Juan 14:6 - Dios Iwene

⁶ —Ötjödasa Dios ö̧jobekwö 'ya̧kwawa manama— yöawinobe Jesúsma—. Ja̧danö, ötjödasa jweinö yöbawo̧ma jweinö jo̧chobetjö̧. Ja̧danö, ötjödasa ba̧kwȩlö̧jatebö ja̧kwawa iyo̧ma. Ja̧danö, ötjöma Dios ö̧jobekwö 'ya̧kwawa manachobetjö̧, ötjönöda 'yo̧ma Dabe'do Dios ö̧jobekwö ichibakwo̧.

Juan 14:6 Iomraidhean Croise

Mateo 11:27

Jojodönö yöawinobe Jesúsma: —Chömöledö, chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö waisadöma, sule ötjö Dios itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe.

Juan 1:14

Ja̧danö, Dios Iwene Jo̧, jö̧ba̧lö, ötjabökwema jojo baibanö jeminökwe. Ja̧danö, jojo baibanö jeminökwema böjȩnö ökwödökwö ö̧jinobe. Ökwödöma jo̧banö edö, Jwiinö otiwo̧, jö̧ba̧lö, dösödijatö. Yelösöda, jo̧bama Dios Itji̧, iteakwo̧daobetjö̧ jwiinö otiwo̧. Ja̧danö, jo̧bama jwiinö lȩlö̧jino edöda pjabato̧. Ja̧danö, jweinöda yöba̧lo̧.

Juan 1:17

Damötjö Diosma iyinobe Moisésnö ökwödönö yöawobö, iteda weina jawa wene, a̧ja̧kwö dö̧jobö weinama. Jo̧kwaijayonö Moisés weinatjö̧ Diosma i̧sebinokobe iteda lȩlö̧jino edi̧ma. Iteda weina jawada i̧sebinobe. Ja̧danö Diosma Jesucristonö weenama ja̧ Moisésnö weinatjö o̧penönö mikwawi̧ma iyinobe ökwödönöma. Ja̧danö, Jesucristonötjö Diosma i̧sebinobe iteda jwiinö lȩlö̧jino edi̧ma, jojodönö pjabatö. Ja̧danö, Jesucristonötjö Diosma itedada jweinö yöa̧lina i̧sebinobe ökwödönöma, Ötjö jö̧ta̧li̧danö isabenö ja̧bo̧sa, jö̧ba̧lö.

Juan 1:4

Jo̧bada, Dios Iwene Jo̧, jö̧ba̧lö, ötjabökweda ökwödönö ba̧kwȩlö̧jatebö ja̧kwawa dujuna̧linö iyo̧. Ja̧danö, jo̧ba, ba̧kwȩlö̧jatebö ja̧kwawa dujuna̧linö iyo̧ma, dewinö jo̧. Jo̧ba dewinö jo̧ma, do̧'wo̧ luwo̧nö isabenö ji̧ jawa, do̧'wo̧ luwo̧ jawa dewinö dejatö döwaisachibanö öbibo̧.

Juan 10:28

Jobadönö ba̧kwȩlö̧jatebö ja̧kwawa chiyawö̧. Ja̧danö, tjö'wöchökakwedö, ötjö ba̧kwȩlö̧jatebö ja̧kwawa chiyawö̧ma. Ja̧danö, otiwanö chite'ada̧lobetjö̧ bakwo̧bi deobe jobadönö ötjötjö 'döbebö emibo̧ma.

Juan 10:7

Jo̧kwaobetjö̧ Jesúsma yemidanö wanedö yöawinobe jobadönöma: —Isabenö yötawa. Ötjödasa o̧bȩja̧dö tjabȩko̧ apjudema. Ja̧danö, ötjönöda tetjachobö jo̧be—yöawinobe—.

Juan 10:9

Ötjödasa apjudedanö jo̧ma. Ja̧danö, ötjönö tebachadönöma tjö̧jibinö pjabato̧sa. Ja̧danö, ötjönö tebachadöma ötjö chite'ada̧lawö̧ o̧bȩja̧dödanöbedö. Ja̧danö, chite'ada̧lawö̧ o̧bȩja̧dödanöbedöma ötjönö tebachöbi tebachadö, labeböbi labebadö. Ja̧danö, ötjö apjudedanö jo̧nö labebajadö meje'ye kwanö otiwanö ja̧dödanö otiwanö ja̧dö— wanedö yöawinobe Jesúsma—.

Juan 14:19

Babema lekwokobe ötjö wotakwa̧ma. Wotaja̧ okobema ötjönö öpöjödadöma ötjönö yemidanö tjedökakwedö. Jo̧kwaijayonö ökwödöma ötjönö yemidanö kwedaduwakwedöja. Ja̧danö, ötjöma wobajaletjö tjetachajakobetjö̧ ökwödöbi wobajaletjöma tjekachajaduwakwedöja, ba̧kwȩlö̧jatebö kwö̧jaduwobö.

Juan 15:1

Jesúsma wanedö yöawinobe öba̧ja̧di̧ waisachadönö: —Ötjöma uba sa'basa, inesö sa'ba. Ja̧danö, Chabe'doma uba batjo otido̧— yöawinobe—.

Juan 18:37

Jejenö yöawiökwe Pilatoma: —Jo̧kwaobetjö̧ ¿yöka̧liji̧, Ötjöma jojodö tjuluwo̧sa, jö̧ba̧lö?— abebö a̧ja̧kwiökwe: — Jweinö yöka̧la. Ötjöma jojodö tjuluwo̧sa. Ja̧danö, ötjöma, böjȩnö ju̧kwadö tjuluwo̧ batibobö, isabenö ji̧ jawa yöbawö chojo'do jeminökwesa. Jejenö batibobö chichijatö böjȩkwö, böjȩnö ju̧kwadö tjuluwo̧ batibobö, isabenö ji̧ jawa yöbawö. Isabenö ji̧ jawa isakwadöma ötjö isabenö ji̧ jawa yötawi̧ma a̧ja̧kwö ösödadö— yöawinobe Jesúsma.

Juan 5:21

Ina yöawinobe: —Chabe'do Diosma iteda ösödi̧danö wobajadönö ja̧kwawa iyö, tjetjachajinö otido̧. Ja̧danö, ötjöma Chabe'do Dios otidi̧danö bakwainö otido̧sa. Ja̧danö, ötjöma Chabe'do jojodönö yemidanö tjetjachajinö otidi̧danö otido̧sa, jojodö jejenö tjetjachajobö, ösödö chomukwatawö̧nöma.

Juan 6:33

Ja̧ Dios iyi̧, mölejȩbe jawa kwakwawama, ba̧kwȩlö̧jatebö ja̧kwawa iyi̧ kwakwawa— yöawawö̧:

Juan 6:51

Ja̧danö, ötjödasa jojodönö ba̧kwȩlö̧jatebö ja̧kwawa chiyobö mölejȩbetjö ichino̧ma. Ötjönö, kwakwawa wanekwacho̧nö kwadöma isabenö ö'wö batjibökakwedö. Ba̧kwȩlö̧jatebö ja̧kwawa tjujuna̧lakwedö jobadöma. Ötjöma ötjödada chiyawakwo̧sa jojodö Dioskwö ba̧kwȩlö̧jatebö tjuju̧kwobö— yöawinobe Jesúsma.

Juan 6:57

Dabe'do Dios, ötjönö webinama, ba̧kwȩlö̧jatebö ja̧kwawa iyo̧. Ja̧danö jo̧bama, ba̧kwȩlö̧jatebö ja̧kwawa iyo̧obetjö̧ ötjöbi ba̧kwȩlö̧jatebö ja̧kwawa iyo̧sa. Ja̧danö, ötjö chiteba'o kwadöbi ba̧kwȩlö̧jatebö ja̧kwawa juna̧ladö batjibakwedö, jobadönö ba̧kwȩlö̧jatebö ja̧kwawama chiyobetjö̧.

Juan 6:68

—Chuluwo̧ kadatibokobe. ¿Ti yöawi̧ da̧ja̧kwobö di̧'yobö? Ökwöda ba̧kwȩlö̧jatebö ja̧kwawa wene yöbawo̧ma.

Juan 8:32

Ja̧danö, ötjö chöba̧ja̧di̧ waisachadö kwö̧jaduwobetjö̧ isabenö ji̧ yötawi̧ma kwöwaisachibaduwakwedöja. Wanedö yötawaduwakwö: Isabenö ji̧ yötawi̧ kwöwaisachibaduwobetjö̧, nu'yö di̧batö tjödinatjö̧ kwö̧jibaduwinö bakibaduwakwedöja, kwuluwo̧duwi wei̧tjö lakebaduwinö— jö̧a̧linobe Jesúsma, wanedö yöbawö.

Juan 8:51

Isabenö yötawa. Ötjö yötawi̧ a̧ja̧kwadöma la'akatjöda wotjökakwedö.

Hechos 3:15

Ja̧danö, ökwödöma weköbaduwijatö ösötenö bȩbö tjujunobö Jesúsnö, ja̧kwawa iyo̧nöma, ö'wöchobö. Jo̧kwaijayonö chömöledö, Diosma ja̧bijetö yemidanö 'yaibajinö. Jo̧ba 'yabibajo̧nö dedinobetjö̧ jweinö yödawa.

Hechos 4:12

Ja̧danö, jojodö tjö̧jibinö pjabato̧ma jo̧bada. Jelo̧ma deobe. Dios böjȩnö ju̧kwadönö tjö̧jibinö pjaatobö weinökwema bakwo̧da, Jesúsda— jejenö yöbawö atadijetö Pedroma.

Hechos 9:2

Ichibö ö'weje la'aka pjabato̧nö abebijetö öjiya iwȩyudobö, jo̧ba imikwö, jelobe, Damascobe e'ewotö jö̧ba̧lö. Ja̧ öjiyama Sauloma Damascobe e'ewö 'ya̧jo̧ ichibö judío jojodö ba̧nö tja̧ja̧kwa̧leju te'ada̧lakwawa jojodönö i̧sebobö jö̧ba̧lijetö. Ja̧danö, Jesúsnö ösödadönö, ji̧bakwawa mananö kwebachadö ötjabiwö̧nö, ömadönöbi ya̧dönöbi do̧batö nu'yajo̧ Jerusalénbe öbibö ȩwa̧jobö jö̧ba̧lijetö Sauloma.

Romanos 5:2

Ja̧danö, ju'wibi chömöledö. Jesúsda dö̧jibinö pjabato̧, jö̧ba̧lö dösödiökwe, Diosma mikwa jwiinö otiwa jawa iyinobe ökwödönöma. Ja̧danö, do̧'wo̧ ösöwanö dö̧jobe, isabenö Dios dewinö idejatena duju̧kwakwedösa jö̧ba̧lö. Ja̧bi Cristoda ja̧ina chömöledö.

Romanos 5:21

Jau chömöledö, jojodö sulabenö ja̧tji̧ma isabenö juluwinobe, jojodö wotjawinö ja̧bö. Ja̧danö Dios mikwa jwiinö otiwa jawa iyi̧bi juluwi̧, jojodö ba̧kwȩlö̧jatebö tjö̧jakwedö batjibanö ja̧bö. Jau chömöledö, Duluwo̧ Jesucristoda midawö woinobetjö̧, Diosma, ökwödönö mikwa jwiinö otiwa jawa iyö, Chedemi bidöma suli̧ jwibadö, jö̧ba̧lö, ba̧kwȩlö̧jatebö ja̧kwawa iyobe ökwödönöma.

1 Corintios 15:45

Jau chömöledö, baikwö laebobe Dios iwene: Ajayinö jojo Adánnö otidinobe, 'yabalo̧ baibanö, jö̧ba̧lö laebobe. Jo̧kwaijayonö, ikena luwo̧ Cristoma, ja̧kwawa iyo̧ O̧'wo̧ Luwo̧ baibinobe.

Efesios 2:18

Chömöledö, Jesúsma midawö woinobetjö̧, ökwödö judío jojodönöbi ökwödö judío jojodöböködönöbi, Dios O̧'wo̧ Luwo̧ma, bakwo̧da tebachibö öjamatinawö̧sa. Ja̧danö, bakwo̧da tebachibö öjamatinawö̧dobetjö̧ ökwödöma okobe deinö Dabe'do Diosnö abebadösa.

Colosenses 2:17

Ja̧ jawama mikwawökö ji̧ babema chömöledö. Baikwö yötawa: Ja̧ pjiesta jawa Dios weinenama, tupakwö ichakwo̧nö badekwachinö weinobe, jo̧banö tjomukwato jö̧ba̧lö. Jo̧kwaijayonö, ja̧ jawa badekwachökwe Cristoma ida̧ökö ichibinobetjö̧, tupakwö ja̧ jawa domukwatobö jwiobe. Jau chömöledö, Cristoda isabenö mikwawo̧ma, jo̧bama isabenö jo̧.

Colosenses 2:9

Jau chömöledö, jelobetjö Dios jawa kwisakwaduwoböma jwiobe, jojo babibina Cristoma okobe jwiinö Dios jawa ujuna̧lobetjö̧.

Colosenses 3:4

Jau chömöledö, isabenö ja̧kwawa dujuna̧li̧ma, Cristotjöda ichi̧, ja̧danö jo̧ba yemidanö öwawachibena, iteda salöinö ujulunö ichö öwawachibenama, ökwödöbi jo̧bakwö döwawachibakobe, jo̧bakwö iteda salöinö ujulu juna̧ladö.

Hebreos 7:25

Jo̧kwaobetjö̧ Jesúsda jojodö Dioskwö ichibö tjö̧jibinö pjabato̧, Jesúsma dö̧jibinö pjabato̧, jö̧ba̧ladönöma. Ja̧danö, jobadö tjö̧ji̧bi okobe jwiinö pjaatinobe Jesúsma, ja'yubebi ji̧bökönö. Ja̧danö, Jesúsma jo̧banö ösödadönöma ba̧kwȩlö̧jatebö tjö̧jibinö pjabato̧, Jesúsma ba̧kwȩlö̧jatebö Diosnö abebö jobadönö pjaatobö ö̧jobetjö̧.

Hebreos 9:8

Chömöledö, jejenö Diostjö jojodötjö ö'weje la'aka pjabato̧ma tebachiainobe okwasȩko̧nö. Jo̧bada, bakwöta o̧bakwenada, pakaya itji̧, chiwo tjökwösöbu iyö tebachiainobe tjöekwemi tupakwösȩko̧nö. Jejenö Diosma weinobe jo̧banö böjȩtjö eju okwasȩko̧nö teachobö. Ja̧danö, jejenö ji̧nama Dios O̧'wo̧ Luwo̧ma ökwödönö i̧sebobe, Diostjö jojodötjö ö'weje pjabatadöma Dios böjȩtjö eju kweatakweju okwatjö juwö iyö ina tjotidayi bakwo̧da, ö'weje la'aka pjabato̧da tebachiainobe Dios ö̧jobekwö. Diostjö jojodötjö ö'weje pjabatadöma Dios ajayinö yöbawö junö wei̧ a̧ja̧kwö tjotidayi jojodö jo̧kwadabedöma Dios ö̧jobekwö tjetjachoböma ina tjöekwatinobe.

1 Pedro 1:21

Ja̧danö, Cristo ökwödönö pjaatinobetjö̧, Diosnö ösödadöja chömöledö. Jau chömöledö, Diosda Cristonö wobajaletjö tjeachajinö ja̧binama, ja̧danö jo̧banö dejatinö ujulu iyinama, jo̧kwajabetjö̧ Cristonö kwösödaduwenama, Dios yöawi̧ ösödadöja, ja̧danö Diosnö kwo̧'wo̧ wana̧ladöja. Jau chömöledö, Dabe'do Diosma isabenö otiwanö pjaatinobe sulabetjö dö̧jibobö, jo̧kwajabetjö̧ ja̧ pjaatina omukwatö sulabenö ja̧bökönö dö̧jobö jo̧be.

1 Pedro 2:4

Jau chömöledö, isabenö duluwo̧nö waisachinadösa, lȩlö̧jinö pjabato̧ jö̧ba̧lö. Ökwödö Jesúsnö ösödadönö baikwö wanedö yötawa: Ökwödöma Dios eju inawiyadanö ichejekwadösa, ja̧danö Duluwo̧ Jesúsma Dios ejutjö inesö la'aka lödawawa inawadanöbo̧. Ja̧danö, ökwödö Jesúsnö ösödadöma, jo̧banö ösödö ichadösa, Diosma ökwödötjö iteda eju otidakobetjö̧. Jau chömöledö, Jesúsma isabenö ökwödö Dios ejubedötjö la'akadanöbo̧, Dios iwene laebi̧danö. Baikwö laebobe Dios iwene Jesúsnöma: Inawa nöinö mikwawawa omudawajo̧, Jerusalénnö chödobe, o̧dotjö inesö la'aka lödawawa baibanö, ja̧danö bakwo̧ jo̧ba inawadanöbo̧nö ösöditjö̧ma, waekwökena, jö̧ba̧lö laebobe Jesúsnöma. Jau chömöledö, kwöwaisaduwa, böjȩ jojodöma Jesúsnö öpöjödadö, mikwawö̧kö̧ jö̧ba̧lö, jo̧kwaijayonö jobadö tjöpöjödijayonö, Diosma Jesúsnöda omudawö ujuninobe, ökwödö iteda ejubedötjö la'aka ajayinö lödawawa inawadanö ö̧jobö. Jau chömöledö, Dios edemi isabenö mikwawo̧ Jesúsma, ja̧danö ökwödö Jesúsnö ösödadöbi jo̧banö jweinö domukwatobe, isabenö mikwawo̧ jö̧ba̧lö. Jau chömöledö, ökwödö Jesúsnö ösödadöma Dios ejubedösa, jo̧kwaijayonö ja̧damaökö, ju'wibi Diosma ökwödönö 'da̧batö ujuninobe, iteda wei̧ otidadö badibanö chömöledö. Jau chömöledö, Jesucristo ökwödönö pjaatinobetjö̧, babema Dios ösödi̧ iyawa jo̧banö iyadösa, do̧'wo̧ luwo̧ jawa iyawama.

1 Pedro 3:18

Jau chömöledö, Diosma isabenö ökwödö usula kwemawaduwobö weena, baikwö yötawa: Duluwo̧ Cristo usula emawobö weinobe, ¿jö̧tö? Ja̧danö Duluwo̧ Cristo usula emawobö ji̧natjö̧ma, ¿ökwödö usula demawobö jwienaji̧? Jȩna chömöledö. Jau chömöledö, sulabe dujuna̧li̧ imidawo jö̧ba̧lö, Cristoma bakwötanöda midawö woinobe, okobe deinö tjusula midawö. Sulabe jwibo̧da midawö woinobe chömöledö, ökwödö dusula juna̧ladö Dioskwö dichibobö ja̧bö. Jau chömöledö, iteba'oma kwabö lotjinobe, jo̧kwaijayonö Diosma o̧'wo̧ luwo̧nö 'yaibajinö ja̧inobe.

1 Juan 1:8

Chö̧ja̧wo̧dö, ökwödöma okobe deinö sulabenö ja̧bö ja̧dösa ¿jö̧tö? Bakwo̧, Ötjöma sulabenö ja̧bö̧kö̧sa, jö̧ba̧lö, yöa̧litjö̧ma ¿jweinö omukwatö yöba̧lo̧ji̧? Jelobekwö omukwato̧. Isabenö chö̧ja̧wo̧dö, jo̧bama iteda omukwati̧da öibökwe. Ja̧danö, jo̧bama o̧'wo̧ luwo̧ okwanö Dios iwene, isabenö ji̧ wenema öpöjödobe. Isabenö chö̧ja̧wo̧dö, jo̧ba, Sulabenö ja̧bö̧kö̧sa, jö̧ba̧lö, yöba̧lo̧ma iteda omukwati̧da omukwatobetjö̧ Dios isabenö ji̧ yöawi̧ma öpöjödo̧.

1 Juan 2:23

Chömöledö jejenö omukwato̧ma, Jesús Dios Itji̧bö̧kö̧, jö̧ba̧lö, Dioskwö dötewinö 'yö̧kö̧. Jo̧kwaijayonö Jesúsnö ösödo̧ma, Jesúsma Dios Itji̧, dö̧jibinö imidawobö weinökwe, jö̧ba̧lö, Dioskwö dötewinö 'yo̧.

1 Juan 5:20

Ja̧danö chö̧ja̧wo̧dö, ju'wi jawabi döwaisa, biya̧: Dios Itji̧ Jesucristoma böjȩnö ichinobe Isabenö Jo̧ Diosnö döwaisachibanö yöbawö. Ja̧danö, babema Dioskwöbi Itji̧ Jesucristokwöbi bakobe dötewinö 'ya̧dösa. Chö̧ja̧wo̧dö, Jesucristoma isabenö jo̧ Diosda. Ja̧danö, jo̧ba Jesucristoma ökwödönö pjaatinobe, do̧'wo̧ luwo̧nö ba̧kwȩlö̧jatebö dö̧jobö.

1 Juan 5:6

Chö̧ja̧wo̧dö, isabenö döwaisobö jo̧be, Jesús, böjȩnö ichinama, Dios Itji̧, ja̧danö, Dios weinökwe jojodö tjö̧jibinö pjaatobö, jö̧ba̧lö. Ja̧danö, böjȩnö ö̧jena jo̧banö baledinama ökwödönö i̧sebobe, Isabenö Jesúsma Dios Itji̧, Dios weinökwe dö̧jibinö pjaatobö, jö̧ba̧lö. Ja̧danö, Jesús otidawa öjamatakwa̧ abönö Juan Ojwenö Bu̧dato̧ma Jesúsnö ojwenö ubu̧datinobe. Jejenö baledena wajuwanö i̧sebinobe, Jesúsma Dios Itji̧, Dios weinökwe, jö̧ba̧lö. Ja̧danö, ju'wi baledinabi, Jesúsnö ojwenö ubu̧datinadamaökö i̧sebobe, Jesúsma Dios Itji̧, Dios weinökwe, jö̧ba̧lö. Jesúsma iteda otidawa kaatena towisa'otjö ökwösobu ebawinö midawö ö'wöchinobe. Ja̧ baledinabi ökwödönö i̧sebobe, Jesúsma Dios Itji̧, Dios weinökwe dö̧jibinö pjaatobö, jö̧ba̧lö. Chö̧ja̧wo̧dö, isabenö döwaisobö jo̧be, Jesús, böjȩnö ichinama, Dios Itji̧, ja̧danö, Dios weinökwe jojodö tjö̧jibinö pjaatobö, jö̧ba̧lö. Ja̧danö chö̧ja̧wo̧dö, Dios O̧'wo̧ Luwo̧bi bakwainö yöawobe, Jesúsma Dios Itji̧, jojodö tjö̧jibinö pjabato̧, jö̧ba̧lö. Ja̧danö, Dios O̧'wo̧ Luwo̧ma bakwai̧ yöawakwawa yöbawo̧, isabenö ji̧ yöawakwawada.

2 Juan 1:9

Ja̧danö chö̧ja̧wo̧dö, Cristo yöawina kabatibö, idöda tjomukwati̧da 'ya̧döma Dioskwö dötewinö 'yö̧ködö. Jo̧kwaijayonö Cristo yöawina ösödö 'ya̧döma isabenö Dabe'do Dioskwöbi, iteda Itji̧ Jesucristokwöbi dötewinö 'ya̧dö.

Apocalipsis 1:5

Ja̧danö, Jesucristoma ökwödönö lȩlö̧jino edobö chösöda, kwo̧'wo̧ luwo̧duwi ösöwachibanö kwö̧jaduwobö. Jesucristoma Dios omukwati̧ jweinö yöbawo̧. Ja̧danö, jo̧bama wobinadötjö abönö tjebachajina. Ja̧danö, okobe deinö böjȩ la'aka luwedönö webö jo̧ Jesucristoma, inesö la'aka luwo̧obetjö̧. Chömöledö, Jesúsma ökwödönö jwiinö ile nibebo̧. Jo̧bama iteda ökwösobu ebawinö imidawinobetjö̧, sulabe wei̧ a̧ja̧kwökönö, otiwanö dö̧jobö jo̧be.

Apocalipsis 19:11

Ikenama mölejȩbe chedemi apjude po̧ekwobe chedijatö. Ja̧danö, po̧ekwobe okwatjö kabayu dewo̧nö chedijatö. Jo̧ba kabayu wamenö bakwo̧ ö̧wo̧nö chedijatö. Jo̧ba imima, Jweinö Yöbawo̧ mikwo̧. Jo̧bama, jojodönö lȩbebö jweinö omukwatö webo̧. Ja̧danö, jweinö omukwatö öpöjojodönö ujuluwobö 'yo̧.

Apocalipsis 20:15

Ja̧danö, jojodöma, ba̧kwȩlö̧jatebö ja̧kwawa juna̧ladö tjimi ba̧ja'ye okwa wȩyukwöködöma, joola, ökwöla ubola nöola okwa ba̧kwȩlö̧jatebö tjö̧jakwedö.

Apocalipsis 22:1

Ikenama ángelma ötjönö ojwe i̧sebijatö. Jödötjö ojwiyoma, ba̧kwȩlö̧jatebö ja̧kwawa ojwiyo. Chedemi jödöma Dios ö̧belö, Obeja Itji̧danö Jo̧ ö̧belö labebö isuwödö. Yelösöda salödö, isa̧yu̧ jwiinö salöayu̧danö.

Apocalipsis 22:17

Ikenama Dios O̧'wo̧ Luwo̧ma, Obeja Itji̧danö Jo̧ ilekwo baibanö emakwujukwö Jesúsnö jwötjobe cha̧ja̧kwijatö, Baikwö ichi, jö̧ba̧lö. Ja̧danö, jojodönöbi jwöobe cha̧ja̧kwijatö, Ökwödöbi bi'ye yöawi̧ a̧ja̧kwadöma, Jesúsnö jwöbaduwi, Ichi, jö̧ba̧lö. Jejenö cha̧ja̧kwijatö. Ja̧danö, Dios O̧'wo̧ Luwo̧ma yöawijatö: —Bakwo̧ ojwiyo o̧tinö jo̧nö ojwiyo iyo̧sa, mikwa jwiinö, ba̧kwȩlö̧jatebö ja̧kwawa ojwiyoma— yöawijatö, Dios O̧'wo̧ Luwo̧ma.

Apocalipsis 3:14

Ja̧danö, chedökwema ina chiwȩyudobö weijatö: —Juan, biya̧ yötawi̧ma wȩyudi weköbo, Laodicea jojodötjö ötjönö ko̧ko̧kwa̧lö ösödadönö te'ada̧lakwawa jojonöma. Jo̧banö weköbo, jobe ju̧kwadö ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma Isabenö Yöbawo̧, jö̧ba̧lö, ötjabökwe yöawi̧. Ja̧danö, jo̧bama Dios iwene ba̧kwȩlö̧jatebö jweinö yöbawo̧. Ja̧danö, jo̧bada Dios ajayi otidi̧ baibobö ja̧binama. Jo̧bama baikwö yöawobe ökwödö Laodicea jojodönö, jo̧banö ösödadönöma:

Apocalipsis 3:7

Ja̧danö, chedökwema ina chiwȩyudobö weijatö: —Juan, biya̧ yötawi̧ma wȩyudi weköbo, Filadelfia jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, jobe ju̧kwadö ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma suli̧ jwibo̧ yöawi̧. Ja̧danö, jö̧a̧linadanö ja̧bo̧ yöawi̧, biya̧ chiwȩyudi̧ma. Ja̧danö, jo̧bama la'aka luwo̧ Davidmine u̧kwa yawepi̧ juna̧lo̧. Jo̧bada apjude po̧bebö tebato̧ma. Ja̧danö, jo̧bada apjude yö̧beböbi yö̧bebo̧. Jo̧bama baikwö yöawobe ökwödö Filadelfia jojodönö, jo̧banö ösödadönöma: