Josué 12:7 - Dios Iwene

⁷ Ja̧danö, bakwachödö Jordan ojwetjö jawo̧ meajobekwö ju̧kwadö inesö la'aka luwedöbinadö Josuebi, ju'wedö israel jojodöbi tjujuluwina jawama baikwö laebobe. Jordantjö jawo̧ meajobekwö ju̧kwadönö tjölakwabikwawinobe, ja̧danö ölakwabikwawö tjujuluwinobe. Ikenama, juluwajo̧, Josuema jobe ajayinö ji̧nadö tjiteboinemi, 'da̧batö iyinobe, bakwasokwena jojodö tjitebokwena baibanö. Ja̧ tjujuluwinemi nijima baikwö laebobe: Lebano wabeko jȩmi comunidad Baal Gad comunidadtjö, a̧likwö ja̧'o Seir mösa'o badeibösa'o Jalac mikwa'obe ichibanö tjujuluwinobe.

Josué 12:7 Iomraidhean Croise

Génesis 14:6

Ja̧danö ju'wedönöbi, horeo jojodönö ölakwabikwawö juluwijadötö, mö'ösa'iju Seir mikwa'iju ju̧kwobetjö Parán niji tebo jwiena ö'öbö tjichibenanö.

Génesis 32:3

Ikenama Jacobma webijetö ömöayedönö yöbawö tji̧'yobö öpöe Esaú ö̧jobekwö, Seir mö'ösa'iju ju̧kwobekwö, Edom nijibe.

Génesis 36:20

Ja̧danö, Esaúma ajayinö, jemi Edom niji ö̧jobö ichibenena ida̧ökö ju'wedö, horeo jojodöma jobe ju̧kwijadötö, idöda tjiteboobetjö̧. Horeo jojodöma bakwo̧, Seir mikwo̧tjö tupadanö jojodö. Ja̧danö Seir i̧tji̧muma bidö: Lotán, Sobal, Zibeón, Aná,

Génesis 36:30

Disón, Ezer, Disánnö.

Génesis 36:8

Ja̧danö Esaú, ju'wi imi Edom mikwo̧ma, jelobekwö 'ya̧jo̧ Seir nijinö ji̧jetö, mö'ösa'iju la'aka ba̧ba̧lawena.

Deuteronomio 2:1

Moisesma tupakwö yöawinobe israel jojodönö: —Ja̧danö chömöledö, Cadestjö labebajadö, Isabenö Jo̧ weinadanö tjebachajö, jojodö deobe kwedachijatö, ja̧danö jwaibalawa Duwobu lo̧bekwö 'ya̧nö, lekwe möle Seir mösa'o niji söpödö kwedachijatö.

Deuteronomio 2:4

ja̧danö lakebaduwakwa̧ abönö, baikwö weköbo israel jojodönö: Isabenö Jo̧ma ökwödönö yöawobe, babema kwömöledöduwi Esau itji̧mu tupadanö jojodö tjitebo ö'wejenö kwöbaledaduwobö jo̧be. Ja̧danö, jejenö kwöbaledaduwiawö̧, jobadöma yetjabikobe ökwödönö, jo̧kwajabetjö̧ teada̧lönö kwö̧jaduwo,

Josué 11:17

a̧li̧kwö ja̧'o, Seir niji yöneawa'o Jalac mikwa'otjö, u'dakwö ja̧'o Hermon mikwa'ö badeibö wabeko, Libano wabeko jȩmi comunidad Baal Gadbe ichibanö, okobe jwiinö ja̧ ö'weje niji ujuluwinobe. Okobe jwiinö ja̧ niji la'aka luwedönö ujuluwinobe, ja̧danö okobe deinö jobadönö kwabawö loinobe.

Josué 11:23

Jobekwö laebobe Josue canaan niji ujuluwina wenema. Okobe jwiinö ja̧ niji israel niji baibanö ujuluwinobe, ajayinö Isabenö Jo̧ Moisesnö tjujuluwobö weinadanö badekwachinö. Ikenama, juluwajo̧, ölakwabikwawö kaatakwawajenama, Josuema israel jojodötjö bakwasokwena jojodönö tjitebokwena baibanö niji 'da̧batö iyinobe, bakwasokwena tjitebo baibanö. Jo̧kwajabetjö, bajaliyanö wene jwiinö tjitebo baibanö jobe tjö̧jinobe israel jojodöma.

Josué 3:17

Ja̧danö, Isabenö Jo̧ iteapjo e'ewadö tjö̧'da̧de pjabatadöma, ojwe ja'ö ichibö, tjöjamatinobe, ja̧danö jobe ojwe ja'ö ja̧nö tjiteada̧linobe, okobe deinö israel jojodö tjöbaledenanö kabatö. Ja̧danö, ojwe lo̧ jö̧a̧lemibenö, israel jojodöma kököachibajena nijibenö tjöbaledinobe.

Josué 9:1

Ja̧danö, Jordan ojwetjö jawo̧ meajobekwö ju̧kwadö mösa'iju jȩmi ju̧kwadöbi, Libano mösa'ijutjö a̧li̧kwö jwaibalawa ö'öbö ju̧kwadöbi israel jojodö tjujuluwina wene yetjaibanö tja̧ja̧kwinobe, Jericonö ju̧kwadönöbi, Hainö ju̧kwadönöbi tjujuluwina wenema. Ja̧danö, jejenö a̧ja̧kwö, la'aka tjuluwedöma omukwatö tjujuninobe, bakobe pjabatakwawö, israel jojodönö tjölakwabikwawobö. Jobadö jejenö bakobe pjabatakwawö tjölakwabikwawobö omukwatö ji̧nadöma bidö: Hitita jojodötjö la'aka luwedöbi, amorreo jojodötjö la'aka luwedöbi, cananeo jojodötjö la'aka luwedöbi, ferezeo jojodötjö la'aka luwedöbi, heveo jojodötjö la'aka luwedöbi, jebuseo jojodötjö la'aka luwedöbi. Jobadöma bakobe omukwatö, tjömöayedö ölakwabikwawa jojodönö tjo̧ko̧kodinobe, bakobe ja̧nö Josuekwöbi, ju'wedö israel jojodökwöbi tjölakwabikwawobö.