Juan 14:26 - Dios Iwene26 Ja̧danö, chȩwa̧jabe okobema Dabe'do Dios, ötjö Chabe'doma ökwödönö weakobe jelo̧nö, ötjönö balekwo̧nö, Pjabato̧nöma. Jo̧bama Dios O̧'wo̧ Luwo̧. Ökwödönö okobe jwiinö öba̧ja̧da̧lakwo̧. Jo̧bama ötjö chöba̧ja̧dinabi kwomukwataduwobö pjaatakwo̧— yöawinobe Jesúsma—. Faic an caibideil |
Juan 14:26
75 Iomraidhean Croise
Tupakwö yöawinobe Juanma, jojodönö: —Ötjöma sulabenö tjomukwati̧ kabatibö balewachajadönö ojwenö chubu̧datobe, sule ojwiyonöda. Jo̧kwaijayonö, chökömanö ichakwo̧ma, Dios O̧'wo̧ Luwo̧nö jobadönö ja̧akwo̧, ja̧danö ökwölanö jobadönö ja̧akwo̧. Jo̧ba ötjö chökömanö ichakwo̧ma, ötjötjö yelösöda bajalekwönönö mikwawo̧, baikwö wanedö yötawa: Luwedö 'dutjawatu sapatu e'ewadöma, sule tjömöayedötjö mikwawöködöda, ¿jö̧tö? Jo̧kwaijayonö, ötjöma jo̧ba ömöayo̧ 'duawatu e'ewo̧ ömöayo̧ chö̧joböma mikwawö̧kö̧sa.
Davidda Dios iwene wȩyudijetö, iteda o̧'wo̧ luwo̧ okwanö Dios O̧'wo̧ Luwo̧ öba̧ja̧da̧lonö. Dios iteda weakwo̧nö yöawina wȩyudijetö Davidma. Baikwö wȩyudijetö iteda, Davidda Uluwo̧ jawa: Isabenö Jo̧ Dios baikwö jö̧ba̧lijetö ötjö Chuluwo̧nö. Ötjö chöwaisobekwöchobe bamati. Kwöpöjojodönö kwömasapa teebe kwöja̧tobö chödenanö baibanö bamati. Ökwönö pjatatocha kwöpöjöjödönö kwujuluwobö, jö̧ba̧lö wȩyudijetö.
Ja̧danö, ökwödönö do̧batibö e'ewö luwedö tjöba a'otjö tjujunena yekabiduwa kwatadakwawaduwakwa̧ma, ¿Dakwö chatadakwa̧jö? jö̧ba̧lö. Kwatadakwawaduwakwa̧ma Dios O̧'wo̧ Luwo̧ öba̧ja̧dakobe, iteda atadi̧ma. Ja̧danö, ökwödö kwo̧'wo̧duwi luwo̧nö Dios O̧'wo̧ Luwo̧ öba̧ja̧da̧lonö kwatadakwawaduwakobe, Dios O̧'wo̧ Luwo̧ öba̧ja̧dinö— jö̧ba̧lö—.
Jau chömöledö, ökwödöma sulabedököbaduwijayonö, kwi̧tji̧muduwinö otiwanö te'ada̧lö iyadöja, ja̧danö ökwödö sulabedöma kwi̧tji̧muduwinö otiwanö kwiyaduwitjö̧ma, mölejȩbe jo̧ Kwabe'doduwima ja̧tjö o̧penönö jo̧banö abebadönö ¿otiwanö iyökenaji̧? Iyo̧ chömöledö. Jau chömöledö, jo̧banö abebadönö Kwabe'do Diosma iteda O̧'wo̧ Luwo̧nö iyobe chömöledö— jö̧ba̧lö yöawinobe Jesúsma öba̧ja̧di̧ waisachadönö.
Ja̧ mölema, bakwo̧ Simeón mikwo̧ma Jerusalénnö ö̧jinobe. Jo̧bama otiwanö ja̧bö ö̧jinobe, ja̧danö jwaikwöda Diosnö ösödö ö̧jinobe. Ja̧danö Dios weakwo̧ jö̧a̧linökwenö ösödinö te'ada̧lö ö̧jinobe, Juluwanö ichowe, juluwanö ökwödö Israel jojodönö dö̧jibinö pjaatowe, jö̧ba̧lö. Dios O̧'wo̧ Luwo̧ma Simeonkwö ö̧jinobe,
Ja̧danö chömöledö, Chabe'do yöbawö ujuninadanö Dios O̧'wo̧ Luwo̧nö ökwödönö tebachibö öjamatobö wetakobe. Jo̧kwajabetjö̧ jo̧banö wetenanö kabatö, Jerusalénnö ja̧nö Dios O̧'wo̧ Luwo̧ ichakwa̧ te'ada̧lö kwö̧jaduwo. Ja̧danö, Dios O̧'wo̧ Luwo̧ ökwödönö tebachibö öjamataja̧ ikena, Dios ujulu kwujuna̧laduwakwedöja, otiwanö kwedinaduwa jawa böjȩ bakwameachibanö yökawaduwakobetjö̧— jö̧ba̧lö yöawinobe Jesúsma.
Jesús öba̧ja̧di̧ waisachadöma jejenö baledi̧ tjedijayonö tjomukwatinokobe, Aaa, biya̧ma damötjö tjiwȩyudinadanö wanekwacha, jö̧ba̧löma. Jejenöma tjomukwatinokobe. Jo̧kwaijayonö ju'wi möle, Jesús mölejȩbe kaekwachajabe okobetjöma tjöwaisachibakwedö, Aaa, ajayinö Jesús bulu itji̧nö wa̧nö ichinama damötjö tjiwȩyudinadanö wanekwachinobe, jö̧ba̧lö.
Ja̧danö, Jesús öba̧ja̧di̧ waisachadöma Jesús yöawina, Wa̧pötakwa möle o̧penö yemidanö baibanö chotidocha, jö̧ba̧lö, yöawinama, ju'winö tjomukwatakwedö, Jesúsma woawatjö tjeachajakwa̧ möle baibenama. Ja̧ möle baibena tjomukwatakwedö, Aaa, Jesúsma itedada jweinö yöawijatö, woawatjö tjeachajakwa̧da, jö̧ba̧lö, Dios eju jö̧a̧li̧ma. Jejenöobetjö̧ ja̧ möle baledena Dios damötjö yöawi̧ tjiwȩyudinabi, Jesús yöawinabi, Jweinö laebobe, jö̧ba̧lö, tjösödakwedö.
Jejenö yöbawö Jesúsma Dios O̧'wo̧ Luwo̧nö yöawinobe, itenö ösödadö tjo̧'wo̧ luwo̧nö tebachibö öjamatakwo̧nöda. Ja̧danö, ina Dios O̧'wo̧ Luwo̧ma deinobe. Diosma, jobadö tjo̧'wo̧ luwo̧nö tebachibö öjamatobö ina weinokobe. Ina, jejenö weinokobe Diosma, Jesús kabekwachajö mölejȩbekwö ȩwa̧ji̧ ina badekwachokobetjö̧.
Dios mölejȩbe kabekwajö ȩwa̧jobö ja̧inenanö kabatö chiwȩyudijatö. Ja̧danö, ja̧ mölema, Dios Jesús kaekwajinö ja̧ina mölema, Jesúsma mölejȩbe ȩwa̧jakwa̧ abönö, webijetö iteda yöawi̧ yötjawobö weinawö̧nö, iteda 'da̧batö ujuninawö̧nöma jo̧ba ȩwa̧jabe okobetjö ja̧bö tjuju̧kwakwa̧. Ja̧danö, Jesúsma, ja̧ weinama, Dios O̧'wo̧ Luwo̧ öba̧ja̧da̧lonö webijetö jobadönö.
Jo̧kwaijayonö biya̧da, kwöwaisaduwobö yötawa. Ökwödöma Dios ujulu kwujuna̧laduwakobe, Dios O̧'wo̧ Luwo̧ ökwödö kwo̧'wo̧ luwo̧duwinö tebachibö öjamataja̧ ikena. Ja̧danö, ötjö yötawina wenema otiwanö yökawaduwakwedöja. Bemi Jerusalénnöbi, ju'wi okobe jwiinö Judea nijinöbi, Samaria nijinöbi yökawaduwakwedöja. Jelobe jelobebi böjȩ bakwameachibanö yökawaduwakwedöja— jö̧ba̧lijetö Jesúsma öba̧ja̧di̧ waisachadönöma.
Ja̧danö, ju'wi möle jobadöma tju̧kwa kwökönö ö̧tö̧chö Diosnö ösödijadötö. Tjösödonö Dios O̧'wo̧ Luwo̧ma jobadö tjo̧'wo̧ luwo̧nö jö̧ba̧lijetö: —Ötjöma ökwödötjö du̧ju̧tajanö, Bernabénö, Saulonö 'da̧batö chujunijatö ötjö weti̧ tjotidobö. Jobadönö tjuu wamenö 'bibebö abebaduwi ötjö weti̧ tjotido— jö̧ba̧lijetö.
Ja̧danö, judío jojodöböködöma, Jesúsma dö̧jibinö pjabato̧, jö̧ba̧lö, ösödajadönö, Diosma, jojodö tjomajade okwa tjomukwati̧ waiso̧ma webijetö iteda O̧'wo̧ Luwo̧nöma tebachibö öjamatobö jobadö tjo̧'wo̧ luwo̧nö. Ökwödönö tebachibö öjamatinadanö, jobadönöbi, judío jojodöböködönöbi tebachibö öjamatinobe Dios O̧'wo̧ Luwo̧ma. Ja̧danö, Diosma jejenö i̧sebijetö, Bidöma ötjö chi̧tji̧mu babibadö, jö̧ba̧lö.
Jo̧banöma mölejȩbe kaekwajinö ja̧bijetö Diosma, iteda öwaisobekwöchobe öbamatobö, la'aka inesö ö̧bena. Ikenama Diosma iyijetö iteda O̧'wo̧ Luwo̧nö Jesúsnöma, isabenö yöawinadanö. Jemi tupakwöma Jesúsma iyijetö Dios O̧'wo̧ Luwo̧nö ökwödönöma. Bena ju'wedö tjiwene wajwidijayonö yödawobe kwedaja̧duwabi, kwa̧ja̧kwaja̧duwabi Dios O̧'wo̧ Luwo̧, Jesús ökwödönö weajökwe ja̧aja̧— yöbawijetö Pedroma—.
Ina yöbawijetö: —Ju'wi jawabi yötawa ökwödönö, te'ada̧lakwawa jojodönö. Kwö̧jaduwobema otiwanö kwite'ada̧laduwo, kwo̧'wo̧ luwo̧duwi juluwachibanö tupakwö kwi̧'yaduwobö Dioskwö. Ju'wibi yötawa. Ju'wedönöbi kwite'ada̧laduwo Diosnö ösödadönöma. Dios O̧'wo̧ Luwo̧ma ökwödönö 'da̧batö junijetö jobadönö kwite'ada̧laduwobö. Wanedö yötawa: O̧bȩja̧dönö te'ada̧lakwawa jojo a̧jwi̧mu tjöekwanö ite'ada̧li̧danö ökwödöma Jesúsnö ösödadönö kwite'ada̧laduwo. Kwite'ada̧laduwawö̧nöma ida̧ökö Dios ja̧inobe iteda i̧tji̧mu batjibinö. Diosma iteda itji̧ ökwösobu ebawö ö'wöchö imidawinobetjö̧, ida̧ökö Dios ja̧inobe jobadönöma iteda i̧tji̧mu batjibinö, iteda itji̧nö ösödadöma. Jobadönöma kwite'ada̧laduwo— yöbawijetö Pabloma.
Jejenö ökwödönö i̧sebö chotidijatö chömöledö, ökwödöbi ötjö chotidobe edö kwomukwataduwobö, Aaa, ja̧danö ökwödöbi dotido, demaja̧ baladanö diyo usula jojodönö pjabatö, jö̧ba̧lö. Kwomukwataduwo chömöledö Duluwo̧ Jesús yöa̧linama. Jo̧bama baikwö yöba̧lijetö: Isabenö ju'wedönö pjabatö ja̧bo̧ma o̧'wo̧ ösöwanö jo̧. Jo̧bama jelo̧ tjiyökwe o̧'wo̧ ösöwanö ö̧jemitjö̧ o̧penönö o̧'wo̧ ösöwanö jo̧. Jejenö Duluwo̧ Jesús yöba̧lijetö—yöbawijetö Pabloma.
Ikenama, tjo̧wi̧ dȩwa̧jo, jö̧ba̧lö, ina wainö omukwatijadötö. Tjȩwa̧jakwa̧ abönö Pabloma yöbawijetö, bajaleapo yöawi̧ma: —Damötjö Dios O̧'wo̧ Luwo̧ma ba̧ja̧dijetö jelo̧nö, Dios yöawi̧ yöbawo̧nö, Isaías mikwo̧nö ökwödötjö ajayinö ji̧nadönö yöawobö. Ja̧ yöawinama jweinö yöbawijetö. Baikwö laebobe Dios iwenetjö:
Jau chömöledö, Dios ömöayedö dö̧ji̧ma kwakwawa jawamaökö, owawa jawamaökö. Ju'wida chömöledö, Dios ömöayedö dö̧ji̧ma. Dios O̧'wo̧ Luwo̧ma ökwödönö ja̧inobe, sulabe jwibadö badibanö, ja̧danö tupakwöbi pjaatobe ökwödönöma. Jau chömöledö Cristonö ösödadö dömöledökwö wene jwiinö dö̧jobö, do̧'wo̧ ösöwanö wene jwiinö dömöledökwö dö̧jobö pjabato̧ Dios O̧'wo̧ Luwo̧ma. Ja̧da Dios ömöayedö ja̧kwawama chömöledö.
Chömöledö, Diosma ökwödönö pjabato̧, Aaa, isabenö Dios jö̧a̧linadanö otiwanö ja̧akwo̧, jö̧ba̧lö domukwatobö. Jo̧banö ateba, kwo̧'wo̧ luwo̧duwi ösöwachibanö kwö̧jaduwobö, wene jwiinö kwö̧jaduwobö. Ja̧danö, jo̧banö kwösödaduwobetjö̧, jejenö kwö̧jaduwobö pjaatakwo̧ ökwödönöma chömöledö. Ja̧danö Dios O̧'wo̧ Luwo̧ ökwödönö pjaatobetjö̧, tupakwö kwo̧'wo̧ kwöwana̧laduwakwedöja, isabenö Dios jö̧a̧linadanö ja̧akwo̧ jö̧ba̧lö.
Jau chömöledö, Diosma isabenö ökwödönö pjabato̧. Diosma öwaetjöda i̧sebinobe ökwödönö ile niebi̧ma chömöledö. Otiwa jawa mikwa jwiinö iyö, iteda o̧'wo̧ luwo̧nö iyinobe, ökwödö do̧'wo̧ luwo̧nö ö̧jobö. Ja̧danö, do̧'wo̧ luwo̧nö ja̧nö Dios ökwödönö ile niebi̧ma öba̧ja̧dobe ökwödönöma, Dios O̧'wo̧ Luwo̧ma chömöledö.
Ja̧danö, yöbawadö yötjawi̧ a̧ja̧kwö, Dios O̧'wo̧ Luwo̧ ujulunö yötjawojobö yötjawokojobö jö̧ba̧lö kwöwaisaduwobö baikwö yötawa chömöledö: Dios O̧'wo̧ Luwo̧ ujulunö yöbawadöma, la'akatjöda yöbawöködö, Jesúsma sulabo̧, Dios lȩebakwo̧ Jesúsnöma jö̧ba̧lö. Ja̧danö, Jesúsma la'aka luwo̧ jö̧ba̧lö yöbawadöma, Dios O̧'wo̧ Luwo̧ pjaatawö̧da jejenö yöbawadö chömöledö.
Jejenö usula demawijayonö, sulabenö ja̧bökönö dö̧jobe, ja̧danö ju'wibi Dios iyi̧ waisakwawa di̧sebobe, ja̧danö ju'wibi do̧'wo̧ 'dibachibö dösölö̧jinö ja̧bö dö̧jobe chömöledö, isabenö Dios ömöayedösa jö̧ba̧lö. Ja̧danö ju'wibi, Dios O̧'wo̧ Luwo̧ do̧'wo̧ luwo̧nö ö̧ji̧ma i̧sebobe Dios ömöayedö dö̧ji̧ma, ja̧danö ju'wibi isabenö jojodönö ösödabikwawö ja̧nö di̧sebobe, isabenö Dios ömöayedösa jö̧ba̧lö.
Chömöledö ¿ökwödö judío jojodöböködöja? Ökwödöma Dios isabenö iwene yötjawi̧ a̧ja̧kwö kwösödinaduwobe. Jau chömöledö, kwö̧jibaduwinö ja̧awa, otiwa jawa wene yötjawi̧ a̧ja̧kwö, Jesúsnö kwösödinaduwobe, Jesúsma dö̧jibanö pjabato̧, jö̧ba̧lö. Ja̧danö, Jesúsnö kwösödaduwena Dios O̧'wo̧ Luwo̧ma tebachibö öjamatinobe ökwödö kwo̧'wo̧ luwo̧duwinöma. Jau chömöledö, Dios ajayinö yöbawö ujuninadanö, Ötjö Cho̧'wo̧ Luwo̧nö wetocha, jö̧ba̧lö, yöbawö ujuninadanö, iteda O̧'wo̧ Luwo̧nö weinobe ökwödö kwo̧'wo̧ luwo̧duwinö tebachibö öjamatobö. Ja̧danö jo̧ba tebachibö öjamatenama jweinö i̧sebinobe, Isabenö bidöma ötjö chi̧tji̧mu, jö̧ba̧lö.
Ju'wibi yötawa chömöledö, ökwödönöma. Dios O̧'wo̧ Luwo̧ o̧'wo̧ tjo̧ekwinöma ja̧köbaduwoko. Ökwödöma seyu dobawedödanöbedösa Dios O̧'wo̧ Luwo̧ tebachibö öjamatinobetjö̧. Ja̧danö, Dios O̧'wo̧ Luwo̧ ökwödö do̧'wo̧ luwo̧nö ö̧ji̧ma i̧sebobe, Bidöma Dios ömöledö babibinadö, Dios lȩebi̧tjö emökönö, ba̧kwȩlö̧jatebö Dioskwö tjuju̧kwakwedö, jö̧ba̧lö. Jo̧kwaobetjö̧, Dios O̧'wo̧ Luwo̧ o̧'wo̧ tjo̧ekwinöma ja̧köbaduwa.
Ja̧danö, Diosma iteda ujulu i̧sebinobe jobadönötjö jojodö tjöwaisachibobö, Bidö yötjawi̧ma isabenö ji̧ jawa wene, jö̧ba̧lö. Yelösöda jojodö la'akatjöda edajitjökö jawabi i̧sebinobe Diosma, iteda ujulu, jobadö Jesús yöawina yöbawadö yötjawonö. Isabenö, Jesús yöawina yötjawonö Diosma iteda ujulu i̧sebinobe, ju'wi jawabi, ju'wi jawabi i̧sebö, iteda jwiinö ujuluma, jobadö yöbawadönötjö. Ja̧danö, Diosma jobadö Jesús yöawina yöbawadönöma iteda O̧'wo̧ Luwo̧ ujulutjö iyabinobe jobadö yöbawadönö, bakwo̧nökwena jojodönö pjatjatobö. Ja̧danö, okobe jwiinö Dios iteda ujulu i̧sebi̧ma iteda ösödi̧danöda baledinobe jojodö tjöwaisachibobö, Bidö yötjawi̧ma isabenö ji̧ wene, jö̧ba̧lö. Chömöledö, Diosma iteda ujulu i̧sebobetjö̧, Jesús yöawina isabenö ji̧ wene, jö̧ba̧lö, Jesús yöawina tjöbeba̧lö̧jönö omukwatö di̧'yobö jo̧be. Jo̧ba yöawina wenema jwiinö otiwa jawa wene, dö̧jibinö pjaati̧ wene. Jo̧kwaobetjö̧ ja̧ yöawinama, do̧'wo̧ luwo̧ okwanö do̧tjati̧danö do̧batö di̧'yobö jo̧be jelobekwö omukwatö di̧'yapji jö̧ba̧lö, Jesús yöawina öpöjödö. Chömöledö jelobekwö omukwatö 'ya̧dönöma, Dios lȩebakwawö̧.
Jo̧kwaobetjö̧ chömöledö, jwaikwöda Diosnö do̧'wo̧ wana̧lö di̧'yobö jo̧betjö̧ Dios O̧'wo̧ Luwo̧ yöawina, da'dödöminenö sulabenö tjö̧jina yöawinama tjöbeba̧lö̧jönö domukwatobö jo̧be. Isabenö chömöledö, Dios O̧'wo̧ Luwo̧ yöawina domukwatobö jo̧be, döwaisachibobö, Ökwödöma da'dödömine tjö̧ji̧danö dö̧joböma yelösöda jwiobe, jö̧ba̧lö. Baikwö laebobe Dios iwenetjö, Dios O̧'wo̧ Luwo̧ yöawina: Babema ötjö yötawi̧ kwa̧ja̧kwaduwena
Chömöledö, jejenö Diostjö jojodötjö ö'weje la'aka pjabato̧ma tebachiainobe okwasȩko̧nö. Jo̧bada, bakwöta o̧bakwenada, pakaya itji̧, chiwo tjökwösöbu iyö tebachiainobe tjöekwemi tupakwösȩko̧nö. Jejenö Diosma weinobe jo̧banö böjȩtjö eju okwasȩko̧nö teachobö. Ja̧danö, jejenö ji̧nama Dios O̧'wo̧ Luwo̧ma ökwödönö i̧sebobe, Diostjö jojodötjö ö'weje pjabatadöma Dios böjȩtjö eju kweatakweju okwatjö juwö iyö ina tjotidayi bakwo̧da, ö'weje la'aka pjabato̧da tebachiainobe Dios ö̧jobekwö. Diostjö jojodötjö ö'weje pjabatadöma Dios ajayinö yöbawö junö wei̧ a̧ja̧kwö tjotidayi jojodö jo̧kwadabedöma Dios ö̧jobekwö tjetjachoböma ina tjöekwatinobe.
Jejenö tjöwaisobö jö̧tja̧liökwe, Diosma jobadönö i̧sebinobe, tjiwȩyudi̧ma, damötjö ji̧nadö jawamaökö, ökwödö 'dö̧ibaji̧ möle ju̧kwadönö Dios pjaatakwa̧ weneda tjiwȩyudinobe jö̧ba̧lö. Jau chömöledö, ja̧ wenema, otiwa jawa wene Cristo dö̧jibinö pjaati̧ weneda, ja̧danö Dios iwene yöbawadöma ökwödönöbi ja̧ wene yötjawinobe chömöledö, a̧ja̧kwö kwösödaduwobö. Jau chömöledö, Diosma mölejȩbetjö iteda O̧'wo̧ Luwo̧nö weinobe, ja̧danö jo̧ba Dios O̧'wo̧ Luwo̧ ujulunö otiwa jawa wene yöbawadöma ja̧ wene ökwödönö yötjawinobe. Jau chömöledö, isabenö do̧'wo̧ ösöwanö Diosnö dösödobö jo̧be, isabenö otiwanö ökwödönö pjaatobetjö̧, ja̧danö isabenö otiwanö ökwödönö iyakwo̧obetjö̧. Jejenö isabenö otiwanö ökwödönö pjaatobetjö̧, ángelesdöbi edö, Ayö, Diosma dakwö iteda ömöledönö pjabato̧jö, jö̧ba̧lö tjöwaisobö jö̧ba̧ladö, ökwödönö pjaati̧ma yelösöda otiwanö pjaatobetjö̧.
Jau chömöledö, la'akatjöda idöda omukwatö yötjawinokobe Dios yöawi̧ yöbawadöma, Dios O̧'wo̧ Luwo̧ jobadönö yöawawö̧da, yötjawinobe. Jau chömöledö, Dios yöawi̧da tjiwȩyudinobe, ja̧danö jobadöma Duluwo̧ yemidanö ichakwa̧ wene tjiwȩyudinobetjö̧, öwaetjöda kwöwaisaduwobö jo̧be, Duluwo̧ma isabenö yemidanö ichakwo̧ jö̧ba̧lö.
Jo̧kwaijayonö jelo̧ ökwödönö ba̧ja̧do̧ma ö̧jobe, Dios O̧'wo̧ Luwo̧, Cristo kwo̧'wo̧ luwo̧duwinö ö̧jobö iyinökwema. Ja̧danö, jo̧ba öba̧ja̧di̧ma jwiinö isabenö ji̧ yöawakwawa. Omönama jwiobe yelösöda jo̧ba Dios O̧'wo̧ Luwo̧ öba̧ja̧di̧ma. Jo̧kwaobetjö̧ jelobekwö omukwatö yöbawadö ökwödönö tjöba̧ja̧dobö jwiobe chö̧ja̧wo̧dö. Ja̧danö yötawaduwakwö, Dios O̧'wo̧ Luwo̧ öba̧ja̧di̧ma, biya̧: Cristokwö dötewinö kwi̧'yaduwo, chö̧ja̧wo̧dö.
Jobadönö a̧ja̧kwökönaduwi chösödawö̧ chömöledö, wainö ja̧bö kwö̧jaduwobö jo̧be chömöledö, baikwö yötawa: Jobadö yötjawi̧ ösödadöma omöna wene ösödadö, jo̧kwaijayonö jejenöböködöja ökwödöma. Ökwödöma omöna wene ösödöködöja, isabenö weneda ösödadöja, isabenö Diosda yöawi̧ kwösödaduwobetjö̧, ¿jö̧tö? Jo̧kwajabetjö̧ jwaikwöda Dios yöawi̧ ösödö kwujuluwaduwachibanö kwö̧jaduwo, ja̧danö Dios O̧'wo̧ Luwo̧kwö dötewanö ja̧nö, Diosnö abebö kwö̧jaduwo.
Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia. Baikwö yöawobe: Sulabetjö juluwinadönöma, 'dö̧ibaji̧ woawa baledökakobe. Ja̧danö, ökwöla tiibokola ubolanö, ba̧kwȩlö̧jatebö inia tjöbö tjuju̧kwökakwedö. Jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe ba̧kwȩlö̧jatebö jo̧, ajayinö ji̧nabi, ja̧danö, 'dö̧ibajena baibanö ö̧jakwo̧bi, ja̧danö wobajo̧ yemidanö tjebachajina jo̧ma ökwödönöma— jejenö weijatö chedökwema ötjönöma, iteda yöawi̧ wȩyudö wetobö Esmirna jojodötjö itenö ösödadönö te'ada̧lakwawa jojonö, ite'ada̧lawö̧nö̧ yöawobö.
Sanasan