Josué 7:21 - Dios Iwene

²¹ Jerico jojodönö dujuluwenama, dujuluwajawö̧ tjiteatjö chedijatö, kamijido̧ babilonia nijitjö otikwa̧do̧ jwiinö otiwa̧do̧ wamesa̧do̧ma, ja̧danö ju'wibi plata ö̧pi̧ya doscientos ö̧pi̧ya chedijatö, ja̧danö ju'wibi orotjö cincuenta ö̧piyadanö ömöka'o chedijatö. Jejenö edajo̧, ötjöda chemotö jö̧ba̧lö chösödijatö, ja̧danö emajo̧, cheju i̧sȩdo̧tjö otikweju okwa sobö o̧tjö chotojijatö. Jau Josue, ja̧ chemina jawama, babe cheju okwa, niji okwa jo̧be, ja̧danö ju'wi jawa teebe, plata ö̧pi̧ya bo̧be, —jö̧ba̧lö atadinobe Acanma.

Josué 7:21 Iomraidhean Croise

Génesis 10:10

Ja̧danö, Nimrodma jelobe, jelobebi comunidades otidö junijetö, iteda la'aka luwo̧ baibanö. Ajayinö otidö ujuninemi comunidadesma Babel, Erec, Acad, Calne mikwemi, Sinar nijinö.

Génesis 3:6

Ja̧danö, isujuma jowinö wa̧ji̧ma jedemi kwakwawanöbi otiwijetö. Jowibi jedemi jwiinö otiwijetö. Waisakwawabi otiwioko ösödinö edijotö. Jo̧kwaioko jowinö wa̧ji̧ma 'döbebö kwijotö. Kwaja̧ju jilekwenö iyijotö. Ja̧danö, jo̧babi kwijetö.

Génesis 34:27

Ikenama ju'wedö Jacob i̧tji̧mu ömadöma jobe comunidad 'ya̧nö okobe deinö bulabinö lotjajawö̧ tjöba̧jobe baledibö o̧diju okwa tebachibö naukwijadötö okobe jwiinö tjiteaaja̧ma. Balekwa mikwa ja̧bö naukwijadötö, Shequem tjöjawujunö sulabenö, tabalö̧jinö ja̧ina jawa balekwa mikwa.

Génesis 6:2

Ja̧danö, ja̧ mölema baikwö baledijetö: Mölejȩnö ju̧kwadö ángelesdötjö sulabedö ángelesdöma böjȩnö ju̧kwadö ya̧dönö tjedemi, jwiinö otiwadö jö̧ba̧lö, tji̧lȩkwa̧munö tjemotö jö̧ba̧lö ösödijadötö. Jejenö tjösödobetjö̧ jobadö sulabedö ángelesdöma böjȩnö ju̧kwadö ya̧dönö emijadötö, jobadötjö bakwo̧nökwena tjösödokokwena.

2 Samuel 11:2

Ja̧danö, jobe Jerusalennö ö̧jonö, baikwö baledinobe: Ju'wi möle aba̧lajo̧, yi̧benakwö la'aka luwo̧ Davidma a̧la̧ibö kweachinobe, ejutjö mö ba̧ba̧lawobema. Ja̧danö, kweachonö, mötjö edinobe jojosuju jejutjö ojwe ibujunö, jwiinö otiwujunö.

2 Reyes 7:8

Jo̧kwajabetjö̧, lepra 'dö̧bachadö tjabekwobe ö'öbö tjichibenama, bakweju sabana'wotjö otikweju okwa tebachö, kwanöbi tjukwinobe, ja̧danö owöbi tjowinobe. Jemi ikenama, plata jawabi, oro jawabi, kamiji̧do̧bi tje'ewinobe, ja̧danö tojö tjujuninobe. Ikenama, jeleju okwa tebachö, jobe ji̧bi tje'ewinobe, ja̧danö ja̧bi tojö tjujuninobe.

Diosnö ösödo̧ Job mikwo̧ usula emawina jawa 31:1

Tupakwö yöa̧linobe Jobma: —Isabenö Dios wei̧ a̧ja̧kwö jo̧sa, baikwö wanedö yöta̧la: Ötjökwö, chöbajalekwö sulabenö edökönö chö̧jakwa̧ yöbawö chujunijatö, –La'akatjöda chilekwobökuju möayujunö chedökakwo̧sa, Aaa, isunö chö̧jowe, jö̧ba̧löma. Dios lȩebapji jö̧ba̧lö, la'akatjöda chilekwobököjunö ösödi̧nö chedökakwo̧sa, –jö̧ba̧lö jobekwö yöbawö chujunijatö ötjödada.

Éxodo 20:17

Ja̧danö ju'wibi wetaduwakwö: Kwömöledöso̧ eju ösödöma kwedaduwoko, ötjö cheju baibanö chösöda, jö̧ba̧lö. Ja̧danö, kwömöledöso̧ ilekwonöma ösödöma kwedaduwoko, chösödoko, jö̧ba̧lö. Ja̧danö kwömöledöso̧ ömöayo̧nöbi ömöayujunöbi, ötjöda chömöayedö batjibanö chösöda, jö̧ba̧lö kwedaduwoko. Ja̧danö a̧jwi̧mu̧ pa̧kayönöbi a̧jwi̧mu̧ bu̧lu̧dönöbi ju'wi jayebi kwömöledöso̧ ujunani̧ma ösödama kwedaduwoko, ötjöda chajwimu batjibanö chösöda, ja̧danö iteabi ötjö chitea baibanö chösöda, jö̧ba̧lö— jejenö domulataja jawa weawa yöbawijetö Isabenö Jo̧ma.

Proverbios 1:19

Jobekwö baledobe jobadö ju’wedö tjiteatjö naukwadönö, omukwatökönö ju'wedönö 'döbebö kwabö lobö naukwadönöma. Idöda debö tji̧’yakwedö. ¡Chitji̧ ötjö jwebebö yötawi̧ma a̧ja̧kwitjö!— jobekwö yöawinobe Salomónma, itji̧nö möayo̧nö jwebebö yöawi̧ jawama.

Proverbios 23:31

Chitji̧, ja̧ ubasobu o̧'do̧bu, deja'do̧nö toekwama otiwanö salöanö öwawobe. Ja̧danö, jobu uatakwawama otiwanö sayuwanö meobu. Jobu edö chowowe, jö̧ba̧lö, kwowobö kwösödijayonö kwowoko chitji̧.

Proverbios 28:22

Ja̧danö, ju'wibi yötawa: Balada nöinö emotö jö̧ba̧lö isakwo̧ma juluwanö emobö isakwo̧. Jo̧bama wajwiobe jo̧banö ju'winö baledakwa̧, iteda balada jwibo̧ baibanö badekwachakwa̧ma.

Proverbios 4:23

Ja̧danö, ju'wibi yötawakwö chitji̧: Kwomajadenö kwomukwati̧ma ö'wiyawakwawönö kwite'ada̧lakwawo sulabenö kwomukwatapji jö̧ba̧lö. Chitji̧, kwomajadenö otiwanö kwomukwatitjö̧ma otiwanö kwö̧jakwo̧ja. Jo̧kwaijayonö kwomajadenö sulabenö kwomukwatitjö̧ma sulabenö omukwatö kwö̧jakwo̧ja. Isabenö chitji̧, kwomajadenö kwomukwataja̧ma kwite'ada̧lobö jo̧be, otiwanö jweinö kwomukwatakobetjö̧.

Isaías 28:15

—Ökwödöma Egipto jojodökwö bakobe pjabatakwawö kwö̧jaduwakwa̧ wene yöbawö kwujuninaduwobetjö̧, omukwatadöja: –Ökwödöma Egipto luwedökwö bakobe pjabatakwawö dö̧jakwa̧ wene yöbawö dujuninobetjö̧, ö'wö badibökakwedösa, ja̧danö ö'wö babibajadö tjö̧jemi dichibökakwedösa, otiwanö wene jwiinö dö̧jakwedösa. Jau, inesö labinö kwakwaakwawopja ji̧danö̧ ichejekwadö Asiria ölakwabikwawadöma, yö̧ne israel niji ö'wejenö tjöbaledijayonö, ökwödönö mebibö tjujuluwökakwedö, –jö̧ba̧lö omukwatadöja. Jo̧kwaijayonö ja̧ yöbawö kwujuninaduwama, omöna yöba̧lakwawö yöbawö kwujuninaduwobe, ja̧danö kwo̧'wo kwöwana̧laduwi̧ma, ömöna yöa̧lakwawa jawada ösödö, tjökeba̧la̧duwobö kwisakwaduwobe. Jo̧kwajabetjö̧, baikwö yötawaduwakwö ökwödö Juda jojodönö:

Isaías 29:15

Ökwödö sulabenö ja̧köbaduwakwa̧ omukwatö kwujunaduwijayonö, kwomukwataduwi̧ Isabenö Jo̧ öwaisapji jö̧ba̧lö, tojö kwujunaduwobö isakwadöja. Ja̧danö ju'wedö tjedokonö, yȩa'wo okwatjö sulabenö ja̧badöja. Jobekwö sulabenö omukwatö, sulabenö ja̧köbaduwijayonö, yöba̧ladöja, —Bakwo̧bi sulabenö domukwati̧ wajwibo̧, ja̧danö bakwo̧bi sulabenö ja̧di̧ edö̧kö̧, —jö̧ba̧lö.

Lucas 12:15

Ja̧danö jejenö atadajo̧ Jesúsma tupakwö yöawinobe: —Chömöledö, te'ada̧lönö kwö̧jaduwo, jwaikwöda kwemaduwotö jö̧ba̧lö isakwö kwö̧jaduwapji jö̧ba̧lö. Jau chömöledö, ju'wedö tjomukwatena nöinö chujuna̧litjö̧ma otiwanö chö̧jena, jo̧kwaijayonö ja̧maökö. Isabenö ja̧kwawa mikwawi̧ma, nöinö tjujuna̧li̧ jawadamaökö chömöledö— jö̧ba̧lö.

Lucas 12:2

Jobadö tjomukwati̧danöma kwomukwataduwa chömöledö. Isabenö yötawaduwakwö: Okobe jwiinö babe öwawökö ji̧ jawama, tupakwö öwawakobe, ja̧danö okobe jwiinö babe jojodö tjöwaisapji jö̧ba̧lö tojö tjujuni̧ jawama, okobe deinö tupakwö tjöwaisakobe.

Efesios 5:3

Chömöledö, Dios ömöledö bakibinaduwobetjö̧ sulabe ja̧bökönö ja̧duwi. Ja̧danö, bakwo̧ ilekwo debo̧, jeluju jelujunöma ja̧böma kwö̧jaduwa. Ja̧danö, bakwuju jilekwe debujuma, jelo̧ jelo̧nöma ja̧böma kwö̧jaduwa. Ja̧danö, chömöledö, ju'wi taba̧lö̧ji jawabi ja̧köbaduwa. Ja̧danö, ju'wedö tjujuna̧li̧bi edö jwiinö ösödö, Chujuna̧lobö jö̧ta̧la, jö̧ba̧löma kwomukwataduwa. Chömöledö, Dios ömöledö bakibinaduwobetjö̧, ja'yubebi biya̧ sulabe jawa yötawaja̧ma kwi̧sebaduwoko.

Efesios 5:5

Babema öwaitjöda yötawa chömöledö. Bakwo̧ ilekwobökujukwö jo̧bi, bakwuju jilekwebö̧kö̧kwö ju̧jubi, ju'wi jwiinö taba̧lö̧ji jawa ja̧badöbi Dios Cristokwö webö tjö̧jobekwöma yelösöda tetjachökakwedö. Ja̧danö, bakwo̧, böjȩ jawada ösödanö edö, Diosnö omukwatökönö böjȩ jawada ösödö edo̧ma Dios Cristokwö webö tjö̧jobekwö teachökakwo̧.

Deuteronomio 7:25

—Ja̧danö jobadö tjösödawö̧ o̧'wo jawanöbi söbebö loköbaduwo, ökwölanö juwö loköbaduwo tjösödawö̧ o̧'wo jawanö. Ja̧danö, o̧'wo jawanö tjö̧nönawi̧ orobi, platabi lo̧be kwedaduwijayonö, ja̧ jawa kwujuna̧laduwotö jö̧ba̧lö ösödökönaduwi. Jau chömöledö, o̧'wo jawajaye jawama jwiinö öpöjödobe kwuluwo̧duwi Isabenö Jo̧ Diosma, jo̧kwajabetjö̧ kwemaduwoböma ösödökönaduwi, ökwödönö 'daliwadanö baibapji jö̧ba̧lö.

Colosenses 3:5

Jo̧kwajabetjö̧, ajayinö kwösödinaduwa jawa kakatibaduwo chömöledö. Wanedö yötawa: Sulabenö kwösödaduwi̧bi, sulabenö ja̧köbaduwi̧bi kwabö loköbaduwo chömöledö. Jau chömöledö, kwi̧lȩkwa̧muböködökwö ja̧awabi, ja̧danö sulabenö alewakwawabi, ja̧danö sulabenö 'da̧'da̧akwawa kwösödaduwi̧bi, ja̧danö sulabe jawa kwösödaduwi̧bi, kakatibaduwo chömöledö. Ja̧danö ökwöda kwemotö jö̧ba̧lö ösödakwawabi kakatibaduwo chömöledö, ökwöda kwemotö jö̧ba̧lö ösödakwawama, o̧'wo̧ jawa ösödakwawi̧danö ichejekwobetjö̧.

Hebreos 13:5

Ja̧danö, ju'wibi yötawaduwakwö. Balada kwujuna̧laduwi̧dama omukwatö kwö̧jaduwoko chömöledö. Otiwanö omukwataduwi tjo̧wi̧ kwujuna̧laduwi̧ma, ju'wi jawabi, ju'wi jawabi, kabatökönö kwemaduwobö omukwatökönö. Chömöledö, ökwödöma jwiinö mikwawinö ji̧ juna̧ladöja, Diosma ökwödönö ile niebobetjö̧. Kwomukwataduwo Dios ökwödönö yöawina. Baikwö laebobe Dios iwenetjöma, iteda yöawina: Ökwödönö la'akatjöda le'dedibö chȩwa̧jökakwo̧sa. La'akatjöda ökwödönö katatibökakwo̧sa. Jejenö laebobe Dios iwenetjö, Diosma ba̧kwȩlö̧jatebö ökwödökwö jo̧, jö̧ba̧lö.

Santiago 1:15

Ja̧danö, bakwo̧, jejenö sulabenö ösödi̧da omukwata̧lö ö̧jitjö̧ma sulabenö omukwata̧li̧danö ja̧bö ö̧jena. Jemi ikenama yemidanö, yemidanöbi jejenö sulabenö ja̧böda jo̧ma, sulabenö omukwati̧ öbalewachökötjö̧ma Diostjö 'da̧bachiböda jo̧, o̧'wo̧ luwo̧nö ö'wö babibo̧da.

Josué 7:20

Weökwe, Acanma Josuenö atadinobe: —Isabenö sulabenö ja̧tajabetija, Isabenö Jo̧ israel jojodö duluwo̧ Dios weina a̧ja̧kwökönö sulabenö ja̧tijatö. Baikwö sulabenö ja̧tina yötawakwö:

Josué 7:22

Jejenö yöawökwe, Josuema ju'wedönö weinobe, Acan ejube 'ya̧nö tjisakwobö, ja̧danö jobe ö'öbakwawö tjisakwinobe. Ja̧danö, Acan yöawaja̧danö, eju teebe tjöbadekwajinobe, ja̧danö plata ö̧pi̧ya ju'wi jawa teebe tjöbadekwajinobe.

2 Pedro 2:15

Jau chömöledö, otiwanö ja̧awatjö 'da̧bachibö, Balaam mikwo̧ ökömanö lutja̧libobedanö ichejekwa, jo̧ba ja̧inadanö ja̧bö. Jau chömöledö, kwöwaisaduwa, jo̧ba Beor mikwo̧ itji̧ Balaam mikwo̧ma, balada emotö jö̧ba̧lö sulabenö yöawobö ösödinobe, ¿jö̧tö?