Juan 8:32 - Dios Iwene

³² Ja̧danö, ötjö chöba̧ja̧di̧ waisachadö kwö̧jaduwobetjö̧ isabenö ji̧ yötawi̧ma kwöwaisachibaduwakwedöja. Wanedö yötawaduwakwö: Isabenö ji̧ yötawi̧ kwöwaisachibaduwobetjö̧, nu'yö di̧batö tjödinatjö̧ kwö̧jibaduwinö bakibaduwakwedöja, kwuluwo̧duwi wei̧tjö lakebaduwinö— jö̧a̧linobe Jesúsma, wanedö yöbawö.

Juan 8:32 Iomraidhean Croise

Proverbios 1:23

Ju'wibi yöbawuju: —Ötjö jwebebö yötawi̧ma ¡a̧ja̧kwaduwi! Jelobekwö kwomukwataduwi̧ kabatibö ötjö jwebebö yötawi̧ma a̧ja̧kwaduwi. Jobekwö kwa̧ja̧kwaduwitjö̧ma isabenö cho̧’wo̧ luwo̧tjö chomukwati̧ ökwödönö labebö lobö yötawakwujusa, kwöwaisachibaduwinö —yöbawuju—.

Proverbios 1:29

Ja̧danö, ina yöbawuju: —Isabenö ötjönö abeba̧lö, pjabati, jö̧ba̧lö akeba̧laduwijayonö cha̧ja̧kwökakwujusa ökwödönöma, jwebebö yötawi̧ a̧ja̧kwö kwöwaisachibaduwobö kwöpöjödinaduwobetjö̧. Ja̧danö, Isabenö Jo̧nö yebabinö kwomukwatinaduwokobetjö̧ ökwödönö cha̧ja̧kwökakwujusa akeba̧laduwi̧ma —yöbawuju—.

Proverbios 4:18

Jobekwömaökö Dios wei̧ a̧ja̧kwadö tjö̧ji̧ma. Dios wei̧ a̧ja̧kwadöma sulabenö omukwatadö tjö̧ji̧danö jö̧kö̧dö. Wanedö yötawakwö chitji̧: Dewachenama, i̧ya̧nö deapjo dewachobe tjo̧'o̧manö, ja̧wo̧ laebaja̧ tupakwö jwiinö dewobe jweinö öjenanö. Jobekwö Dios wei̧ a̧ja̧kwadö kwetjachamanö dewinö dejatobe, ajayinö dejatemitjö̧ tupakwö jwiinö dewinö dejatobe, otiwanö edö, salöamanöda tji̧'yobö.

Isaías 2:3

Jau, ba̧jȩkwadö tjitebokwena jojodöma yöba̧lakwawö yötja̧lakwedö, –Isabenö Jo̧ itea mösa'obe di̧'yaduwo, ajayinö ji̧na Jacob ösödinökwe Dios ejube di̧'yaduwo. Jobe di̧'yaduwo, Diosma ökwödönöbi iteda wei̧ ö̧ba̧ja̧dakobetjö̧, ja̧danö ökwödöbi Dios wei̧ a̧ja̧kwö dö̧jakobetjö̧, –jö̧ba̧lö yötja̧lakwedö. —Jau, Sion mösa'otjö laebakobe Dios wei̧ma, Jerusalen comunidadtjö Isabenö Jo̧ yöawi̧ laebakobe, bö̧je ba̧kwemeachibanö tja̧ja̧kwobö.

Isaías 30:21

Isabenö otiwanö ökwödönö jweebakwo̧ chömöledö, baikwö yöta̧la: Kwölakwiyuduwinö ökömakwötjö kwa̧ja̧kwaduwakwedöja, —'Ya̧kwawa manama, bimada, bimanö kwekachaduwo, —jö̧ba̧lö. Jau, kwöwaisaduwakwöchobe jalachö kwi̧'yaduwobö jȩnabi, wajwiköbaduwakwöchobe jalachö kwi̧'yaduwobö jȩnabi, otiwanö jweebakwo̧.

Isaías 35:8

Ja̧danö niji ö'wejenö, jalama mana ja̧kobe, ja̧danö ja̧ma Sulabe jwibadö kwetjachama, jö̧ba̧lö ötjabakwama. Ja̧manö Dios öba a'otjö 'yȩekwi̧ juna̧ladöma kwetjachökakwedö, sule Dios wei̧ a̧ja̧kwö ju̧kwadöda jamanö tjö̧jakwedö. Ja̧manö la'akatjöda kwetjachökakwedö, sulabedö jweinö omukwatöködöma.

Isaías 54:13

Ja̧danö ötjö Isabenö Jo̧ Diosda kwitji̧munö chöba̧ja̧dakwo̧sa, ja̧danö kwi̧tji̧muma isabenö jwiinö otiwanö tjö̧jakwedö.

Isaías 61:1

Isabenö Jo̧ O̧'wo̧ Luwo̧ma ötjökwö jo̧, Isabenö Jo̧ Diosda ötjönö omudawö ujuninobetjö̧, otiwa jawa wene usula jojodönö yötawobö. Ötjönö weinobe, tjo̧'wo tjo̧bekwö ju̧kwadönö tjo̧'wo ösöwachibanö pjatatobö, ja̧danö ölakwabikwawö juluwajö do̧tja̧tajawönö tjetjatakwa̧ yötawobö, ja̧danö ka̧lena ba̧jadönö ka̧lenatjö tjö̧jibakwa̧ wene yötawobö.

Mateo 11:29

Jau chömöledö, ötjö weti̧ ja̧badö bakibaduwo, ja̧danö ötjö chöba̧ja̧di̧ kwöwaisachaduwo chömöledö, ötjöma isabenö dösölö̧jinö ja̧bo̧chobetjö̧. Jau chömöledö, isabenö ökwödönö pjatatocha. Wanedö yötawa: Kwo̧'wo̧ luwo̧duwitjö kwö̧'wachaduwobö pjatatocha,

Juan 1:14

Ja̧danö, Dios Iwene Jo̧, jö̧ba̧lö, ötjabökwema jojo baibanö jeminökwe. Ja̧danö, jojo baibanö jeminökwema böjȩnö ökwödökwö ö̧jinobe. Ökwödöma jo̧banö edö, Jwiinö otiwo̧, jö̧ba̧lö, dösödijatö. Yelösöda, jo̧bama Dios Itji̧, iteakwo̧daobetjö̧ jwiinö otiwo̧. Ja̧danö, jo̧bama jwiinö lȩlö̧jino edöda pjabato̧. Ja̧danö, jweinöda yöba̧lo̧.

Juan 1:17

Damötjö Diosma iyinobe Moisésnö ökwödönö yöawobö, iteda weina jawa wene, a̧ja̧kwö dö̧jobö weinama. Jo̧kwaijayonö Moisés weinatjö̧ Diosma i̧sebinokobe iteda lȩlö̧jino edi̧ma. Iteda weina jawada i̧sebinobe. Ja̧danö Diosma Jesucristonö weenama ja̧ Moisésnö weinatjö o̧penönö mikwawi̧ma iyinobe ökwödönöma. Ja̧danö, Jesucristonötjö Diosma i̧sebinobe iteda jwiinö lȩlö̧jino edi̧ma, jojodönö pjabatö. Ja̧danö, Jesucristonötjö Diosma itedada jweinö yöa̧lina i̧sebinobe ökwödönöma, Ötjö jö̧ta̧li̧danö isabenö ja̧bo̧sa, jö̧ba̧lö.

Juan 14:6

—Ötjödasa Dios ö̧jobekwö 'ya̧kwawa manama— yöawinobe Jesúsma—. Ja̧danö, ötjödasa jweinö yöbawo̧ma jweinö jo̧chobetjö̧. Ja̧danö, ötjödasa ba̧kwȩlö̧jatebö ja̧kwawa iyo̧ma. Ja̧danö, ötjöma Dios ö̧jobekwö 'ya̧kwawa manachobetjö̧, ötjönöda 'yo̧ma Dabe'do Dios ö̧jobekwö ichibakwo̧.

Juan 16:13

Jo̧kwaijayonö Dios O̧'wo̧ Luwo̧, otiwanöda yöbawo̧ma ichena jo̧bada öibakwo̧ ökwödönöma, otiwanö kwöwaisachibaduwobö kwo̧'wo̧ luwo̧duwinö. Dios O̧'wo̧ Luwo̧ma, Iteda iwene yöawökakwo̧, Chabe'do iwene a̧ja̧kwakwawada yöawakwo̧. Baledakwa̧bi öwaitjöda yöa̧lakwo̧.

Juan 17:17

Chabe'do, jobadönö tjo̧'wo̧ luwo̧nö kwöba̧ja̧dodönö ökwö isabenö kwiwenema, ja̧ kwiwene tjöwaisachibanö. Jejenö jobadönö kwöba̧ja̧do ökwö kwiwene waisö wainö tjuju̧kwobö, suli̧ jawakwö pjabacha̧lökönö— aebinobe—.

Juan 6:45

Damötjö Dios yöawi̧ yöbawadö tjiwȩyudinobe, Diosma okobe deinö jojodönöma ba̧ja̧do̧, jö̧ba̧lö. Jo̧kwaobetjö̧ yötawaduwakwö. Dabe'do Dios iwene a̧ja̧kwö waisachibadöma ötjönö ösödö tjichibakwedö.

Juan 7:17

Ja̧danö, Dios ösödi̧ ösödadöma, ötjö yötawi̧ a̧ja̧kwö, ötjö chomukwati̧ yötawojobö, Dios omukwati̧da yötawojobö, tjöwaisachibakobe.

Juan 8:36

Jo̧kwaobetjö̧, Dios Itji̧da ökwödö, suli̧ ömöayedödanö ju̧kwadönö kwö̧jibaduwinö pjabato̧ma. Dios Itji̧da suli̧ wei̧tjö kwö̧jibaduwinö pjaatitjö̧ma, isabenö kwö̧jibaduwinö bakibaduwena— yöawinobe.

Romanos 6:22

Jo̧kwaijayonö, Diosma suli̧tjö kwö̧jibaduwanö ja̧bö, iteda ömöayedö bakibaduwanö ja̧inobe. Ja̧danö, ja̧ Dios ömöayedö kwö̧jaduwi̧ mikwawi̧ma biya̧da chömöledö: Babema sulabetjö 'da̧bachibö ja̧nö, ba̧kwȩlö̧jatebö ja̧kwawa juna̧ladöja.

Romanos 8:15

Jau chömöledö, isabenö Dios i̧tji̧mubedösa babema. Baikwö yötawa: Ajayinöma, suli̧ ömöayedödanö dö̧jinobe, ¿jö̧tö? Ja̧danö, suli̧ ömöayedödanö ja̧nö, yedabinobe, ¿jö̧tö? Jo̧kwaijayonö, yedaboböma jwiobe yelösöda babema. Jau chömöledö, Diosma weinobe iteda O̧'wo̧ Luwo̧nö, ökwödö do̧'wo̧ luwo̧nö ö̧jobö. Ja̧danö, jo̧ba Dios O̧'wo̧ Luwo̧ma, Diosda i̧tji̧mu badibobö ja̧inobe. Ja̧danö, Dios i̧tji̧mu badibobö ja̧inobetjö̧, babema yebabökönö adebena Dabe'do Diosnö, Chabe'dowe jö̧ba̧lö.

Romanos 8:2

Jau chömöledö, Jesúskwö a̧jö dö̧jobetjö̧, O̧'wo̧ Luwo̧ Dios ujulunöda dö̧jibinobe. Dios O̧'wo̧ Luwo̧ ujulunöda, sulabe dujuna̧li̧tjöbi, woawatjöbi dö̧jibinobe chömöledö. Ja̧danö, jejenö dö̧jibinobetjö̧, ba̧kwȩlö̧jatebö ja̧kwawa dujuna̧lobe babema Cristo Jesúskwö chömöledö.

1 Corintios 7:22

Jau chömöledö, bakwo̧ jelo̧ ömöayo̧ Dios jwöinökwema, wamenö uluwo̧ ömöayo̧ ö̧jijayonö, o̧'wo̧ luwo̧nö uluwo̧ wei̧tjö Dios laebinökwedanö ichejekwa. Ja̧danö, jelo̧ ömöayo̧bö̧kö̧ Cristo jwöinökwema, Cristo ömöayo̧ baibanö jo̧.

Gálatas 5:1

Jau chömöledö, isabenö Moisés iwȩyudina ömöayedödanöböködösa ökwödöma, Moisés iwȩyudina ja̧bö dö̧jo jö̧ba̧lö, Cristoma Moisés iwȩyudina ömöayedödanö dö̧ji̧tjö dö̧jibinö ja̧inobetjö̧. Jo̧kwajabetjö̧ 'diinö kwö̧jaduwo, yemidanö Moisés iwȩyudina ömöayedödanö bakibaduwanö ja̧tjapji jö̧ba̧lö.

Gálatas 5:13

Chömöledö, Diosma ökwödönö jwöinobe, Moisés iwȩyudinatjö kwö̧jibaduwinö, ¿jö̧tö? Jo̧kwaijayonö, Aaa, Moisés iwȩyudina ömöayedödanöböködö dö̧jobetjö̧, jwaikwöda dösödi̧ jawada ja̧bö dö̧jo jö̧ba̧löma kwomukwataduwa chömöledö, kwömöledöduwi Jesúsnö ösödadönö ösödabikwawö ja̧nö, tjömöayedödanö ja̧nö pjabatakwawö kwö̧jaduwo chömöledö.

2 Timoteo 3:7

Jau Timoteo, jobadöma tjösödi̧ jawa tjisakwobetjö̧, ba̧kwȩlö̧jatebö ju'wi omöna yöawakwawabi, ju'wi omöna yöawakwawabi tja̧ja̧kwobe. Jo̧kwajabetjö̧ nöinö omöna yöawakwawa tja̧ja̧kwobetjö̧, isabenö waisakwawa tjöwaisobö jwibadö, ja̧danö juluwanö 'daliwanö tjö̧libobe.

Santiago 1:25

Baikwö kwö̧jaduwobö jo̧be: Dios yöawi̧, iteda iwenetjö yöawi̧ma ö'wiawakwa̧lö̧jönö a̧ja̧kwö kwomukwata̧laduwo. Chö̧ja̧wo̧dö, Dios iwenema tjöba dekwawöte i̧sebi̧danö ökwödönö i̧sebobe Dios ösödi̧ma. Ja̧danö, ökwödö sulabe dujuna̧li̧ i̧sebobe. Ja̧danö, Dios ösödi̧danö ja̧kwawa i̧sebobe. Nöinö i̧sebobe Dios iwenema. Jo̧kwaobetjö̧ Dios iwene kwa̧ja̧kwaduwaja̧ ikena kwo̧'wo̧duwi̧ jwibibökönuwi Dios wei̧ma. Dios wei̧ a̧ja̧kwö kwi̧sebaduwobö jo̧be chö̧ja̧wo̧dö. Ju'wi wanedö yötawa chö̧ja̧wo̧dö: Ökwödöma böjȩ sulabenö ji̧kwö 'dii̧ osiju ka̧lenasijunö yö̧dekwinobe. Ja̧danö, Dios yöawi̧ma ejachajibinö pjabatö dö̧jibinö pjaatinobe, Dios otiwanö omukwati̧danö omukwatö dö̧jobö. Chö̧ja̧wo̧dö, kwo̧'wo̧duwi jwikibaduwoko Dios yöawi̧, iteda iwenetjö yöawi̧ma. Dios yöawi̧ a̧ja̧kwö yöawi̧danö omukwatö ja̧köbaduwo chö̧ja̧wo̧dö, kwö̧jaduwi̧ma. Ja̧danö, Dios yöawi̧danö ja̧bö jo̧ma Dios jwiinö pjaatökwe, okobe jwiinö böjȩnö ja̧nö ja̧i̧ma.

Santiago 2:12

Ja̧danö chö̧ja̧wo̧dö, yötawaduwakwö. Cristoma ökwödönö lȩlö̧jino edö dö̧jibinö pjaatinobe. Jo̧kwaobetjö̧ ökwödöbi jojodönö lȩlö̧jino edö dö̧jobö jo̧be chö̧ja̧wo̧dö. Ja̧danö, ju'wi möle ökwödöma Dios öba a'o ja̧nö datadakwedösa. Ja̧ möle Diosma ökwödönö bakwo̧nökwena edakobe, Bite Cristo ö̧jibinö pjaatinökwema ¿Cristo lȩlö̧jino edinadanö edinaji̧ ju'wedönö? jö̧ba̧lö. Isabenö, ökwödöma babe, böjȩnö ina dö̧jayi Dios lȩbebö yöawakwa̧ domukwatobö jo̧be. Ja̧danö, ju'wi jawabi. Yöda̧li̧ma jweinöda yöba̧lö, ja̧di̧bi otiwanöda ja̧bö dö̧jobö jo̧be chö̧ja̧wo̧dö, jojodönö lȩlö̧jino edö.

1 Pedro 2:16

Jau chömöledö, kwöwaisaduwa, ju'wedö Cristonö ösödadöma yötja̧lena, Aaa, Cristonö chösödobetjö̧, ida̧ökö mölejȩ jojosa, böjȩ jojobö̧kö̧sa, jo̧kwajabetjö̧ luwedö wetji̧ cha̧ja̧kwobö jwibo̧sa, mölejȩ jojodö tjuluwedötjokobetjö̧, jö̧ba̧lö. Jau chömöledö, jejenö omukwatadö tjuju̧kwobe, ja̧danö jejenö omukwatö, sulabenö ja̧bö tjö̧jobe. Jobadö tjomukwati̧danöma kwomukwataduwa chömöledö. Isabenö yötja̧li̧danö, böjȩ luwedö tjömöayedöböködösa, jo̧kwaijayonö Dios ömöayedösa, ja̧danö jo̧bama ökwödönö weobe, luwedö wetji̧ ja̧bö dö̧jobö. Jau chömöledö, Dios ömöayedö ja̧nö, sulabenö ja̧bökönö jwaikwöda otiwanö ja̧bö kwö̧jaduwo.

2 Juan 1:1

Jesústjö chö̧ja̧wo̧dö dokwa. Ötjöma Jesúsnö ösödadö tjuluwo̧sa, ja̧danö te'ada̧lakwawa jojosa. Ja̧danö, böjanö wȩyudö yötawa ökwödö Jesúsnö ösödadö ko̧ko̧kwa̧ladönö, Dios omudawö ujuninawö̧nöma. Ja̧danö, chö̧ja̧wo̧dö yötawaduwakwö. Ökwödönö ile nibebo̧sa bakwainö Dios yöawi̧, isabenö ji̧ iwenema dösödobetjö̧. Ja̧danö chö̧ja̧wo̧dö ötjödamaökö, okobe deinö Dios isabenö ji̧ yöawi̧ ösödadöma ökwödönö ile nitjebobe.