Josué 21:1 - Dios Iwene

^1-2 Ja̧danö, jemi ikenama, Levisaso jojodötjö bakwasokwena luwedöbi ichibö atjebinobe. Canaan nijinö ja̧nö, Diostjö jojodötjö tjö'da̧de pjabato̧ Eleazarbi, Josuebi, jelesokwena tjuluwedöbi Silo comunidadnö tjö̧jinobe, ja̧danö tjöba a'o ichibö, Levisaso jojodötjö bakwasokwena luwedöma atjebinobe: —Isabenö Jo̧ma Moisesnötjö̧ weinobe, comunidadbiya 'da̧batö kwujunaduwobö, ökwödö Levisaso jojodöma jelobekwena ditebo baibanö dö̧jobö, comunidadbi, comunidad ö'öbö mejetjö da̧jwi̧mu otiwanö tjukwoböbi 'da̧batö kwujunaduwobö weinobe. Jo̧kwajabetjö̧ ja̧ weina badekwachinö kwiyaduwobö adebaduwakwö, —jö̧ba̧lö atjebinobe.

Josué 21:1 Iomraidhean Croise

Génesis 49:7

Ina yöbawijetö jobadönö, Dios lȩebakwa̧ jawa: —Ökwödöma Dios lȩebakwawö̧ja jwiinö labidököbaduwobetjö̧. Ja̧danö lȩebakwawö̧ja ju'wedönö labinö inia tjötjinö ja̧köbaduwobetjö̧. Baikwö lȩebakobe Diosma ökwödönöma: Ökwödötjö tupadanö jojodöma bakobe, bakwasonö tjuju̧kwökakwedö. Idöda tjitebonö tjuju̧kwökakobe, ju'wedö tjömöledö bakwasokwena tjitebonö tjuju̧kwi̧danö. Jobadötjö ju'wedöma jelobe, ju'wedöma jelobe, ju'wedöma jelobe, Israel niji okobe jwiinö, bakwemeachibanö tjuju̧kwakwedö, bakobe jö̧kö̧nö— yöbawijetö i̧tji̧mu Simeónnö, Levínö jobadötjö tupadanö jojodönö baledakwa̧ma.

Éxodo 6:14

Böjanö wȩyukwi̧ma Moisés, Aarón tja'dödötjö ju'wedö tjimibiya ba̧ji̧ wȩyukwi̧, baikwö: Reuben, Jacob itji̧ abönö pöe i̧tji̧mu ömadöma bidö: Hanoc, Falú, Hezrón, Carmi mikwadö. Jobadötjö tupadanö jojodöma idöda tja'dö imi ötjabinawö̧, Reubén jojodö, jö̧ba̧lö.

Éxodo 6:25

Ja̧danö Aarón itji̧ Eleazar mikwo̧ma ilekwonö emijetö, Futiél mikwo̧ i̧tji̧mu ya̧dötjö. Jobujuma jitji̧nö 'yabebijotö, Finees mikwo̧nö. Böjanö tjimibiya ba̧ji̧ wȩyukwi̧ma Levítjö tupadanö jojodötjö ju'wedö tjimibiya.

Josué 14:1

Ja̧danö, bakwachödö Moises iyinadanö, Josuebi Diostjö jojodötjö inesö tjö̧'da̧de pjabato̧ Eleazarbi niji 'da̧batö tjiyinobe, bakwasokwena jojodö tjitebo baibanö. Dios chiyocha jö̧a̧lina badekwachinö, Josuebi, Eleazarbi, israel jojodötjö bakwasokwena luwedöbi Canaan niji 'da̧batö tjiyinobe, baikwö:

Josué 17:4

Jobadöma Diostjö jojodötjö tjö̧'da̧de pjabato̧ Eleazar mikwo̧bi, Josuebi, ju'wedö luwedöbi tjöba a'o ichibö yötja̧linobe, —Isabenö Jo̧ma Moisesnö weinobe, ju'wedö dömöledö ömadönö niji wei̧danö, ökwödönöbi ditebo baibanö weobö, jo̧kwajabetjö̧ ökwödönö adeba, Dios wei̧danö badekwachinö ditebo baibanö weköbaduwobö, —jö̧ba̧lö. Jo̧kwajabetjö̧, ajayinö Isabenö Jo̧ weinadanö, tjömöledö ömadönö niji wetji̧danö, jobadö Zelofejad itji̧mu ya̧dönöbi tjitebo baibanö niji wetjinobe.

Josué 19:51

Jobekwö laebobe Dios chiyocha jö̧a̧lina badekwachinö niji 'da̧batö wetjina jawa, bakwasokwena jojodö tjitebo otiwanö tjujuna̧lobö. Diostjö jojodötjö tjö̧'da̧de pjabato̧ Eleazarbi, Josuebi, israel bakwasokwena jojodö tjuluwedöbi Silo comunidadtjö Isabenö Jo̧ öba a'otjö inawiya jabö tjedinobe, Isabenö Jo̧ wei̧ tjöwaisobö, ja̧danö wei̧danö 'da̧batö wetjinobe, okobe deinö tjitebo tjujuna̧lenanö kabatö.