaduwobö omukwatö kwujunaduwi̧ma.

Diosnö ösödo̧ Job mikwo̧ usula emawina jawa 32:3

Ja̧danö ju'wibi, Job ömöledö, ajayinö jo̧banö yöba̧lajadönöbi ödameakwinobe. Jobadöma Job sulabenö ja̧aja̧ wajwitjijayonö, yayonö jwaikwöda —Sulabenö ja̧bo̧ja, —jö̧ba̧lö yötja̧linobe, ja̧danö wajwibö jejenö yötja̧liökwe, jobadönöbi ödameakwinobe Eliuma.

Diosnö ösödo̧ Job mikwo̧ usula emawina jawa 42:7

Jejenö Jobkwö yöba̧lakwawajo̧, Isabenö Jo̧ma Job ömöledöso̧ Elifaznö yöa̧linobe, —Isabenö dameakwo̧sa ökwönöbi, kwömöledö Bildadnöbi, Zofarnöbi, isabenö ö'öbönö ötjönö yöka̧laja̧duwobetjö̧. Jau Elifaz, chömöayo̧ Job jweinö ötjönö yöa̧li̧danöma yöba̧löködöja.

Mateo 11:5

tjöbajale tjewawinadöma babema edadö, ja̧danö kwebachinöködöma babema kwebachadö, ja̧danö tji̧sȩdo̧ sulinadöma, babema tji̧sȩdo̧ otiwadö, ja̧danö a̧ja̧kwinöködöma babema a̧ja̧kwadö, ja̧danö ö'wö babibajadöma yemidanö 'yabibajadö, ja̧danö usula jojodöma otiwa jawa wene yöawakwawa a̧ja̧kwadö jö̧ba̧lö Juannö yökawaduwo, ja̧ baledi̧ a̧ja̧kwö ötjönö öwaisakobetjö̧.

Juan 11:4

Jesúsma jo̧ba yöawi̧ a̧ja̧kwö jö̧a̧linobe: —Ja̧ ö'wöchi̧tjö ö'wö baibökakwo̧ Lázaroma. Ja̧ ö'wöchi̧ baledi̧ma jojodö Dios ujulu i̧sebi̧ tjedobö ö'wöcho̧ jo̧bama. Ja̧danö, ötjö, Dios Itji̧, ötjö chujulu chi̧sebi̧bi tjedobö ö'wöchi̧ma baledobe jo̧banöma— jö̧a̧linobe Jesúsma.

Juan 11:40

Jo̧kwaijayonö Jesúsma atadinobe jobujunö: —¿Ökwönö yötawi̧, Otiwanö kwo̧'wo̧ kwöwana̧litjö̧ma Dios ujulu i̧sebi̧ kwedakobe, jö̧ba̧lö, yötawi̧ma kwa̧ja̧kwajökiji̧?— jö̧a̧linobe Jesúsma Martanöma.

Hechos 28:4

Jobe ju̧kwadöma a̧ko'da Pablonö yö̧obe edö yötja̧lakwawijatö: —¡Ayö! Isabenö bite a̧ko'da yö̧ajökwema jojonö kwabö lobina. Ojwe okwatjö ö̧jibajayonö babema ö̧jibökö. Ö'wö baibakwo̧— yötja̧lakwawijatö.

Hechos 4:21

Jejenö jö̧tja̧liawö̧, la'aka luwedöma Pedronö, Juannö, Inia tjötjobö wedo, jö̧ba̧lö, omukwatijadötö. Jo̧kwaijayonö jejenö wetjobö jwibijadötö, jojodöma tjöpöjödobetjö̧. Okobe deinö jobe ju̧kwadöma kwebachö̧kö̧nö otiwanö baibanö otidinobetjö̧ Diosnö ösödijadötö. Jo̧bama, ömasapiya otiwanö baibajökwema, cuarenta o̧biya tupakwö juna̧lijetö. Lekwe kwebachökönö ji̧nanö otiwanö baibinobetjö̧ jojodöma Diosnö ösödijadötö. Jo̧kwaobetjö̧ la'aka luwedöma inia tjötjobö webökönö, labebijadötö Pedronö, Juannö. Jobadönö yemidanö, Jojodönö yökawaduwoko, jö̧ba̧lö, lȩbebö labebijadötö.

1 Juan 4:16

Chö̧ja̧wo̧dö Diosma ökwödökwö dötewinö i̧'yobetjö̧, ja̧danö jo̧bakwö dötewinö di̧'yobetjö̧ isabenö döwaisachibijatö, Diosma jwiinö ile niebobe ökwödönöma, jö̧ba̧lö. Jejenö waisö jo̧banö do̧'wo̧ wana̧lö di̧'yobe, Diosma isabenö ökwödönöma jwiinö ile nibebo̧, jö̧ba̧lö. Chömöledö, Diosma ile nibeböda jo̧. Ja̧danö bakwo̧, ö̧ja̧wo̧dökwö ile nibebö jo̧ma Dioskwö dötewinö 'yo̧. Ja̧danö, Diosma jo̧bakwö dötewinö 'yo̧, ö̧ja̧wo̧dönö ile nibebö 'yo̧kwö.

1 Juan 4:9

Ja̧danö chö̧ja̧wo̧dö, Diosma ¿dakwö i̧sebinada jojodönö jwiinö ile niebi̧ma? Bejenö i̧sebinobe: Iteda itji̧nö, iteakwo̧nöda weinobe böjȩkwö ichö ö'wö baibobö. Ja̧danö, Dios Itji̧ma ökwödö dusula dumusidi̧ midawö ö'wö baibinobe ökwödö do̧'wo̧ luwo̧ okwa ö'wö babiböködö, ba̧kwȩlö̧jatebö ja̧dö badibobö.