Juan 4:48 - Dios Iwene

⁴⁸ Jejenö aebökwe Jesúsma jö̧a̧linobe: —Ökwödöma sule chi̧seboböda kwedaduwobö kwisakwaduwa, juluwi̧ jawa i̧sebö, jojodö edajitjökö jawa chi̧seboböma. Ja̧ juluwi̧ jawa chi̧sebökötjö̧ma kwösödaduwökena ötjönöma. Ja̧danö, yöka̧laduwökena, Bitema Dios weinökwe, jö̧ba̧lö, juluwi̧ jawa chi̧sebobe kwedaduwökötjö̧ma— jö̧a̧linobe Jesúsma.

Juan 4:48 Iomraidhean Croise

Daniel 4:2

Okobe jwiinö juluwo̧ Diosma isabenö iteda ujulu i̧sebö, jojodö edajitjökö jawa i̧sebö pjaatinobe ötjönö, ja̧danö jejenö i̧sebö pjaatinobetjö̧ kwöwaisaduwobö yötawaduwakwö.

Daniel 6:27

Jo̧bama iteda ömöledönö tjö̧jibinö pjabato̧, ja̧danö wene tjujuna̧li̧tjö latjebobö pjabato̧. Mölejȩbetjöbi, böjȩtjöbi iteda ujulu i̧sebö jojodö edajitjökö jawa i̧sebo̧ Diosma, ja̧danö jo̧bada iteda ujulu i̧sebö Danielnö didibadötjö ö̧jibinö pjaatajabe— jö̧ba̧lö iwȩyudinobe Daríoma.

Mateo 16:1

Jemi ikenama fariseo jojodötjöbi, saduceo jojodötjöbi ju'wedöma ichö Jesúsnö atjebinobe dakwö ja̧ojobö jö̧ba̧lö: —Ökwöma isabenö Dios weökweköbitjö̧ma, jojodö edajitjökö jawa ja̧bi, ökwönö döwaisachibakobetjö̧— jö̧ba̧lö.

Mateo 24:24

Jau chömöledö, isabenö Dios weakwo̧ jö̧a̧linökwesa jö̧ba̧lö omöna yöba̧ladöma yötjawakobe, ja̧danö Dios yöawi̧ yöbawadösa jö̧ba̧lö omöna yöba̧ladöbi yötjawakobe. Jobadöma jojodö edajitjökö jawa tji̧sebakobe, Dios omudawö ujuninawö̧bi jobadö yötjawi̧ tjösödobö, jo̧kwaijayonö Dios omudawö ujuninawö̧tjobetjö̧ tjösödökakobe.

Mateo 27:42

—Edaduwi, bitema ju'wedönö pjaatinadanöma, iteda ö̧jiboböma juluwö̧kö̧. Jo̧bama isabenö Israel jojodö la'aka tjuluwo̧ ö̧jitjö̧ma, towisa'otjö yutuajobö jo̧be, ja̧danö towisa'otjö yutubajö ichitjö̧ma, jo̧banö dösödena, isabenö Israel jojodö duluwo̧ jö̧ba̧lö.

Marcos 13:22

Ba̧jekwadö, Ötjödasa jojodö tjö̧jibinö pjabatö Dios weajökwesa, jö̧ba̧lö, yöba̧ladöbi, ja̧danö, Ötjödasa Dios yöawi̧ yöbawo̧sa, jö̧ba̧lö, yöba̧ladöbi tjichakobe. Jobadö omöna yöbawö tjichonöbi kwa̧ja̧kwaduwoko. Jobadöma tjo̧'wo̧ sulinö omukwatö jojodö edajitjökö jawa i̧seböbi, juluwi̧ jawa i̧seböbi tji̧sebakobe jojodö tjösödo jö̧ba̧lö. Ja̧danö, jejenö tji̧sebakobe Dios i̧tji̧mu baibanö 'da̧batö ujuninawö̧bi tjösödo jö̧ba̧lö. Jejenö tji̧sebijayonö waekwakobe, Dios i̧tji̧muma tjösödökakobe omöna yöba̧ladönöma.

Lucas 10:18

Yötja̧liökwe, Jesúsma atadinobe: —Jau chömöledö, yöka̧laduwi̧danö jo̧be. Ötjöma Awetjanö chedatö, böba jwiachibi̧danö Awetja mölejȩbetjö mei̧ma. Isabenö chujulu ökwödönö chiyobetjö̧ Awetjanöbi ömöayedönöbi kwujuluwaduwajabe.

Lucas 16:31

Yöa̧liökwe, Abrahamma atadinobe: Isabenö yötawakwö, jobadöma Moisés iwȩyudinabi ju'wedö Dios yöawi̧ yöbawinadö tjiwȩyudinabi tja̧ja̧kwobö tjöpöjöditjö̧ma, la'akatjöda tjösödökakwedö, bakwo̧ woawatjö tjebachajö yöawitjö̧böbi la'akatjöda tjösödökakwedö, jö̧ba̧lö— Jobekwö wanedö yöawinobe Jesúsma, Moisésbi ju'wedö Dios yöawi̧ yöbawinadöbi tjiwȩyudi̧ma, isabenö inesö mikwawi̧, ja̧ a̧ja̧kwö sulabenö tjomukwati̧ kabatibö tjöbalewachobö jö̧ba̧lö.

Juan 12:37

Ja̧danö, Jesúsma jojodönö Dios ujulu nöinö i̧sebinajayonö ina tjösödinokobe jo̧banöma. Ina, Biteda Dios weinökwe, jö̧ba̧lö, tjomukwatinokobe.

Juan 15:24

Ja̧danö, jojodökwö ja̧nö juluwi̧ jawa i̧sebiachijatö, jelo̧ la'akatjöda i̧sebajiökö jawama. Ja̧ chi̧sebi̧ edö, Ayö bitema Dios weinökwe, jö̧ba̧lö, tjösödobö ji̧jayonö tjöpöjödijatö ötjönöbi, Chabe'donöbi. Jo̧kwaobetjö̧, jobadönöma lȩebakwawö̧.

Juan 2:18

Ikenama judío jojodötjö la'aka luwedöma jö̧tja̧linobe Jesúsnö: —¿Ti weaja̧da bidönö a'dewö loköbobö?— abebö tja̧ja̧kwinobe—. Ökwödönö i̧sebi kwujuluma, dedo, Diosda weajabe ökwönö, jö̧ba̧lö, döwaisobö— judío jojodöma wetjinobe Jesúsnöma.

Juan 20:29

Ja̧danö, Jesúsma yöawinobe jo̧banö: —Tomás, ökwöma ötjönö kwedobetjö̧ jejenö, Jesúsma 'yaba̧lo̧, jö̧ba̧lö, ötjönö ösödö yöka̧lobe. Jo̧kwaijayonö ju'wedö, ötjönö tjedököjayonö ösödö yötja̧lakobe, Jesúsma 'yaba̧lo̧, jö̧ba̧lö. Jobadöma, jwiinö tjo̧'wo̧ ösöwanö tjö̧jakwedö, tjedököjayinö tjösödobetjö̧— jejenö yöawinobe Jesúsma Tomásnö.

Juan 4:49

Ja̧danö, la'aka luwo̧ma yemidanö aebinobe: —Chuluwo̧, ötjökwö ichi chitji̧ ö'wö baibapji jö̧ba̧lö— aebökwe:

Hechos 14:3

Jejenö tjölabijayonö Pablo, Bernabé juluwanö ȩwa̧jijöködötö. Ina lekwe ju̧kwijadötö jobema. Yebabökönö yöbawiabijadötö Duluwo̧ Jesúsnö. Ja̧danö, yebabökönö, Diosma jojodönö lȩlö̧jino edo̧, jö̧ba̧lö, yöbawijadötö. Ja̧danö, Diosma iteda ujulu iyijetö Pablonö Bernabénö. Jobadöma Dios ujulunö jojodö edajitjökö jawa i̧sebijadötö. Jejenö ja̧bö jojodönö i̧sebijadötö, Ökwödöma Dios ujulunö otidadösa, jö̧ba̧lö. Ja̧danö, Diosma iteda ujulu iyö i̧sebijetö jojodönö, Bidö yötjawi̧, Dios lȩlö̧jino edo̧, jö̧ba̧lö, yötjawi̧ma, ötjöda, Diosda yötawi̧ jweinö yöbawadö, jö̧ba̧lö.

Hechos 15:12

Ikenama Pedro yöba̧lö kaatena okobe deinö a̧ja̧kwadöma wi babibö ju̧kwijadötö, atadakwawa jwiinö. Ikenama Bernabébi, Pablobi yöbawijadötö okobe jwiinö, Dios ujulunö, jojodö edajitjökö jawa tji̧sebinama judío jojodöböködökwö tjuju̧kwonö, judío jojodöböködöma edö tjöwaisachibobö, Bidöma Dios ujulunö otidadö, jö̧ba̧lö.

Hechos 2:19

Ina yöawobe: Ja̧danö, mölejȩbetjö jojodö edajitjökö jawa chi̧sebakwo̧sa. Böjȩnöbi chujulu chi̧sebakwo̧sa, kwu̧kwinö jawabi, ubi̧bi, imiyu'wobi. Jejenö chi̧sebakwo̧sa, Ötjöma isabenö juluwo̧sa, jö̧ba̧lö.

Hechos 2:22

Ina yöbawijetö Pedroma: —Chömöledö israel jojodö, ötjö yötawi̧ma a̧ja̧kwaduwi. Jesús Nazaretnö da̧peachinama Dios ujulu i̧sebiaijatö ökwödö kwö'da̧deduwitjö— jö̧ba̧lijetö—. Jo̧bama jojodö la'akatjöda edajitjökö jawa i̧sebiaijatö. Jejenö i̧sebinama Diosma ökwödönö jweinö i̧sebijatö, Bite Jesús Dios ujulunö i̧sebo̧, jö̧ba̧lö— yöbawijetö Pedroma.

Hechos 2:43

Ja̧danö, Jesús webawedöma jojodö edajitjökö jawa i̧sebiabijadötö. Ja̧danö, Dios ujulunö otidiatjinabi i̧sebiabijadötö. Ja̧danö, jojodöma jejenö tji̧sebobe edö, tjöbajale jalaka baibanö, Bidöma Dios ujulunö otidadö, jö̧ba̧lö, ji̧jadötö.

Hechos 4:30

Ö'wöchadö otiwanö batjibinö dotidonö kwujulu i̧sebö pjabati. Ja̧danö, ökwödönö pjabati, Jesús ujulunö jojodö edajitjökö jawa di̧sebonö. Ja̧danö, pjabati jojodönö di̧sebobö, Ökwödöma Jesús ujulunö i̧sebadösa, jö̧ba̧lö. Ökwö suli̧ jwibo̧ weköbinökwe, ökwö weköbina ja̧bo̧ Jesús ujulunö di̧sebonö pjabati ökwödönöma— abebijadötö Diosnö.

Hechos 5:12

Ja̧danö, Jesús webawedöma jojodö tjö'da̧denö ja̧nö kabatökönö Dios ujulu i̧sebiabijadötö, jojodö edajitjökö jawabi. Okobe deinö Jesúsnö ösödadöma bakwainö omukwatö ko̧ko̧kwijadötö Dios ejunö, Salomón ö̧jȩko̧ mikwȩko̧nö, a̧petukwöchobesȩko̧nöma.

Hechos 6:8

Esteban mikwo̧ma Dios pjaatinökwe. Jo̧bama Dios ujulu i̧sebö ji̧abijetö. Ja̧danö, jo̧bama jojodö tjeda̧lonö edajitjökö jawabi i̧sebö ji̧abijetö.

Hechos 7:36

Jo̧ba Moisésma israel jojodönö Egiptotjö labebijetö. Ina Egipto nijinö kwebachöbi, ojwe duwobu pebiböbi, cuarenta o̧biya jojodö deobe kwebachöbi Moisésma i̧sebijetö jojodö edajitjökö jawa, Dios ujulu jawama.

Romanos 15:19

Ja̧danö Dios O̧'wo̧ Luwo̧ weitjö̧, Dios O̧'wo̧ Luwo̧ ujulunö jojodö edajitjökö jawa chi̧sebijatö, Dios ujulu chi̧sebijatö, edö Diosnö tjösödo jö̧ba̧lö, Dios wei̧ jobadöbi ja̧tjo jö̧ba̧lö. Ja̧danö, jejenö yötawiawö̧, judío jojodöböködöbi Diosnö tjösödinobe, jobadöbi Dios wei̧ ja̧bö. Jau chömöledö, nöinö yöbawö kwebachiachijatö, Jerusaléntjö jamatö, Ilírico niji baibanö. Jobe okobe jwiinö Cristo jawa otiwa jawa wene yöbawiachijatö.

1 Corintios 1:22

Jau chömöledö, judío jojodöma jojodö edajitjökö ujulu jawa i̧sekwada abebadö, ja̧danö judío jojodöböködöma waisakwawada isakwadö.

2 Corintios 12:12

Kwö'da̧deduwi chö̧jenama, ¿okobe jwiinö Jesús webawedö tji̧sebi̧ jawa chi̧sebinökiji̧? Isabenö chi̧sebijatö chömöledö, ökwödö kwö̧'da̧deduwinö chö̧jenama, isabenö Jesús webawo̧ jawa öwaetjöda chi̧sebijatö. Cho̧'wo̧ 'dibachibö ja̧nö, okobe jwiinö chi̧sebijatö chömöledö, jojodö edajitjökö jawabi, Dios ujulunö otiwanö otikwabi chi̧sebijatö, isabenö Jesús webawo̧sa jö̧ba̧lö.

2 Tesalonicenses 2:9

Jau chömöledö, jo̧ba inesö sulabo̧ma Awetja ujulunö ichakwo̧, ja̧danö omöna i̧sebakobe, ujulu i̧sekwa jawabi, jojodö edajitjökö jawabi.

Hebreos 2:4

Ja̧danö, Diosma iteda ujulu i̧sebinobe jobadönötjö jojodö tjöwaisachibobö, Bidö yötjawi̧ma isabenö ji̧ jawa wene, jö̧ba̧lö. Yelösöda jojodö la'akatjöda edajitjökö jawabi i̧sebinobe Diosma, iteda ujulu, jobadö Jesús yöawina yöbawadö yötjawonö. Isabenö, Jesús yöawina yötjawonö Diosma iteda ujulu i̧sebinobe, ju'wi jawabi, ju'wi jawabi i̧sebö, iteda jwiinö ujuluma, jobadö yöbawadönötjö. Ja̧danö, Diosma jobadö Jesús yöawina yöbawadönöma iteda O̧'wo̧ Luwo̧ ujulutjö iyabinobe jobadö yöbawadönö, bakwo̧nökwena jojodönö pjatjatobö. Ja̧danö, okobe jwiinö Dios iteda ujulu i̧sebi̧ma iteda ösödi̧danöda baledinobe jojodö tjöwaisachibobö, Bidö yötjawi̧ma isabenö ji̧ wene, jö̧ba̧lö. Chömöledö, Diosma iteda ujulu i̧sebobetjö̧, Jesús yöawina isabenö ji̧ wene, jö̧ba̧lö, Jesús yöawina tjöbeba̧lö̧jönö omukwatö di̧'yobö jo̧be. Jo̧ba yöawina wenema jwiinö otiwa jawa wene, dö̧jibinö pjaati̧ wene. Jo̧kwaobetjö̧ ja̧ yöawinama, do̧'wo̧ luwo̧ okwanö do̧tjati̧danö do̧batö di̧'yobö jo̧be jelobekwö omukwatö di̧'yapji jö̧ba̧lö, Jesús yöawina öpöjödö. Chömöledö jelobekwö omukwatö 'ya̧dönöma, Dios lȩebakwawö̧.