Juan 10:12 - Dios Iwene

¹² Jelo̧ o̧bȩja̧dönö ite'ada̧lobö midö weökwema ösödö omukwatinokobe o̧bȩja̧dönöma, jo̧ba a̧jwi̧muböködötjobetjö̧. Jo̧bama otiwanö ite'ada̧lokobe o̧bȩja̧dönöma. Ja̧danö, jo̧bama tebo awili ichobe ediakwawö döbibajo̧, o̧bȩja̧dönö le'dedibö. Ikenama, jo̧ba döibaja okobetjö tebo awilima o̧bȩja̧dö tjö̧jobekwö ichö jobadötjö ju'wedönö yöbö kwo̧. Ja̧danö, ju'wedöma omönanö 'wobekwajadö.

Juan 10:12 Iomraidhean Croise

Mateo 10:16

Tupakwö yöawinobe Jesúsma: —Chömöledö, isabenö labobe kwi̧'yaduwobö wetaduwakwö. Baikwö wanedö yötawa: Ökwödönöma o̧bȩja̧dönö wetobedanö ichejekwa, labidö tebo a̧wi̧li̧dö tjö'da̧de kwi̧'yaduwobö. Jo̧kwajabetjö̧, waisanö omukwatö kwö̧jaduwo, ja̧danö ju'wibi ja'yubebi jojodönö laböködö kwö̧jaduwo.

Mateo 7:15

Tupakwö yöawinobe Jesúsma: —Chömöledö, ö'wiakwawönö edö kwö̧jaduwo sulabenö yöbawadönö. Jobadöma, Dios yöawi̧ yöbawadösa, jö̧ba̧lö yötja̧lijayonö, omöna yöba̧ladö. Ja̧danö wanedö yötawa: O̧bȩja̧dödanö ichejekwadö tjichejekwijayonö, o̧bȩja̧döböködö. Labidö. Tebo a̧wi̧li̧dödanöbedö chömöledö.

Juan 10:13

Ja̧danö, o̧bȩja̧dönö ite'ada̧lobö midö weökwema jo̧ba a̧jwi̧mutjokobetjö̧ o̧'wo̧ tjo̧bö̧kö̧ jobadönöma. Jo̧kwaobetjö̧ tebo awili ichenama le'dedibö döbibajo̧, te'ada̧lökönö—yöawinobe—.

Juan 10:3

Ja̧danö, o̧bȩja̧dönö te'ada̧lo̧ ichena, apjude ja̧nö po̧bebo̧ma apjude po̧ebobe o̧bȩja̧dönö te'ada̧lo̧ teachobö. Ja̧danö, o̧bȩja̧döma idöda a̧dekwanö te'ada̧lo̧ iwenema a̧ja̧kwadö. Ja̧danö, te'ada̧lo̧ma iteda ite'ada̧lawö̧ tjimikwena waiso̧. Ja̧danö, ite'ada̧lawö̧ tjimibiyanö jwöawö̧ma ichadö, te'ada̧lo̧kwö tji̧'yobö.

Hechos 20:29

Ina yöbawijetö: Ja̧danö, jobadö Jesúsnö ösödadönöbi, ökwödödabi otiwanö eda̧lö kwite'ada̧laduwo ju'wedö omöna yötjawi̧ a̧ja̧kwö tjösödapji. Jweinö yötawa chömöledö, chi̧'yajabe okobetjöma ju'wedöma tjichakobe, omöna yöbawadöma. Jobadöma ichö, ökwödökwö ko̧ko̧kwö, omöna yötjawakobe. Jobadöma ökwödö kwite'ada̧laduwawö̧nö omöna yötjawakobe idöda omöna tjomukwati̧ tja̧ja̧kwobö. Jobadöma idöda jweökönö tjomukwati̧danö kwite'ada̧laduwawö̧bi jejenö tjomukwatobö yötjawakobe. Wanedö yötawa: Jobadö omöna yöbawö ichadöma, tebo luwo̧ awili, lobo mikwo̧, o̧bȩja̧dö tjuju̧kwobekwö sulabenö ukwotö jö̧ba̧lö ichi̧danö sulabenö yöbawö tjichakobe, kwite'ada̧laduwawö̧nö sulabenö yöbawö. Loboma, o̧bȩja̧dönö le jwiinö edo̧. Ja̧danö, omöna yöbawö tjichakwedöma le jwiinö edadö, ökwödönöma— yöbawijetö Pabloma.

1 Timoteo 3:3

Ja̧danö, te'ada̧lakwawa luwo̧ baibanö otidakwo̧ma, 'dukwachinö owa̧lö̧kö̧, ja̧danö, kwakwabakwawö̧kö̧. Wainö ja̧bö jo̧ te'ada̧lakwawa luwo̧ baibanö otidakwo̧ma, jojodönö dösölö̧jinö ja̧bö jo̧. Ja̧danö, ölakwabikwawa jwii̧ jawa ösödo̧. Ja̧danö, iteda nöinö balada emotö jö̧ba̧lö ösödö̧kö̧.

1 Timoteo 3:8

Jesúsnö ösödadönö pjaatakwawa luwedöbi ja̧danö. Pjaatakwawa luwo̧ baibanö otidakwo̧ma jojodö, Aaa, bitema otiwanö ja̧bö jo̧, jö̧ba̧lö tjöwaisökweda, ja̧danö, dötölatajanö yöba̧lö̧kö̧, ja̧danö, nöinö nio ojwiyo owa̧lö̧kö̧, ja̧danö, nöinö balada iteda emotö jö̧ba̧lö ösödö̧kö̧.

2 Timoteo 4:10

Jau Timoteo, ajayinö ötjökwö otidina Demas mikwo̧ma, böjȩ jawa ösödobetjö̧ ötjönö le'dedibö i̧'yajabe, ja̧danö böjȩ jawa ösödobetjö̧ Tesalónicabe i̧'yajabe. Ja̧danö, ju'wibi Crescentema Galacia nijibe i̧'yajabe, ja̧danö Titoma Dalmacia nijibe i̧'yajabe,

Tito 1:7

Jau Tito, Jesúsnö ösödadönö te'ada̧lakwawa luwo̧ma Dios otidawa jawa luwo̧ baibanö jo̧. Jo̧kwajabetjö̧ te'ada̧lakwawa luwo̧ otidobö kwujunakwo̧ma ju'wedö jo̧banö sulabenö yötja̧lobö jwibo̧nöda kwujunobö jo̧be. Ja̧danö, te'ada̧lakwawa luwo̧ otidakwo̧ma, Aaa, ötjöma waiso̧sa, jö̧ba̧lö omukwatö̧kö̧, ja̧danö juluwanö o̧'wo̧ sulachibö jö̧kö̧, ja̧danö 'dukwachinö nio ojwiyo owa̧lö̧kö̧, ja̧danö ju'wedönö ölakwabikwawö kwakwabö̧kö̧, ja̧danö iteda nöinö balada emotö jö̧ba̧lö ösödö̧kö̧, te'ada̧lakwawa luwo̧ otidakwo̧ma.

1 Pedro 5:2

Jo̧kwajabetjö̧ bakobe ökwödökwö te'ada̧lakwawa luwo̧ ja̧nö, kwujuluwaduwachibanö baikwö yötawa ökwödö te'ada̧lakwawa luwedönö: Diosma Jesúsnö ösödadönö kwite'ada̧laduwobö ujuninobetjö̧, jobadönö te'ada̧lö kwö̧jaduwo chömöledö. Ja̧danö jejenö kwite'ada̧laduwenama, öpöjödinö, Aaa, wetjökwechobetjö̧ chite'ada̧lo jö̧ba̧lömaökö chömöledö, te'ada̧lakwawa ösödö kwite'ada̧laduwo. Ja̧danö, sule balada kwemaduwotö jö̧ba̧löma kwite'ada̧laduwoko chömöledö, isabenö pjakataduwobö ösödö, jobadönö kwite'ada̧laduwo chömöledö.

2 Pedro 2:3

Ja̧danö, idöda tjemotö jö̧ba̧lö tjösödobetjö̧, jobadö sulabenö yöbawadöma ökwödönö omöna yötja̧lakobe, ökwödötjö balada tjemo jö̧ba̧lö. Jo̧kwaijayonö Diosma damötjö jobadönö lȩebobö omukwatö ujuninobe chömöledö, ja̧danö isabenö jobadönö lȩebakobe.