Juan 3:35 - Dios Iwene

³⁵ Dabe'do Diosma jwiinö ile niebobe itji̧nö. Ja̧danö, jo̧banö pjaatobe, okobe jwiinö iyö—yöawinobe—.

Juan 3:35 Iomraidhean Croise

Génesis 41:44

Ju'wibi jö̧ba̧lijetö faraónma Josénö: —Ötjöma la'aka luwo̧ chö̧jajayonö jojodöma ökwönöda atjebökweja, okobe jwiinö ja̧tjakwa̧ abönöma. Ja̧danö, ökwö weköbi̧ma okobe jwiinö tja̧ja̧kwobö jo̧be, bemi jojodöma— jö̧ba̧lijetö.

Génesis 41:55

Ja̧danö, Egipto niji jojodöma, tjöbatjotjö tju̧kwa kwakwawa okobe jwiinö tjukwajabetjö̧, A̧wi̧chinö dö̧ja, jö̧ba̧lö, faraónönö jwöbijadötö kwakwawa iyobö. Jejenö jwötjökwe: —Josénöda abebajaduwi. Ja̧danö, jo̧ba wei̧ kwa̧ja̧kwaduwo— jö̧ba̧lijetö.

Proverbios 8:30

Ina yöbawuju: —Ötjöma Isabenö Jo̧kwö, jwiinö waisanö otido̧kwö ji̧abinujusa. Ju'wi mölȩkwena Isabenö Jo̧kwö chö̧jiökwe o̧'wo̧ ösöwanö ö̧jijatö Isabenö Jo̧ma. Ja̧danö ötjöma ba̧kwȩlö̧jatebö jo̧banö ösödö cho̧'wo̧ ösöwanö chö̧jijatö jo̧bakwö.

Isaías 42:1

Baikwö laebobe Dios yöa̧li̧ma: Bitema ötjöda omudawö chujuninökwe chömöayo̧, ujuluwachibanö pjatjatökwema. Jo̧bama ötjö ile 'di̧tebökwe. Jo̧banö chiyajabe ötjöda Cho̧'wo Luwo̧nö, ja̧danö jo̧bama jweinö lȩebo jö̧a̧li̧danö lȩebakwo̧ tjitebotenia jojojodönö.

Daniel 7:14

Ja̧danö Diosma jo̧banö iyobekwö chedatö, inesö la'aka luwo̧ baibobö. Dejatinö ujulu jo̧banö iyatö, ja̧danö yöbawö weakwa̧bi iyatö, okobe deinö böjȩ bakwameachibanö ju̧kwadö jo̧ba wei̧ tjotidobö, tjitebotenia ju̧kwadöbi, tjiwenetenia yöba̧ladöbi. Jo̧ba yöbawö wei̧ma, ba̧kwȩlö̧jatebö 'dö̧ibajökenanö yöbawö weakwo̧. Bakwo̧bi la'akatjöda söbebö loökakobe jo̧ba yöbawö wei̧ma, 'dö̧ibajökenanö kabatökönö yöbawö weakwo̧.

Mateo 11:27

Jojodönö yöawinobe Jesúsma: —Chömöledö, chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö waisadöma, sule ötjö Dios itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe.

Mateo 17:5

Pedro ina jejenö yöa̧lonö, ojwiyo'wo dewinö dejata'wo jobadö tjöwamenö öwawachinobe, ja̧danö ja'wotjö̧ iwene ökwöinobe baikwö ökwöi̧ma: —Bitema ötjöda chösödökwe chitji̧, cho̧'wo̧ ösöwanö chedobe jo̧banö. Jo̧banö kwa̧ja̧kwaduwo— jö̧ba̧lö iwene ökwöinobe.

Mateo 28:18

Ikenama Jesúsma jobadö tjö̧jobekwö ichö yöawinobe: —Mölejȩtjöbi, böjȩtjöbi okobe deinö la'aka tjuluwo̧ batibanö ja̧ajabe Diosma,

Mateo 3:17

Ja̧danö, mölejȩbetjö Dios iwene ökwöinobe, baikwö ökwöi̧ma: —Bitema ötjöda chösödökwe chitji̧. Cho̧'wo̧ ösöwanö chedökwe bitema— jö̧ba̧lö ökwöinobe.

Lucas 10:22

Ikenama Jesúsma yöawinobe: —Chömöledö, Chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö isabenö waiso̧ma sule ötjö Dios Itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe Jesúsma.

Juan 13:3

Ja̧danö, Jesúsma omukwatinobe, Chabe'doma ötjönö okobe jwiinö ujulu iyo̧, jö̧ba̧lö. Chabe'do itebobetjö ichinasa. ja̧danö, jo̧ba ö̧jobekwö chȩwa̧jakwo̧sa, jö̧ba̧lö, omukwatinobe Jesúsma.

Juan 15:9

Ina yöawinobe: —Chömöledö, jwiinö ile nitebobe ökwödönö. Chabe'do ötjönö jwiinö ile niebi̧danö ökwödönö ile nibebo̧sa. Ja̧danö chömöledö, ötjökwö dötewinö ja̧nö, ötjö ile niteba'wo okwada ja̧duwi.

Juan 17:2

Chabe'do, ökwöma chujulu iyö böjȩ jojodönö webo̧ batibanö pjakatinobetjö̧, jejenö ateba, ötjö jwiinö chotiwi̧ma kwi̧sebo, jö̧ba̧lö. Chabe'do, ökwöma chujulu iyö pjakatobetjö̧ böjȩ jojodötjö kwiyinawö̧nö tjö̧jibinö pjatatobö jo̧be, ba̧kwȩlö̧jatebö ja̧kwawa tjujuna̧lobö.

Juan 17:23

Chabe'do, ötjökwö ökwökwö dötewinö bakwaibedösa. Ja̧danö, ökwöma ötjö cho̧'wo̧ luwo̧ okwa kwö̧jobe. Ja̧danö, ötjöma jobadö tjo̧'wo̧ luwo̧ okwa jo̧sa. Ja̧danö, jobadö tjo̧'wo̧ luwo̧ okwa chö̧jobetjö̧ bakwaibedödanö omukwatö tjuju̧kwobe. Jejenö, bakwaibedödanö omukwatö tjö̧jiawö̧ böjȩnö ju̧kwadöma, jobadönö edö tjöwaisachibakobe, Aaa, Diosma bidönö ile niebobe. Itji̧ Jesús, böjȩkwö weinökwenö ile niebi̧danö isabenö ile niebobe bidönö, Jesúsnö ösödadönöma, jö̧ba̧lö— jejenö Jesúsma aebinobe Abe'donö.

Juan 17:26

Chabe'do, jobadönö yöbawiachijatö ökwönöma. Ja̧danö, ina babebi jobadönö yötawobe ökwönö, ötjönö ile nikebi̧ma edö tjöwaisachibobö. Jejenö yötawobe, ötjönö ile nikebi̧danö jobadöbi ile nibekwö tjö̧jobö. Jejenö nibekwö tjö̧jobema jobadökwö tjo̧'wo̧ luwo̧nö chö̧jobe— jejenö jö̧ba̧lö aebinobe Jesúsma Abe'donöma.

Juan 5:20

Ja̧danö, Diosma ötjönö, iteda itji̧nö jwiinö ile niebobetjö̧ iteda otidi̧ma okobe jwiinö i̧sebobe ötjönöma, iteda ösödi̧ chöwaisobö. Ja̧danö, Diosma ju'wi jawabi i̧sebakobe, ötjö otiwa jawa chotidakwa̧ma. Yelösöda, kwebachö̧kö̧nö otiwanö baibanö chotidajemitjö o̧penönö mikwawi̧ jawa chotidakwo̧sa. Jejenö chotidiawö̧ ökwödöma, ¡Ayö!, jö̧ba̧lö, kwöbajaleduwi jalaka baibanö kwedaduwakwedöja— yöawinobe Jesúsma judío la'aka luwedönö.

Juan 5:22

Ja̧danö, ötjödasa jojodönö lȩebakwawa baledakwa̧ yötawakwo̧ma. Chabe'doma ötjönöda kabebö öwanijatö, ötjöda jojojodönö, otiwanö ja̧bö tjö̧jinojobö, sulabenö ja̧bö tjö̧jinojobö yötawobö. Ja̧danö, Chabe'doma jojodönö lȩebakwawa baledakwa̧ yöawökakwo̧, iteda itji̧da, ötjöda.

1 Corintios 15:27

Baikwö laebobe Dios iwene: Diosma okobe jwiinöbi, okobe deinöbi jo̧ba ömasapiya teebe ödakobe, jö̧ba̧lö laebobe. Chömöledö, ja̧ okobe jwiinöbi okobe deinöbi Cristo ömasapiya teebe ödakobe jö̧ba̧lö laebi̧ma, Diosbi Cristo ömasapiya teebe baibakwo̧ jö̧ba̧löma laebokobe. Diosda ju'wedönö Cristo ömasapiya teebe ödakwo̧ma chömöledö.

Efesios 1:22

Ja̧danö, Diosma kabebö wanijetö Jesúsnöma okobe jwiinö Jesúsda weobö, böjȩ jawabi, böjȩnö ju̧kwadönöbi, mölejȩ jawabi mölejȩnö ju̧kwadönöbi. Ja̧danö Jesúsnö kabebö wanijetö Diosma, jo̧banö ösödadö tjuluwo̧ baibanö.

Hebreos 1:2

Jau chömöledö, damötjö da'dödöminema Dios yöawi̧ yöbawadö yötjawi̧ a̧ja̧kwijadötö. Jo̧kwaijayonö ökwödö Dios yöawi̧ da̧ja̧kwi̧ma damötjö da'dödömine tja̧ja̧kwinatjö o̧penönö mikwawi̧ wene da̧ja̧kwijatö, Dios Itji̧da yöawina da̧ja̧kwobetjö̧. Ja̧ yöawina da̧ja̧kwinama jwiinö mikwawi̧ yöawina. Chömöledö, Diosma böjȩkwö webijetö iteda Itji̧nö, iteda yöawi̧ yöawobö jojodönö, Dios Itji̧ ö̧jinanö ju̧kwadönöma. Ja̧danö, ökwödöbi, jobadötjö tupadanö jojodöma, Dios Itji̧ yöawi̧ tja̧ja̧kwina da̧ja̧kwijatö. Ökwödöma jejenö Dios yöawi̧ a̧ja̧kwinadösa. Da'dödömine tja̧ja̧kwinadanömaökö, Dios Itji̧ yöawina weneda da̧ja̧kwijatö. Ja̧danö chömöledö, Dios Itji̧nö yötawaduwakwö. Dios Itji̧ma isabenö jwiinö inesö jo̧. Jo̧bama Dios 'da̧batö ujuninökwe, okobe jwiinö böjȩnö ju̧kwi̧bi, mölejȩnö ju̧kwi̧bi la'aka luwo̧ baibanö. Isabenö jo̧ba, okobe jwiinö la'aka luwo̧ baibanö Dios 'da̧batö ujuninökweda jojodönö otiwanö pjabatina, dusuli̧ma Dios söbebö loobö. Jejenö pjaataja̧ ikena böjȩtjö mölejȩbekwö kabekwajo̧ ichibö inesö ö̧bena bamatijetö, Jwiinö Juluwo̧ Dios ö̧bemi öwaisobekwöchobe. Isabenö chömöledö, Dios Itji̧, mölejȩnö inesö ö̧bena bo̧ma jwiinö inesö bo̧. Ja̧danö, ju'wibi yötawaduwakwö Dios Itji̧nö, Dios damötjö 'da̧batö ujuninökwe okobe jwiinö la'aka luwo̧ baibanö jo̧nöma. Okobe jwiinö böjȩnö ju̧kwi̧bi, mölejȩnö ju̧kwi̧bi Diosma iteda itji̧nötjö otidijetö. Ja̧danö, okobe jwiinö böjȩnö ju̧kwi̧ma Dios Itji̧ iteda ujulunö webo̧ ina ju̧kwo. Isabenö chömöledö, Dios Itji̧, okobe jwiinö otidina, okobe jwiinö ina ju̧kwobö webo̧ma jwiinö inesö jo̧. Ja̧danö chömöledö, jo̧ba Dios Itji̧ma jwiinö otiwo̧. Jo̧bama bakwainö Diosdanö jo̧. Dios jwiinö otiwi̧danö jo̧ba Dios Itji̧bi bakwainö jwiinö otiwo̧. Ja̧danö, Dios Itji̧ma Dios jwiinö otiwi̧danö bakwainö jo̧obetjö̧, okobe jwiinö Dios jwiinö otiwi̧ma jo̧batjöda salöinö idejati̧danö i̧sebinobe. Isabenö chömöledö, Dios Itji̧, Dios jwiinö otiwi̧danö otiwo̧ma ökwödönöma Dios otiwi̧ i̧sebo̧. Ja̧danö, ökwödö dö̧ji̧ma jo̧ba Dios jwiinö otiwo̧ Itji̧tjö, jwiinö inesö jo̧tjöda Dios yöawina a̧ja̧kwinadösa.

1 Pedro 3:22

Ja̧danö, woawatjö tjebachajo̧, Cristoma mölejȩbe kaekwajinobe chömöledö, ja̧danö jobe Dios öwaisobekwöchobe inesö la'aka luwo̧ ö̧bena öbamatinobe. Ja̧danö chömöledö, okobe deinö ángelesdötjöbi, böjȩ luwedötjöbi, mölejȩbe luwedötjöbi la'aka tjuluwo̧ma jo̧bada, Cristoda. Ja̧danö chömöledö, babe usula kwemawaduwijayonö, kwo̧'wo̧ ösöwanö kwö̧jaduwena, baledajadö ökwödöbi Dioskwö dö̧jakwedösa jö̧ba̧lö.