Juan 3:15 - Dios Iwene

¹⁵ Ja̧danö, bakwo̧, ötjönö edö ösödo̧ma, Bitema dö̧jibinö pjabato̧, jö̧ba̧lö, ba̧kwȩlö̧jatebö ja̧kwawa ujuna̧lakwo̧— yöawinobe Jesúsma Nicodemonöma.

Juan 3:15 Iomraidhean Croise

Isaías 11:10

Ja̧danö, ja̧ möle bandera ötjabi̧ jawa öwawi̧danö, Isai itji̧ tupadanö jojo la'aka luwo̧ma öwawinö öjamatakwo̧, okobe deinö bö̧jȩnö ju̧kwadöma joba ö̧jobekwö ko̧ko̧kwö tji̧'yakobetjö̧. Ja̧danö, öba a'o ichibajadö, tjitebotenia jojodöma jo̧banö abebö tja̧ja̧kwakwedö, otiwanö ja̧bö tjö̧jakwa̧ tjöwaisakobetjö̧. Ja̧ mö̧le, isabenö okobe deinö jojodöma jo̧ba itebo comunidad ösödö otiwanö tjomukwatakwedö, —Duluwo̧ itebo comunidadma dejatinö salöi̧ comunidad, —jö̧ba̧lö.

Isaías 45:22

Jau, ötjöda Diosbo̧ma, jo̧kwajabetjö̧ sulabenö kwomukwataduwi̧ kabatibö, balewachö ötjönö kwösödaduwo, ökwödönöbi kwö̧jibaduwinö pjatatakobetjö̧. Jau, okobe deinö bö̧jȩnö ju̧kwadö, bö̧jȩ bakwachö̧je ju̧kwadöbi ötjönö kwödösaduwo, ötjöda Diosbo̧chobetjö̧, ja̧danö jelo̧ diosbo̧ma deobetjö̧.

Mateo 18:10

Jau chömöledö, omukwatönö kwö̧jaduwo, bidö tjemunö mikwawöködö jö̧ba̧lö kwöpöjödaduwapji jö̧ba̧lö. Jau chömöledö, isabenö yötawaduwakwö, bidö tjemunö te'ada̧ladö ángelesdöma tjö̧jobe, ja̧danö jobadöma ba̧kwȩlö̧jatebö mölejȩbe Chabe'do öba a'o tjuju̧kwobe— jö̧ba̧lö yöawinobe Jesúsma.

Mateo 25:46

Ikenama, jobadö sulabedöma ökwöla nöolabe tji̧'yakwedö, jobetjö Dios lȩebi̧tjö ba̧kwȩlö̧jatebö usula tjemawobö, jo̧kwaijayonö otiwadöma ba̧kwȩlö̧jatebö ja̧kwawobe ja̧nö tji̧'yakwedö— jö̧ba̧lö yöawinobe Jesúsma.

Marcos 16:16

Bakwo̧, ja̧ otiwa jawa wene ösödö, Jau Jesúsma dö̧jibinö otido̧, jö̧ba̧lö, ösödo̧nö, ojwenö ubu̧datajökwenöma jo̧ba ö̧jibinö otidökwe Diosma. Jo̧kwaijayonö, Jesúsnö öpöjödo̧ma Dios lȩebi̧ baibenama baledakwo̧.

Juan 1:12

Jo̧kwaijayonö jojodötjö ju'wedöma jo̧banö ösödö do̧batö tjeminobe, Biteda, jö̧ba̧lö. Ösödö do̧batö tjemobetjö̧, Bidöma Dios i̧tji̧mu, jö̧ba̧lö, yöawinobe dewinö jo̧ma.

Juan 16:33

Ja̧danö, babe yötawaja̧ma kwo̧'wo̧ luwo̧duwi tjo̧bekwökönö kwö̧jaduwobö yötawajabe. Chömöledö, böjȩnö ja̧nö usula kwemawaduwakobe. Jo̧kwaijayonö, kwo̧'wo̧duwi̧ ösöwanö kwö̧jaduwo, ötjöma böjȩnö jawa okobe jwiinö chujuluwobetjö̧— yöawinobe Jesúsma öba̧ja̧di̧ waisachadönöma.

Juan 20:31

Biya̧ chiwȩyudi̧ma ökwödönö pjabatö chiwȩyuda, kwöwaisaduwobö, Jesúsma Dios weinökwe jojodö tjö̧jibinö pjabatö, jö̧ba̧lö. Ja̧danö, Jesúsma Dios Itji̧, jö̧ba̧lö, kwöwaisachibaduwobö chiwȩyuda bi'yema. Jejenö waisinö, Jesúsma jojodö dö̧jibinö pjabato̧, jö̧ba̧lö, jo̧banö kwösödaduwobö chiwȩyuda bi'yema. Ja̧danö, Jesúsnö ösödö do̧batö kwemaduwobetjö̧, ba̧kwȩlö̧jatebö ja̧kwawa kwujuna̧laduwobö chiwȩyuda biya̧ jawama.

Juan 3:16

Diosma okobe deinö böjȩnö ju̧kwadönö jwiinö ile niebobetjö̧ itji̧nö iteakwo̧nöda weinobe böjȩkwö. Ja̧danö, itji̧ iteakwo̧nö weinobe, jo̧banö ösödadöma, Bitema dö̧jibinö pjabato̧, jö̧ba̧lö, ba̧kwȩlö̧jatebö tjuju̧kwobö Dioskwö. Ja̧danö, jobadönö Dios lȩebi̧tjö baledökönö ba̧kwȩlö̧jatebö tjuju̧kwakwedö Dioskwö.

Juan 3:36

Bakwo̧, Dios Itji̧nö ösödo̧ma ba̧kwȩlö̧jatebö ja̧kwawa juna̧lo̧. Ja̧danö, Dios Itji̧nö öpöjödö, jo̧ba wei̧ a̧ja̧kwö̧kö̧ma jwibo̧, ba̧kwȩlö̧jatebö ja̧kwawama. Jo̧bama Dios lȩebakwo̧— jejenö yöawinobe Juan Ojwenö Bu̧dato̧ma ömöayedönö.

Juan 5:24

Ina yöawinobe Jesúsma judío la'aka luwedönö: —Isabenö yötawa, ötjö yötawi̧ a̧ja̧kwadö, ötjönö webinanö ösödadöma, ba̧kwȩlö̧jatebö ja̧kwawa tjujuna̧lakwedö. Jobadöma lȩtebökakwawö̧. Wobajaletjö tjö̧jibanö babibö, ba̧kwȩlö̧jatebö tjuju̧kwakwedö— yöawinobe—.

Juan 6:27

A̧ja̧kwaduwitjö, wanedö yötawi̧ma: Ökwödöma 'dö̧ibaji̧ kwakwawada kwukwaduwobö omukwatö kwö̧jaduwobe. Jo̧kwaijayonö yötawaduwakwö. 'Dö̧ibajökö jawa kwakwawa kwujuna̧laduwobö omukwatö kwö̧jaduwo. Ja̧ 'dö̧ibajökö kwakwawama ba̧kwȩlö̧jatebö ja̧kwawa iyi̧ kwakwawa. Ja̧ kwakwawa iyo̧ma ötjöda, jojo baibanö jeminökweda. Jau, ötjödasa ba̧kwȩlö̧jatebö ja̧kwawa iyo̧ma, Chabe'do Dios jejenö chiyobö ösödö ötjönö weinobetjö̧— yöawinobe Jesúsma jobadönöma.

Juan 6:40

Ja̧danö ötjö, Dios Itji̧nö tjöwaisachibanö ösödadöma ba̧kwȩlö̧jatebö tjuju̧kwobö ösödobe Chabe'doma. Ja̧danö, 'dö̧ibaji̧ möle badekwachena yemidanö tjetjachajinö chotidobö ösödobe ötjönö webo̧, Chabe'doma—Jesús yöawinobe.

Juan 6:47

Isabenö yötawa. Ötjönö ösödadö, Bitema Dios weinökwe, jö̧ba̧lö, ösödadöma ba̧kwȩlö̧jatebö ja̧kwawa tjujuna̧lakwedö.

Hechos 13:41

Ökwödö Diosnö öpöjödadönöma, Diosma jweinö yöba̧lökö, jö̧ba̧lö, jö̧ba̧ladönöma isabenö yöta̧la. A̧ja̧kwaduwitjö. Ötjö labi̧ jawa baledinö weti̧ma kwedaduwakwedöja, ökwödö kwö̧jaduwi̧ma. Ja̧ baledakwa̧ma, baledakwa̧ abönö luwedö yötjawi̧, Labi̧ jawa baledakobe, jö̧ba̧lö, a̧ja̧kwö yöka̧laduwakobe, Omöna, jejenöma baledökakwa̧, jö̧ba̧lö. Jo̧kwaijayonö yötawaduwakwö. Isabenö ja̧ labi̧ jawa baledakobe. Baledenama ökwödöma, Ayö, ökwödöwe, jö̧ba̧lö, kwedaduwakwedöja. Jejenö baledinö wetobetjö̧ woköbaduwakwedöja, jö̧ba̧lö laebobe Dios iwenetjö, Dios yöawi̧ yöbawinama iwȩyudinama— yöbawijetö Pabloma.

Hechos 8:36

Ikenama, 'ya̧nö Etiopía jojoma edijetö ojwe se'do. Je'do edö jö̧ba̧lijetö: —¡Edi! Ojwese'do be'do. ¿Ojwe okwa kwubu̧datobö jo̧beji̧?— abebijetö.

Romanos 5:21

Jau chömöledö, jojodö sulabenö ja̧tji̧ma isabenö juluwinobe, jojodö wotjawinö ja̧bö. Ja̧danö Dios mikwa jwiinö otiwa jawa iyi̧bi juluwi̧, jojodö ba̧kwȩlö̧jatebö tjö̧jakwedö batjibanö ja̧bö. Jau chömöledö, Duluwo̧ Jesucristoda midawö woinobetjö̧, Diosma, ökwödönö mikwa jwiinö otiwa jawa iyö, Chedemi bidöma suli̧ jwibadö, jö̧ba̧lö, ba̧kwȩlö̧jatebö ja̧kwawa iyobe ökwödönöma.

1 Corintios 1:18

Jau chömöledö, Dios lȩebi̧tjö tjemakwedöma, Cristo towisa'onö woina wenema tjöpöjödobe, waisakwawa jwii̧ wene jö̧ba̧lö. Jo̧kwaijayonö ökwödö Dios lȩebi̧tjö ji̧badöma Cristo towisa'onö midawö woina wene dösöda, Dios ujulu ji̧ wene jö̧ba̧lö.

2 Corintios 4:3

Jau chömöledö, jweinö öwawinö yödawobe, jo̧kwaijayonö öwawinö yödawijayonö, ju'wedönö öwawökö wenedanö ichejekwena. Baikwö yötawaduwakwö chömöledö: Sule Dios lȩebakwawö̧nöda öwawökö wene jö̧ba̧lö ichejekwobe chömöledö.

Gálatas 2:16

ökwödöma döwaisa Dios weina Moisés iwȩyudina ja̧böma sulabe jwibadö baibakwawokobe, sule Jesucristonö ösödöda sulabe jwibadö badibobö jo̧be jö̧ba̧lö döwaisobe, ¿jö̧tö? Ja̧danö ökwödöbi judío jojodöböködödanö bakweminö Cristo Jesúsnö dösödinobe, dö̧jibinö ja̧bo̧ jö̧ba̧lö. Jau, ökwödöma Moisés iwȩyudina ja̧böma sulabe jwibadö badibijökötö, bakwo̧bi Moisés iwȩyudina ja̧böma sulabe jwibo̧ baibokobetjö̧. Ökwödöma Cristonö dösödijatö, sulabe jwibadö badibo jö̧ba̧lö, jo̧kwajabetjö̧ judío jojodöböködönö weköboko judío jojodö ja̧tji̧danö ja̧tjo jö̧ba̧lö— lȩtebijatö Pedronöma.

Gálatas 2:20

Jau chömöledö, Cristokwö bakobe towisa'onö la̧nö wotinajayonö, 'yaba̧lo̧ chö̧jobe. Jo̧kwaijayonö, babe chö̧ji̧ma, ötjöma ida̧ökö wotinobetjö̧ babe chö̧ji̧ma ötjö chö̧ji̧maökö chömöledö, Cristo ö̧ji̧da. Ja̧danö, babe chiteba'onö chö̧ji̧ma, Dios itji̧nö ösödö, ötjönö ile nibebö midawö wobinanö ösödö chö̧jobe.

Hebreos 10:39

Jo̧kwaijayonö chömöledö, yötawaduwakwö. Ökwödöma ajayinö dö̧jinama tjebachinöködösa, Dios lȩebakwawö̧da babibö. Ökwödöma Diosnö do̧'wo̧ wana̧ladösa. Ja̧danö, dö̧jibinö pjaatawö̧sa ökwödöma. Chömöledö biya̧ yötawi̧ma pjabatö yötawa.

Hebreos 7:25

Jo̧kwaobetjö̧ Jesúsda jojodö Dioskwö ichibö tjö̧jibinö pjabato̧, Jesúsma dö̧jibinö pjabato̧, jö̧ba̧ladönöma. Ja̧danö, jobadö tjö̧ji̧bi okobe jwiinö pjaatinobe Jesúsma, ja'yubebi ji̧bökönö. Ja̧danö, Jesúsma jo̧banö ösödadönöma ba̧kwȩlö̧jatebö tjö̧jibinö pjabato̧, Jesúsma ba̧kwȩlö̧jatebö Diosnö abebö jobadönö pjaatobö ö̧jobetjö̧.

1 Juan 2:25

Ja̧danö jejenö, böjȩnö ja̧nö Dioskwö dötewinö di̧'yi̧ma di̧sekwobe, Dioskwö ba̧kwȩlö̧jatebö ja̧dösa, jö̧ba̧lö. Chö̧ja̧wo̧dö, jejenö Diosma ökwödönö yöbawö ujuninobe, Ötjökwö ba̧kwȩlö̧jatebö kwö̧jaduwakobe, jö̧ba̧lö. Ja̧danö böjȩnö ja̧nö, Dioskwö dötewinö di̧'yi̧ma ja̧ Dios yöbawö ujunina i̧sekwö dö̧jobe, Ökwödöma isabenö Dioskwö ba̧kwȩlö̧jatebö ja̧dösa, jö̧ba̧lö.

1 Juan 5:1

Chö̧ja̧wo̧dö, Jesúsnö ösödadöma, Jesúsma Dios weinökwe dö̧jibinö pjabato̧, jö̧ba̧lö, Dios i̧tji̧mu babibinadö. Diosma jobadönö tjo̧'wo̧ luwo̧nö 'yayi̧ ja̧kwawa iyawö̧. Ja̧danö, Dios i̧tji̧muma Diosnö ile nibebö ju̧kwadö. Ja̧danö, Diosnö isabenö ile nibebö tjuju̧kwobetjö̧ Dios ju'wedö tji̧tji̧mu̧nöbi ile nibebö tjö̧jobe.

1 Juan 5:20

Ja̧danö chö̧ja̧wo̧dö, ju'wi jawabi döwaisa, biya̧: Dios Itji̧ Jesucristoma böjȩnö ichinobe Isabenö Jo̧ Diosnö döwaisachibanö yöbawö. Ja̧danö, babema Dioskwöbi Itji̧ Jesucristokwöbi bakobe dötewinö 'ya̧dösa. Chö̧ja̧wo̧dö, Jesucristoma isabenö jo̧ Diosda. Ja̧danö, jo̧ba Jesucristoma ökwödönö pjaatinobe, do̧'wo̧ luwo̧nö ba̧kwȩlö̧jatebö dö̧jobö.