Isaías 48:3 - Dios Iwene

³ Ja̧danö, ökwödö weti̧ a̧ja̧kwöködönö, baikwö yötawaduwakwö: Damötjö ökwödönö yötawijatö, —Baikwö baledakobe, —jö̧ba̧lö. Ötjöda yöbawö chujunijatö, baledakwa̧ma, ja̧danö jemi ikena yöbawajo̧, ju'wibi juluwanö chotidijatö yötawaja̧danö badekwachakobetjö̧.

Isaías 48:3 Iomraidhean Croise

Isaías 29:5

Jemi ikenama, Isabenö Jo̧ Okobe Jwiinö Juluwo̧ Diosma kwöpöjojodöduwinö lȩebakwo̧, juluwanö ichibö söbebö loakwo̧ kwöpöjojodöduwinö. Jobekwö ichibö lȩebakwa̧, baikwö wanedö yötawa: Jelobetjö ichajadö kwöpöjojodöduwi tjö̧ba̧jȩkwijayonö, nijiso̧pja̧ ejeopja̧danö batjibakwedö, jadanö inesö ba̧jȩkwadö kwöpöjojodöduwi labidöma, trigo sula'wo jwa̧le'epjo e'ewibi̧danö tjichejekwakwedö. Jau, böba labinö ökwöinö, ja̧danö niji̧ tjö̧awinö, labinö ökwöinö ichakwo̧ Isabenö Jo̧ma. Ja̧danö jwa̧le'epjo labinö doibapjokwö ichibakwo̧, ja̧danö jwiinö ubola ökwölakwö ichibakwo̧, kwöpöjojodöduwinö söbebö loakobetjö̧.

Isaías 30:13

Jo̧kwaijayonö ja̧ sulabenö ja̧köbaduwi̧ma ökwödönö suli̧ waedakwawa jawa jakobe, jobekwö sulabenö jaköbaduwi̧tjö̧ isabenö lȩtebakobetjö̧. Baikwö wanedö yötawa: Comunidad tjöekwemi möemima, ja'ö 'dainö, meakwa̧ wajwitjonö a̧petukwöchobe juluwanö meobe,

Isaías 37:29

Jau, ötjönö dameakwö jwökeba̧li̧ma chöwaisa, ja̧danö ju'wedötjö bajalekwönö bo̧sa jö̧ba̧lö omukwatö yöka̧li̧ma, chölakiyunö cha̧ja̧kwajabe Senaquerib, jo̧kwajabetjö̧ baikwö ja̧takwo̧sa ökwönö: Ökwö kwi̧su̧nö, chitea o̧jwo̧'ye chakwatocha, ja̧danö kwaanö chitea kabayu aanö jweeba̧laka chanocha, ja̧danö ökwönö jalatö jwetebocha, kwichina mananö tjebachajö kwȩwa̧jakobetjö̧, –jö̧ba̧lö yöa̧lobe Diosma Senaqueribnö.

Isaías 37:7

Baikwö yöta̧lakwö baledakwa̧ma: Asiria la'aka luwo̧ omukwati̧ balewö lotocha, ja̧danö ju'wedö yötja̧li̧ a̧ja̧kwobö wetocha. Ja̧danö yötja̧li̧ a̧ja̧kwajo̧, iteda itebobe ȩwa̧ja̧kwo̧. Jemi ikenama, iteda itebo nijinö ö̧jonö, ju'wedö dȩdȩbö lotjökwe ö'wö baibobö wetakwo̧sa, –jö̧ba̧lö Isabenö Jo̧ yöawi̧ yökawaduwo kwuluwo̧duwi Ezequiasnö, —jö̧ba̧lö yöawinobe Isaiasma.

Isaías 41:22

Jau, kwösödaduwawö̧ o̧'wo jawanö kwichejebaduwo, tupakwö baledakwa̧ jawa yötjawakobetjö̧. Ja̧danö belö yötjawina, —Tupakwö baikwö baledakobe, —jö̧ba̧lö yötjawina jawabi labebö lobö yötjawo, yötjawaja̧ a̧ja̧kwö domukwatakobetjö̧, jweinö yötjawinojobö, jö̧ba̧lö. Ajayi jawabi, tupakwö baledakwa̧bi yötjawo, yadakwö baledakwa̧ jawa otiwanö döwaisakobetjö̧.

Isaías 41:27

Ötjödasa ja̧ baledakwa̧ yöbawinama, ötjöda Sion mösa'onö ju̧kwadönö yötawijatö, —Babeda tjichiba, —jö̧ba̧lö. Ja̧danö ötjöda Jerusalennö ju̧kwadönö yöbawo̧nö webo̧sa, otiwa jawa wene yöawobö.

Isaías 42:9

Ötjöma isabenö jweinö yöbawo̧sa, okobe jwiinö damötjö baledakwa̧ yötawinama, yötawinadanö badekwachajabe. Ja̧danö babema jemi tupakwö baledakwa̧bi yötawocha. Jau, baledakwa̧ abönö, jweinö yötawocha, ina baledapji, —Baikwö isabenö baledakobe, —jö̧ba̧lö jweinö yötawocha, jö̧ba̧lö laebobe Dios yöa̧li̧ma.

Isaías 43:9

Okobe deinö bö̧jȩnö ju̧kwadö, tjitebotenia jojodönö ko̧ko̧dö kwichejebaduwo, bakobe ko̧ko̧kwö yöda̧lakwawobö. Ko̧ko̧kwajadö, okobe deinö tjösödawö̧nö abebö kwa̧ja̧kwaduwo, jobadö tjösödawö̧tjö bakwo̧bi babe baledi̧ jawa baledakwa̧ abönö yötjawinojobö jö̧ba̧lö. Isabenö jweinö baledakwa̧ yötjawinatjö̧ma, yötjawina waisadö ichibö yötja̧lobö jo̧be, —Isabenö waisanö yöbawinadötö, —jö̧ba̧lö waisachibö yöda̧lakobetjö̧. Jo̧kwaijayonö okobe deinö tjösödawö̧tjö jobekwö waisanö yöbawinama deobe, jö̧tö?

Isaías 45:21

Jobekwö a̧ja̧kwö, jobadönö dösödi̧ma otiwa jö̧ba̧lö kwomukwataduwitjö̧ma, baikwö abebö cha̧jakwaduwakwö: Bakobe yöba̧lakwawö kwedaduwo, ökwödö kwösödaduwawö̧tjö dite babe baledakwa̧ yöawinojobö, jö̧ba̧lö. Ina baledapji, dite jweinö yöawinada, —Bejenö baledakobe, —jö̧ba̧lö? Kwösödaduwawö̧tjö bakwo̧bi yöawinokobe, jö̧tö? Ötjö Isabenö Jo̧ Diosda babe baledakwa̧ yöbawinama. Ötjödasa Diosbo̧ma, jelo̧ diosbo̧, ötjödajayo̧ma deobe yelösöda. Ötjöda bakwainö otiwanö ja̧bö jo̧sa, ötjöda tjö̧jibinö pjabato̧ma, jelo̧ma deobe.

Josué 21:45

Isabenö okobe jwiinö Isabenö Jo̧ israel jojodönö yöbawö ujunina jawama, yöawinadanö badekwachinö pjaatinobe. Yöbawö ujunina jawatjö bakwöta jawabi waekwinokobe, okobe jwiinö yöawinadanö badekwachinobe, ja'yubebi waekwökönö.