Isaías 4:1 - Dios Iwene

¹ Ja̧ möle, o̧bukwedöda tjö̧jakwedö, ömadöma, jo̧kwajabetjö̧ ya̧dö jelemutjö du̧ju̧taja bakwo̧nö do̧batö atjebakwedö: —Ökwödönö kwemobö adebakwö, kwilekwamu badibanö. Ökwödönö kwiteada̧lobö adebökö, ökwödöda du̧kwa kwakwawa dukwakwedösa, ja̧danö ökwödöda dökamisi 'dudawakwedösa. Dilekwe debadö dö̧jobetjö̧, taba lö̧jawö̧sa, jo̧kwajabetjö̧ adebakwö, ökwödönö kwemobö, kwimi yöba̧lö, –Ite ilekwamusa, –jö̧ba̧lö taba jwiinö yöda̧lakobetjö̧. Jobekwö taba dö̧ji̧ söbebö lobö, ökwödönö kwemobö adebakwö, —jö̧ba̧lö atjebakwedö, Juda jojodötjö ömadöma deakobetjö̧.

Isaías 4:1 Iomraidhean Croise

Génesis 30:23

Ja̧danö, jobujuma metu'wo ja̧ju jitji̧nö emijotö. Emajaju jö̧ba̧lijotö: —Diosma chötabakwi̧ma emö loajabe— jö̧ba̧lijotö.

2 Samuel 6:23

Ja̧danö, Saul itjiju Mical mikwujuma, ji̧tji̧mu debuju jö̧jinobe, ö'wö bajibenanö baibanö.

Isaías 10:20

Yadakwö, israel jojodötjö o̧bukwedöda tjö̧jibakwedö, Jacob itji̧mu tupadanö jojodötjö sule o̧bukwedöda ina 'ya̧baladö tjö̧jakwedö. Ajayinö jobadöma jobadönö ujuluwina Asiria la'aka luwo̧nö tjo̧'wo tjöwana̧linobe, —Asiria luwo̧ ömöayedösa, —jö̧ba̧lö. Jo̧kwaijayonö ja̧ möle jo̧banö o̧'wo wa̧nalökönö, Israel jojodö tjösödökwe Inesö Sulabe Jwibo̧ Isabenö Jo̧ Diosnöda ösödö, isabenö Diosnöda tjo̧'wo wana̧lö tjö̧jakwedö.

Isaías 13:12

—–Ja̧ möle jwiinö lȩtebobetjö̧, bö̧jȩ jojodötjö o̧bukwedöda tjö̧jibakwedö, wanedö yötawa: bakwai̧ oro ja'yubeda ji̧tjö, inesö otiwi̧ Ofir niji oro ja'yubeda ji̧tjö baikwönönö o̧bukwedöda batjibanö lȩtebakwosa bö̧jȩ jojodönö.

Isaías 17:7

Tupakwö yötawa, Dios israel jojodönö yöawi̧ma: —Ja̧danö, ja möle bajaliyanö israel jojodöma yemidanö jobadönö otidina Diosnö tjomukwatakwedö, israel jojodö tjösödökwe Suli̧ Jwibo̧nö edö tjomukwatakwedö.

Isaías 2:11

Ja̧ möle Isabenö Jo̧ Diosnöda otiwanö tjomukwatakwedö, —Isabenö Jo̧ Diosda inesö la'aka luwo̧ juluwo̧ma, —jö̧ba̧lö. Babe möle bö̧je jojodöma ju'wedönö edö omukwatadö, —Idöma mikwawöködö, —jö̧ba̧lö, ja̧danö, —Ju'wedötjö bajalekwönö mikwawo̧sa, —jö̧ba̧lö omukwatadö babema. Jo̧kwaijayonö, löji möle okobe deinö jobekwö omukwatadöma tabakwö tjö̧jakwedö, sule Isabenö Jo̧ Diosnöda otiwanö tjomukwatakwedö, —Diosda mikwawo̧ma, —jö̧ba̧lö.

Isaías 2:17

Jobekwö omukwatadö bö̧je jojodöma, jo̧kwaijayonö Dios omudawö ujunina möle badekwachenama, okobe jwiinö ja̧jaye tjomukwati̧ma söbebö loakwo̧ Isabenö Jo̧ma. —Ju'wedötjö bajalekwönönö otiwo̧sa, bajalekwönönö juluwo̧sa, —jö̧ba̧lö tjomukwati̧ma söbebö loakwo̧ Diosma. Ja̧danö ja̧ möle sule Isabenö Jo̧ Diosnöda omukwatö tjösödakwedö, —Isabenö Jo̧ Diosda okobe deinö ju'wedötjö bajalekwönönö bo̧ma, —jö̧balö.

Isaías 3:6

Ja̧ möle, isabenö usula emawö, jwibö tjö̧jakwedö Juda jojodöma, baikwö yötawa: Bakwaso jojodö idöda tjömöledöso̧nö yötja̧lakwedö, —Ökwöda kwökamijido̧ wamesa̧do̧ juna̧lo̧ja, jo̧kwajabetjö̧ ökwöda duluwo̧ kwö̧jobö jo̧be, ökwöda bemi söbebö lotjinemi comunidad webö kwö̧jobö jo̧be, —jö̧ba̧lö yötja̧lakwedö.

Isaías 54:4

Tupakwö Jerusalen comunidad jawa wanedö yöawinobe Diosma, jojosujunö yöa̧li̧danö: Yebabökönui Jerusalen, bemi tupakwö tabakwö kwöjökakwujuja. Kwo̧'wo tjo̧kekwobö jwiobe, isabenö ökwönö tabakwö kwö̧jobö wetjökakobetjö̧. Jau, ina möayuju kwö̧jayi, tabakwö kwö̧jinajayonö, ja̧ tabakwö kwö̧jina kwo̧'wo jwikibakwujuja. Ja̧danö, —Bisuma jilekwe wobekwinuju mikwawökuju, —jö̧ba̧lö yötja̧lioko taba lö̧jinajayonö, bemi tupakwö ja̧ sulabenö tjomukwatioko taba lö̧jinö kwö̧jinama la'akatjöda kwomukwatibökakwujuja.

Lucas 1:25

Ja̧danö, metu'wo jö̧jobetjö̧, Elisabetma jo̧'wo̧ ösöwanö yöja̧linobe: —Ajayinöma chi̧tji̧mu debuju chö̧jobetjö̧, jojodö tjöba a'otjö tabakwö chö̧jijatö. Jo̧kwaijayonö Diosma isabenö otiwanö pjaatajabe ötjönö. Babema taba jwiinö chö̧jakwujusa, Diosma chitji̧nö chemobö otiwanö iyajabetjö̧— jö̧ba̧lö yöja̧linobe Elisabetma.

Lucas 21:22

Jau chömöledö, ja̧ mölema, sulabenö ja̧tjiökwe Dios Jerusalénnö ju̧kwadönö lȩebakwa̧ma badekwachakobe, ja̧danö ja̧ möle okobe jwiinö Dios yöawi̧ wȩyudinadö tjiwȩyudinadanö baledakobe.

2 Tesalonicenses 3:12

Jejenö ja̧bö ju̧kwadönö Duluwo̧ Jesucristo iminö baikwö ba̧ja̧dö wedobe ökwödönö chömöledö: 'Wi̧inö ja̧nö, idöda tjotidawa otidö tjö̧jo jö̧ba̧lö, böjȩnö ja̧nö tjukwakwa̧ kwakwawama idöda otidö tjemobö.

1 Samuel 1:6

Ja̧danö, jejenö baledioko, Ana jöpöjojosuju Peninama sulabenö jo̧'wo sulinö ojinobe Ananö, chi̧tji̧munö 'yatebobö weijayonö, ökwö 'yakebobö webö̧kö̧ Isabenö Jo̧ma jö̧ba̧lö.