Juan 16:32 - Dios Iwene

³² Jejenö ösödö yöka̧laduwijayonö yötawaduwakwö. Tjo̧wi̧, ötjö chö̧jelö dökibaduwakobe, kwejuduwikwena ȩwa̧jö. Jau, ötjönö le'dedibö kwȩwa̧jaduwakwa̧ möle yöneawacha babema. Ja̧danö, döbibajö kwȩwa̧jaduwajabe okobema jo̧dawa'ye chö̧jakwo̧sa. Jo̧kwaijayonö, jo̧dawa'yemaökö, Chabe'do ötjökwö jo̧.

Juan 16:32 Iomraidhean Croise

Mateo 26:31

Ikenama Jesúsma iteda öba̧ja̧di̧ waisachadönö yöawinobe: —Chömöledö, makö yö̧te ökwödö okobe deinö ötjönö le'dedibö dökibajaduwakwedöja, Dios iwene laebi̧danö. Baikwö laebobe Dios iwene: Diosma o̧bȩja̧dönö te'ada̧lo̧nö kwabö loakobe, ja̧danö o̧bȩja̧döma wainökwena dötjibajakwedö, jö̧ba̧lö laebobe.

Mateo 26:56

Baikwö yötawaduwakwö: Okobe jwiinö babe baledi̧ma baledajabe, Dios yöawi̧ yöbawinadö tjiwȩyudinadanö baledakobetjö̧— jö̧ba̧lö yöawinobe Jesúsma. Ikenama, okobe deinö Jesús öba̧ja̧di̧ waisachadöma jo̧banö le'dedibö dötjibajinobe.

Marcos 14:27

Ikenama Jesúsma öba̧ja̧di̧ waisachadönö jö̧ba̧lö yöbawijetö: —Babe yö̧te ökwödöma okobe deinö ötjönö kakatibaduwakwedöja. Baikwö laeba Dios iwenetjö, Dios yöawi̧ yöawina wȩyudinama: Diosma o̧bȩja̧dönö te'ada̧lo̧nö kwabö loakobe. Ja̧danö, o̧bȩja̧döma wainökwena dötjibajakwedö, jö̧ba̧lö labebobe Dios iwenetjö —yöbawijetö Jesúsma öba̧ja̧di̧ waisachadönö, jobadöma o̧bȩja̧dödanö ja̧dö, jö̧ba̧lö—.

Marcos 14:50

Jejenö jö̧a̧lonö iteda öba̧ja̧di̧ waisachadöma jelobe döbibajijadötö, yebaibö.

Juan 12:23

Jejenö yötjawökwe Jesúsma judío jojodönöbi, judío jojodöböködönöbi yöawinobe: —Ida̧ökö badekwacha ötjö, jojo baibanö jeminökwe jwiinö chujulu i̧sebi̧ möle— yöawinobe Jesúsma. Ikenama, wanedö yöbawö yöawinobe:

Juan 16:2

Jau, inia tjököbaduwinö baledakobe ökwödönöma. Kwömöledöduwi judío jojodöma jobadökwö ba̧nö kwa̧ja̧kwa̧laduweju tekachaduwoböma wetjökakobe, ötjönö ösödö kwö̧jaduwobetjö̧. Yelösöda ja̧ mölema jojodöma ökwödönö kwabö lotjakobe, Diosma jejenö kwabö lodobö ösöda, jö̧ba̧lö, tjomukwatobetjö̧.

Juan 16:25

Jesúsma ina yöawinobe öba̧ja̧di̧ waisachadönöma: —Chömöledö, nöinö wanedö yötawajabe ökwödönöma. Ja̧danö, jweinö yötawakwa̧ möle yöneawacha babema. Ja̧ mölema Dabe'do Dios jawa yötawena wanedöma yötawokobe. Jweinöda yötawocha.

Juan 16:31

Jejenö jö̧tja̧liökwe Jesúsma: —¿Isaji̧? ¿Babema ötjönö ösödö yöka̧laduwiji̧, Biteda, jö̧ba̧lö?

Juan 19:27

Ja̧danö jö̧a̧linobe öba̧ja̧di̧ waisacho̧nö: —Chömöayo̧, bisu chojo'doma ökwö kwojo'dodanö baibakwuju— jö̧a̧linobe. Jejenö jö̧a̧lökwe, Jesús ömöayo̧, ja̧ Jesús jejenö jö̧a̧laja̧ tupakwö ba̧kwȩlö̧jatebö ite'ada̧linobe Jesús ojo'donö, jobujunö iteda ejube jö̧jobö öbibö.

Juan 20:10

Ikenama jobadöma tjȩwa̧jinobe tjejube.

Juan 4:21

Jejenö jö̧ja̧lökwe Jesúsma: —Chömöledösuju, a̧ja̧kwitjö. Ju'wi möle ökwödö Samaria jojodöma jelobetjöbi, jelobetjöbi kwösödaduwakwedöja Dabe'do Diosnö. Sule bi'o mö'ösa'otjödama kwösödaduwökakobe jo̧banöma. Ja̧danö, sule Jerusalénbe 'ya̧nö jobetjödama kwösödaduwökakobe jo̧ba Dabe'do Diosnöma. Jelobetjöbi jelobetjöbi kwösödaduwakwedöja Dabe'do Diosnö, bakwelödadamaökö— jö̧a̧linobe—.

Juan 4:23

Yötawakwö. Dabe'do Diosnö inesö tjösödi̧ mölema ida̧ökö ja̧. Ja̧ mölema Dios O̧'wo̧ Luwo̧ Diosnö ösödadö tjo̧'wo̧ luwo̧ okwanö öiba̧lonö isabenö tjösödobe Dabe'do Diosnöma. Ja̧danö, Diosma jejenö, itenö inesö tjösödi̧ ösödobe, tjo̧'wo̧ luwo̧nöda.

Juan 5:25

Isabenö yötawa. Böjȩnö ju̧kwadö, tjo̧'wo̧ luwo̧ okwanö wobinadödanö ju̧kwadötjö ju'wedöma, Dios Itji̧ yöawi̧ a̧ja̧kwö tjösödakwedö, ötjöda yötawi̧ma. Ja̧danö, babebi ötjö, Dios Itji̧ yötawi̧ a̧ja̧kwö tjösödobe. Ja̧danö, ötjö yötawi̧ a̧ja̧kwö ösödadöma, wobajaletjö tjebachajadödanö ja̧nö, ba̧kwȩlö̧jatebö ja̧kwawa juna̧ladö batjibakwedö— yöawinobe Jesúsma.

Juan 5:28

Ja̧danö ¿tajawedö kwöbajaleduwi jalaka babiböma kwö̧jaduwobeda, tajijö, jö̧ba̧lö? Yötawaduwakwö. Dios badedö ujunina möle badekwachena, okobe deinö wobinadö, ida̧ökö tjödinawö̧ma ötjö chiwene tja̧ja̧kwakobe.

Juan 8:16

Jejenö, jojodö ja̧tji̧ yötawököjayonö, yötawitjö̧ma jweinö yötawena. Ötjöma jo̧dawa'ye edö yöbawö̧kö̧sa. Ötjökwö, ötjönö webinakwö, du̧ju̧taja yöbawadösa.

Juan 8:29

Ja̧danö, ötjönö webinama ötjökwö jo̧. Ba̧kwȩlö̧jatebö jo̧ba ösödi̧ ösödö chö̧jobetjö̧, junibö le'dedibö̧kö̧ ötjönö, jo̧dawa'yema— yöawinobe Jesúsma.

Hechos 21:6

Ikenama isowinö da̧jibajena jobe ju̧kwadöma tjejube tjȩwa̧jijatö.

Hechos 8:1

Ja̧danö, Sauloma Estebannö ikwawö tjö'wötajobe edö, Otiwa, jö̧ba̧lö, ösödijetö. Ja̧danö, Diosnö jwiinö ösödadöma Esteban ö'wö babibajo̧nöma e'ewö lödijadötö. Jobadöma labinö budekwakwawijadötö, Esteban ö'wöchajiawö̧. Ja̧ möletjö, Esteban ö'wöchina möletjö jemi tupakwöma Jerusalénnö ju̧kwadö Jesúsnö ösödadönöma usula tjemawinö ja̧bijadötö ju'wedöma. Usula tjemawinö ja̧tjiawö̧ Jesúsnö ösödadöma jobetjö döbibajijadötö. Jerusaléntjö döbibajadö Judea nijinö ju'wedö, Samaria nijinö ju'wedö, wainökwena babibö ju̧kwijadötö. Okobema Jesús webawedöda, a̧li̧nösamutjö du̧ju̧tajanöda Jerusalénnöma ju̧kwibijadötö.