Juan 7:14 - Dios Iwene

¹⁴ Ja̧danö, pjiesta ö'wejenö baledena Jesúsma ichibö teachinobe Dios eju okwa, yöbawö.

Juan 7:14 Iomraidhean Croise

Mateo 21:12

Jemi ikenama, Jesúsma Dios eju a̧petusȩko̧ teachinobe, ja̧danö jobetjö okobe deinö tea iyadönöbi, tea emadönöbi a'dewö loinobe. Balada balewadö tjitea mesasötebiya wi'yödöbeabinö loinobe, ja̧danö yu̧nu̧ku̧dönö iyadö tjitea wa̧kwawaökiya wi'yödöbeabinö loinobe.

Mateo 26:55

Ikenama, Jesúsma jo̧banö do̧tjatobö ichajadönö abebö a̧ja̧kwinobe: —Naukwabo̧ labo̧danö chichejekwobetjö̧, ¿kwölöte'ijukwö ja̧danö ö̧'iyakwö ichejebö ötjönö do̧batö kwichaduwaji̧? Mölekwena Dios ejutjö ba̧nö jojodönö chöba̧ja̧dijatö. ¿Tajawedö jobetjö ötjönö do̧katinaduwöködaja̧?

Lucas 19:47

Ja̧danö, jemi ikenama mölekwena Jesúsma Dios eju a̧petusȩko̧tjö jojodönö öba̧ja̧dinobe. Ja̧danö, Diostjö jojodötjö ö'weje pjabatadötjö la'aka luwedöbi, Moisés iwȩyudina ba̧ja̧dadöbi, ju'wedö jojodö tjuluwedöbi Jesúsnö tjöpöjödinobe, ja̧danö öpöjödö jo̧banö söbebö lotjobö tjisakwinobe.

Juan 18:20

Jejenö aeba̧liökwe: —Ötjöma ba̧kwȩlö̧jatebö jojodö tjeda̧lonö yöbawiachijatö. Judío jojodö ba̧nö tja̧ja̧kwa̧leju okwa ja̧nö yötawijatö. Dios eju okwatjöbi ba̧kwȩlö̧jatebö yöbawiachijatö jojodö tjeda̧lonö. Ju̧kwawibö ja̧nöma yötawijökötö.

Juan 5:14

Jemi ikenama, Jesúsma, Dios eju okwa tebachajo̧, öbadekwajinobe otidö loajökwenöma. Ja̧danö, jö̧a̧linobe jo̧banö: —A̧ja̧kwitjö. Babema otiwanö bakibajabe. Ja̧danö, sulabenö ja̧bö kwö̧ji̧ma kabatibi, ju'wi suli̧ jawa, o̧penönö suli̧ jawama ökwönö baibapji jö̧ba̧lö— jö̧a̧linobe Jesúsma.

Juan 7:2

Ja̧danö, ida̧ökö judío jojodö tjukwi̧ pjiesta lekwokobe, Judea niji Jerusaléntjö baledakwa̧ pjiestama. Ja̧ pjiesta, löwöte pjiesta, jö̧ba̧lö, mikwinobe, ja̧ pjiesta baledena judío jojodöma löwöte tjotidinobe, jötenöda ju̧kwö.

Juan 7:28

Ja̧danö Jesús, Dios eju okwa ja̧nö, jojodö tjomukwati̧ waisö labinö yöawinobe: —Isabenö ¿ötjönö kwöwaisaduwiji̧? Ötjö chitebo kwöwaisaduwiji̧, ötjö chichinemima?— abebö a̧ja̧kwinobe—. Ötjö chomukwati̧da ja̧tobö chichinokobe baima. Ötjöma Dios, isabenö jo̧ weinökwesa. Chedemi ökwödöma jo̧banö wajwiköbaduwobe— yöawinobe—.

Juan 7:37

Ja̧danö, pjiesta mölebiyatjö 'dö̧ibaji̧ möle, jwiinö mikwawi̧ möle Jesúsma jamatö labinö yöawinobe: —Ojwiyo o̧ti̧ tjöbö ja̧dönö jwöta, Ötjökwö ichaduwi kwowaduwo, jö̧ba̧lö.

Juan 8:2

Ju'wi dewachö, jobetjö jwibachö, yȩayi, Dios ejube yemidanö yöbawö i̧'yinobe. Jojodöma ba̧jekwadö a̧ja̧kwö tjichinobe. Ja̧danö, Jesúsma ba̧nö ichajadönö yöawinobe.

Juan 8:20

fariseo jojodönö, Dios eju okwatjö, balada tjiyi̧ a̧japjo jemi ö'öbö ja̧nö. Jobe ja̧nö yöawijayonö la'aka luwedöma ina do̧batö tje'ewinokobe jo̧banöma. Do̧batö tje'ewakwa̧ möle, Dios badedö ujunina möle ina badekwachokobetjö̧, ina Jesúsnö do̧batö tje'ewinokobe.