Juan 8:12 - Dios Iwene12 Ikenama, Jesúsma yemidanö yöawinobe jojodönö: —Wanedö yötawa: Ötjödasa dewinö jo̧ma. Ja̧danö, ötjödasa jojodönö öbibo̧ma, dewa'wo okwanö kwetjachobö. Ja̧danö, böjȩ jojodö tjo̧'wo̧ luwo̧ okwanö dewinö chidejatobe, tjo̧'wo̧ luwo̧ jawa tjöwaisachibanö. Ja̧danö, ötjökwö ichadöma yȩa'wo okwanö kwebachöködö, kwetjachobema dewinö chidejatobetjö̧. Ja̧danö, ötjökwö ichadönöma, tjo̧'wo̧ luwo̧ okwanö dewinö dejatö chi̧sebakwo̧sa, ba̧kwȩlö̧jatebö ja̧kwawa tjujuna̧lobö tjöwaisachibanö— yöawinobe Jesúsma. Faic an caibideil |
Juan 8:12
31 Iomraidhean Croise
—Ötjö chömöayo̧ ja̧nö, Jacob itji̧mu tupadanö jojodö sasokwena jojodönö, yemidanö ajayi tjitebonö Israel nijinö tjö̧jobö tjekatobö otiwa. Jo̧kwaijayonö ja̧ otikwa otiwijayonö, ja̧ otikwadama ba̧jȩkwachökena, jemi tupakwöbi kwotidobö chösöda. Jo̧kwajabetjö̧ ju'wibi tjitebotenia jojodönö dejato̧ bakibanö chujunakwo̧sa, tjö̧jibinö pjatatakwa̧ma, bö̧jȩ bakwachö̧jȩ ju̧kwadönöbi tjö̧jibinö pjatatakobetjö̧, —jö̧ba̧lö babe yöawobe ötjönö, jö̧ba̧lö laebobe Dios ömöayo̧ yöa̧li̧ma.
Baikwö yöta̧laduwakwö chömöledö: Ökwödötjö didöda Isabenö Jo̧ Diosnö yebabinö ösödö kwö̧jaduwobeda? Ökwödö Diosnö ösödadösa jö̧ba̧ladöma, Dios ömöayo̧ yöawi̧ a̧ja̧kwö kwö̧jaduwo chömöledö. Ja̧danö ökwödötjö yȩa'wo okwa, dewi̧ ja'yubebi dewokobe kwebachadöma, Isabenö Jo̧nö kwo̧'woduwi wana̧lö kwö̧jaduwo, kwuluwo̧duwi Diosnö ösödö kwö̧jaduwo, —Diosda pjaatakwo̧, —jö̧ba̧lö.
Jejenö abebö tja̧ja̧kwökwe wanedö yöawinobe: —Dewi̧ma lekwema dejatokobe, ökwödö kwö̧jaduwobema. Jo̧kwaobetjö̧ ina dejatobetjö̧ dewinö dejatobeda kwekachaduwo otiwanö kwi̧'yaduwobö. Jau, dewa'wo okwanönda kwekachaduwo, yȩa'wo okwa tekachibaduwapji jö̧ba̧lö. Yȩa'wo okwa kwebachadöma tji̧'yobema edökönö kwebachadö— jö̧a̧linobe Jesúsma, wanedö yöbawö—.
Diosma jojodönö lȩbebo̧, weinökwenö öpöjödadönö, jo̧ba yöawi̧ a̧ja̧kwö öpöjödadönöma. Ja̧danö, iteda itji̧, dewinö jo̧nö webijetö böjȩkwö, dewinö dejatö öibobö jojodönö, tjo̧'wo̧ luwo̧ okwanö, itenöda tjöwaisachibobö. Jejenö weinökwema otiwanö dewinö dejatö öibijayonö jojodötjö ju'wedöma jo̧banö tjöpöjödinobe. Jobadöma sulabenö ja̧bö tjuju̧kwobetjö̧ yȩa'wo okwa tjö̧ji̧da ösödinadö, sulabenö ja̧tji̧ öwawökönö tjö̧jobö. Ja̧danö, yȩa'wo okwa ja̧nö, Dios weinökwenö tjöpöjödobetjö̧ Diosma jobadönö lȩbebo̧.
Jejenö yödawitjö̧ma jwiinö otiwena, Duluwo̧ma judío jojodöböködöbi tja̧ja̧kwobö weinobetjö̧. Baikwö laebobe Duluwo̧ iwenetjöma: Ökwönö 'da̧batö chujuna ötjö chiwene, ji̧bakwawa wene judío jojodöböködö tjöwaisinö yökawobö. Wanedö yötawa. La̧pa̧la̧yu̧ yȩobe tjidejatemi dewi̧danö, ökwödönö wetocha jojodönö yökawaduwobö ji̧bakwawa wenema. Jojodöma ökwö yökawi̧ a̧ja̧kwö, la̧pa̧la̧yu̧ tjidejatemi dewi̧danö edö tjöwaisachibakwedö, ji̧bakwawa wenema. Böjȩ bakwameachibanö ja̧ ji̧bakwawa wene yöbawö kwi̧'yo, jö̧ba̧lö laebobe Duluwo̧ iwenetjöma— jö̧ba̧lijadötö Pablo, Bernabé.
Jobadöma ajayinö yöbawijadötö Dios jojodö tjö̧jibinö ja̧obö weakwo̧ usula emawajo̧ woakwa̧ma. Yöbawijadötö, Dios jojodö tjö̧jibinö pjaatobö weakwo̧ma, wobajo̧ Dios yemidanö tjeachajinö ja̧akwo̧, jö̧ba̧lö. Jejenö ja̧bö, jo̧bama abönö tjeachajinö ja̧ökwe baibakwo̧, jö̧ba̧lö, yöbawijadötö. Jejenö wȩyudö yöbawijadötö jo̧ba, abönö yemidanö teachajinö ja̧ökwe baibakwo̧ma, tjo̧'wo̧ luwo̧ okwa dewachibanö ji̧bakwawa wene yöawakwo̧, judío jojodönöbi, judío jojodöböködönöbi, jö̧ba̧lö, yöbawijadötö damötjö, Dios yöawi̧ yöbawinadöma. Chuluwo̧, ötjöma jobadö damötjö tjiwȩyudinadanö bakwainö yöbawo̧sa— yöbawijetö Pabloma Agripanö.
Jau chömöledö, jobadö sulabenö yöbawadöma mikwawöködö, baikwö yötawa: Ojwese'do kököe'dodanö mikwawöködö, ja̧danö ojwiyo'wo o̧bökö'wo, jwa̧lȩ'epjo jelobe e'ewa'wodanö mikwawöködö, ja'yubebi pjatjatokobetjö̧. Jobadönö baikwö yötawa chömöledö, Diosma jobadönö lȩebakwa̧ omukwatö ujuninobe, ja̧danö ökwöla nöolanö, inesö yȩa'wo okwada tjö̧bakobe.
Jau chömöledö, isabenö jobadönö Dios lȩebakwa̧ wene döwaisobe, jobadöjayedönö Diosma ida̧ökö damötjö lȩebinobetjö̧. Jau chömöledö, damötjö ángelesdötjö sulabenö ja̧binadöma Dios lȩebi̧tjö tjö̧jibinokobe, sulabenö ja̧tjiökwe Diosma jobadönö ödinobe, Dios lȩebakwawö̧ tjö̧jena tjö̧bobö, ja̧danö jobe ka̧lena tjö̧bobe, inesö Dios lȩebakwa̧ möle baibenanö kabatö, ¿jö̧tö?
Chö̧ja̧wo̧dö, Diosma jejenö jo̧obetjö̧, Suli̧ jwibo̧, jö̧ba̧lö ¿dakwö dö̧ji̧da jo̧bakwö domajadenö bakobe dötekwö dö̧ji̧ma? Biya̧ chö̧ja̧wo̧dö: Dioskwö domajadenö bakobe dötekwö dö̧ji̧ma sulabenö ja̧bökönö dö̧ji̧. Jau chö̧ja̧wo̧dö, Diosma suli̧ jwibo̧obetjö̧ jo̧bakwö domajadenö bakobe dötekwö dö̧ji̧ma sulabenö ja̧bökönö dö̧ji̧. Ökwödötjö bakwo̧, Ötjöma dewinö jo̧ Dioskwö chomajadenö bakobe dötekwö jo̧sa, jö̧ba̧lö, yöa̧lijayonö sulabenö ja̧bö ö̧jitjö̧ma ¿jweinö yöba̧lo̧ji̧? Jweinö yöba̧lö̧kö̧, omönada yöba̧lo̧. Isabenö, jo̧bama omajadenö Dioskwö bakobe dötekwö ö̧jitjö̧ma otiwanö ja̧bö ö̧jena. Jo̧bama omajadenö Dioskwö bakobe dötekwö jö̧kö̧. Yȩa'wo okwada kwebachö jo̧, Dios iwene, isabenö ji̧ wenema öpöjödö.
Ju'wibi yötawa jobadönö: Jobadöma taba jwiinö jojodö tjöba a'otjö sulabenö ja̧tji̧ tji̧sebobe, baikwö wanedö yötawa: Balawa inawanö loenama, itjei'wo dewinö öwawinö loobe, okobe deinö tjedobö, ¿jö̧tö? Ja̧danö, bidöbi okobe deinö tjöba a'otjö taba jwiinö sulabenö ja̧tjobe, okobe deinö tjedobö. Chömöledö, Dios yöawi̧ yöbawadöma jweinö jojodönö ötjibobö jo̧be, öbibö yötja̧wi̧ a̧ja̧kwö, Dios ösödi̧danö ja̧bö tjö̧jakobetjö̧, ¿jö̧tö? Jo̧kwaijayonö bidöma Dios yöawi̧ yöbawadösa jö̧tja̧lijayonö, Dios ösödi̧danö ja̧bö tjö̧joböma öbiböködö. Ötjibo jö̧tja̧li̧tjö 'da̧bachibö, sulabenö Dios öpöjödi̧danö ja̧bö tjö̧jobö öbibadö. Ja̧danö, jejenö ja̧bö tjö̧jiökwe Diosma omukwatö ujunajabe, inesö yȩa'wo okwa ba̧kwȩlö̧jatebö tjö̧bobö.
Sanasan