Juan 14:12 - Dios Iwene

¹² Isabenö yötawa, ötjönö ösödadöma ötjö juluwinö chotidi̧danö tjotidakwedö. Yelösöda, ötjö juluwinö chotidi̧tjö o̧penönö juluwinö tjotidakwedö. Chabe'do ö̧jobekwö chi̧'yakobetjö̧, jobetjöda pjatatakwo̧sa ötjönö ösödadönöma, juluwinö tjotidobö.

Juan 14:12 Iomraidhean Croise

Mateo 21:21

Atjebökwe, Jesúsma atadinobe: —Isabenö yötawaduwakwö chömöledö, Diosma isabenö atebi̧danö ja̧akwo̧ jö̧ba̧lö Dios ujulu ösödö, waekwena jö̧ba̧lö omukwatökönö Diosnö akebaduwitjö̧ma, towi kököbachibö woobö ja̧taja̧danö ja̧köbaduwena chömöledö, jo̧kwaijayonö ja̧damaökö. Jau chömöledö, jwaikwöda Dios ujulu ösödö bi'o mösa'o, Pjolachibö ojwe okwa babibi, jö̧ba̧lö weköbaduwitjö̧ma, weköbaduwaja̧danö baibakobe.

Marcos 11:13

Jemi tupakwö edemi higos towi ji̧jetö, öjiya nöinö lö̧jowi. Öjiya nöinö lö̧jiökwe, Aaa, ida̧ökö opobiya wa̧jena, jö̧ba̧lö, 'ya̧wibö edijetö, ukwotö jö̧ba̧lö, a̧wi̧chi̧lö̧jachibökwe. Jowi jobe 'ya̧wibö edemi öjiyada lö̧jijetö, opobiya jwiinö, ina wa̧jainokobetjö̧.

Marcos 16:17

Ja̧danö, ötjönö tjo̧'wo̧ wana̧ladöma, Diosma iteda ujulu tji̧sebobö pjaatakobe. Ja̧ ujulu tji̧sebi̧ma biya̧: Ötjö chiminö jojodö tjo̧'wo̧ luwo̧nö sulabedönö a'dewö lotjakwedö, ja̧danö, ju'wedö tjiwene wajwitjijayonö yötja̧lakwedö,

Juan 14:28

Yötawaja̧, Tjo̧wi̧ chi̧'yakobe, jö̧ba̧lö, kwa̧ja̧kwaduwatö. Ja̧danö, kwa̧ja̧kwaduwatö, Yemidanö chichakwo̧sa, jö̧ba̧lö, yötawaja̧ma. Jejenö a̧ja̧kwö kwo̧'wo̧ tjo̧kekwibaduwatö. ¿Tajawedö kwo̧'wo̧ tjo̧kekwibaduwa? Ötjöma Chabe'do ö̧jobekwö chȩwa̧jakwo̧sa. Ötjönö ile nikebaduwitjö̧ma kwösödaduwena, Otiwanö ȩwa̧jakobe abe'do öjobekwö, jö̧ba̧lö. Yelösöda Chabe'doma ötjönötjö o̧penönö inesö jo̧. Ötjönö ile nikebaduwitjö̧ma kwösödaduwo jö̧ka̧laduwena chȩwa̧jakwa̧ omukwatö— yöawinobe—.

Juan 16:7

Isabenö yötawa, ökwödönö otiwanö baibakobetjö̧ chȩwa̧jocha. Chȩwa̧jökötjö̧ma Pjaatakwo̧ma ichökena. Jo̧kwaijayonö chȩwa̧jitjö̧ma jo̧bama ichobö wetena— yöawinobe Jesúsma öba̧ja̧di̧ waisachadönöma.

Juan 4:37

Ja̧danö, jojodö yötja̧li̧danö isabenö baledobe, baikwö yötja̧li̧ma: Bakwo̧ batjo juno̧. Ja̧danö, ujuninatjö pokwina, yȩi̧ wa̧ji̧ma, jelo̧ 'döbö emo̧.

Juan 5:20

Ja̧danö, Diosma ötjönö, iteda itji̧nö jwiinö ile niebobetjö̧ iteda otidi̧ma okobe jwiinö i̧sebobe ötjönöma, iteda ösödi̧ chöwaisobö. Ja̧danö, Diosma ju'wi jawabi i̧sebakobe, ötjö otiwa jawa chotidakwa̧ma. Yelösöda, kwebachö̧kö̧nö otiwanö baibanö chotidajemitjö o̧penönö mikwawi̧ jawa chotidakwo̧sa. Jejenö chotidiawö̧ ökwödöma, ¡Ayö!, jö̧ba̧lö, kwöbajaleduwi jalaka baibanö kwedaduwakwedöja— yöawinobe Jesúsma judío la'aka luwedönö.

Juan 7:33

Ja̧danö, jejenö do̧tjatobö wetjonö, Jesúsma, jojodönö yöawinobe, iteda ö̧jobekwö ichajadönö: —Ökwödökwö chö̧ji̧ma lekwokobe. Ikenama ötjönö webina ö̧jobekwö chȩwa̧jakwo̧sa.

Juan 7:39

Jejenö yöbawö Jesúsma Dios O̧'wo̧ Luwo̧nö yöawinobe, itenö ösödadö tjo̧'wo̧ luwo̧nö tebachibö öjamatakwo̧nöda. Ja̧danö, ina Dios O̧'wo̧ Luwo̧ma deinobe. Diosma, jobadö tjo̧'wo̧ luwo̧nö tebachibö öjamatobö ina weinokobe. Ina, jejenö weinokobe Diosma, Jesús kabekwachajö mölejȩbekwö ȩwa̧ji̧ ina badekwachokobetjö̧.

Hechos 10:46

Jobadöma Cornelionöbi, Cornelio ömöledönöbi, Diosnö tjösödobe ju'wedö tjiwenenö, jobadö wajwitji̧ tjiwenenö tja̧ja̧kwajobetjö̧ jejenö omukwatijadötö, Dios O̧'wo̧ Luwo̧ma tebachibö öjamatajabe jobadönöma, jö̧ba̧lö. Ikenama Pedroma jö̧ba̧lijetö:

Hechos 16:18

Ja̧danö, jobujuma ju'wi möle jwiinö jejenö jwöbeba̧liabinuju. Jejenö jwöjeba̧liökwe Pabloma jwiinö öpöjödijatö, Jo̧'wo̧ luwo̧nö sulabo̧da yöa̧la, jö̧ba̧lö. Jo̧kwaobetjö̧ Pabloma weijatö jo̧'wo̧ luwo̧nö sulabo̧nöma: —Jesucristo iminö wetakwö, bisutjö labebi— weiökwe jo̧bama juluwanö laebajijatö.

Hechos 19:12

Pablo jejenö otidiawö̧ jojodöma, jo̧ba u̧kwa kamijido̧bi emibö ȩwa̧jijadötö, ö'wöchadö wamenö tjöwanobö. Uunö ubutjawa̧laja̧do̧bi, wame jawa 'duawaja̧do̧bi emibö ȩwa̧jijadötö. Ȩwa̧jadö, ja̧do̧ tjöwanawö̧ ö'wöchadöma otiwanö babibijadötö. Ja̧danö, tjo̧'wo̧ luwo̧nö sulabedö ju̧kwadönö juna̧ladönö Pablo u̧kwa kamijido̧ tjöwanemi tjo̧'wo̧ luwo̧nö sulabedöma labekwibijadötö.

Hechos 2:33

Jo̧banöma mölejȩbe kaekwajinö ja̧bijetö Diosma, iteda öwaisobekwöchobe öbamatobö, la'aka inesö ö̧bena. Ikenama Diosma iyijetö iteda O̧'wo̧ Luwo̧nö Jesúsnöma, isabenö yöawinadanö. Jemi tupakwöma Jesúsma iyijetö Dios O̧'wo̧ Luwo̧nö ökwödönöma. Bena ju'wedö tjiwene wajwidijayonö yödawobe kwedaja̧duwabi, kwa̧ja̧kwaja̧duwabi Dios O̧'wo̧ Luwo̧, Jesús ökwödönö weajökwe ja̧aja̧— yöbawijetö Pedroma—.

Hechos 2:41

Ikenama Pedro yöawi̧ a̧ja̧kwö ba̧jekwadö ösödijadötö. Ja̧danö, ösödadöma ojwenö ubu̧datobö abebijadötö, Jesúsnö tjo̧'wo̧ tjöwana̧li̧ i̧sebö. Ja̧ mölema tres mil jenanö jojodöma Jesúsnö ösödijadötö.

Hechos 4:16

Latjebajabe okobe jobadöma yöba̧lakwawijadötö: —¿Dakwö ja̧dakwa̧jö jobadönöma? Okobe deinö Jerusalénnö ju̧kwadöma tjöwaisa jobadö juluwi̧ jawa tji̧sebinama. Jo̧kwaobetjö̧, Ja̧ baledinama baledinokobe, jö̧ba̧lö, yöda̧loböma ökwödöma jwidobe.

Hechos 4:33

Ja̧danö, Duluwo̧ Jesús yöawina yötjawobö webawedöma jwiinö juluwi̧ i̧sebö yöbawiabijadötö, Jesús yemidanö 'yaibajina wenema. Ja̧danö, Diosma otiwanö ösödö pjabatijetö okobe deinö Jesúsnö ösödadönöma.

Hechos 4:4

Ja̧danö, jobadönö ka̧lena ba̧kwaweju okwa tjödobö tje'ewaja̧ okobema, ba̧jekwadö Pedro, Juan yötjawaja̧ a̧ja̧kwajadöma Jesúsnö ösödijadötö, Jesúsma dö̧jibinö pjabato̧, jö̧ba̧lö. Ja̧danö, jobadökwö Jesúsnö ösödadöma, ömadöma, cinco mil jenanö babibijadötö.

Hechos 5:15

Ja̧danö, Jesús webawedöma, Dios ujulu i̧sebö tjotidiawö̧ jobe ju̧kwadöma ö'wöchajadönö, wa̧kwawapjonö wa̧jadönö e'ewijadötö mana ö'öbö tjödobö. Jejenö mana ö'öbö lödö omukwatijadötö, Aaa, Pedro baikwö öbaledena, jo̧ba o̧'wo̧ jawa baledenabi bidö ö'wöchadöma otiwanö batjibakobe, jö̧ba̧lö.

Hechos 6:7

Ja̧danö, Jesúsnö ösödadöma kabatökönö yöbawiabijadötö Dios iwenema. Jerusalénnö ju̧kwadöma kabatökönö ju'wedö ju'wedöbi Jesúsnö ösödijadötö, Jesúsma dö̧jibinö pjabato̧, jö̧ba̧lö. Ja̧danö, Jesúsnö ösödadö baibanö, ba̧jekwadö babibijadötö. Ba̧jekwadö Diostjö jojodötjö ö'weje pjabatadöbi Jesúsnö ösödadö Dios iwene yötjawobe a̧ja̧kwö do̧batö emijadötö Jesúsnöma.

Hechos 8:7

Felipema ba̧jekwadönö tjo̧'wo̧ luwo̧nö sulabedönöma jwötjeba̧linö a'dewö loiawö̧ ösödijadötö. Ja̧danö, ju'wedönö, ba̧jekwadönö 'wabadönöbi, kwebachöködönöbi otidijetö otiwadö batjibanö.

Hechos 9:34

Ja̧danö, Pedroma Eneasnö edö jö̧ba̧lijetö: —Eneas, Jesucristo ökwönö otiwanö bakibanö ja̧ajabe. A̧laibö kamapjo do̧lati— jö̧ba̧lijetö. Jejenö jö̧a̧lemi Eneasma omönanö otiwanö baibajökwema a̧laibijetö.

Hechos 9:40

Ikenama Pedroma okobe deinö a'dewö lobijetö a̧petube. A'dewö lobajo̧ma u̧yu̧ju̧ki̧junö bamatö Diosnö abebijetö. Ja̧danö, abebö kabatö wobajajunö edö jö̧ba̧lijetö: —Tabita, a̧laibi—jö̧ba̧lijetö. Jejenö jö̧a̧lioko jöbajale 'bobebö Pedronö edö a̧laibö bi̧jotö kamapjonö.

Romanos 15:19

Ja̧danö Dios O̧'wo̧ Luwo̧ weitjö̧, Dios O̧'wo̧ Luwo̧ ujulunö jojodö edajitjökö jawa chi̧sebijatö, Dios ujulu chi̧sebijatö, edö Diosnö tjösödo jö̧ba̧lö, Dios wei̧ jobadöbi ja̧tjo jö̧ba̧lö. Ja̧danö, jejenö yötawiawö̧, judío jojodöböködöbi Diosnö tjösödinobe, jobadöbi Dios wei̧ ja̧bö. Jau chömöledö, nöinö yöbawö kwebachiachijatö, Jerusaléntjö jamatö, Ilírico niji baibanö. Jobe okobe jwiinö Cristo jawa otiwa jawa wene yöbawiachijatö.