Josué 1:8 - Dios Iwene

⁸ Ba̧kwelöjatebö kwiyalu'ye weti̧ wȩyukwa'ye yöba̧lö kwö̧jo, ja̧danö mölebi, yö̧tebi laebi̧ jawa omukwatö kwö̧jo, okobe jwiinö laebi̧danö ja̧bö kwö̧jakobetjö̧. Jau Josue, jejenö ja̧bö kwö̧jitjö̧ma, kwö̧ji̧ma isabenö jwiinö otiwanö waekwökönö kwö̧jakwo̧ja.

Josué 1:8 Iomraidhean Croise

Génesis 24:63

Yi̧benakwö Isaacma kwebachö 'yi̧jetö niji ba̧ba̧lawobekwö. Kwebachö 'ya̧jo̧ ödö edemi ka̧mȩyu̧dönö ȩwa̧ja̧dönö edijetö.

Proverbios 3:1

Baikwö laebobe Salomón iteda itji̧nö möayo̧nö jwebebö yöawinama: Chitji̧ yötawakwö: Ötjö jwebebö yötawi̧ma kwo̧’wo̧ jwikiboko. Ja̧danö, weti̧ma kwomajadenö kwanawo, jwiinö mikwawobe jö̧ba̧lö.

Isaías 59:21

Ju'wibi yöawobe Isabenö Jo̧ma: Ja̧danö, ötjöma jobadö tjö̧jibinö pjatatajawö̧nö isabenö pjatatakwa̧ wene yöbawö chujunakwo̧sa, baikwö: Ökwödökwö jo̧ cho̧'wo luwo̧ma, la'akatjöda kwö̧jaduwelö laebökakwo̧. Ja̧danö ötjö yötawi̧, yöka̧laduwobö chiyaja̧ chiwenema, ba̧kwelöjatebö yöba̧lö kwö̧jaduwakwedöja, ja̧danö kwitji̧muduwibi ba̧kwelöjatebö yöba̧lö tjö̧jakwedö, ja̧danö tji̧tji̧mu tupadanö jojodöbi ba̧kwelöjatebö chiwene yöba̧lö tjö̧jakwedö. Bemi tupakwö, ba̧kwelöjatebö 'dö̧ibajökönö, jobekwö yöba̧lö kwö̧jaduwakwedöja, jö̧ba̧lö yöawobe Isabenö Jo̧ma.

Mateo 12:35

Jau, otiwo̧ma, omajadenö otiwa jawa omukwati̧tjö otiwa jawa yöba̧lo̧, ja̧danö sulabo̧ma omajadenö suli̧ jawa omukwati̧tjö suli̧ jawa yöba̧lo̧.

Mateo 28:20

Ja̧danö, jobadö 'yabayedö chöba̧ja̧di̧ waisachadönö ba̧ja̧daduwi, okobe jwiinö ökwödönö wetinama, jobadöbi ja̧bö tjö̧jakobetjö̧. Ja̧danö chömöledö, isabenö ökwödökwö chö̧jakwo̧sa, böjȩ 'dö̧ibenanö kabatö— jö̧ba̧lö weinobe Jesúsma.

Mateo 7:21

Tupakwö yöawinobe Jesúsma: —Chömöledö, ju'wedöma ötjönö Duluwo̧ jö̧ba̧lö ötjabijayonö, chömöayedöböködö, ja̧danö ötjönö Duluwo̧ jö̧ba̧lö ötjabijayonö, mölejȩbe jo̧ Dios la'aka luwo̧ ö̧jakwa̧ tetjachökakwedö. Jau chömöledö, sule mölejȩbe jo̧ Chabe'do ösödi̧danö ja̧badöda jobe tetjachakwedö.

Mateo 7:24

Tupakwö yöawinobe Jesúsma: —Jau chömöledö, yötawi̧ a̧ja̧kwö ja̧badöma isabenö waisanö omukwatadö. Baikwö wanedö yötawa: 'Diena, inawaena o̧do otido̧danö tjichejekwobe.

Lucas 11:28

Yöja̧liökwe, Jesúsma atadinobe: —Isabenö Dios otiwanö pjaatoko chojo'donöma, ötjönö jemobö iyinobetjö̧, jo̧kwaijayonö ja̧tjö bajalekwönönö isabenö nöinö pjabato̧ Diosma, Dios iwene a̧ja̧kwö laebachi̧danö ja̧bö ju̧kwadönöda chömöledö— jö̧ba̧lö.

Juan 13:17

Ina yöawinobe: —Ötjö, ökwödö kwuluwo̧duwima, kwömasapaduwibiya chidicha̧laja̧ma kwomukwataduwobö chidicha̧latö, Ökwödöbi jejenö pjakataduwobö jo̧be, jö̧ba̧lö. Babema kwöwaisaduwobe pjakataduwobö ji̧ma. Jo̧kwaobetjö̧ jejenö pjakataduwitjö̧ma kwo̧'wo̧duwi ösöwanö kwö̧jaduwena—yöawinobe Jesúsma—.

Juan 14:21

Ötjö weti̧ a̧ja̧kwadöma isabenö ötjönö ile nibebö ju̧kwadö. Ja̧danö, ötjö Chabe'doma ötjönö ile nibebö ju̧kwadönö ile nibebö jo̧. Ja̧danö ötjöbi, ötjönö ile nibebö ju̧kwadönö ile nibebö jo̧sa. Jobadönö chi̧sekwakwo̧sa ötjönö tjöwaisachibanö—yöawinobe Jesúsma.

Efesios 4:29

Ja̧danö, sulabema yöka̧laduwa chömöledö. Pjabatö yöa̧lakwawada yöka̧laduwo, bakwo̧ o̧'wo̧ tjo̧bekwö jo̧nö pjabatö. Jejenö yöka̧laduwi̧ a̧ja̧kwadönö pjakataduwakobe, tjo̧'wo̧ luwo̧ ösöwachibawö̧ jö̧tja̧lobö, Bidöma otiwanö pjabatö yöba̧ladö, jö̧ba̧lö.

Deuteronomio 29:8

ja̧danö juluwajadö, tjiteboinemi 'döbebö demijatö, ja̧danö emajadö, Rubensaso jojodönöbi, Gadsaso jojodönöbi, Manasessaso ja'ö jojodönöbi diyijatö, tjitebo niji baibanö, jö̧tö?

Deuteronomio 29:9

Jau chömöledö, isabenö yötawaja̧danö otiwanö pjaatinobe Diosma, jo̧kwajabetjö̧ teada̧lönö kwö̧jaduwo, babe Dios wei̧ yötawaja̧danö ja̧bö kwö̧jaduwakobetjö̧. Ja̧danö, isabenö yötawaduwakwö chömöledö, wei̧ a̧ja̧kwö kwö̧jaduwitjö̧ma, isabenö okobe jwiinö kwotidaduwi̧tenia otiwanö laebakobe chömöledö.

Deuteronomio 30:14

Jobekwö abebö kwa̧ja̧kwaduwobö jwiobe chömöledö, Dios wei̧ma ida̧ökö ökwödökwö yöne jo̧betjö̧ chömöledö, baikwö yötawa: Ida̧ökö jo̧ba wei̧ kwineneduwinö jo̧be, ida̧ökö Dios wei̧ yöka̧laduwobetjö̧, ja̧danö ida̧ökö kwomajadeduwinö kwöwaisaduwobe, otiwanö wei̧ a̧ja̧kwö kwö̧jaduwobö. Jo̧kwajabetjö̧ isabenö wayökö chömöledö, Dios wei̧ a̧ja̧kwö kwö̧jaduwobö.

Deuteronomio 31:24

Moisesma okobe jwiinö Dios weaja̧ jawa bi'yenö laebi̧ jawa i̧wȩyudinobe, okobe jwiinö wȩyudö kaatakwawenanö baibanö.

Deuteronomio 5:1

Ja̧danö, jobe Jordan ojwetjö jawo̧ ichobekwöchobe ja̧nö, Moisesma okobe deinö israel jojodönö o̧ko̧kodinobe, ja̧danö ko̧ko̧dajo̧, jobadönö yöawinobe: —Chömöledö israel jojodö, otiwanö kwa̧ja̧kwaduwo, Dios ökwödönö wei̧, ja̧bö kwö̧jaduwobö wei̧ma, babe ökwödönö chö̧ba̧jadonö. Ja̧ wei̧ma otiwanö kwöwaisachaduwo, ja̧danö waisachibajadö, jwaikwöda otiwanö wei̧danö a̧ja̧kwö kwö̧jaduwo.

Deuteronomio 5:29

Isabenö yöta̧lakwö, babe yebabinö tjo̧mukwati̧danö ba̧kwelöjatebö ötjönö yebabinö omukwatö, weti̧ ja̧bö tjö̧jobö tjomukwatitjö̧ma, isabenö jwiinö otiwo jö̧a̧lena, ba̧kwelöjatebö jejenö tjomukwatowe. Ba̧kwelöjatebö jejenö omukwatö tjö̧jitjö̧ma, jobadöbi tji̧tji̧mu tupadanö jojodöbi ba̧kwelöjateböda otiwanö tjö̧jo jö̧tja̧lena. Otiwanö omukwatö yötja̧lajabe Moises.

Deuteronomio 5:32

—Jobekwö baledinobe chömöledö, mösa'otjö Dios iwene ökwöi̧ kwa̧ja̧kwadwuwenama. Jo̧kwajabetjö̧ isabenö yöka̧linaduwadanö kwuluwo̧duwi weina ja̧bö kwö̧jaduwobö jo̧be chömöledö, teada̧lönö kwö̧jaduwo, jwaikwöda kwuluwo̧duwi Isabenö Jo̧ Dios weina ja̧bö kwöjaduwakobetjö. Wanedö yötawa chömöledö, kwuluwo̧duwi Isabenö Jo̧ Dios ökwödönö wei̧ma: Mana öninobe, jweinö önina mananöda kwekachaduwobö, jo̧kwajabetjö̧ jweinö ja̧ma mananöda kwekachaduwobö jo̧be, kwöwaisobekwöchobebi, wajwiköbobekwöchobebi jalachibökönö. Jweinö Dios önina mananö kwi̧'yaduwobö jo̧be, debö kwi̧'yaduwapji jö̧ba̧lö, ja̧danö lekwe möle wene jwiinö Dios iyakwa̧ kwiteboduwinö kwö̧jaduwakobetjö̧, —jö̧ba̧lö yöawinobe Moisesma, israel jojodönö.

Colosenses 3:16

Chömöledö, Cristo jawa wene kwomajadeduwinö omukwatö kwö̧jaduwo, jo̧kwajabetjö̧ waisanö yökawakwawaduwo, ja̧danö waisanö kwöba̧ja̧dakwawaduwo kwömöledöduwikwö. Ja̧danö otiwanö pjabato̧ja jö̧ba̧lö, Diosnö ösödö lo̧köbaduwo, Salmos jawa lo̧awabi, Jesús jawa lo̧awabi, Dios O̧'wo̧ Luwo̧tjö öba̧ja̧di̧ lo̧awabi.

Josué 1:7

Jejenö pjatatakwo̧sa Josue, jo̧kwajabetjö̧ baikwö wetakwö: Kwujuluwachibanö, yebabökönö ja̧nö, teada̧lönö ja̧bö kwö̧jo, weti̧ jawa chömöayo̧ Moisesmine i̧wȩyudina jawama. Ja'yubebi ö'öbönö 'yö̧könö, jwaikwöda weti̧danö ja̧bö kwö̧jo, ba̧kwelöjatebö okobe jwiinö kwö̧ji̧ma otiwanö waekwökönö kwö̧jobö.

Josué 8:34

Ikenama, jejenö ju̧kwadönö yöa̧linobe Josuema, okobe jwiinö Dios wei̧ wene wȩyukwa'ye laebi̧ma. Dios pjaatakwa̧ wenebi, lȩebakwa̧ wenebi, okobe jwiinö yöa̧linobe Josuema, ja'yubebi ji̧bökönö.

Apocalipsis 22:14

Ina jö̧a̧lijatö: —Ötjö chömöledö, tjökamisi dichadöma, suli̧ jwibadödanö babibö, otiwanö tjo̧'wo̧ ösöwanö tjö̧jakwedö. Jobadöma 'yayi̧ Jerusalén comunidad apjude po̧bebö tetjachakwedö, ba̧kwȩlö̧jatebö ja̧kwawa towi wa̧ji̧tjö tjukwobö.