Josué 24:32 - Dios Iwene

³² Ja̧danö, tja'dömine Jose iwe'iju, Egipto nijitjö tjichejebina iwe'ijuma, Siquen comunidadtjö tjo̧tjinobe. Ja̧ Josenö tjo̧tjinemima, damötjö̧ Jacob Siquen mikwo̧ abedo Jamor mikwo̧tjö midö eminemi. Jacobma cien balada ö̧pibiya imidinobe Jamornö, iteda itea niji baibanö emobö, ja̧danö ja̧ nijima Jose itji̧mu tupadanö jojodö tjitea niji baibinobe.

Josué 24:32 Iomraidhean Croise

Génesis 33:19

Ja̧danö, jemi niji midö emijetö Jacobma, Hamor mikwo̧ i̧tji̧mu ömadötjö. Jobadötjö bakwo̧ Sequem mikwijetö. Ja̧danö, ciennö jawa ö̧pi̧ midö emijetö jemi niji, mejema.

Génesis 48:22

Ja̧danö, José, ökwönöda chiya Shequem nijima. Jemi nijima amoritas jojodökwö ölakwabikwawö juluwajo̧ chemijatö, kwölöte'onö dȩdȩbakwawö, ja̧danö, na̧yu̧nijunö 'böbabikwawö. Jemi nijima ökwönöda, ökwötjö tupadanö jojodönöda chiya, kwöpöedönö chiyemitjö̧ o̧penönö otiwemi niji— yöba̧lijetö Jacobma Josénöma.

Génesis 50:24

Woakwa̧ abönö yöbawijetö Joséma ömöledönö: —Chömöledö, ötjöma tjo̧wi̧ pöebo̧sa, wotakwa̧ma lekwokobe. Ja̧danö, yötawaduwakwö: Diosma isabenö pjaatakobe ökwödönöma, bena Egipto nijitjö̧ öbibö labebö. Ja̧danö Diosma jelobe öbibö e'ewakobe ökwödönöma, ajayinö da'dödöminenö, Okwötjö tupadanö jojodönö niji chiyocha, jö̧ba̧lö, yöawinobekwö. Jau chömöledö. Da'dödömine Abrahamnö, Isaacnö, dabe'do Jacobnö jejenö iteda iwene yöbawö ujuninobe Diosma, Ökwödötjö tupadanö jojodönö niji, idöda tjitebo baibanö chiyocha, jö̧ba̧lö—yöbawijetö Joséma ömöledönöma, woakwa̧ abönö.

Génesis 50:25

Ikenama baikwö webijetö jobadö ömöledönö, Israel i̧tji̧munöma, yöbawö tjujunobö: —Diosma Canaán nijikwö kwȩwa̧jaduwobö öbibö ichitjö̧ma ötjö chowobiyakoma kwe'ewaduwo, jobeda kwödaduwo , jö̧ba̧lö yöba̧lö tjujunobö webijetö.

Éxodo 13:19

Ja̧danö, latjebakwa̧ abönö Moisésma webijetö Josémine iwe'iju jobadö tje'ewobö, José damötjö ö'wö baibakwa̧ abönö aebinadanö. Damötjö José ö'wö baibakwa̧ abönö ömöledönö yöbawö tjujunobö aebinobe, ju'wi möle ökwödötjö tupadanö jojodöma belö latjebakobe, Dios tjö̧jibinö pjaatobetjö̧. Jo̧kwaobetjö̧ isabenö kwiweneduwima yöbawö junaduwi babeda, jobadöma latjebena ötjö chiwe'iju tje'ewakobe, jö̧ba̧lö.

Juan 4:5

Ja̧danö Samaria nijinö, Sicar comunidadnö ichibinobe, Jacob itji̧ Josénö iyinemi niji yöneawinö.

Hechos 7:15

Jejenöobetjö̧ Jacobma Egiptobe 'yi̧jetö ö̧jobö. Lekwe tjuju̧kwina ikena jobetjö pöe waekwö wobijetö Jacobma. Ja̧danö, i̧tji̧mubi damö waekwö wobijadötö.

Hechos 7:16

Jobetjö wobajadönöma e'ewijadötö tjitebobe, Siquembe tjödobö. Jobe jobadönö lödijadötö i̧lȩdo̧ okwa, Abraham midö eminena Hamor i̧tji̧munötjö.

Hebreos 11:22

Ja̧danö da'dömine Joséma, Diosnö o̧'wo̧ wana̧lö ö̧jobetjö̧ ida̧ökö woakwa̧ma yöneawachena ömöledö Israel jojodö ju'winö Egiptotjö latjebakwa̧ wene yöawinobe. Ja̧danö ömöledönö weinobe Egiptotjö latjebena iteda iwe'iju e'ewö tji̧'yobö Dios iyakwemi Canaánbe, jobeda tjo̧tjobö.