Josué 1:5 - Dios Iwene

⁵ Isabenö kwujuluwachibanö pjatatakwo̧sa, baikwö yötawa: Ina 'yaba̧lo̧ kwö̧jayi, kwöpöjojodötjö bakwo̧bi ökwönö ujuluwobö jwiakobe, okobe deinö kwöba a'otjö dötjibajakwedö. Jau Josue, Moiseskwö ja̧nö pjatatinadanö, ökwökwöbi ja̧nö pjatatakwo̧sa, isabenö ba̧kwelöjatebö ökwökwö chö̧ja̧kwo̧sa, la'akatjöda ökwönö katatibökakwo̧sa.

Josué 1:5 Iomraidhean Croise

Génesis 39:2

Ja̧danö, Isabenö Jo̧ Diosma Josénö pjabatö ö̧jobetjö̧ Joséma uluwo̧ Potifar ejunö ja̧nö okobe jwiinö otidi̧ma otiwijetö.

1 Reyes 1:37

Jau chuluwo̧, Isabenö Jo̧ma isabenö ökwökwö ja̧nö, otiwanö pjabatö jo̧, jadanö ökwökwö janö pjaati̧danö, kwitji̧ Salomonkwö janö pjaatobö chösöda. Jau David, isabenö kwitji̧nö pjaatobö chösöda, ökwö kwujulutjö bajalekwönönö juluwo̧ baibenanö, kwitji̧ Salomonnö pjaatobö chösöda, —jö̧ba̧lö yöa̧linobe Benaiasma.

1 Reyes 11:38

Jejenö 'da̧batö chujunenama, baikwö wetakwö Jeroboan: Isabenö okobe jwiinö ökwönö weti̧ kwa̧ja̧kwobö ja̧kobe, -Baikwö ja̧bö kwö̧jo, -jö̧ba̧lö ökwönö weti̧ a̧ja̧kwö, chösödi̧danö ja̧bö kwö̧jo. Jau, chömöayo̧ David a̧ja̧kwö ö̧jinadanö, ökwöbi jwaikwöda ja̧bö kwö̧jobö weti̧bi, ju'wi weti̧bi kwa̧ja̧kwobö ja̧kobe, ja̧danö otiwanö a̧ja̧kwö kwö̧jitjö̧ma, isabenö ökwökwö ja̧nö otiwanö pjatatakwo̧sa. Jau Jeroboan, chömöayo̧ David otiwanö a̧ja̧kwö ö̧jitjö̧, itji̧mu tupadanö jojodöbi otiwanö luwedö 'diinö tjö̧jobö 'da̧batö chujunajabe, ja̧danö jo̧ba a̧ja̧kwinadanö ökwöbi a̧ja̧kwö kwö̧jitjö̧ma, bakwainö ökwönöbi pjatatakwo̧sa, kwitji̧mu ba̧kwelöjatebö israel luwedö 'diinö tjö̧jakobetjö̧.

1 Reyes 6:13

Jau Salomon, bejunö ja̧nö israel jojodö tjö̧'da̧de chö̧jakwo̧sa, jadanö la'akatjöda le'dedö lotökakwosa ötjöda chömöledö israel jojodönö, —jö̧ba̧lö yöa̧linobe.

1 Reyes 8:57

Duluwo̧ Isabenö Jo̧ Dios da'dödöminekwö ö̧ji̧nadanö, bakwainö ökwödökwöbi ö̧jobö chösöda, la'akatjöda ökwödönö le'dedö lobökönö, ba̧kwelöjatebö ökwödökwö ö̧jobö chösöda.

1 Crónicas 28:20

Ja̧danö wȩyukwa'ye Salomonnö iyajo̧, tupakwö yöawinobe Davidma: —Chitji̧, kwujuluwachibanö yebabökönö ja̧nö kwotido. Yebabökönö ja̧nö, dakwö ja̧takwajö jö̧ba̧lö omukwatökönö kwö̧jo, ötjö chösödökwe Dios, Isabenö Jo̧ Dios ökwökwö ö̧jobetjö̧. Kwö̧jelö 'da̧bachibökönö, ökwönö le'dedö loökakwo̧ chitji̧, isabenö ökwökwö pjabatö ö̧jakwo̧, okobe jwiinö iteda eju, Isabenö Jo̧ eju, kwotido jö̧ka̧lidanö otidö kakatakwawenanö baibanö.

Éxodo 3:12

Jejenö atadiökwe: — Moisés, ötjöma ökwökwö chö̧jakwo̧sa. Ötjö Diossa ökwönö webo̧, Israel jojodönö Egiptotjö lakebobö. Ja̧danö, ökwönö kwöwaisachibobö chi̧sebocha, Isabenö ötjönö webinama Diosda, jö̧ba̧lö. Baikwö kwöwaischibobö baledakobe: Moisés, ötjö chömöledönö Egiptotjö labebö öbibö kwi̧'yaja̧ ikena bi'onöda ichibö kwösödaduwakwedöja ötjönöma— yöba̧lijetö Diosma Moisésnöma.

Isaías 42:16

Ja̧danö, chömöledö tjöbajale tjewawadödanöbedönö pjatatocha. Jobadönö ötibakwo̧sa, mana edajitjökö mananö kwetjachobö. Ötjöda jobadönö jwetebakwo̧sa, ja̧danö tjöba a'otjö yȩa'woma, dewi̧ baibanö balewö lotakwo̧sa, otiwanö tjedakobetjö̧. Ja̧danö niji ya̧likwaobe inakoobema, ba̧ba̧ladö chotidocha, ba̧ba̧lawamanö otiwanö kwetjachakobetjö̧. Jobekwö isabenö chömöledönö pjatatakwo̧sa, ja̧danö jobadönö le'dedö lotökakwo̧sa.

Daniel 11:16

Ja̧danö ujuluwobö ichajo̧ Siria la'aka luwo̧ma ujuluwakobe, ja̧danö okobe jwiinö ösödi̧danö ja̧akobe, ja̧danö bakwo̧bi jo̧ba öba a'o 'diinö ö̧jobö jwiakobe. Ja̧danö, jo̧bama inesö otiwobe Israel niji okobe jwiinö ujuluwakobe, ja̧danö nöinö söbebö loakobe.

Mateo 28:20

Ja̧danö, jobadö 'yabayedö chöba̧ja̧di̧ waisachadönö ba̧ja̧daduwi, okobe jwiinö ökwödönö wetinama, jobadöbi ja̧bö tjö̧jakobetjö̧. Ja̧danö chömöledö, isabenö ökwödökwö chö̧jakwo̧sa, böjȩ 'dö̧ibenanö kabatö— jö̧ba̧lö weinobe Jesúsma.

Romanos 8:31

Chömöledö, biya̧ babeda yötawaja̧ omukwatö, ökwödönö suli̧ waedo̧ma bakwo̧bi deobe ichejekwa. Diosda ökwödönö pjabato̧obetjö̧, bakwo̧bi deobe ökwödönö suli̧ waedo̧ma chömöledö.

Romanos 8:37

Jau chömöledö, okobe jwiinö yötawaja̧ baleditjö̧böbi, woditjö̧böbi, ja̧ jawa okobe junibö, ida̧ökö abönö ichibinadösa ökwödöma chömöledö, Jesúsda ökwödönö pjaatinobetjö̧. Jo̧bama ökwödönö ile nibebö pjaatinobetjö̧, ida̧ökö abönö ichibinadösa chömöledö.

Deuteronomio 20:1

Tupakwö yöawinobe Moisesma, israel jojodönö: —Chömöledö, kwöpöjojodöduwinö ölakwabikwawö lakebaduwenama, tja̧jwi̧mu kabayudönöbi, kolukiyabi juna̧ladönö kwedaduwena, ja̧danö ökwödötjö bajalekwönönö ba̧jȩkwadö ölakwabikwawadönö kwedaduwena. Jejenö ökwödötjö bajalekwönönö juluwadönö kwedaduwijayonö, jobadönö yekabiduwoböma jwiakobe chömöledö, baikwö yötawa: Kwöwaisaduwa, kwuluwo̧duwi Isabenö Jo̧ Diosma, iteda ujulu i̧sȩbö Egipto nijitjö lakebaduwinö ichejebinobe, ja̧danö jo̧bada ökwödökwö ö̧jakwo̧ chömöledö. Ja̧danö jo̧ba inesö juluwo̧da ökwödökwö ja̧nö pjaatobetjö̧, kwöpöjojodöduwinö yekabiduwoböma jwiakobe chömöledö.

Deuteronomio 20:4

kwuluwo̧duwi Isabenö Jo̧ Diosda ökwödökwö 'ya̧nö kwöpöjojodöduwinö ölakwabikwawakobetjö̧. Jo̧ba Diosda ökwödönö pjaatakwo̧, kwöpöjojodöduwinö kwujuluwaduwobö, –jö̧ba̧lö tjö̧'da̧de pjabato̧ yöawobö ja̧kobe.

Deuteronomio 31:23

Jemi ikenama Diosma Josuenö 'da̧batö ujuninobe, israel jojodö la'aka tjuluwo̧ baibanö, ja̧danö jo̧banö 'da̧batö junö yöawinobe: —Josue, kwujuluwachibanö yebabökönö kwöjobö jo̧be, ökwöda yöbawö chujunina nijibe tjichibanö israel jojodönö ökibakobetjö̧. Jau Josue, damötjö̧ israel jojodönö chiyakwa̧ jawa yöbawö chujunijatö, –Isabenö chiyakwo̧sa, –jö̧ba̧lö, ja̧danö ja̧ yötawina badekwachinö jobadönö ökibakwo̧ja, ja̧danö ötjöma ökwökwö chö̧jakwo̧sa, —jö̧ba̧lö yöawinobe Diosma, Josuenö.

Deuteronomio 4:31

Ja̧danö chömöledö, jejenö tjebachajö Diosnö kwösödaduwiökwe, isabenö lȩlöinö edakobe ökwödönö, kwuluwo̧duwi Isabenö Jo̧ Diosma lȩlöjinö edo̧ Diosobetjö̧. Jo̧bama la'akatjöda kwa'dödönö yöbawö ujunina jawa o̧'wo jwiibökakwo̧, ba̧kwelöjatebö kwa'dödönö yöbawö ujunina jawa omukwatakobe chömöledö. Ja̧danö, yöbawö ujunina omukwatö, la'akatjöda ökwödönö le'dedibö loökakwo̧, ja̧danö la'akatjöda söbebö loökakwo̧ ökwödönö jwiinöma, ba̧kwelöjatebö ökwödötjö ji̧badö tjö̧jibobö pjaatakobe, —jö̧ba̧lö yöawinobe Moisesma, israel jojodönö.

Deuteronomio 7:24

Ja̧danö tjuluwedö inesö la'aka luwedönöbi kwujuluwaduwobö weakobe, jadanö jejenö kwujuluwaduwobö weenama, jobadö luwedönöbi tjömöledönöbi kwabawö loköbaduwo, tji̧tji̧mu tupadanö jojodötjö bakwo̧bi tjö̧jibökönö. Isabenö jobadö kwöpöjojodötjö bakwo̧bi kwöba a'oduwi ö̧joböma jwiakobe, okobe deinö jobadönö kwabawö loköbaduwenanö kabatö.

2 Timoteo 4:17

Ja̧danö, ju'wedö le'dedibö lotjijayonö, Duluwo̧ma le'dediböma loinokobe ötjönö, Duluwo̧ma ötjökwö ö̧jinobe, ja̧danö chujuluwachibanö pjaatinobe okobe jwiinö Dios yöawi̧ yötawobö. Jejenö pjaatobetjö̧, okobe deinö jobe ju̧kwadö judío jojodöböködöma Dios yöawi̧ tja̧ja̧kwinobe, ja̧danö ju'wibi, Duluwo̧ma chö̧jibinö pjaatinobe, lȩekwa luwedö ötjönö kwabö lotjapji jö̧ba̧lö.

Hebreos 13:5

Ja̧danö, ju'wibi yötawaduwakwö. Balada kwujuna̧laduwi̧dama omukwatö kwö̧jaduwoko chömöledö. Otiwanö omukwataduwi tjo̧wi̧ kwujuna̧laduwi̧ma, ju'wi jawabi, ju'wi jawabi, kabatökönö kwemaduwobö omukwatökönö. Chömöledö, ökwödöma jwiinö mikwawinö ji̧ juna̧ladöja, Diosma ökwödönö ile niebobetjö̧. Kwomukwataduwo Dios ökwödönö yöawina. Baikwö laebobe Dios iwenetjöma, iteda yöawina: Ökwödönö la'akatjöda le'dedibö chȩwa̧jökakwo̧sa. La'akatjöda ökwödönö katatibökakwo̧sa. Jejenö laebobe Dios iwenetjö, Diosma ba̧kwȩlö̧jatebö ökwödökwö jo̧, jö̧ba̧lö.

Josué 1:17

Jau Josue, inesö dösödi̧ma Kwuluwo̧ Isabenö Jo̧ Dios Moiseskwö ö̧jinadanö ökwökwö ja̧nö pjaatobö. Ja̧danö, jejenö ökwökwöbi ö̧jitjö̧ma, okobe jwiinö Moises weina a̧ja̧kwö dö̧jinadanö, bakwainö ökwö weköbi̧ a̧ja̧kwö dö̧jakwedösa.

Josué 1:9

Jau Josue, wetaja̧danö yemidanö wetakwö, Kwujuluwachibanö yebabökönö kwö̧jo. Kwöpöjojodö tjöba a'o ja̧nö, yebabinö tjö̧bawöma kwö̧joko, ötjö kwösödökwe Isabenö Jo̧ Diosma okobe jwiinö kwekachi̧tenia ökwökwö chö̧jobetjö̧, —jö̧ba̧lö yöa̧linobe Isabenö Jo̧ma, Josuenö.

Josué 10:8

Ja̧danö, Isabenö Jo̧ma Josuenö yöawinobe, —Josue, jobadö amorreo jojodö ölakwabikwawa jojodönö yekaboko. Jau Josue, isabenö jobadönö kwujuluwobö chiyajabe, jo̧kwajabetjö jobadötjö bakwo̧bi kwöba a'o ö̧joböma jwiakobe, isabenö okobe deinö jobadönö kwujuluwakobe, —jö̧ba̧lö.

Josué 21:44

Ja̧danö, damötjö tja'dödönö yöbawö ujuninadanö, Isabenö Jo̧ma jobadönö otiwanö pjaatinobe, tjöpöjojodökwö ölakwabikwawökönö, wene jwiinö tjö̧jobö. Jau, Isabenö Jo̧ Diosda jobadönö otiwanö pjaatinobetjö̧, tjöpöjojodötjö bakwo̧bi tjöba a'o ö̧jobö jwiinobe, isabenö okobe deinö tjöpöjojodönö tjujuluwobö Dios pjaatinobetjö̧.

Josué 3:7

Ja̧danö, Isabenö Jo̧ma Josuenö yöawinobe, —Babe mölȩ badekwachajabe, okobe deinö israel jojodö tjöba a'otjö ökwökwö chö̧ji̧ chi̧sȩbakwa̧ma. Ja̧u Josue, chi̧sȩbakwa̧ edö, öwaetjöda öwawinö tjöwaisachibakobe, Moiseskwö chö̧jinadanö isabenö ökwö Josuekwöbi jo̧sa̧ jö̧ba̧lö, ja̧danö isabenö tjuluwo̧ baibanö chujunaja̧ wene öwawakobe.

Josué 6:27

Ja̧danö, ja̧ möle baledi̧natjö̧, öwaetjöda öwawinobe, Isabenö Jo̧ma Josuekwö jo̧ jö̧ba̧lö. Ja̧danö niji ba̧kwemeachibanö jojodöma Josuenö tja̧ja̧kwinobe, Isabenö Josuema juluwo̧, jö̧ba̧lö.

Jueces 2:18

Sulabenö a̧ja̧kwökönö tjö̧jijayonö, Isabenö Jo̧ma ina lȩlöinö edinobe jobadönö. Tjöpöjojodö usula tjemawinö ja̧tjawö̧, nöinö usula emawö tjubudekwenama, Isabenö Jo̧ma lȩlöinö ediainobe israel jojodönö, ja̧danö pjaatakwo̧ la'aka luwo̧nö kabebö juniainobe, israel jojodönö pjabatö. Ja̧danö Isabenö Jo̧ pjaatakwo̧nö kabebö ujunenama, ba̧kwelöjatebö jo̧banö pjabatiainobe, tjöpöjojodötjö tjö̧jibanö otiwanö pjaatobö. Ja̧danö jo̧ba ujuninökwe ina 'yaba̧lo̧ ö̧jayi, Isabenö Jo̧ma ba̧kwelöjatebö jo̧banötjö̧ israel jojodönö pjabatiainobe, jobadönö lȩlöinö edobetjö̧.

Jueces 6:16

Atadökwe, Isabenö Jo̧ma Gedeonnö yöawinobe, —Ötjödasa ökwönö pjatatakwo̧ma, jo̧kwajabetjö̧ ökwönö pjatatobetjö̧, wayökakobe jobadönö kwujuluwobö. Jau, jojo bakwo̧nöda tjujuluwi̧danö, madianitas jojodö tjö̧ba̧jȩkwijayonö, wayökakobe jobadönö kwujuluwoböma, —jö̧ba̧lö.

1 Samuel 10:7

Jejenö yötawaja̧danö baledaja̧ ikenama, otiwanö ja̧köbo jö̧ka̧li̧danö ja̧bi, ja̧danö isabenö Diosma ökwönö pjaatakobe.