Juan 1:17 - Dios Iwene

¹⁷ Damötjö Diosma iyinobe Moisésnö ökwödönö yöawobö, iteda weina jawa wene, a̧ja̧kwö dö̧jobö weinama. Jo̧kwaijayonö Moisés weinatjö̧ Diosma i̧sebinokobe iteda lȩlö̧jino edi̧ma. Iteda weina jawada i̧sebinobe. Ja̧danö Diosma Jesucristonö weenama ja̧ Moisésnö weinatjö o̧penönö mikwawi̧ma iyinobe ökwödönöma. Ja̧danö, Jesucristonötjö Diosma i̧sebinobe iteda jwiinö lȩlö̧jino edi̧ma, jojodönö pjabatö. Ja̧danö, Jesucristonötjö Diosma itedada jweinö yöa̧lina i̧sebinobe ökwödönöma, Ötjö jö̧ta̧li̧danö isabenö ja̧bo̧sa, jö̧ba̧lö.

Juan 1:17 Iomraidhean Croise

Génesis 22:18

Jao Abraham, ötjö weti̧ kwa̧ja̧kwajobetjö̧ ökwötjö tupadanö jojodönöma pjatatakwo̧sa. Ja̧danö, jobadö ökwötjö tupadanö jojodönö pjatatobetjö̧ okobe deinö böjȩnö ju̧kwadönö, bakwasokwena jojodönöma dösölö̧jinö edö pjatatakwo̧sa— jejenö yöbawijetö Isabenö Jo̧ Dios weajökwe ángelma Abrahamnöma.

Génesis 3:15

Ja̧danö, ökwöma isuju jöpöjojo kwö̧jakwo̧ja. Ja̧danö, isujuma kwöpöjojosuju jö̧jakwuju. Ba̧kwelö̧jatebö wene ja̧kobe ökwötjö tupadanö ju̧kwadökwö, isujutjö tupadanö jojodökwö. Kwöpöjojodöda tjuju̧kwakwedö. Ja̧danö, isujutjö tupadanö jojodötjö bakwo̧ma kwuunö öja̧takwo̧ja. Ja̧danö, jo̧ba ökesayunö yö̧köbakwo̧ja— lȩbebö jö̧ba̧lijetö Isabenö Jo̧ Diosma a̧ko'danöma.

Juan 1:14

Ja̧danö, Dios Iwene Jo̧, jö̧ba̧lö, ötjabökwema jojo baibanö jeminökwe. Ja̧danö, jojo baibanö jeminökwema böjȩnö ökwödökwö ö̧jinobe. Ökwödöma jo̧banö edö, Jwiinö otiwo̧, jö̧ba̧lö, dösödijatö. Yelösöda, jo̧bama Dios Itji̧, iteakwo̧daobetjö̧ jwiinö otiwo̧. Ja̧danö, jo̧bama jwiinö lȩlö̧jino edöda pjabato̧. Ja̧danö, jweinöda yöba̧lo̧.

Juan 14:6

—Ötjödasa Dios ö̧jobekwö 'ya̧kwawa manama— yöawinobe Jesúsma—. Ja̧danö, ötjödasa jweinö yöbawo̧ma jweinö jo̧chobetjö̧. Ja̧danö, ötjödasa ba̧kwȩlö̧jatebö ja̧kwawa iyo̧ma. Ja̧danö, ötjöma Dios ö̧jobekwö 'ya̧kwawa manachobetjö̧, ötjönöda 'yo̧ma Dabe'do Dios ö̧jobekwö ichibakwo̧.

Juan 18:37

Jejenö yöawiökwe Pilatoma: —Jo̧kwaobetjö̧ ¿yöka̧liji̧, Ötjöma jojodö tjuluwo̧sa, jö̧ba̧lö?— abebö a̧ja̧kwiökwe: — Jweinö yöka̧la. Ötjöma jojodö tjuluwo̧sa. Ja̧danö, ötjöma, böjȩnö ju̧kwadö tjuluwo̧ batibobö, isabenö ji̧ jawa yöbawö chojo'do jeminökwesa. Jejenö batibobö chichijatö böjȩkwö, böjȩnö ju̧kwadö tjuluwo̧ batibobö, isabenö ji̧ jawa yöbawö. Isabenö ji̧ jawa isakwadöma ötjö isabenö ji̧ jawa yötawi̧ma a̧ja̧kwö ösödadö— yöawinobe Jesúsma.

Juan 5:45

Ina yöawinobe: —Ja̧danö ötjömaökö, Chabe'donö ökwödönö jwöbeba̧lo̧ma, Sulabedö, jö̧ba̧lö. Ötjömaökö. Moisés iwȩyudinada ökwödönö jwöeba̧lobe Diosnö, Sulabedö, jö̧ba̧lö. Ökwödöma Moisés webö iwȩyudina a̧ja̧kwö kwö̧jaduwi̧da kwo̧'wo̧duwi wana̧lö kwö̧jaduwobe. Ja̧danö, kwomukwataduwobe, Dios öba a'o ja̧nö wene jwiinö, otiwadö badiboböma Moisés iwȩyudina a̧ja̧kwö dö̧jaduwobö jo̧be, jö̧ba̧lö. Jo̧kwaijayonö, ja̧ webö iwȩyudinada ökwödönö jwöeba̧lobe Diosnöma, Sulabedö, jö̧ba̧lö.

Juan 7:19

A̧ja̧kwaduwitjö. Damötjö Moisésma Dios wei̧ wȩyudijetö. Ja̧ iwȩyudinama ökwödö judío jojodö dö̧jobö weawa, Biya̧da ja̧bö dö̧jobö jo̧be, jö̧ba̧lö. Jo̧kwaijayonö ökwödöma jejenö okobe jwiinö ja̧bö kwö̧jaduwoböma waiya. Waekwobe. Okobe jwiinö Dios wei̧ Moisés iwȩyudinama ja̧dokobe. Jo̧kwaobetjö̧ ¿tajawedö kwabö loköbaduwobö jö̧ka̧laduwa ötjönöma, Itema Moisés weina ja̧bö̧kö̧, jö̧ba̧lö?— yöawinobe Jesúsma judío jojodönöma.

Juan 8:32

Ja̧danö, ötjö chöba̧ja̧di̧ waisachadö kwö̧jaduwobetjö̧ isabenö ji̧ yötawi̧ma kwöwaisachibaduwakwedöja. Wanedö yötawaduwakwö: Isabenö ji̧ yötawi̧ kwöwaisachibaduwobetjö̧, nu'yö di̧batö tjödinatjö̧ kwö̧jibaduwinö bakibaduwakwedöja, kwuluwo̧duwi wei̧tjö lakebaduwinö— jö̧a̧linobe Jesúsma, wanedö yöbawö.

Juan 9:29

Dios Moisésnö yöawinama döwaisa. Jo̧kwaijayonö ¿jo̧ba Jesús? Jo̧ba ichinabi wajwibadösa—jö̧tja̧liökwe:

Hechos 28:23

Jejenö, Ökwödönö yöbawi, jö̧ba̧lö, abebajadö, Pablo yöawakwa̧ möle badedö junijadötö. Ja̧ möle baibena jojodö ba̧jekwadö 'yi̧jadötö Pablo ejube. Ichibajadönö Pabloma möle baledibanö yöbawijetö Dios iwenema. Dios La'aka Luwo̧ ö̧jena wenebi yöbawijetö. Moisés iwȩyudinabi, Dios yöawi̧ yöbawadö damötjö tjiwȩyudinabi eda̧lö labebö lobö yöbawijetö Pabloma. Yöbawijetö, Jesúsma Dios yöbawö ujuninökwe jojodö tjö̧jibinö pjaatobö, jö̧ba̧lö, jojodö tjöwaisachibobö.

Hechos 7:38

jö̧ba̧lö yöbawijetö Moisésma. Ja̧danö, jo̧ba Moisésda da'dödöminekwö ji̧nama, jojodö deena. Jobetjöma ángelma Dios yöawi̧ yöbawijetö Moisésnöma, mö'ösa'o Sinaí mikwa'onö jo̧nö. Jobetjöma Moisésma emijetö Dios wei̧ iwȩyudinama, ba̧kwȩlö̧jatebö ji̧ iwȩyudinama ökwödöbi dujuna̧lobö.

Romanos 6:14

Jau chömöledö, suli̧ma ökwödönö juluwoböma jwiobe yelösöda babema, Diosma suli̧tjö kwö̧jibaduwanö ja̧inobetjö̧. Jo̧kwajabetjö̧, jwaikwöda otiwanö ja̧bö kwö̧jaduwo, sulabenö ja̧bökönö. Jau chömöledö, Diosma ökwödönö weinokobe, Okobe jwiinö Moisés iwȩyudina ja̧bö kwö̧jaduwo, jö̧ba̧lö. Ju'wida ja̧inobe, itedada mikwa jwiinö otiwa jawa iyö, suli̧tjö kwö̧jibaduwanö ja̧inobe. Ja̧danö jejenö pjaatinobetjö̧, suli̧ma ja'yubebi ökwödönö juluwoböma jwiobe chömöledö.

2 Corintios 1:20

Jau chömöledö, okobe jwiinö Dios ja̧tocha jö̧a̧lina, badekwachinö ja̧bo̧ma Jesucristoda, ja̧danö öwaetjöda öwawobe jö̧a̧li̧danö ja̧bo̧ jö̧ba̧lö. Ja̧danö, ju'wibi chömöledö, Jesucristoda Dios jö̧a̧lina badekwachinö ja̧bo̧obetjö̧, ökwödö jo̧banö dötewadöma amen jö̧ba̧ladösa, jejenö otiwa jö̧ba̧lö. Jau chömöledö, jejenö jo̧be, okobe deinö Diosnö otiwanö tjomukwatakobetjö̧. Ja̧danö chömöledö, Dabe'do Diosbi, Duluwo̧ Jesucristobi ba̧kwȩlö̧jatebö jweinö yötja̧lobetjö̧, ötjöbi jweinöda yöta̧lobö jo̧be.

Gálatas 3:17

Baikwö labebö lobö yötawa chömöledö. Diosma iteda ja̧akwa̧ma Abrahamnö yöbawö ujuninobe, ja̧danö isabenö yötawaja̧danö ja̧tocha jö̧ba̧lö yöawinobe, ¿jö̧tö? Jemi ikenama, cuatrocientos treinta o̧biya baledibajenama, Dios wei̧ Moisés iwȩyudobö weinobe. Jo̧kwaijayonö, ja̧ ikena weinama, ajayi Abrahamnö yöbawö ujuninama söbebö looböma jwiobe chömöledö, Dios ajayinö yöawinadanö ja̧oko jö̧ba̧löma.

Deuteronomio 33:4

Jau, ötjö Moisesma israel jojodönö webö yötawijatö Dios wei̧ma, ja̧danö yötawiawö̧ tjösödinobe, –Bi̧ya Dios wei̧ma inesö mikwawi̧, ökwödö Jacob itji̧mu tupadanö jojodö dujuna̧lobö, –jö̧ba̧lö.

Deuteronomio 4:44

Moises israel jojodönö yöawinobe Dios wei̧ma, a̧ja̧kwö tjö̧jobö wei̧ma. Ja̧danö ja̧ jobadönö yöawina möle labebö loawama baikwö laebobe: Ja̧ möle jobadönö yöawenama, Egipto nijitjö labebajadö,

Deuteronomio 5:1

Ja̧danö, jobe Jordan ojwetjö jawo̧ ichobekwöchobe ja̧nö, Moisesma okobe deinö israel jojodönö o̧ko̧kodinobe, ja̧danö ko̧ko̧dajo̧, jobadönö yöawinobe: —Chömöledö israel jojodö, otiwanö kwa̧ja̧kwaduwo, Dios ökwödönö wei̧, ja̧bö kwö̧jaduwobö wei̧ma, babe ökwödönö chö̧ba̧jadonö. Ja̧ wei̧ma otiwanö kwöwaisachaduwo, ja̧danö waisachibajadö, jwaikwöda otiwanö wei̧danö a̧ja̧kwö kwö̧jaduwo.

Hebreos 9:22

Jejenö Diosma weinobe, Okobe jwiinö, ja'yubeda u'yukwinö, tjökwösobuda liliobö, suli̧ dichö loinö. Chömöledö ja̧ baledinama ökwödönö i̧sebobe, Sule bakwo̧ ökwösobu ebawinö woi̧tjöda tjusuli̧ söbebö loobe, jö̧ba̧lö. Chömöledö jejenö, itea webo̧ma jo̧ba woobö ji̧danö wei̧ jamatö 'yo̧bö, Dios ajayinö yöbawö ujuni̧tjö wei̧bi, ökwösobu ebawinö woi̧tjöda jamatö 'yi̧nobe.