Juan 2:16 - Dios Iwene

¹⁶ Ja̧danö, weinobe yu̧nu̧ku̧dönö iyabidönö: —Bidö yu̧nu̧ku̧dönöma betjöma e'ewö da̧ja̧duwi— weinobe—. Ökwödöma beju, Chabe'do ejuma, sulabenö, iyaweju baibanö ja̧köbaduwa— jö̧a̧linobe Jesúsma iyabidönöma.

Juan 2:16 Iomraidhean Croise

Mateo 21:12

Jemi ikenama, Jesúsma Dios eju a̧petusȩko̧ teachinobe, ja̧danö jobetjö okobe deinö tea iyadönöbi, tea emadönöbi a'dewö loinobe. Balada balewadö tjitea mesasötebiya wi'yödöbeabinö loinobe, ja̧danö yu̧nu̧ku̧dönö iyadö tjitea wa̧kwawaökiya wi'yödöbeabinö loinobe.

Mateo 21:13

Jejenö a'dewo lobö, Jesúsma jobadönö yöawinobe: —Dios iwenesa'yetjö Dios yöawi̧ laebobe: Dios ejuma, Diosnö aekweju jö̧ba̧lö ötjabikweju, jö̧ba̧lö laebobe, jo̧kwaijayonö ökwödöma naukwabidö tjejudanö waedadöja, jo̧kwajabetjö̧ ökwödö naukwabidönö a'dewö lotaduwakwö— jö̧ba̧lö yöawinobe Jesúsma.

Mateo 22:5

Jo̧kwaijayonö, jejenö tja̧debawö̧, tja̧ja̧kwinokobe, ja̧ pjiestama mikwawökö ji̧ jö̧ba̧lö, ja̧danö idöda tjomukwati̧da ja̧tjinobe. Bakwo̧ma iteda öbatjobe otidö i̧'yinobe, jelo̧ma iteda itea bodega otidö i̧'yinobe.

Marcos 11:17

Ikenama jojodönö yöbawö jö̧ba̧lijetö Jesúsma: —Isabenö baikwö laebobe Dios iwenetjö: Ötjö chejuma okobe deinö böjȩnö ju̧kwadöma ötjönö aekweju, jö̧ba̧lö, laebobe. Jejenö laebijayonö ökwödöma sulabenö ja̧köbaduwobe. Ökwödö iyabidöma, kwo̧'wo̧duwi sulabenö omukwatö, balada nöinö tjimidobö webö diyabo, jö̧ba̧lö, nöinö mikwawö webö kwiyabiduwobetjö̧ ökwödöma, Dios ejuma naukwabidö iyawejudanö ichejekwa—jö̧ba̧lijetö.

Lucas 2:49

Abebö ja̧ja̧kwiökwe, Jesúsma atadinobe: —¿Tajawedö jelobetenia ötjönöma isakwö kwekachaja̧da? Ötjöma Chabe'do ejunö chö̧jobö jo̧be, jö̧ba̧lö ¿wajwiköbaduwinaji̧? Kwöwaisaduwo jö̧ka̧laduwajena, Jesúsma Abe'do ejunö jo̧, jelobe isakwökönö abe'do ejutjöda disakwo, jö̧ba̧lö kwöwaisaduwo jö̧ka̧laduwajabe— jö̧ba̧lö Jesús atadinobe.

Juan 10:29

Ötjö Chabe'do iyijatö jobadönö ötjönöma. Jo̧bama böjȩnö ju̧kwadötjöbi, mölejȩbe ju̧kwadötjöbi o̧penönö juluwo̧. Jo̧kwaobetjö̧ bakwo̧bi deobe jobadönö Chabe'dotjö 'döbebö emibo̧ma.

Juan 2:15

Jesúsma jobadönö edö jwiinö ölabinobe. Jwiinö ölabobetjö̧, kwakwaakwawopja isopjatjö otidibö a'dewö loinobe okobe deinö iyabidönöbi, o̧bȩja̧dönöbi, pa̧ka̧yö̧danö ichejekwadö, buey mikwadönöbi Dios eju a̧petutjöma. Ja̧danö, balada balewö otidadö balada ö̧pi̧bi̧yama jatö loinobe. Ja̧danö, jobadö tju̧kwa mesa ötebiya wi'yö döeabinobe.

Juan 20:17

Wo̧jatibiökwe: —Wo̧katibatjö María, ina Dabe'do ö̧jobekwö ȩwa̧jö katekwachokobetjö̧— jö̧a̧linobe—. Babema chömöledönö yöbawaji, tjöwaiso. Ja̧danö, jobadönö yökawo, Chabe'do ö̧jobekwö chȩwa̧jakobe, ötjö Chabe'dobi ökwödö kwabe'doduwibi ö̧jobekwö. Ja̧danö, ötjö cho̧'wo̧ chöwana̧lökwe Dios, ökwödö kwo̧'wo̧duwi kwöwana̧laduwökwe Dios ö̧jobekwö chȩwa̧jakobe, yökawo— weinobe Jesúsma María Magdalenanö.

Juan 5:17

Ja̧danö, sulabenö jwötjeba̧lakwawökwe Jesúsma jö̧a̧linobe jobadönö: —Ötjö Chabe'do Diosma ba̧kwȩlö̧jatebö otido̧. Ja̧danö ötjöbi ba̧kwȩlö̧jatebö otido̧sa— jö̧a̧linobe Jesúsma judío jojodötjö la'aka luwedönöma.

Juan 8:49

Jejenö jö̧tja̧liökwe: —Ötjöma Awetja ömöayo̧ tjeachibinökökwesa— jö̧a̧linobe—. Ötjöma Chabe'do otiwanö omukwati̧da yöbawo̧sa. Jo̧kwaobetjö̧ ökwödöma otiwanö omukwatöködöja ötjönöma.

2 Pedro 2:3

Ja̧danö, idöda tjemotö jö̧ba̧lö tjösödobetjö̧, jobadö sulabenö yöbawadöma ökwödönö omöna yötja̧lakobe, ökwödötjö balada tjemo jö̧ba̧lö. Jo̧kwaijayonö Diosma damötjö jobadönö lȩebobö omukwatö ujuninobe chömöledö, ja̧danö isabenö jobadönö lȩebakobe.