Juan 10:28 - Dios Iwene

²⁸ Jobadönö ba̧kwȩlö̧jatebö ja̧kwawa chiyawö̧. Ja̧danö, tjö'wöchökakwedö, ötjö ba̧kwȩlö̧jatebö ja̧kwawa chiyawö̧ma. Ja̧danö, otiwanö chite'ada̧lobetjö̧ bakwo̧bi deobe jobadönö ötjötjö 'döbebö emibo̧ma.

Juan 10:28 Iomraidhean Croise

Diosnö ösödo̧ Job mikwo̧ usula emawina jawa 17:9

–Dios ösödi̧danö ja̧badösa, –jö̧ba̧ladöma jwaikwöda idöda tjomukwati̧danö tjö̧jakwedö, ja̧danö, –Otiwanö ja̧badösa, –jö̧ba̧ladöma ajayitjö bajalekwönönö, –Jweinö omukwatadösa, –jö̧ba̧lö tjomukwatakwedö.

Proverbios 24:16

Ja̧danö chitji̧, yötawakwö: Ökwöma otiwanö omukwatadö tjö̧ji̧danö kwö̧jo. Wanedö yötawakwö: Otiwanö omukwatadöma yemidanö yemidanöbi, jelemutjö dötölatajanö metjijayonö ba̧kwȩlö̧jatebö tja̧laiba̧lakwedö. Ja̧ jö̧ba̧löma, labi jawa jobadönö baledijayonö katjatibökakobe, jwaikwöda tji̧'yakwedö, wanekwachobe. Jobekwö baledokobe sulabenö ja̧badö metjena. Sulabenö ja̧badöma metjena yemidanöma ala̧iböködö, tjujulu jwitjobetjö̧. Ja̧ jö̧ba̧löma, labi̧ jawa sulabenö ja̧badönö baledena juluwanö söbekwö lotjakwedö jö̧ba̧lö wanekwachobe.

Proverbios 4:18

Jobekwömaökö Dios wei̧ a̧ja̧kwadö tjö̧ji̧ma. Dios wei̧ a̧ja̧kwadöma sulabenö omukwatadö tjö̧ji̧danö jö̧kö̧dö. Wanedö yötawakwö chitji̧: Dewachenama, i̧ya̧nö deapjo dewachobe tjo̧'o̧manö, ja̧wo̧ laebaja̧ tupakwö jwiinö dewobe jweinö öjenanö. Jobekwö Dios wei̧ a̧ja̧kwadö kwetjachamanö dewinö dejatobe, ajayinö dejatemitjö̧ tupakwö jwiinö dewinö dejatobe, otiwanö edö, salöamanöda tji̧'yobö.

Isaías 27:3

—Ötjö Isabenö Jo̧ma, chöbatjo teada̧lo̧sa. Teada̧lönö, ba̧kwelöjatebo otiwanö ojwiyo sa̧sa̧bö otido̧sa, ja̧danö teada̧lönö tjöbeba̧lö jo̧sa, bakwo̧bi chöbatjo suli̧ öwaedapji jö̧ba̧lö. Yötebi, mölebi otiwanö teada̧lö jo̧sa,

Isaías 45:17

Jobekwö baledököwö̧ ökwö Diosnö ösödadönö. Ju'wedö tabakwö tjö̧jonö, ökwödö israel jojodönö dö̧jibinö pjabato̧ Diosma, 'dö̧ibajökö ji̧ ji̧kwawa baibanö dö̧jibinö pjabato̧. Ja̧danö jobekwö dö̧jibinö pjaatobetjö̧, la'akatjöda 'dö̧bibajökönö tabakwö dö̧jökakwedösa, la'akatjöda taba lö̧jawö̧ badibökakwedösa.

Isaías 54:17

Ja̧danö, ötjö jobadönö otidinada ökwönö tjöbeba̧lo pjatatobetjö̧, okobe jwiinö ölakwabikwawa jawa tjotidi̧teniama, kwöba a'otjö suli̧ waekwakobe, ju'wi jawabi ökwönö suli̧ waedobö jwiakobe. Ja̧danö lȩekwa luwedö tjöba a'otjö, ju'wedö ökwönö wanedö yötja̧litjö̧ma, okobe deinö jobekwö wanedö yöba̧ladö yötja̧li̧ otiwanö i̧sȩbö kwatadakwujuja, —Omöna, lȩekwa yötjawobö jwia, —jö̧ba̧lö. Jobekwö pjabato̧sa ötjöda chömöayedönö Jerusalen, ja̧danö wene jwibadö tjö̧ji̧ i̧sȩkwama, ötjö tjuluwo̧ Isabenö Jo̧ Diostjö ichi̧, jö̧ba̧lö wanedö yöa̧lobe Diosma, Jerusalen comunidad jojodönö.

Isaías 55:3

Teada̧lönö a̧ja̧kwalö, chöjobekwö kwichaduwo chömöledö. Otiwanö kwa̧ja̧kwaduwo, tupakwö 'yaka̧laduwakobetjö̧. Jau, ötjönö kwa̧ja̧kwaduwitjö̧ma, ökwödökwö bakobe dösölö̧jinö dö̧jakwa̧ jawa yöbawö chujunocha, 'dö̧ibajökö ji̧ yöbawö junawama. Jau, damötjö Davidnö yöbawö chujunijatö, jwaikwöda 'dö̧bibajökönö jo̧banö ösödö chö̧jakwa̧ma, ja̧danö ökwödönöbi Davidnö yöbawö chujuninadanö yöbawö chujunena.

Marcos 13:22

Ba̧jekwadö, Ötjödasa jojodö tjö̧jibinö pjabatö Dios weajökwesa, jö̧ba̧lö, yöba̧ladöbi, ja̧danö, Ötjödasa Dios yöawi̧ yöbawo̧sa, jö̧ba̧lö, yöba̧ladöbi tjichakobe. Jobadö omöna yöbawö tjichonöbi kwa̧ja̧kwaduwoko. Jobadöma tjo̧'wo̧ sulinö omukwatö jojodö edajitjökö jawa i̧seböbi, juluwi̧ jawa i̧seböbi tji̧sebakobe jojodö tjösödo jö̧ba̧lö. Ja̧danö, jejenö tji̧sebakobe Dios i̧tji̧mu baibanö 'da̧batö ujuninawö̧bi tjösödo jö̧ba̧lö. Jejenö tji̧sebijayonö waekwakobe, Dios i̧tji̧muma tjösödökakobe omöna yöba̧ladönöma.

Lucas 23:46

ja̧danö Jesúsma labinö jwöbeba̧lö jö̧a̧linobe: —Chabe'do, cho̧'wo̧ luwo̧nö chiyakwö, ötjönö kwite'ada̧lobö— jö̧ba̧lö jwöeba̧linobe. Ja̧danö, jejenö jwöbeba̧lajo̧ juluwanö ö'wö baibinobe.

Juan 10:29

Ötjö Chabe'do iyijatö jobadönö ötjönöma. Jo̧bama böjȩnö ju̧kwadötjöbi, mölejȩbe ju̧kwadötjöbi o̧penönö juluwo̧. Jo̧kwaobetjö̧ bakwo̧bi deobe jobadönö Chabe'dotjö 'döbebö emibo̧ma.

Juan 11:25

—Marta ötjödasa wobinadö yemidanö tjetjachinö ja̧bo̧ma. Ötjödasa ji̧bakwawa iyo̧ma. Ötjönö o̧'wo̧ wana̧lo̧ma woaja̧ ikenabi yemidanö ö̧jakwo̧.

Juan 14:19

Babema lekwokobe ötjö wotakwa̧ma. Wotaja̧ okobema ötjönö öpöjödadöma ötjönö yemidanö tjedökakwedö. Jo̧kwaijayonö ökwödöma ötjönö yemidanö kwedaduwakwedöja. Ja̧danö, ötjöma wobajaletjö tjetachajakobetjö̧ ökwödöbi wobajaletjöma tjekachajaduwakwedöja, ba̧kwȩlö̧jatebö kwö̧jaduwobö.

Juan 17:2

Chabe'do, ökwöma chujulu iyö böjȩ jojodönö webo̧ batibanö pjakatinobetjö̧, jejenö ateba, ötjö jwiinö chotiwi̧ma kwi̧sebo, jö̧ba̧lö. Chabe'do, ökwöma chujulu iyö pjakatobetjö̧ böjȩ jojodötjö kwiyinawö̧nö tjö̧jibinö pjatatobö jo̧be, ba̧kwȩlö̧jatebö ja̧kwawa tjujuna̧lobö.

Juan 18:9

Jejenö jö̧ba̧lö iteda ajayinö yöawina badekwachinö jö̧a̧linobe. Ajayinö aebinobe Abe'do Diosnö, Bidö, ökwö kwiyinawö̧nö chite'ada̧lobe Chabe'do tjo̧'wo̧ luwo̧nö jelobekwö tji̧'yapji jö̧ba̧lö.

Juan 3:36

Bakwo̧, Dios Itji̧nö ösödo̧ma ba̧kwȩlö̧jatebö ja̧kwawa juna̧lo̧. Ja̧danö, Dios Itji̧nö öpöjödö, jo̧ba wei̧ a̧ja̧kwö̧kö̧ma jwibo̧, ba̧kwȩlö̧jatebö ja̧kwawama. Jo̧bama Dios lȩebakwo̧— jejenö yöawinobe Juan Ojwenö Bu̧dato̧ma ömöayedönö.

Juan 4:14

Jo̧kwaijayonö ötjö chiyobu owo̧ma yemidanöma ojwiyo owoböma o̧ti̧lö̧jökökwe, jo̧ba o̧'wo̧ luwo̧ okwanö ojwese'dodanö okwobetjö̧, ba̧kwȩlö̧jatebö ja̧kwawa okwe'dodanö— yöawinobe Jesúsma.

Juan 5:24

Ina yöawinobe Jesúsma judío la'aka luwedönö: —Isabenö yötawa, ötjö yötawi̧ a̧ja̧kwadö, ötjönö webinanö ösödadöma, ba̧kwȩlö̧jatebö ja̧kwawa tjujuna̧lakwedö. Jobadöma lȩtebökakwawö̧. Wobajaletjö tjö̧jibanö babibö, ba̧kwȩlö̧jatebö tjuju̧kwakwedö— yöawinobe—.

Juan 6:27

A̧ja̧kwaduwitjö, wanedö yötawi̧ma: Ökwödöma 'dö̧ibaji̧ kwakwawada kwukwaduwobö omukwatö kwö̧jaduwobe. Jo̧kwaijayonö yötawaduwakwö. 'Dö̧ibajökö jawa kwakwawa kwujuna̧laduwobö omukwatö kwö̧jaduwo. Ja̧ 'dö̧ibajökö kwakwawama ba̧kwȩlö̧jatebö ja̧kwawa iyi̧ kwakwawa. Ja̧ kwakwawa iyo̧ma ötjöda, jojo baibanö jeminökweda. Jau, ötjödasa ba̧kwȩlö̧jatebö ja̧kwawa iyo̧ma, Chabe'do Dios jejenö chiyobö ösödö ötjönö weinobetjö̧— yöawinobe Jesúsma jobadönöma.

Juan 6:37

Ja̧danö, yötawaduwakwö. Chabe'do Dios ötjönö iyawö̧ jojodöma ötjökwö tjichibakwedö. Ja̧danö, ötjökwö ichibo̧nöma a'dewakwawö̧kö̧sa.

Juan 6:47

Isabenö yötawa. Ötjönö ösödadö, Bitema Dios weinökwe, jö̧ba̧lö, ösödadöma ba̧kwȩlö̧jatebö ja̧kwawa tjujuna̧lakwedö.

Juan 6:68

—Chuluwo̧ kadatibokobe. ¿Ti yöawi̧ da̧ja̧kwobö di̧'yobö? Ökwöda ba̧kwȩlö̧jatebö ja̧kwawa wene yöbawo̧ma.

Hechos 7:59

Tjikwawökwe Estebanma Uluwo̧nö jwöbijetö, Chuluwo̧ Jesús, cho̧'wo̧ luwo̧nö emi, jö̧ba̧lö.

Romanos 5:17

Isabenö bakwo̧ sulabenö ja̧inobetjö̧, woawa jamatinobe. Ja̧danö, jo̧ba sulabenö ja̧inama jwiinö juluwinobe ichejekwa, ba̧jekwadö wotjawinö ja̧bö. Jo̧kwaijayonö, jelo̧ Jesucristo ja̧inama, jemi bajalekwönönö juluwi̧ ji̧. Jau chömöledö, Jesús midawö woinobetjö̧, mikwa jwiinö otiwa jawa iyö, Diosma ba̧jekwadönö jö̧ba̧lo̧, Chedemi bidöma suli̧ jwibadö, jö̧ba̧lö. Ja̧danö bakwo̧, Jesucristoda midawö woinobetjö̧, ba̧jekwadöma ji̧badö, ja̧danö ba̧kwȩlöjateböda tjö̧ja̧kwedö.

Romanos 5:2

Ja̧danö, ju'wibi chömöledö. Jesúsda dö̧jibinö pjabato̧, jö̧ba̧lö dösödiökwe, Diosma mikwa jwiinö otiwa jawa iyinobe ökwödönöma. Ja̧danö, do̧'wo̧ ösöwanö dö̧jobe, isabenö Dios dewinö idejatena duju̧kwakwedösa jö̧ba̧lö. Ja̧bi Cristoda ja̧ina chömöledö.

Romanos 5:21

Jau chömöledö, jojodö sulabenö ja̧tji̧ma isabenö juluwinobe, jojodö wotjawinö ja̧bö. Ja̧danö Dios mikwa jwiinö otiwa jawa iyi̧bi juluwi̧, jojodö ba̧kwȩlö̧jatebö tjö̧jakwedö batjibanö ja̧bö. Jau chömöledö, Duluwo̧ Jesucristoda midawö woinobetjö̧, Diosma, ökwödönö mikwa jwiinö otiwa jawa iyö, Chedemi bidöma suli̧ jwibadö, jö̧ba̧lö, ba̧kwȩlö̧jatebö ja̧kwawa iyobe ökwödönöma.

Romanos 5:9

Jau, Cristoma midawö woinobe, iteda ökwösobu ebawinö. Jejenö ja̧inobe, Diosma ökwödönö yöawakobetjö̧, Chedemi bidöma suli̧ jwibadö, jö̧ba̧lö. Jejenö pjaatotö jö̧ba̧lö midawö woinobe. Ja̧danö ¿dakwö kwomukwataduwa? ¿Ökwödönö, jo̧banö ösödadönö babema öpöjödenaji̧ Jesúsma? Dios lȩebakwa̧ möle badekwachenama ökwödönö öpöjödö, Bidönö lȩkebo, jö̧ba̧lö, ¿weakwa̧ji̧?

Romanos 6:23

Jau chömöledö, sulabenö ja̧di̧ mikwawi̧ma wobaleda. Jo̧kwaijayonö, Dios mikwa jwiinö otiwa jawa iyi̧ mikwawi̧ma ja̧kwawa jawada chömöledö. Dios mikwa jwiinö otiwa jawa iyi̧ mikwawi̧ma, ba̧kwȩlö̧jatebö ja̧kwawa Duluwo̧ Cristo Jesúskwö chömöledö.

Romanos 8:1

Ja̧danö chömöledö, babema Cristo Jesúskwö a̧jö dö̧jobetjö̧ bakwo̧bi deobe ökwödönö yöba̧lo̧ma, Bidöma sulabedö, Dios lȩebakwawö̧, jö̧ba̧lö.

Romanos 8:29

Jau chömöledö, Diosma la'akatjöda öwaisinobe jo̧banö tjösödakwedönöma, iteda ömöledö batjibakwedönöma. Ja̧danö, jejenö waisö, jobadönö 'da̧batö ujuninobe, iteda itji̧ Jesúsdanö ichejekwadö batjibo jö̧ba̧lö. Ja̧danö, weinobe, Jesúsda iteda i̧tji̧mutjö abönö pöe baibobö, ökwödö döpöe baibobö chömöledö.

Deuteronomio 33:3

—Isabenö iteda ömöledönö ösödo̧ Isabenö Jo̧ma, ja̧danö iteda ömöledö batjibanö 'da̧batö ujuninawö̧ israel jojodönö tjöbeba̧lö pjabato̧. Jejenö pjaatiawö̧, jo̧ba öba a'otjö bȩbachibö tjösödobe israel jojodöma, ja̧danö jobadönö wei̧ a̧ja̧kwö tjö̧jobe.

Filipenses 1:6

Jau chömöledö, Diosda ökwödönö otiwa jawa kwo̧'wo̧ luwo̧duwi jawa jamatö otidinama, ¿jö̧tö? Ja̧danö chöwaisa, jamatö otidina jawama, Diosma okobe jwiinö otidö kaatakobe jö̧ba̧lö. Ja̧danö, Jesucristo yemidanö ichakwa̧ möle baibenama ja̧ okobe jwiinö kwo̧'wo̧ luwo̧duwinö otidi̧ma kaatakwawakobe chömöledö.

2 Tesalonicenses 2:13

Chömöledö kabatökönö Diosnö ösödö adebobö jo̧be, ökwödönö pjaatinobetjö̧. Jau chömöledö, ökwödöma Duluwo̧ ile niebawö̧ja, ja̧danö Diosma la'akatjöda ökwödönö omudawö ujuninobe, kwö̧jibaduwobö. Ja̧danö, Dios O̧'wo̧ Luwo̧ ujulunö ökwödönö 'da̧batö ujuninobe, iteda ömöledö bakibaduwanö, isabenö wene kwösödaduwobetjö̧.

1 Timoteo 1:16

Jo̧kwaijayonö Diosma lȩlö̧jinö edinobe ötjönöma. Jau, Cristo Jesús kabatökönö o̧'wo̧ 'dibachibö lȩlö̧jinö edi̧ma öwaetjöda öwawo jö̧ba̧lö, Diosma ötjönö, sulabedötjö o̧penönö sulabenö ja̧binanö lȩlö̧jinö edinobe. Ja̧danö, o̧'wo̧ 'dibachibö lȩlö̧jinö edinobe ötjönöma, ju'wedöma edö tjöwaisachibobö, Aaa, Cristo Jesúsma isabenö kabatökönö o̧'wo̧ 'dibachibö sulabenö ja̧badönö lȩlö̧jinö edo̧, jö̧ba̧lö. Ja̧danö jobadöbi ösödö ba̧kwȩlö̧jatebö ja̧kwawa juna̧ladö batjibakobetjö̧, ötjönö lȩlö̧jinö edinobe Duluwo̧ma.

2 Timoteo 1:12

Ja̧danö, jejenö ötjönö 'dabatö ujuninobetjö̧, babema ka̧lena chö̧bobe Timoteo. Jo̧kwaijayonö, ka̧lena chö̧bijayonö, ja̧ wenetjö chötabakwökö, cho̧'wo̧ chöwana̧lökwenö chöwaisobetjö̧. Jau Timoteo, cho̧'wo̧ chöwana̧lökwenö chöwaisa, Isabenö juluwo̧ cho̧'wo̧ luwo̧nö ite'ada̧lobö, jö̧ba̧lö, yemidanö ichakwa̧ möle baibenanö kabatö.

Hebreos 7:25

Jo̧kwaobetjö̧ Jesúsda jojodö Dioskwö ichibö tjö̧jibinö pjabato̧, Jesúsma dö̧jibinö pjabato̧, jö̧ba̧ladönöma. Ja̧danö, jobadö tjö̧ji̧bi okobe jwiinö pjaatinobe Jesúsma, ja'yubebi ji̧bökönö. Ja̧danö, Jesúsma jo̧banö ösödadönöma ba̧kwȩlö̧jatebö tjö̧jibinö pjabato̧, Jesúsma ba̧kwȩlö̧jatebö Diosnö abebö jobadönö pjaatobö ö̧jobetjö̧.

1 Pedro 1:5

Jau chömöledö, Dios yöawi̧ kwösödaduwiökwe, Diosma ökwödönö tjöbeba̧lönö ite'ada̧lobe, ja̧danö jejenö ite'ada̧lakwo̧, 'dö̧ibaji̧ möle kwö̧jibinaduwa wene i̧sebenanö kabatö. Jau chömöledö, ja̧ möle baibenama, ökwödö iteda i̧tji̧munö otiwa jawa iyakobe, ja̧danö jejenö iyö, kwö̧jibinaduwa wene öwaetjöda i̧sebakobe.

1 Juan 2:19

Ja̧danö, jobadö Cristo öpöjojodöma ajayi ökwödökwö ba̧nö Dios iwene a̧ja̧kwiabinadö. Jo̧kwaijayonö ökwödö Cristonö domukwati̧danö bakwainö omukwatöködö. Ja̧danö, jelobekwö tjomukwatobetjö̧ ökwödötjö 'da̧bachibö labebö kwebachadö. Chö̧ja̧wo̧dö ökwödödanö bakwainö Cristonö ösödö tjomukwatitjö̧ma ina ökwödökwö tjö̧jena. Jo̧kwaijayonö dö̧jelöma latjebinobetjö̧ döwaisachibijatö, Aaa, jobadöma isabenö ökwödödanö omukwatöködö Jesucristonöma, jö̧ba̧lö. Jesucristotjöma dö̧ja̧wo̧döböködö, jö̧ba̧lö, döwaisachibijatö.

1 Juan 2:25

Ja̧danö jejenö, böjȩnö ja̧nö Dioskwö dötewinö di̧'yi̧ma di̧sekwobe, Dioskwö ba̧kwȩlö̧jatebö ja̧dösa, jö̧ba̧lö. Chö̧ja̧wo̧dö, jejenö Diosma ökwödönö yöbawö ujuninobe, Ötjökwö ba̧kwȩlö̧jatebö kwö̧jaduwakobe, jö̧ba̧lö. Ja̧danö böjȩnö ja̧nö, Dioskwö dötewinö di̧'yi̧ma ja̧ Dios yöbawö ujunina i̧sekwö dö̧jobe, Ökwödöma isabenö Dioskwö ba̧kwȩlö̧jatebö ja̧dösa, jö̧ba̧lö.

1 Juan 5:11

Ja̧danö chö̧ja̧wo̧dö, Dios ökwödönö yöawinama baikwö laebobe: Ötjö chitji̧nö ösödadöma, Diosma Itji̧nö weinobe jojodö tjö̧jibinö pjaatobö, jö̧ba̧lö, tjo̧'wo̧ luwo̧nö ba̧kwȩlö̧jatebö tjuju̧kwakwedö. Jo̧kwaijayonö Chitji̧nö öpöjödadöma ba̧kwȩlö̧jatebö tjuju̧kwökakwedö. Chö̧ja̧wo̧dö, Diosma jweinöda yöbawo̧obetjö̧ jo̧ba yöawina, iteda Itji̧nö yöawinama dösödaduwo, Jweinö yöawinobe, jö̧ba̧lö.

Judas 1:1

Ötjö böja wȩyudö webo̧ma, Judassa, Jesucristo ömöayo̧sa, ja̧danö ju'wibi Jacobo öjawo̧sa. Ja̧danö, böjanö wȩyudö wetawö̧ma bidö, Dios jwöinawö̧nö, ju'wibi Dabe'do Dios ösödawö̧nö, ju'wibi Jesucristo tjöbeba̧lö ite'ada̧lawö̧nö.

Judas 1:21

Dabe'do Diosma isabenö otiwanö ile niebobe ökwödönö chömöledö, ¿jö̧tö? Ba̧kwȩlö̧jatebö ja̧ Dios ökwödönö ile niebi̧ wene omukwatö kwö̧jaduwo. Ja̧danö, ju'wibi te'ada̧lö kwö̧jaduwo, Duluwo̧ Jesucristoma isabenö lȩlö̧jinö edö ba̧kwȩlö̧jatebö ja̧kwawa iyakwo̧ jö̧ba̧lö.

Judas 1:24

Okobe deinö Diosnö dösödaduwo chömöledö, jo̧bada meköbaduwapji jö̧ba̧lö pjabato̧ma, ja̧danö jo̧bada iteda inesö dewinö salöinö öba a'o wene jwiinö kwö̧jaduwobö pjabato̧ma, kwo̧'wo̧duwi jwiinö ösödachibanö.

1 Samuel 2:9

Isabenö Jo̧ma isabenö tjöeba̧lakwo̧ jo̧banö tjo̧'wo wana̧ladönöma, jo̧kwaijayonö sulabedönö yȩa'wo okwa debö tji̧'yobö weakwo̧. Jau, isabenö idöda tjujulunö tjujuluwökakwedö bö̧jȩ jojodöma, Isabenö Jo̧da ujuluwakwo̧ma.