Isaías 26:3 - Dios Iwene

³ Ökwönö omukwatö jo̧nö, otiwanö teada̧lo̧ja duluwo Dios. Ökwönö o̧'wo wa̧na̧lö ösödö ö̧jobetjö̧, bakwainö wene jwiinö ö̧jobö pjabato̧ja.

Isaías 26:3 Iomraidhean Croise

1 Crónicas 5:20

ja̧danö jobadökwö tjölakwabikwawenama, Diosnö atjebinobe, —Duluwo̧ Dios, juluwanö pjakatobö adebakwö, —jö̧ba̧lö. Jobekwö tjo̧'wo wana̧lö atjebiökwe, atjebi̧ a̧ja̧kwinobe Diosma, ja̧danö otiwanö pjaatinobe. Jo̧kwajabetjö̧, jobekwö pjaatiawö̧, jwiinö tjujuluwinobe agarenos jojodönöbi, agarenos jojodönö pjabatadönöbi.

Isaías 12:2

—Jau, edaduwi, Diosda ökwödönö dö̧jibinö pjabato̧ma, jo̧kwajabetjö̧ jo̧banö do̧'wo wa̧nalö ja̧nö, yebabökönö dö̧jakwedösa. Jau, Isabenö Jo̧ Diosda dujuluwachibanö pjabato̧ma, jo̧bada dö̧jibinö pjabato̧ma, ja̧danö döpöjojodötjö dö̧jibobö pjaatinobetjö̧, jo̧banö ösödö lo̧badösa, —jö̧balö yöka̧laduakwedöja.

Isaías 26:12

Duluwo̧ Isabenö Jo̧, isabenö ökwöda wene jwiinö dö̧jobö pjakatakwo̧ja. Jau duluwo̧, okobe jwiinö belö otiwanö dotidina jawama, ökwöda kwotidinobetjö̧ dotidobö ji̧nobe duluwo, jo̧kwajabetjö̧ döwaisa, wene jwiinö dö̧jakwa̧ma, ökwöda weköbobetjö̧ otiwanö dö̧jakwedösa, jö̧ba̧lö.

Isaías 27:5

—Ju'wibi chösödena, sȩakadanö ichejekwadöbi, ju'wi sula'wodanö ichejekwadöbi, chöbatjo öpöjojodö tjö̧ji̧ kabatibö, chömöayedö batjibanö tjichobö chösödena. Ölakwabikwawa kabatibö, ötjökwö wene jwiinö tjöjakwa̧ yöbawö tjujunobö chösödena, —jö̧ba̧lö wanedö yöa̧lobe Diosma.

Isaías 31:1

Ayö, isabenö usula tjemawakwedö, Egipto niji jojodö pjatjatakwa̧ tjo̧'wo wana̧ladöma. Jobadöma Egipto nijibe 'ya̧dö, —Isabenö otiwanö pjatjatakwedö Egipto jojodöma, —jö̧ba̧lö. Ja̧danö ju'wibi kabayudönö tjo̧'wo wana̧lö tjö̧jobe, —Egipto jojodöma nöinö ölakwabikwawa jawa kolukiya tjujuna̧lobetjö̧, ja̧danö jobadötjö kabayudönö wa̧nö ölakwabikwawadöma juluwadötjobetjö̧, dö̧jibinö pjatjatakwedö, —jö̧ba̧lö tjomukwatobe. Isabenö tjo̧'wo tjöwana̧lo jö̧tja̧lökwema, Israel jojodö tjösödökwe Sulabe Jwibo̧ Diosda. Abebö tja̧ja̧kwo jö̧tja̧lökwema, Isabenö Jo̧ Diosda, jo̧kwaijayonö jo̧banö omukwatökönö, wajwibö Egipto jojodönöda tjo̧'wo wana̧ladö, sulabenö.

Isaías 32:17

Ja̧danö otiwanö Dios wei̧ a̧ja̧kwö tjö̧jiökwe, wene jwiinö ölakwabikwawökönö tjö̧jobö pjaatakobe. Okobe jwiinö ditebo ba̧kwemwachibanö, lekwe möle wene jwiinö tjö̧jakwedö, ja möle ju̧kwadö Dios wei̧ a̧ja̧kwö tjö̧jobetjö̧.

Isaías 32:18

Jau, ja̧ möle chömöledö Juda jojodöma otiwanö ölakwabikwawa jwiinö otiwanö tjö̧jakwedö, wene jwiinö tjeju 'diejunö tjö̧jakwedö, otiwanö wi̧inö ö'wachö tjö̧jakwedö.

Isaías 42:19

Ökwödöma ötjöda chömöayedöja, jo̧kwaijayonö kwöbajaleduwi tjewawadöja. Ja̧danö yötawi̧ yöbawadö bakibaduwanö wetawö̧ja, jo̧kwaijayonö a̧ja̧kwöködöja. Jau, isabenö sulabenö edöködöja, ökwödö edökönö kwö̧jaduwi̧danö ju̧kwadöma didöda? Deobe, ökwödö Isabenö Jo̧ ömöayedöda ju'wedötjö bajalekwönönö edökönö ja̧döja.

Isaías 42:6

Ötjöma Isabenö Jo̧ Diossa, ötjödasa ökwönö jwöbinama, weti̧ a̧ja̧kwö kwö̧jakobetjö̧. Ötjöda kwömamu do̧ba̧lö, ökwönö chiteada̧lakwo̧sa. Ja̧danö ökwönö i̧sȩbö chiyakwo̧sa jojodönö, ökwönötjö̧ jojodökwöbi, ötjökwöbi bakobe ja̧nö dö̧jakwa̧ wene yöbawö dujunakobetjö̧, ja̧danö tjitebotenia jojodönö öbibö dejato̧ kwö̧jakobetjö̧.

Isaías 49:8

Baikwö yöa̧lobe Isabenö Jo̧ma, iteda ömöayo̧nö: Lȩlöjinö edö pjatatakwa̧ möle badekwachenama, akebi̧ a̧jakwö pjatatajabe, tjö̧jibinö pjatatakwa̧ möle badekwachenama, ökwönö pjatatajabe. Ja̧danö, ökwönö tjöbeba̧lö pjatatakwo̧sa, ja̧danö ökwönö chujunocha, tjitebokwena jojodötjö, ötjötjö ö'weje pjabato̧ bakibanö. Ja̧danö ju'wibi ökwönö chujunocha, israel niji yemidanö otiwachibanö kwotidakobetjö̧, ja̧danö tjitebo niji, jojodö deinelö nijima, 'da̧batö junö, ja̧ niji tjö̧jakwedönö kwiyabobö chujunajabe.

Isaías 50:1

Baikwö wanedö yöawobe Diosma, israel jojodönö: Chitji̧mu, kwojo'donö, tajawedö jelobekwö öbibö tje'ewinada? Jobujunö kabatibö, chilekwonö katatibobö wȩyukwöja chi̧wȩyudajabetjö̧, jobujunö öbibö tje'ewinaji̧? Ja̧danö ökwödö chi̧tji̧mubedö, ju'wedö tjömöayedö bakibaduwanö kwö̧jaduwi̧ma, ju'wedönö chumusidobetjö̧, ju'wedö tjömöayedö bakibaduwanö iyö lotinaji̧? Ja̧maökö chitji̧mu, ökwödö sulabenö ja̧bö kwö̧jaduwobetjö̧, iyö lotinawö̧ja. Kwojo'doduwibi ja̧danö, sulabenö ja̧bö jö̧jinobetjö̧, jelobekwö öbibö tje'ewinoko.

Isaías 50:10

Baikwö yöta̧laduwakwö chömöledö: Ökwödötjö didöda Isabenö Jo̧ Diosnö yebabinö ösödö kwö̧jaduwobeda? Ökwödö Diosnö ösödadösa jö̧ba̧ladöma, Dios ömöayo̧ yöawi̧ a̧ja̧kwö kwö̧jaduwo chömöledö. Ja̧danö ökwödötjö yȩa'wo okwa, dewi̧ ja'yubebi dewokobe kwebachadöma, Isabenö Jo̧nö kwo̧'woduwi wana̧lö kwö̧jaduwo, kwuluwo̧duwi Diosnö ösödö kwö̧jaduwo, —Diosda pjaatakwo̧, —jö̧ba̧lö.

Isaías 66:12

Baikwö yöawobe Diosma: Baikwö wanedö yötawaduwakwö: Isabenö otiwanö pjatatocha Jerusalennö, ojwe kabatökönö isuwi̧danö, otiwanö jö̧jobö pjatatocha, ja̧danö tjitebotenia jojodö tjitea nöinö mikwawi̧ma, ojwe okwatibi̧danö jobujunö welachobö wetocha. Ja̧danö ökwödö jitji̧muma, otiwanö kwö̧jaduwakwedöja. Kwojo'doduwi Jerusalenma otiwanö jo̧do'bi̧ ojwö jiteada̧lakwawö̧ja, ja̧danö jö̧dö̧lö'anö apjö̧alö je'ewakwawöja, ja̧danö ji̧sȩ'bonö wananö döjeabikwawö̧ kwö̧jaduwakedöja.

Daniel 3:17

Yöka̧lajadanö ökwödönö ökwölanö ikwö loköbitjö̧ma, Duluwo̧ma, wei̧ a̧ja̧kwö dösödökwe Diosma isabenö juluwo̧, okwöla jwiinö tubinö ubolatjö dö̧jibanö pjaatobö. Ja̧danö duluwo̧ Nabucodonosor, dedemi Diosma isabenö kwujulutjö dö̧jibinö pjaatakwo̧.

Daniel 3:28

Jejenö balediökwe, Nabucodonosorma yöa̧linobe: —Isabenö okobe deinö tjösödobö jo̧be, Sadracbi Mesacbi Abednegobi tjösödökwe Diosnöma. Bidöma tjuluwo̧ Diosnö ösödö, weti̧ tjöpöjödinobe, debö di̧'yitjö̧böbi sule Duluwo̧ Diosnöda dösödakwedösa, jelo̧nö la'akatjöda dösödökakwedösa jö̧ba̧lö. Ja̧danö jejenö tjo̧'wo̧ tjöwana̧liökwe, Diosma iteda ömöayo̧ ángelnö weajabe, ökwölatjö tjö̧jibinö pjabatö, jo̧kwajabetjö̧ okobe deinö jo̧banö tjösödobö jo̧be.

Daniel 6:23

Daniel ina yaba̧lo̧ ö̧jiökwe, Daríoma jwiinö o̧'wo̧ ösöwachibanö ö̧jinobe, ja̧danö weinobe Danielnö i̧lȩdo̧tjö tötjebobö. Ja̧danö i̧lȩdo̧tjö Danielnö latjebenama, ja'yubebi didibadö suli̧ tjöwaedajökökwenö tjedinobe. Diosnö o̧'wo̧ wana̧lö ösödiökwe, Diosma tjöbeba̧lö ite'ada̧linobe Danielnö, didibadö ja'yubebi Danielnö suli̧ tjöwaedapji jö̧ba̧lö.

Juan 14:27

Chi̧'yajabe okobema kwo̧'wo̧duwi ösöwanö kwö̧jaduwobö pjatatakwo̧sa. Jejenö pjatati̧ma kwo̧'wo̧duwi ösöwanö kwö̧jaduwobö pjatati̧, böjȩ jawamaökö. Tjo̧'wo̧ luwo̧ okwa jawa, ba̧kwȩlö̧jatebö ji̧ jawama. Chöba̧ja̧di̧ waisachadö, kwo̧'wo̧duwi tjo̧kekwaduwa, ja̧danö yekabiduwa.

Juan 16:33

Ja̧danö, babe yötawaja̧ma kwo̧'wo̧ luwo̧duwi tjo̧bekwökönö kwö̧jaduwobö yötawajabe. Chömöledö, böjȩnö ja̧nö usula kwemawaduwakobe. Jo̧kwaijayonö, kwo̧'wo̧duwi̧ ösöwanö kwö̧jaduwo, ötjöma böjȩnö jawa okobe jwiinö chujuluwobetjö̧— yöawinobe Jesúsma öba̧ja̧di̧ waisachadönöma.

Romanos 5:1

Ja̧danö, ökwödö Jesúsda dö̧jibinö pjabato̧, jö̧ba̧lö dösödiökwe, Diosma jö̧a̧linobe, Chedemi bidöma suli̧ jwibadö, jö̧ba̧lö. Jejenö jö̧a̧linobetjö̧, wene jwibadö otiwanö dö̧jobe Dioskwö. Ja̧ wene jwibadö dö̧ji̧ma, Duluwo̧ Jesucristoda ja̧ina.

Filipenses 4:7

Jejenö akebaduwitjö̧ma, Diosma kwo̧'wo̧ luwo̧duwi ösöwachibanö pjaatakwo̧ chömöledö. Wanedö yötawa: Cristo Jesúskwö dötewanö kwö̧jaduwobetjö̧, Diosma kwomajadeduwibi, kwomukwataduwi̧bi tjöbeba̧lö ite'ada̧lakobe kwo̧'wo̧ tjo̧kekwaduwapji jö̧ba̧lö. Jejenö Dios iyi̧jaye tjo̧'wo̧ luwo̧ ösöwachibi̧ma jojodö wajwitjobe, dakwö jejenö tjo̧'wo̧ luwo̧ ösöwawö̧jö jö̧ba̧lö, Diostjöda ichobetjö̧.