Juan 7:35 - Dios Iwene

³⁵ Jejenö yöawiawö̧ judío jojodötjö la'aka luwedöma, idödada yötja̧lakwawinobe: —¿Dai i̧'yakwa̧da, döbadekwajökemima? ¿Dömöledö tji̧'yinobekwö i̧'yakwa̧ji̧, griego jojodökwö tjö̧jobö tji̧'yinobekwö? ¿Ja̧danö griego jojodönö öba̧ja̧dobö i̧'yakwa̧ji̧?— yötja̧lakwawinobe—.

Juan 7:35 Iomraidhean Croise

Isaías 11:10

Ja̧danö, ja̧ möle bandera ötjabi̧ jawa öwawi̧danö, Isai itji̧ tupadanö jojo la'aka luwo̧ma öwawinö öjamatakwo̧, okobe deinö bö̧jȩnö ju̧kwadöma joba ö̧jobekwö ko̧ko̧kwö tji̧'yakobetjö̧. Ja̧danö, öba a'o ichibajadö, tjitebotenia jojodöma jo̧banö abebö tja̧ja̧kwakwedö, otiwanö ja̧bö tjö̧jakwa̧ tjöwaisakobetjö̧. Ja̧ mö̧le, isabenö okobe deinö jojodöma jo̧ba itebo comunidad ösödö otiwanö tjomukwatakwedö, —Duluwo̧ itebo comunidadma dejatinö salöi̧ comunidad, —jö̧ba̧lö.

Isaías 11:12

Iteda itea bandera kaebakobe, tjitebotenia jojodö öwawinö tjedobö, ja̧danö israel jojodö, ajayinö tjitebotjö a'dewö loinawö̧nö o̧ko̧kodakobe, ja̧danö Juda jojodö tjipjelekwachinö ju̧kwadönöbi o̧ko̧ko̧dakobe, bö̧jȩ bajale ju̧kwadönöbi o̧ko̧kodakobe, a̧dekwanö tjitebobe tjetjachajakobetjö̧.

Isaías 49:6

—Ötjö chömöayo̧ ja̧nö, Jacob itji̧mu tupadanö jojodö sasokwena jojodönö, yemidanö ajayi tjitebonö Israel nijinö tjö̧jobö tjekatobö otiwa. Jo̧kwaijayonö ja̧ otikwa otiwijayonö, ja̧ otikwadama ba̧jȩkwachökena, jemi tupakwöbi kwotidobö chösöda. Jo̧kwajabetjö̧ ju'wibi tjitebotenia jojodönö dejato̧ bakibanö chujunakwo̧sa, tjö̧jibinö pjatatakwa̧ma, bö̧jȩ bakwachö̧jȩ ju̧kwadönöbi tjö̧jibinö pjatatakobetjö̧, —jö̧ba̧lö babe yöawobe ötjönö, jö̧ba̧lö laebobe Dios ömöayo̧ yöa̧li̧ma.

Isaías 56:8

Jau chömöledö, Isabenö Jo̧ Diosma, tjipjelekwachibanö israel nijitjö a'dewö lotjinawö̧ israel jojodönö ko̧ko̧dö tjebato̧, yemidanö tjitebo israel nijinö tjö̧jakobetjö̧. Ja̧danö israel jojodönö ko̧ko̧dö tjebato̧ Diosma, baikwö yöawobe: —Jobadö ida̧ökö cho̧ko̧kodajawö̧ israel jojodödamaökö, ju'wibi ju'wedö israel jojodöböködönöbi ko̧ko̧dö chichejebakwo̧sa, —jö̧ba̧lö.

Mateo 12:21

ja̧danö jo̧banö böjȩ bakwameachibanö jojodö tjo̧'wo̧ tjöwana̧lakobe, jö̧ba̧lö laebobe Isaías iwȩyudinama.

Lucas 2:32

Jo̧bama dewinö idejatakwo̧, tjitebotenia jojodö Diosnö tjöwaisachibakobetjö̧. Ja̧danö ju'wibi, jo̧bama Israel jojoobetjö̧, böjȩnö ju̧kwadöma Israel jojodönö ösödö yötja̧lakobe: Bidö Israel jojodöma isabenö otiwadö, jobadönötjöda Dios weinökwe ichinobetjö̧— jö̧ba̧lö yöawinobe Simeonma.

Juan 12:20

Ja̧danö, Diosnö ösödö Jerusalénnö ichajadötjö ju'wedöma tjö̧jinobe, judío jojodöböködö.

Juan 7:1

Jemi ikenama Jesús Galilea niji comunidadesda, ju'wi comunidadbi, ju'wi comunidadbi 'ya̧nö kweachinobe. Ja̧danö, Judea nijibe kwebachö i̧'yinokobe, jobe ju̧kwadö judío jojodötjö la'aka luwedöma jo̧banö kwabö lotjobö tjomukwatobetjö̧.

Juan 8:22

Jejenö yöawiawö̧: —Bitema, Chȩwa̧jakwemima kwichibaduwökakwedöja, jö̧ba̧lö, yöawaja̧ma, ¿itedada ö'wö baibanö kwabawakwawö loakwa̧ji̧?

Hechos 11:18

Ikenama Pedrokwö wene juna̧lakwawö yöba̧ladöma Pedro yöawobe a̧ja̧kwö wene tjujuna̧li̧ma kabatakwawijadötö. Wene tjujuna̧li̧ma kabatibö Diosnö ösödö jö̧ba̧lijadötö: —Diosma judío jojodöböködönöbi otiwanö pjaatinobe. Tjomukwati̧ balewachö itekwöda tjichibobö, itekwöda ba̧kwȩlö̧jatebö tjuju̧kwobö pjaatinobe— jö̧ba̧lö, ösödijadötö Diosnö.

Hechos 11:20

Jobadöma judío jojodönöda yötjawijayonö jobadötjö ju'wedöma, Chipre jojodöbi, Cirene jojodöbi Antioquíabe 'ya̧jadö jobetjöma judío jojodöböködönöbi yöbawiabijadötö, Duluwo̧ Jesús pjaatina wenema.

Hechos 14:1

Ikenama Pablo, Bernabé Iconionö ichibajadöma judío jojodö yötjawejunö tebachijadötö. Tebachajadö Dios iwene jweinö yöbawijadötö. Jweinö yötjawiawö̧ jojodöma tjo̧'wo̧ luwo̧nö tjösödinö a̧ja̧kwö, Jesúsma dö̧jibinö pjabato̧, jö̧ba̧lö, ösödö do̧batö emijadötö Jesúsnöma. Ba̧jekwadö, judío jojodöbi judío jojodöböködöbi Pablo, Bernabé yötjawi̧ a̧ja̧kwö Jesúsnö ösödö do̧batö emijadötö, Jesúsma dö̧jibinö pjabato̧, jö̧ba̧lö.

Hechos 17:4

Jejenö Pablo yöawi̧ a̧ja̧kwö judío jojodötjö ju'wedöma tjösödobetjö̧, Jesúsma dö̧jibinö pjabato̧, jö̧ba̧lö, ösödö do̧batö emijadötö Jesúsnöma. Jobadöma Pablo, Silas yötjawi̧danö omukwatö ju̧kwijadötö. Ju'wedöbi, judío jojodöböködöbi a̧ja̧kwö ösödijadötö. Jobadöma judío jojodöböködöjayonö judío jojodö ja̧tji̧danö ja̧bö ju̧kwadö. Ja̧danö, jobadötjöbi ba̧jekwadö a̧ja̧kwö, Jesúsma dö̧jibinö pjabato̧, jö̧ba̧lö, ösödö do̧batö emijadötö Jesúsnöma. Ja̧danö, ju'wedöbi, la'aka luwedötjöma, ya̧döda, ba̧jekwadö Jesúsnö ösödijadötö.

Hechos 18:4

Ja̧danö, Pabloma jobe ja̧nö, judío jojodö yötjawejunö tebachö yöbawiabijetö judío jojodönöbi, judío jojodöböködönöbi. Pabloma jojodö yötja̧li̧ a̧ja̧kwö atada̧lö yöbawiabijetö Dios jawa otiwa jawa wenenöma. Ja̧danö, ösödö yöbawiabijetö Pabloma, Jesúsnö tjösödobö.

Hechos 21:21

Kwi̧'yajabe okobetjö jobadöma ju'wedö ökwönö omöna yötjawi̧ tja̧ja̧kwinobe, Pabloma judío jojodönö weinobe katjatibobö Moisés wȩyudö weinama, Dios yöawi̧ iwȩyudinama, jö̧ba̧lö. Jejenö omöna yötjawinobe ju'wedöma. Ja̧danö, ju'wibi omöna yötjawinobe, biya̧: Pabloma weinobe judío jojodönö tji̧tji̧munö, ömadönö, tjötade bajalesado̧ 'wibebö lotjoko, jö̧ba̧lö, omöna yötjawinobe. Ja̧danö, Pabloma weinobe judío jojodö ba̧kwȩlö̧jatebö ja̧biatjina jawama kabatibö tjuju̧kwo, jö̧ba̧lö, omöna yötjawinobe ökwönöma. Jejenö bemi ju̧kwadö Jesúsnö ösödadö judío jojodöma tja̧ja̧kwinobe ju'wedö omöna yötjawi̧ma— yötjawijatö te'ada̧lakwawa jojodöma Pablonöma—.

Hechos 22:21

Jejenö yötawijayonö Chuluwo̧ma weijatö ötjönöma, Belöma 'ya̧wi, ökwönö jelobe ödö kwi̧'yobö wetobetjö̧, judío jojodöböködönö yökawobö, jö̧ba̧lö, weijatö— jejenö yöbawijetö Pabloma.

Romanos 1:16

Jau chömöledö, tabada̧lökönö yöbawo̧sa otiwa jawa wenema, jo̧kwajabetjö̧ isabenö ökwödönöbi yötawobö jö̧ta̧la. Jau chömöledö, tabada̧lökönö yöbawo̧sa. ¿Tajawedö chötabada̧lobö chömöledö? Ja̧ weneda inesö mikwawi̧ wene, ju'wima jwiobe yelösöda, jojodö tjö̧jibobö chömöledö. Okobe deinö ja̧ otiwa jawa wene ösödadönöma, tjö̧jibinö ja̧akwo̧ Diosma, abönö a̧ja̧kwinadö judío jojodönöbi, judío jojodöböködönöbi. Ja̧danö, ja̧ weneda ji̧kwa weneobetjö̧, tabada̧lökönö yöbawo̧sa ötjöma chömöledö. Jau, ja̧ wene isabenö juluwi̧ ji̧.

Efesios 3:8

Chömöledö, ötjöma ju'wedö Dios ömöledö babibinadötjö baikwönönöda jo̧sa. Jejenöijayonö Diosma ötjönö lȩlö̧jino edö 'da̧batö ujuninobe, judío jojodöböködönö yötawobö, Cristoma jwiinö pjabato̧, jwiinö otiwo̧, jwiinö juluwo̧, jö̧ba̧lö. Ja̧ jawa, Cristo pjaati̧, otiwi̧, ujuluwi̧ jawa kaatiboböma jwibo̧, jö̧ba̧lö, yötawobö 'da̧batö ujuninökwesa.

Colosenses 1:27

Jojodö ajayinö wajwitjina wene Diosma iteda ömöledönö i̧sebobö jö̧a̧lobe, inesö otiwi̧ wenema. Ja̧danö ja̧ wenema sule judío jojodönöda i̧sebobömaökö, judío jojodöböködönöbi ja̧ ajayinö wajwitjina wene i̧sebobe chömöledö. Ja̧ wajwitjina wenema biya̧ chömöledö, Cristoma kwo̧'wo̧ luwo̧duwinö ö̧jobetjö̧, inesö otiwobe mölejȩbe kwö̧jaduwakwedöja jö̧ba̧lö.

1 Timoteo 2:7

Ja̧danö, Diosma okobe deinö tjö̧jibobö ösödo̧obetjö̧, ötjönö weinobe, Jesús webawo̧ batibanö, ja̧danö judío jojodöböködönö yöbawo̧ batibanö. Ja̧danö, ötjönö weinobe judío jojodöböködönö isabenö wene yötawobö, Jesús jawa isabenö wene yötawobö weinobe. Ja̧ yötawi̧, judío jojodöböködönö yötawobö weinobe jö̧ba̧lö yötawi̧ma, jweinö yötawa, omöna yöta̧lökö.

2 Timoteo 1:11

Ja̧danö, ja̧ wene yötawo jö̧ba̧lö Diosma 'da̧batö ujuninobe ötjönö, yöbawo̧ batibanö, ja̧danö Cristo webawo̧ batibanö, ja̧danö ja̧ wene ba̧ja̧do̧ batibanö.

Santiago 1:1

Chömöledö, Cristotjö chö̧ja̧wo̧dö dokwa. Ötjö Santiago böja kwialusöjanö wȩyudö yötawa ökwödö judío jojodönö, Israelbetjö labebinadö jelobebi, jelobebi ju̧kwadönöma. Ötjöma Dios ömöayo̧sa. Ja̧danö, Duluwo̧ Jesucristo ömöayo̧sa ötjöma. Böja kwialusöja weta ökwödönö Jesúsnö ösödadönöma.

1 Pedro 1:1

Dokwa chömöledö, ötjöma Jesucristo webawo̧ Pedro mikwo̧sa. Ötjöma böja kwialusöja wȩyudö wetaduwakwö, ökwödö Dios omudawö ujuninawö̧ mölejȩ jojodönö. Jau chömöledö, ina böjȩnö kwö̧jaduwijayonö, mölejȩ jojodöja. Ja̧danö ökwödö jelobetenia ju̧kwadönö chiwȩyudobe, Ponto nijinö ju̧kwadönöbi, Galacia nijinö ju̧kwadönöbi, Capadocia nijinö ju̧kwadönöbi, Asia nijinö ju̧kwadönöbi, Bitinia nijinö ju̧kwadönöbi.