Juan 13:18 - Dios Iwene18 Ja̧danö, ökwödötjö okobe deinöma yötawökö. 'Da̧batö chujuninawö̧nöma chöwaisawö̧. Jo̧kwaijayonö ökwödötjö bakwo̧ ötjönö iyö loakwo̧ma. Jo̧bama benada bo̧, Dios iwene damötjö yöawinadanö badekwachakobetjö̧. Baikwö yöawobe Dios iwenema: Bakwo̧ ötjökwö kwo̧ma ötjönö iyö loakwo̧, jö̧ba̧lö, yöawobe Dios iwenema, damötjö tjiwȩyudinama. Faic an caibideil |
Juan 13:18
27 Iomraidhean Croise
Ja̧danö, ötjöma omudawö chujunijatö ökwödönöma ötjö chömöledö bakibaduwanö. Ökwödömaökö. Ötjönö omudawö juninöködöja. Ötjödasa. Ja̧danö, ökwödönö 'da̧batö chujunijatö ötjö yötawi̧ jojodönö yöbawö kwi̧'yaduwobö. Wanedö yötawa: Jojodöma ba̧jekwadö, nöinö wa̧ji̧danö, ökwödö yökawaduwi̧ a̧ja̧kwö ötjönö tjösödakobe. Ja̧ wa̧ji̧ma kököbachibö woökönö ba̧kwȩlö̧jatebö 'wa̧jakobe— wanedö yöawinobe—. Chömöledö, jejenö jojodönö yöbawö 'ya̧nö, okobe jwiinö ötjö chiminö Chabe'donö akebaduwinö jo̧bama a̧ja̧kwö pjaatakwo̧.
Ökwödöma jojodö tjomukwati̧danö, böjȩ jawada omukwatö kwö̧jaduwitjö̧ma jojodöma ökwödönö tjösödena, Bidöma ökwödödanö omukwatadö, jö̧ba̧lö. Jo̧kwaijayonö ökwödöma böjȩ ja̧wada omukwatöködöja. Jejenö, böjȩ jawada kwomukwatiaduwiököwö̧ tjöpöjödakobe. Ja̧danö, ötjöma böjȩnö ju̧kwadötjö omudawö chujuninobe ökwödönöma, böjȩ jawa omukwatökönö kwo̧'wo̧ luwo̧duwi jawada omukwatadö bakibaduwinö ja̧bö. Jejenö ja̧nö kwomukwatiaduwiawö̧ yelösöda tjöpöjödakobe ökwödönöma—yöawinobe—.
Ja̧danö, jobadöma damötjö Dios wei̧ wȩyudadö tjiwȩyudinadanöbedö. Baikwö laebobe Dios iwenetjö: Jojodöma, ötjönö tjöpöjödoböma jwiijayonö, tjöpöjödinobe, jö̧ba̧lö, tjiwȩyudinobe damötjöma. Ja̧danö ja̧ tjiwȩyudinadanö badekwachinö tjöpöjödobe ötjönöma, jö̧ba̧lö laebobe Dios iwenetjö— yöawinobe Jesúsma, Dios wei̧ wȩyudadö tjiwȩyudinama.
Ina aebinobe: —Bidö, ökwö kwiyinawö̧kwö ja̧nö ökwö kwujulunö te'ada̧liachijatö Chabe'do, tjo̧'wo̧ luwo̧nö jelobekwö tji̧'yapji, jö̧ba̧lö. Jo̧kwaijayonö bakwo̧ma jelobekwö ile'dewibijatö, ba̧kwȩlö̧jatebö usula emawakwo̧ baibanö. Jo̧banöma damötjö Dios yöawi̧ tjiwȩyudinobe. Ja̧ tjiwȩyudinama badekwachinö jo̧bama jelobekwö ile'dewibijatö— aebinobe Jesúsma Abe'donö—.
Jo̧kwaobetjö̧ idödada yötja̧linobe: —Bido̧ma dikȩ'eboko. Inawiya ikwawö dalewo bido̧ emakwo̧nö döwaiso— yötja̧linobe. Jejenö yötja̧linama, Dios iwene laebi̧danö badekwachinö yötja̧linobe. Damötjö baikwö tjiwȩyudinobe: Jobadöma ötjö chökamisi tjemobö tjiyabikwawakwedö. Ja̧danö ötjö chökamisi emakwo̧nö tjöwaisobö inawiya ikwawö tjalewakwedö, jö̧ba̧lö laebobe Dios iwenema, damötjö tjiwȩyudinama.
Ikenama yemidanö abebö a̧ja̧kwinobe, wa̧pötakwanö baibanö: —Simón, Juan itji̧ ¿jwiinö ile nikebiji̧ ötjönö?— abebö a̧ja̧kwiökwe Pedroma o̧'wo̧ tjo̧bekwibö ö̧jinobe, Jesús wa̧pötakwanö abebö a̧ja̧kwobetjö̧. Ja̧danö atadinobe: —Chuluwo̧, ökwöma okobe jwiinö waiso̧ja. Kwöwaisa. Ökwönö jwiinö ile nibebo̧sa—atadiökwe: —Jo̧kwatjö̧ma cha̧jwi̧mu o̧bȩja̧dönö kwite'ada̧lo— weinobe Jesúsma.
—Chömöledö, damötjö da'dömine Davidma, iteda o̧'wo̧ luwo̧ okwanö Dios O̧'wo̧ Luwo̧ öba̧ja̧da̧lonö yöbawö wȩyudijetö Judasnöma, Jesúsnö do̧batö tje'ewotö jö̧ba̧ladönö öbibö i̧'yakwo̧nöma. Damötjö jejenö laebijetö Dios iwenetjö, Davidmine iwȩyudinama. Ja̧ wene isabenö badekwachinobe, Judas sulabenö iyö loawa wene— yöbawijetö Pedroma—.
Dios mölejȩbe kabekwajö ȩwa̧jobö ja̧inenanö kabatö chiwȩyudijatö. Ja̧danö, ja̧ mölema, Dios Jesús kaekwajinö ja̧ina mölema, Jesúsma mölejȩbe ȩwa̧jakwa̧ abönö, webijetö iteda yöawi̧ yötjawobö weinawö̧nö, iteda 'da̧batö ujuninawö̧nöma jo̧ba ȩwa̧jabe okobetjö ja̧bö tjuju̧kwakwa̧. Ja̧danö, Jesúsma, ja̧ weinama, Dios O̧'wo̧ Luwo̧ öba̧ja̧da̧lonö webijetö jobadönö.
Jau chömöledö, Dios iwene laebi̧danö, böjȩ otidenama yȩa'woda ji̧nobe, ja̧danö jemi ikenama Diosda: Yȩa'wo okwatjö dewi̧ babibi, jö̧ba̧lö weinobe, ¿jö̧tö? Ökwödöbi ja̧danö chömöledö, ökwödöbi ajayinöma yȩa'wo okwa dö̧ji̧danö dö̧jinobe, jo̧kwaijayonö dewi̧ otido̧ Diosma iteda iwenenötjö domajadenö idejatinobe chömöledö, Dios salöinö ujulu, Jesucristo öbatjö dejati̧ ujulu döwaisakobetjö̧. Ja̧danö jejenö i̧sebinobetjö̧, ja̧ weneda yöbawö dö̧jobe. Jau chömöledö, yödawi̧ma ökwödö jawama yödawokobe, Cristo jawada yödawobe, jo̧banö a̧ja̧kwö ökwödöbi ju'wedöbi kwö̧jibaduwobö. Ja̧danö chömöledö, luwedösa jö̧ba̧lö yödawokobe, kwömöayedödanöbedösa jö̧ba̧lö yödawobe, ökwödönö pjadatotö jö̧ba̧lö yödawobetjö̧. Jau chömöledö, yöbawö dö̧ji̧ma, ökwödö demo jö̧ba̧löma yöbawöködösa, ökwödönö pjadatotö jö̧ba̧lö yöbawadösa, ja̧danö jejenö omukwatö yödawobetjö̧, nöinö usula demawijayonö kadatibokobe. Jau chömöledö, salöi̧ wene otiwa jawa wenema isabenö jojodö tja̧ja̧kwobö mikwawi̧ wene, ja̧danö jejenö döwaisobetjö̧, kabatibökönö jwaikwöda yöbawö dö̧jobe.
Chömöledö ¿Diosma okobe jwiinö edokobeji̧? Edo̧. Ja̧danö ¿okobe jwiinö baledi̧ma wajwiobeji̧? Waiso̧, chömöledö. Jo̧kwaobetjö̧ Diosma isabenö okobe jwiinö domukwati̧ma waiso̧. Ja̧danö, domukwati̧ma jo̧banö i̧sekwi̧danö i̧sekwobe. Ökwödö domukwati̧ ja'yubebi dötabada̧loböma jwiobe chömöledö. Ja̧danö chömöledö, ju'wi möle, Dios öba a'o ja̧nö, ökwödöma datadakobe okobe jwiinö ja̧bö dö̧ji̧, do̧'wo̧ luwo̧tjö laebi̧ ja̧bö dö̧ji̧ma. Isabenö ökwödöma Dios wei̧ da̧ja̧kwinököbi, da̧ja̧kwinabi datadakwedösa. Isabenö chömöledö Dios wei̧, Jesúsnötjö yöawi̧ma a̧ja̧kwö dö̧jobö jo̧be.
Ja̧danö, jobuju jömöayedönö, jobuju yöjawi̧ ösödadönöma omönanö ö'wö batjibanö wetakwo̧sa. Ötjöma jobadö tjo̧'wo̧ luwo̧ okwanö tjomukwati̧bi waiso̧sa. Ja̧danö, jobadö ö'wö batjibiawö̧ okobe deinö ötjönö ösödadöma, okobe jwiinö tjö̧baji̧tenia, jweinö tjöwaisachibakobe ötjönöma. Ötjönö jweinö tjöwaisachibakobe, ¡Ayö! Jesúsma jojodö tjo̧'wo̧ luwo̧ okwanö tjomukwati̧bi okobe jwiinö waiso̧, jö̧ba̧lö. Ja̧danö, tjöwaisachibakobe lȩtebakwa̧ma jweinö omukwatö lȩtebakwo̧sa, jojodö bakwo̧nökwena ja̧tjaja̧ mikwama. Jau, jojodö ja̧tji̧ mikwama lȩtebocha, sulabenö omukwatö ja̧badönöma.
Sanasan