Juan 10:15 - Dios Iwene

¹⁵ Jejenö ötjökwö, Chabe'dokwö jo̧be. Ötjö Chabe'doma ötjönö öwaisobe, ja̧danö, ötjöma Chabe'donö chöwaisobe. Ja̧danö, ötjöma cha̧jwi̧mu o̧bȩja̧dö tjö̧jibinö ö'wöchö midawö lotakwo̧sa.

Juan 10:15 Iomraidhean Croise

Isaías 53:10

yayonö inia tjöinö, jo̧banö lȩebobö ösödinobe Isabenö Jo̧ma, jwiinö o̧'wo tjo̧bekwo̧ baibanö. Dios ömöayo̧ma tjusula söbebö loawa iyawa baibanö iyawakwo̧, ja̧danö jobekwö iyawenama, Isabenö Jo̧ jo̧banötjö̧ otidobö omukwatö ujuninama badekwachakobe. Jemi ikenama iteda itji̧mu tupadanö jojodönö edakwo̧, ja̧danö lekwe möle otiwanö öjakwo̧.

Isaías 53:8

Jo̧banö do̧batajadö, lȩekwa sulabenö yötjawinobe, ja̧danö jelobekwö ötjibinökwe. Ja̧danö, —Bitema itji̧mu tupadanö jojodö deakwo̧, —jö̧ba̧lö jo̧banö kwabö lotjinobe, Dios ömöayo̧nö. Jau, dömöledöda Dios wei̧ tja̧ja̧kwokobetjö̧, inia tjöinö ja̧tji̧nökwe, ja̧danö 'yaba̧ladö tjö̧jelö debi baibanö, kwabö lotjinökwe.

Daniel 9:26

Ja̧danö, ja̧ cuatrociento treinta y cuatro o̧biya baledibajenama, Dios weakwo̧ jö̧a̧linökwenö kwabö lotjakobe, sulabenö ja̧ököjayonö kwabö lotjakobe. Ja̧danö, jemi ikenama tupakwö ichakwo̧ sulabo̧ la'aka luwo̧ ömöledöma ichö Jerusalén comunidad söbebö lotjakobe, ja̧danö Dios ejubi söbebö lotjakobe. Ja̧ baledakwa̧ma, ojwe okwatö okobe jwiinö söbebö loi̧danö baledakobe, jwiinö Jerusalén comunidadbi, Dios ejubi söbebö lotjakobe. Dios omukwatö ujuninadanö, ja̧ cuatrociento treinta y cuatro o̧biya baledaja̧ ikena, kwakwabakwadö tjichakobe, ja̧danö kwakwabakwawö tjö̧jakobe, Jerusalénma jojodö deobe baibenanö kabatö.

Mateo 11:27

Jojodönö yöawinobe Jesúsma: —Chömöledö, chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö waisadöma, sule ötjö Dios itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe.

Mateo 20:28

ötjö jojo baibanö jeminökwe ju'wedönö pjabatö chö̧ji̧danö. Jau chömöledö, ju'wedö ötjönö pjatjato jö̧ba̧löma ichinö̧kö̧sa. Ötjöda jojodönö pjabatö ichinasa, ja̧danö ba̧jekwadö tjö̧jibo jö̧ba̧lö midawö wotobö ichinasa— jö̧ba̧lö yöawinobe Jesúsma.

Lucas 10:21

Jejenö yöa̧linobe Jesúsma setentabedönö. Jemi ikenama, Dios O̧'wo̧ Luwo̧ iteda o̧'wo̧ luwo̧nö ja̧nö, Jesúsma o̧'wo̧ ösöwanö aebinobe Abe'do Diosnö: —Chabe'do, mölejȩbe ju̧kwadöbi, böjȩnö ju̧kwadöbi tjuluwo̧ja. Chabe'do, otiwanö biya̧ isabenö wene jawa kwotoja̧lajabe, waisadöbi, nöinö waisachadöbi tjedapji jö̧ba̧lö, jo̧kwaijayonö jobadö wajwitjijayonö, waisachöködönö otiwanö kwi̧sebajabe, ja̧danö jejenö kwi̧sebobetjö̧, otiwanö i̧sebo̧ja jö̧ba̧lö yötawakwö, Chabe'do. Jau Chabe'do, ökwöda kwösödi̧danö ja̧bö jejenö i̧sebo̧ja— jö̧ba̧lö Diosnö aebinobe Jesúsma.

Lucas 10:22

Ikenama Jesúsma yöawinobe: —Chömöledö, Chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö isabenö waiso̧ma sule ötjö Dios Itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe Jesúsma.

Juan 1:18

Ja̧danö, bakwo̧bi deobe, Diosnö edo̧ma, damötjöbi babebi. Jo̧kwaijayonö Dios iteakwo̧ itji̧ma Diosnö edo̧. Ja̧danö, jo̧ba, Dabe'do Dios ile niebökwema, ökwödönö Diosnö döwaisachibanö öba̧ja̧dinobe.

Juan 10:11

Ina yöawinobe: —Ötjödasa, o̧bȩja̧dönö otiwanö te'ada̧lo̧ma. Ja̧danö chöpöjojodö tjichitjö̧bi kabatibö̧kö̧sa chite'ada̧lawö̧nöma, chöpöjojodö ötjönö kwabö lotjenatjö̧bi. Te'ada̧lo̧sa, kwabö lotjenatjö̧bi.

Juan 15:13

Ja̧danö, bakwo̧ ömöledönö ile niebi̧ i̧sebi̧ma, ju'witjö o̧penönö ile niebi̧ i̧sebi̧ma biya̧: Bakwo̧, ömöledö tjö̧jibobö iyawö, jobadö tjö'wöchökönö itedada ö'wöcho̧. Jejenö iyawö bakwo̧ma ju'witjö o̧penönö jwiinö ile niebi̧ma i̧sebobe— Jesúsma yöawinobe öba̧ja̧di̧ waisachadönöma.

Juan 17:25

Jweinöda Omukwato̧ Chabe'do, sule bö̧jȩda jojodöma ökwönö wajwibadö. Jo̧kwaijayonö ötjöma chöwaisa ökwönöma. Ja̧danö, böjȩ jojodöma wajwitjijayonö, bidö, chöba̧ja̧di̧ waisachadöma tjöwaisobe, Diosma Jesúsnö weinobe, jö̧ba̧lö.

Juan 6:46

Jejenö yötawena, Dabe'do Dios iwene a̧ja̧kwö waisachibadö, jö̧ba̧lö, yötawenama, Dabe'do Diosnö tjedinobe, jö̧ba̧löma, yöta̧lökö. Dabe'do Diosnö edo̧ma bakwo̧da, ötjödasa, Dios weinökweda.

Juan 8:55

Ökwödöma, Dabe'do Diosnö dösöda, jö̧ba̧lö, yöka̧laduwijayonö wajwiköbaduwobe jo̧banöma. Jo̧kwaijayonö ötjöma isabenö waiso̧sa Dabe'do Diosnö, ötjö Chabe'donöma. Yöta̧lökö, Dabe'do Diosnö ötjöma wajwitökwe, jö̧ba̧lö. Jejenö yöta̧litjö̧ma omönada yöta̧lena, ökwödö omöna yöka̧laduwi̧danö. Jejenöma yöta̧lokobe. Jo̧banö, ötjö Chabe'donö chöwaisökwe. Ja̧danö, jo̧ba yöawi̧ a̧ja̧kwo̧sa.

Gálatas 1:4

Böjȩ sulaböjȩtjö dö̧jibobö, jo̧ba Jesucristoma ökwödö dusula midawö woinobe, Dabe'do Dios ajayitjöda omukwatö ujuninadanö.

Gálatas 3:13

Ja̧danö, Dios weina Moisés iwȩyudinatjö Dios lȩebi̧ma demo jö̧da̧linobe chömöledö, okobe jwiinö laebi̧danö ja̧dokobetjö̧. Jo̧kwaijayonö ökwödö Dios lȩebi̧tjö demo jö̧da̧linama, Cristonöda baibinobe. Dios lȩebi̧ma Cristonö baibinobe Dios iwene laebi̧danö. Baikwö laebobe Dios iwenema: Okobe deinö towinö la̧dönöma, Dios lȩebawö̧, jö̧ba̧lö laebobe.

Efesios 5:2

Cristoma ökwödönö ile niebobetjö̧ dumusidi̧ midawö ö'wöchijetö, dö̧jibinö pjabatö. Jejenö pjabatö, Diosnö söinö nöekwi̧ jawa juwö tjiyinadanö Cristoma midawö iyijetö Diosnöma. Ja̧danö chömöledö, Cristo ökwödönö ile niebi̧danö ökwödöbi kwömöledöduwinö ile nibebö ja̧duwi.

Tito 2:14

Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

1 Pedro 2:24

Jau chömöledö, Cristoma isabenö ökwödönö pjabatö usula emawinobe. Ökwödö sulabenö ja̧dobetjö̧ Dios lȩebi̧tjö demo jö̧da̧linobe chömöledö, jo̧kwaijayonö ökwödö demawo jö̧da̧linama, jo̧bada dusula emawö towisa'onö ö̧linobe. Jejenö midawö woinobe, ökwödöma suli̧ ujulutjö ji̧bö, otiwanö ja̧bö dö̧jakobetjö̧. Jau chömöledö, kwakwatji̧tjö jo̧bada usula emawinobetjö̧, ökwödöma kwö'wöchaduwi̧tjö ji̧binadöja.

1 Pedro 3:18

Jau chömöledö, Diosma isabenö ökwödö usula kwemawaduwobö weena, baikwö yötawa: Duluwo̧ Cristo usula emawobö weinobe, ¿jö̧tö? Ja̧danö Duluwo̧ Cristo usula emawobö ji̧natjö̧ma, ¿ökwödö usula demawobö jwienaji̧? Jȩna chömöledö. Jau chömöledö, sulabe dujuna̧li̧ imidawo jö̧ba̧lö, Cristoma bakwötanöda midawö woinobe, okobe deinö tjusula midawö. Sulabe jwibo̧da midawö woinobe chömöledö, ökwödö dusula juna̧ladö Dioskwö dichibobö ja̧bö. Jau chömöledö, iteba'oma kwabö lotjinobe, jo̧kwaijayonö Diosma o̧'wo̧ luwo̧nö 'yaibajinö ja̧inobe.

1 Juan 2:2

Jo̧ba Jesucristoma ökwödö diminö imidawinobe dusula dumusidi̧ma sulabenö ja̧di̧ Diosma söbebö loobö. Ja̧danö chö̧ja̧wo̧dö, ökwödönödamaökö. Okobe deinö böjȩnö ju̧kwadönöda pjabatö imidawinobe Jesúsma, okobe deinö suli̧ ja̧tji̧ma söbebö loobö. Chö̧ja̧wo̧dö, Jesucristoda ökwödönö pjabato̧, suli̧ ja̧denama, Diosnö abebö, ja̧ suli̧ ja̧di̧ma söbebö loobö.